གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་སྒྲོལ་དཀར་ཡིད་བཞིན་འཁོར་ལོའི་རྗེས་གནང་།
གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་སྒྲོལ་དཀར་ཡིད་བཞིན་འཁོར་ལོའི་རྗེས་གནང་བཞུགས་སོ༔
དུདུ༔ གུ་རུ་དྷེ་ཝ་ཌཱ་ཀི་ནི་ཧཱུྃ༔ སྒྲོལ་མ་དཀར་མོའི་དབང་སྒྲུབ་བྱ་སྟེ༔ ཞེས་པས༔ འདི་ཉིད་སྒྲུབ་པའི་མན་ངག་ལས༔ དཀྱིལ་འཁོར་གཏོར་མ་ལེགས་པར་བཅས༔ སྐུ་བུམ་ནས་ཕྲེང་རྡོ་རྗེ་གཏོར༔ ཕྱག་མཚན་འཁོར་ལོ་མཆོད་པ་བཤམས༔ དཀོན་མཆོག་གསུམ་ལ་སྐྱབས་མཆི་ཞིང་༔ འགྲོ་བའི་དོན་དུ་འཕགས་མ་བསྒྲུབ༔ བདག་དང་མདུན་དང་བུམ་ནང་དང་༔ གཏོར་མ་སྒྲོལ་མ་དཀར་མོར་གསལ༔ ཞལ་གཅིག་ཕྱག་གཉིས་སྐྱིལ་ཀྲུང་བཞུགས༔ གཡས་པས་མཆོག་སྦྱིན་གཡོན་ཨུཏྤལ༔ དར་དང་རིན་ཆེན་རྒྱན་གྱིས་བརྒྱན༔ འོད་ཟེར་དཔག་ཏུ་མེད་པ་འཕྲོ༔ དེ་ཡི་ཐུགས་
ཀར་ཨུཏྤལ་ནི༔ དཀར་པོ་འདབ་མ་དགུ་པའི་ནང་༔ ལྟེ་བར་ཨོཾ་དང་སྔགས་གཡོན་བསྐོར༔ དེ་ལས་འོད་ཟེར་འཕྲོས་པ་ཡིས༔ སྒྲོལ་མ་དཀར་མོ་ཡེ་ཤེས་པ༔ སྤྱན་དྲངས་ཐིམ་སྟེ་དབང་བསྐུར་གྱུར༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ བརྒྱ་རྩ་སོགས་ཅི་འགྲུབ་བཟླས༔ དེ་ཡིས་སྒྲོལ་མ་དཀར་མོ་འགྲུབ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ ཁྱམ། དེ་ནས། ལས་བུམ་དུ་དབང་ཆེན་ཁྲོ་བོ་གསལ་བར་གྱུར༔ ཧཱུྃཧཱུྃ་ཕཊ༔ བཟླའོ༔ ཨོཾ་ཨཱརྱ་ཏཱ་རེ་ས་པཱ་རི་ཝཱ་ར་ཨརྒྷཾ་སོགས་ནས། ཨོཾ་འཁོར་བ་ལས་སྒྲོལ་ཏཱ་རེ་མ༔ ཏུཏྟཱ་རེ་ཡིས་འཇིགས་བརྒྱད་སྒྲོལ༔ ཏུ་རེས་ན་བ་རྣམས་
