སྒྲོལ་དཀར་མདུན་བུམ་སྟབས་གཅིག
སྒྲོལ་དཀར་མདུན་བུམ་སྟབས་གཅིག་ཡོད།
ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོཉཧཾ། སྟོང་པའི་ངང་ལས་འབྱུང་བ་རིམ་བརྩེགས་སྟེང་། །གླིང་བཞི་གླིང་ཕྲན་གྱིས་བསྐོར་རི་རབ་སྟེང་། །མཆོད་པའི་སྤྲིན་ཕུང་རིན་ཆེན་ཁང་བཟང་དབུས། །རིན་ཆེན་ཁྲི་ཡི་སྟེང་དང་བུམ་བཟང་ནང་། །བདུད་རྩིའི་རྒྱ་མཚོར་པདྨ་ཟླ་བའི་སྟེང་། །ཏཾ་ཡིག་དཀར་པོའི་འོད་ཀྱིས་འཕགས་པ་མཆོད། །སེམས་ཅན་དོན་བྱས་ཚུར་འདུས་ཡོངས་གྱུར་ལས། །བཅོམ་ལྡན་སྒྲོལ་མ་རབ་དཀར་འཛུམ་ཞལ་གཅིག །ཕྱག་གཉིས་གཡས་པ་མཆོག་སྦྱིན་གཡོན་པ་ན། །མཐེབ་སྲིན་སྦྱར་བས་ཨུཏྤལ་ཡུ་བ་འཛིན། །བྱེ་དང་མ་བྱེ་མེ་ཏོག་
ལྷགས་པ་ཡི། །རྩེ་མོ་གསུམ་གྱིས་དུས་གསུམ་སངས་རྒྱས་མཚོན། །སྒེག་ཅིང་ཡིད་འོང་ཡེ་ཤེས་སྤྱན་བདུན་ལྡན། །རིན་ཆེན་རྒྱན་སྤྲས་དར་དཔྱངས་སྨད་གཡོགས་གསོལ། །དབུ་སྐྲ་ནག་ལ་སྣུམ་པ་བཅིངས་ཤིང་གྲོལ། །རྡོ་རྗེའི་གདན་གྱི་བཞུགས་པའི་པད་འདབ་ལ། །སྒྲོལ་མ་ཉེར་གཅིག་བསྐོར་བའི་གནས་གསུམ་དུ། །འབྲུ་གསུམ་མཚན་དང་ཐུགས་ཀའི་ཧཱུྃ་ཡིག་ལས། །འོད་འཕྲོས་ཡེ་ཤེས་པ་དང་དབང་ལྷ་རྣམས། །ནམ་མཁར་སྤྱན་དྲངས་བཛྲ་ས་མཱ་ཛ། ཨོཾ། ཐུགས་རྗེའི་རྨད་བྱུང་བཅོམ་ལྡན་འདས། །འཇིག་རྟེན་དབང་པོའི་སྲས་མོ་
མཆོག །མ་ལུས་རྒྱལ་བ་ཀུན་གྱི་ཡུམ། །དོན་གཉིས་མཐའ་དག་གྲུབ་མཛད་མ། །ཐུགས་རྗེ་ཆེ་མངའ་འདིར་གཤེགས་གསོལ། །པོ་ཊ་ལ་ཡི་གནས་མཆོག་ནས། །ཏཱཾ་ཡིག་དཀར་པོ་ལས་འཁྲུངས་ཤིང་། །ཏཱཾ་ཡིག་འོད་ཀྱིས་འགྲོ་བ་འདྲེན། །སྒྲོལ་མ་འཁོར་བཅས་གཤེགས་སུ་གསོལ། །འཕགས་མ་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །སྟོང་གསུམ་ཀུན་དང་མཉམ་པ་ཡི། །པདྨ་འདབ་བརྒྱད་ཟླ་བར་བཅས། །བདེ་ཞིང་ཡངས་པར་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །ཨཱརྱ་ཏཱ་རེ་བཛྲ་ས་མ་ཡ་ཛཿ པདྨ་ཀཱ་མ་ལྟ་སྟེ། ཨ་བྷི་ཥིཉྩནྟཾ། ཛཿཧཱུྃ་བཾ་ཧོ༔དམ་ཡེ་དབྱེར་མེད་འདྲེས། །དབང་ལྷས་དབང་བསྐུར་རིགས་བདག་གིས་མཚན་པའི། །ཐུགས་ཀར་འཁོར་ལོ་རྩིབས་བརྒྱད་ལྟེ་བར་ཧཱུྃ། །གཡས་གཡོན་ཨོཾ་ཧྭ་བར་དུ་མིང་སྤེལ་ཚིག །རྩིབས་བརྒྱུད་འབྲུ་བརྒྱད་ཕྱི་ནང་མུ་ཁྱུད་ལ། །དབྱངས་གསལ་རྟེན་འབྲེལ་རྡོ་ར་མེ་རི་དཀར། །འོད་ཟེར་འཕྲོ་འདུ་འཆི་མེད་ཚེ་ལ་སོགས། །ཡོན་ཏན་ཡེ་ཤེས་ཐམས་ཅད་འཕེལ་བར་
གྱུར། །ཨོཾ་ལས་རིན་ཆེན་སྣོད་དུ་མཆོད་པའི་སྤྲིན། །དཀར་གསུམ་གཏོར་མ་བདུད་རྩིའི་རྒྱ་མཚོར་གྱུར། །ཨོཾ་བཛྲ་སྥ་ར་ཎ་ཁཾ། ལྷ་ཡི་མེ་ཏོག་དམ་པ་འདི། །གཙང་ཞིང་དག་པའི་སྐྱེ་གནས་ཏེ། །ནགས་ཀྱི་རོ་སོགས་ཡིད་འོང་བའི། །དྲི་ལ་སོགས་པའི་བདུག་སྤོས་མཆོད། །བསྲུང་བའི་ཚོགས་དང་དག་པ་ཡིས། །ཡིད་ཀྱིས་མུན་འཇོམས་དགེ་བ་སྟེ། །ལྷ་ཡི་དྲི་མཆོག་དམ་པ་འདི། །གཙང་ཞིང་དག་པའི་སྐྱེ་གནས་ཏེ། །ལྷ་ཡི་རོ་མཆོག་ཕུན་ཚོགས་པའི། །བཤོས་གཙང་ཡིད་དུ་འོང་བ་དང་། །དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་སེལ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །དཔག་བསམ་གྱིས་ནི་ཤིང་དག་དང་། །ལྗོན་པའི་ཤིང་ནི་ཤིང་བཟང་པོ། །དྲི་ཞིམ་ལོ་འདབ་བཅས་པའི་ཤིང་། །ཕྱོགས་བཅུ་ཀུན་ནས་གཏིབས་གྱུར་ཅིག །སྤོས་ཀྱི་དྲི་ངད་ལྡང་བའི་ཆར། །འབྲུ་དང་མེ་ཏོག་ལ་སོགས་ཆར། །ཡིད་དུ་འོང་བའི་དྲི་ཞིམ་ཆེར། །ངེས་པར་ཀུན་དུ་འབབ་པར་ཤོག །འབབ་ཆུ་ལྡེང་ཀ་ལུ་མ་དང་། །མཚོ་དང་རྫིང་བུ་དག་དང་ནི། །རོ་བརྒྱ་
དག་དང་ལྡན་པའི་མཚོ། །ངང་པ་ལ་སོགས་བཅས་པ་དང་། །རིན་ཆེན་ཁང་བཟང་ཡིད་འོང་པའི། །དྲ་བ་དྲ་བ་ཕྱེད་པ་དང་། །ཤར་ནུབ་འོད་ཅན་ཉི་ཟླ་དང་། །ཁང་པ་ཤིན་ཏུ་ཡིད་འོང་རྣམས། །རྒྱལ་བའི་ཡུམ་ལ་མཆོད་པར་འབུལ། །ཞིང་འདིར་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་སྟེ། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེ་ཤེས་རབ་ཅན་གྱིས་འབུལ། །ཞིང་ཁམས་རྣམ་དག་རྡོ་རྗེའི་ས་གཞི་ལ། །གླིང་བཞི་རི་རབ་ལ་སོགས་མཆོད་པའི་སྤྲིན། །རབ་འབྱམས་བསམ་ཡས་རྡོ་རྗེའི་རྒྱན་ཕྲེང་འབར། །རྡོ་རྗེ་སྒྲོལ་མ་རྒྱལ་བ་ཀུན་ཡུམ་ལ། །མཆོག་ཏུ་དད་པས་ཀུན་ཏུ་བདེག་འབུལ་ལོ། །བདག་དང་འགྲོ་ལ་རྟག་ཏུ་བདེ་ལེགས་ཀྱི། །གཞལ་ཡས་འབྱོར་པ་ཟག་མེད་བསྩལ་དུ་གསོལ། །རིན་ཆེན་གདུགས་དང་གསེར་ཉ་པདྨ་དུང་། །བུམ་པ་རྒྱལ་མཚན་དཔའ་བེའུ་འཁོར་ལོ་སྟེ། །ལྷ་ཡི་དགའ་ཚལ་མཛེས་པར་བྱེད་པ་ཡི། །བཀྲ་ཤིས་རྟགས་བརྒྱད་དག་ནི་དབུལ་བར་བགྱི། །ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བའི་ཡུམ་དང་བྱང་ཆུབ་སེམས་མ་ལ། །བཀྲ་ཤིས་
རྫས་བརྒྱད་དག་ནི་མཆོད་པར་བགྱི། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། བཛྲ་ས་ར་པྲ་མཛྷ་ནེ། ཏ་ཐཱ་ག་ཏཱ་ཡ། ཨདྷ་ཏེ། སམྱཀཾ་བུདྡྷ་ཡ། ཏདྱ་ཐཱ། ཨོཾ་བཛེ་བཛྲ་མ་ཧཱ་བཛྲ། མ་ཧཱ་ཏེ་ཛ་བཛྲ། མ་ཧཱ་བིདྱ་བཛྲ། མ་ཧཱ་བོ་དྷི་ཙིཏྟ་བཛྲ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛེ། སརྦ་ཀརྨ་ཨཱ་ཝ་ར་ཎ་བི་ཤོ་དྷ་ནི་བཛྲ་ཡེ་སྭཱ་ཧཱ། ཨོཾ་ཨཱརྱ་ཏཱ་རེ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཅོམ་ལྡན་འདས་འཕགས་མ་ཡིད་བཞིན་གྱི་འཁོར་ལོས་བདག་ཅག་དཔོན་སློབ་མི་ནོར་བསྲུང་བྱ་ཐམས་ཅད་ལ། །རྒྱལ་པོའི་འཇིགས་པ་དང་། དགྲའི་འཇིགས་པ་དང་། །ཆོམ་རྐུན་གྱི་འཇིགས་པ་དང་། མེ་ཆུ་དུག་མཚོན་གྱི་འཇིགས་པ་དང་། ནད་དང་གདོན་ལ་སོགས་པའི་འཇིགས་པ་ཆེན་པོ་བཅུ་དྲུག་ལས་ཐར་བར་མཛད་དུ་གསོལ། ཚེ་དང་བསོད་ནམས་དཔལ་དང་འབྱོར་པ་སྟོབས་དང་མངའ་ཐང་ཐམས་ཅད་དར་ཞིང་རྒྱས་པར་མཛད་དུ་གསོལ། ནམ་འཆི་བའི་ཚེ་ངན་སོང་གི་སྒྲ་ཡང་མི་གྲགས་པར་བདེ་བ་ཅན་གྱི་ཞིང་ཁམས་སུ་སྐྱེ་བར་བྱིན་གྱིས་བརླབ་ཏུ་གསོལ། ༈ སེང་གེ་གླང་ཆེན་མེ་སྦྲུལ་ཆོམ་རྐུན་དང་། །ལྕགས་སྒྲོག་རྒྱ་མཚོ་ཤ་ཟའི་
འཇིགས་པ་རྣམས། །ཞི་མཛད་ཟླ་བའི་འོད་ལྟར་མཛེས་པའི་གཟུགས། །བཅོམ་ལྡན་སྒྲོལ་མ་ཁྱེད་ལ་ཕྱག་འཚལ་བསྟོད། །ཁྱོད་ཀྱི་ཞབས་ཀྱི་པདྨ་གཉིས་ལ་ནི། །ཡན་ལག་མཆོག་གིས་རབ་ཏུ་གཏུགས་གྱུར་ན། །མངོན་འདོད་བདེ་བའི་འབྲས་བུ་སྨིན་མཛད་མ། །བཅོམ་ལྡན་སྒྲོལ་མ་ཁྱེད་ལ་ཕྱག་འཚལ་བསྟོད། །འདབ་མ་བརྒྱད་ལྡན་ཡངས་པའི་སྙིང་པོ་ནི། །གསེར་ཞུན་ཉི་མ་འཆར་ཀའི་མདོག་འདྲ་ཞིང་། །རྡུལ་བྲལ་སྟོན་ཀའི་ཟླ་ལྟར་དྲི་མ་མེད། །བཅོམ་ལྡན་སྒྲོལ་མ་ཁྱེད་ལ་ཕྱག་འཚལ་བསྟོད། །དྲང་སྲོང་གཙོ་དང་གྲུབ་པ་ལྟོ་འཕྱེ་ཆེ། །གཤིན་རྗེ་སྲིན་པོ་གནོད་སྦྱིན་ལྷ་མིན་དང་། །ལྷ་ཚོགས་རྣམས་ཀྱི་ཞབས་ལ་ཕྱག་བྱས་པའི། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་བསྟོད། །གླིང་དང་ནགས་ཚལ་སྡུག་པའི་རི་ཁྲོད་དང་། །ཕུག་དང་ཆུ་ཀླུང་རི་བོའི་རྩེ་རྣམས་སུ། །དུས་རྣམས་རྟག་ཏུ་བཞུགས་པར་གྱུར་པ་ཡི། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་བསྟོད། །སེང་གེ་སྟག་དང་གླང་པོ་མཚོ་ཆེན་དང་། །མེ་དང་འཆིང་བ་རྐུན་པོ་སྦྲུལ་དུག་གི །གནོད་པ་ཐམས་ཅད་རབ་ཏུ་འཇོམས་མཛད་མ། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་བསྟོད། །
ཏཱ་རེ་ཏུཏྟ་རེ་དང་ཏུ་རེ་ཡིས། །གཡུལ་གྱི་མཚོན་ཆ་བཟློག་མཛད་ཕན་པར་དགོངས། །འཇིགས་དང་རྨི་ལམ་ངན་པ་འཇོམས་མཛད་མ། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་བསྟོད། །ཐུགས་རྗེས་ནོན་པའི་ཐབས་ཀྱིས་གང་དང་གང་། །སེམས་ཅན་གཟིགས་གྱུར་དེ་ཡི་དཔལ་འཕེལ་འགྱུར། །སྒྲོལ་མས་མི་བསླུ་འབྲས་བུ་མྱུར་ཐོབ་མཛད། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་བསྟོད། །གནས་སྐྱེ་བ་མེད་པའི་ཆོས་དབྱིངས་ན། །ཡུམ་རྗེ་བཙུན་འཕགས་མ་སྒྲོལ་མ་བཞུགས། །ཁྱོད་སེམས་ཅན་ཀུན་ལ་བདེ་སྟེར་མས། །བདག་འཇིགས་པ་ཀུན་ལས་བསྐྱབ་ཏུ་གསོལ། །རང་ཆོས་སྐུ་ཡིན་པར་མ་ཤེས་པས། །སེམས་ཉོན་མོངས་དབང་དུ་གྱུར་པ་ཡི། །མར་འཁོར་བར་འཁྱམས་པའི་སྡུག་བསྔལ་ལས། །ཡུམ་ཡང་དག་ལྷ་མོས་བསྐྱབ་ཏུ་གསོལ། །ཆོས་སྙིང་ནས་རྒྱུད་ལ་མ་སྐྱེས་ཏེ། །ཚིག་ཐ་སྙད་རྗེས་སུ་འབྲངས་པ་ལ། །མཐར་གྲུབ་མཐའ་ངན་པས་བསླུས་པ་རྣམས། །ཡུམ་སྤྲོས་བྲལ་ལྷ་མོས་བསྐྱབ་ཏུ་གསོལ། །རྟོགས་པར་དཀའ་བའི་རང་གི་སེམས། །མཐོང་ནས་གོམས་པར་མི་བྱེད་པར། །བྱ་བ་ངན་པས་གཡེངས་པ་
རྣམས། །ཡུམ་དྲན་པའི་ལྷ་མོས་བསྐྱབ་ཏུ་གསོལ། །དེ་ཉིད་ཀྱི་དོན་ལ་བསམ་བྱས་ཀྱང་། །རྒྱུ་འབྲས་ཀྱི་རྟེན་འབྲེལ་མི་ཤེས་པས། །ཤེས་བྱའི་གནས་ལ་རྨོངས་པ་རྣམས། །ཡུམ་ཀུན་མཁྱེན་ལྷ་མོས་བསྐྱབ་ཏུ་གསོལ། །སེམས་རང་བྱུང་ཡེ་ཤེས་གཉིས་མེད་ལ། །གཉིས་འཛིན་འཁྲུལ་པའི་བག་ཆགས་ཀྱིས། །ཇི་ལྟར་བྱས་ཀྱང་བཅིངས་པ་རྣམས། ཡུམ་གཉིས་མེད་ལྷ་མོས་བསྐྱབ་ཏུ་གསོལ། །སེམས་མཐའ་བྲལ་གཉུག་མའི་མཚན་ཉིད་ཅན། །ཐབས་མཆོག་བདེ་དང་དབྱེར་མེད་ཀྱང་། །ད་དུང་སློབ་པའི་གང་ཟག་རྣམས། །ཡུམ་རྫོགས་སངས་རྒྱས་མས་བསྐྱབ་ཏུ་གསོལ། །ཨོཾ་ཏཱ་རེ་ཏུཏྟ་རེ་ཏུ་རེ་འཇིགས་པ་བཅུ་དྲུག་ཤཱནཾ་ཀུ་རུ་སྭཱ་ཧཱ། ཞེས་པ་འུར་འདོན་སྒྲུབ་པ་གཅིག་བྱེད་དགོས་ཀྱང་། ཆོ་ག་པར་མ་སོགས་གཞན་དུ་ལུས་པས་འཕྲལ་དུ་སྟབས་བདེ་བར་འདོན་བྱ་རཱ་ག་ཨ་སྱས་བྲིས་པ་མངྒ་ལཾ།། །།འདི་ལ་བརྩོན་ན་འཇིགས་པ་ཐམས་ཅད་ཞི་ཞིང་ཚེ་དང་བསོད་ནམས་ཤེས་རབ་འཕེལ། སྤྱི་མ་ངན་སོང་གི་སྒྲ་ཡང་མི་གྲགས་པར་བདེ་བ་ཅན་དུ་སྐྱེ་བར་གསུངས་སོ། །བདག་བསྐྱེད་རྗེ་ཆོས་ཀྱི་དབང་ཕྱུག་གིས་མཛད་པ་ལྟར་རོ། །རྙིང་མ་ལ་མོས་ན་གནམ་ཆོས་ལྟར་བྱའོ། །རྗེས་ཆོག་ནི་སྤྱི་ལྟར་རོ།། ཨོཾ་ཏཱ་རེ་ཏུཏྟ་རེ་ཏུ་རེ་འཇིགས་པ་བཅུ་དྲུག་ཤཱནྟཾ་ཀུ་རུ་ཡེ་སྭཱ་ཧཱ།། །།