ལས་སྒྲོལ༔ སྒྲོལ་མ་ཡུམ་ལ་ཕྱག་འཚལ་བསྟོད༔ ཅེས་དང་། བདག་དང་སེམས་ཅན་ཐམས་ཅད་འཇིགས་པ་ཆེན་པོ་བརྒྱད་དང་བཅུ་དྲུག་སོགས་འཁོར་བའི་སྡུག་བསྔལ་མཐའ་དག་ལས་སྐྱོབ་ཅིང་མཆོག་དང་ཐུན་མོང་གི་དངོས་གྲུབ་མ་ལུས་པ་བསྩལ་དུ་གསོལ༔ སློབ་མ་ཁྲུས་བྱས་མཎྜལ་ཕུལ། གནམ་ཆོས་ལུགས་ཀྱི་སྒྲོལ་དཀར་གྱི་དབང་བསྐུར་ཟབ་མོ་ཞུ་བའི་ཡོན་དུ་ཐོག་མར་མཎྜལ་ཕུལ། འོ་ན་ད་ལམ་ཁྱེད་རྣམས་ལ་རྗེ་བཙུན་འཕགས་མ་སྒྲོལ་མའི་དབང་བསྐུར་བ་ཡིན་ཏེ༔ དེ་ཡི་ལོ་རྒྱུས་ཟུར་ཙམ་ཞུ་ན༔ སྒྲོལ་མའི་ངོ་བོ་ནི་སངས་རྒྱས་སྣང་བ་མཐའ་ཡས་ཀྱི་སྤྱན་གཡོན་ལས་སྤྲུལ་པ་ཡིན་ཏེ༔ སངས་རྒྱས་སྣང་བ་མཐའ་ཡས་ཀྱི་ཐུགས་ཀྱི་སྤྲུལ་པ་ཐབས་ཀྱི་ཆ་ལས་སྤྱན་རས་གཟིགས་དང་༔ སྟོང་པ་ཤེས་རབ་ཀྱི་ཆ་ལས་སྒྲོལ་མར་སྤྲུལ་པ་ཡིན་པར་བཤད་དོ༔ དེའང་གནམ་ཆོས་འཕགས་མ་སྒྲོལ་མའི་རྒྱུད་འོད་ཟེར་རབ་འཕྲོ་ཞེས་བྱ་བ་ལས༔ བཅོམ་ལྡན་འདས་རྡོ་རྗེ་འཆང་༔ འཕགས་མ་རྗེ་བཙུན་སྒྲོལ་མ་ཡི༔ རྒྱུད་ཅིག་བདག་ལ་བཀའ་སྩོལ་ཨཾ༔ ཞེས་ཞུས་པས་རྒྱུད་ལེའུ་བཅུ་པ་གསུངས་ཏེ༔ འདིའི་རྒྱུད་ཀྱི་བཀའ་སྲུང་མ༔ དཔལ་མོ་ཐང་ནག་ཁྱོད་ལ་གཏད༔
ཅེས་གསུངས་པའི་རྒྱུད་ལས༔ ཨེ་མ་ཧོ༔ འཕགས་མ་རྗེ་བཙུན་སྒྲོལ་མ་ཡི༔ ལོ་རྒྱུས་ཅུང་ཟད་བཤད་པ་ནི༔ འཕགས་མཆོག་སྤྱན་རས་གཟིགས་དབང་གིས༔ སྙིང་རྗེ་འཁོར་བ་སྟོང་མ་བཟོད༔ འཁོར་བའི་སེམས་ཅན་ཡང་ཡང་དྲངས༔ ཞེས་ཀྱང་སྟོང་པར་མ་ནུས་ཏེ༔ བཤུམས་པའི་སྤྱན་ཆབ་གཡས་གཡོན་ལས༔ སྒྲོལ་མ་དཀར་སྔོན་འབྱུང་བ་སྟེ༔ ཐུགས་རྗེ་འདི་ལས་ཆེ་བ་མེད༔ ཅེས་གསུངས་སྤྲུལ་པ་འབྱུང་ཚུལ་ནི༔ འཕགས་པ་སྤྱན་རས་གཟིགས་ཀྱིས་སེམས་ཅན་གཅིག་ཀྱང་མ་ལུས་པར་སྒྲོལ་བའི་དམ་བཅའ་མཛད་ཅིང་༔ སེམས་ཅན་གྱི་དོན་དཔག་ཏུ་མེད་པར་མཛད་ནས༔ ད་ཅི་ལྟ་བར་གྱུར་པ་དགོངས་ནས་གཟིགས་པས་སེམས་ཅན་ལ་སྐྱེ་འབྲི་མེད་པས་ཐུགས་མུག་སྟེ༔ སྤྱན་ཆབ་བསིལ་བས༔ སྤྱན་ཆབ་གཉིས་ལས་མེ་ཏོག་པདྨ་གཉིས་བྱུང་སྟེ་ཁ་བྱེ་བའི་ནང་ནས་སྒྲོལ་མ་དཀར་སྔོན་གཉིས་བྱོན་ནས༔ སྲིད་ན་སུ་ཞིག་འཇིགས་པས་འཇིགས་གྱུར་ཡོད་དེ་ཀུན་ངས་སྐྱོབ་མ་འཇིགས་མ་འཇིགས་ཤིག༔ ཅེས་གསུངས་ཤིང་དམ་བཅས་ནས༔ འཕགས་པ་ལ་ཁྱེད་ཐུགས་མུག་མ་མཛད་ངེད་གཉིས་ཀྱིས་གྲོགས་བྱ་སྟེ༔ སེམས་
ཅན་དཔག་ཏུ་མེད་པའི་དོན་བྱའོ༔ ཞེས་གསུངས་སོ༔ མདོར་ན་འཕགས་པ་སྤྱན་རས་གཟིགས་ཀྱི་སྤྲུལ་པ་ཇི་ཙམ་མཛད་པའི་གྲངས་སུ་སྒྲོལ་མའི་སྤྲུལ་པ་དེ་ཉིད་དུ་ཕྲིན་ལས་ཀྱི་གྲོགས་མཛད༔ སེམས་ཅན་ཇི་སྙེད་པའི་གྲངས་མཉམ་སྤྲུལ་པ་གང་ལ་གང་འདུལ་དུ་འགྲོ་བའི་དོན་མཛད་པ་མང་ཡང་༔ སྐུ་དངོས་ནི་པོ་ཏ་ལར་བཞུགས་སོ༔ དེ་ཡང་སྒྲོལ་མའི་རིགས་ཐམས་ཅད་ཐུགས་རྒྱུད་གཅིག་སྟེ༔ འཇམ་དཔལ་རྩ་རྒྱུད་ལས༔ རིགས་པའི་རྒྱལ་མོ་རྫུ་འཕྲུལ་ཆེ༔ བུད་མེད་གཟུགས་འཆང་ལྷ་མོ་ནི༔ འགྲོ་བ་ཀུན་ཏུ་རྣམ་པར་སེམས་ཅན་རྣམས་ནི་འདུལ་བྱེད་པ༔ ལྷ་མོ་སྒྲོལ་མ་ཞེས་ཀྱང་བསྟན༔ ཞེས་དང་༔ སམ་བུ་ཊི་ལས༔ སྒྲོལ་མ་འཁོར་བ་ལས་སྒྲོལ་མ༔ དེ་ལྟར་སྒོམ་པ་ཙམ་གྱིས་སྒྲུབ་པོ་སངས་རྒྱས་ཐོབ་པར་འགྱུར༔ ཞེས་དང་༔ སྒྲོལ་མ་སྣ་ཚོགས་འབྱུང་བའི་རྒྱུད་ལས༔ འཇམ་དཔལ་དེ་ཡི་ཕན་ཡོན་ནི༔ མཚམས་མེད་པ་ལྔ་དང་༔ དེ་དང་ཉེ་བ་ལྔ་དང་༔ སྡང་བ་དང་རྨི་ལམ་ངན་པ་ཐམས་ཅད་ཞི་བར་འགྱུར་རོ༔ ངན་སོང་གསུམ་གྱི་སྡུག་བསྔལ་ཞི་བར་འགྱུར་རོ༔ ཚེ་རབས་དྲན་པ་དང་༔ དབང་པོ་གསལ་བ་དང་༔
ཡིད་གཞུངས་པར་འགྱུར་རོ༔ བཟོ་ཡི་གནས་ཐམས་ཅད་ལ་མཁས་པར་འགྱུར་རོ༔ སྟོབས་དང་མདངས་དང་གཟི་བརྗིད་ཕུན་སུམ་ཚོགས་པར་འགྱུར་འཇིག་རྟེན་སྐྱོང་བ་ཐམས་ཅད་ཅེས་ཀྱང་སྲུང་བ་དང་སྐྱོབ་པ་དང་སྦེད་པ་དང་ཕན་པ་བྱེད་ཅིང་གང་དུ་ཕྱིན་པ་ཐམས་ཅད་བཀྲ་ཤིས་པར་འགྱུར་རོ༔ ཞེས་གསུངས་པས༔ སྒྲོལ་མའི་དབང་དང་བྱིན་རླབས་ཐོབ་པ་དང་༔ གསོལ་བ་བཏབ་པ་ཙམ་གྱིས་ནད་གདོན་ལ་སོགས་འཇིགས་པ་བརྒྱད་ཀྱིས་འཚེ་བ་དང་༔ གནོད་པ་ཐམས་ཅད་སྐད་ཅིག་ལ་ཞི་བ་དང་༔ ཚེ་དཔལ་ཕུན་སུམ་ཚོགས་ནས་བདེ་ཆེན་དག་པའི་ཞིང་དུ་སྐྱེ་བར་གསུངས་པའི་དབང་འདི་ནི་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་བྱ་ལོ་ནག་པ་ཟླ་བའི་ཉེར་གསུམ་ལ༔ སྒྲོལ་ལྷམ་དཀར་སྔོན་གཉིས་ཀྱིས་མགྲིན་གཅིག་ཏུ་དངོས་སུ་གསུངས་པས་ཐུགས་རྗེ་མྱུར་ཞིང་བྱིན་རླབས་ཆེ་བའི་དབང་ཞུ་བའི་ཕྱིར༔ སློབ་དཔོན་དང་དབང་རྫས་རྣམས་སྒྲོལ་དཀར་དུ་མོས་ཤིང་༔ སློབ་བུས་གསོལ་བ་འདེབས་པ་འདི་ཡི་རྗེས་ཟློས་མཛོད༔ ཀྱཻ༔ བླ་མ་སངས་རྒྱས་དགོངས་སུ་གསོལ༔ བདག་ལ་འཕགས་མ་སྒྲོལ་མ་ཡི༔ དབང་དང་རྗེས་གནང་
བསྩལ་དུ་གསོལ༔ ལན་གསུམ༔ དཀོན་མཆོག་གསུམ་ལ་བདག་སྐྱབས་མཆི༔ སོགས༔ ལན་གསུམ༔ དེ་ནས་སློབ་མ་ལྷར་བསྐྱེད་པའི་དོན༔ དམིགས་པ་འདི་བཞིན་བསྒོམ་པར་བྱོས༔ ཁྱེད་རྣམས་སྒྲོལ་མ་དཀར་མོར་གསལ༔ ཞལ་གཅིག་ཕྱག་གཉིས་སྐྱིལ་ཀྲུང་བཞུགས༔ གཡས་པས་མཆོག་སྦྱིན་གཡོན་ཨུཏྤལ༔ དར་དང་རིན་ཆེན་རྒྱན་གྱིས་བརྒྱན༔ འོད་ཟེར་དཔག་ཏུ་མེད་པ་འཕྲོ༔ དེ་ཡི་ཐུགས་ཀར་ཨུཏྤལ་ནི༔ དཀར་པོ་འདབ་མ་དགུ་པའི་ནང་༔ ལྟེ་བར་ཨོཾ་དང་སྔགས་གཡོན་བསྐོར༔ དེ་ལས་འོད་ཟེར་འཕྲོས་པ་ཡིས༔ སྒྲོལ་མ་དཀར་མོ་ཡེ་ཤེས་པ༔ སྤྱན་དྲངས་ཐིམ་སྟེ་དབང་བསྐུར་གྱུར༔ ཧཱུྃ༔ སྒྲོལ་མ་དཀར་མོའི་ལྷ་ཚོགས་མ་ལུས་རྣམས༔ གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ༔ སྐལ་ལྡན་དད་ལྡན་འདི་ལ་དབང་མཆོག་བསྐུར༔ ལོག་འདྲེན་ཚེ་ཡི་བར་ཆད་གསལ་དུ་གསོལ༔ རྩ་སྔགས་མཐར༔ བཛྲ་ཨཱ་ཝེ་ཤ་ཡ་ཨ་ཨཱཿ རྡོ་རྗེ་མགོར་བཞག་ལ༔ ཡེ་ཤེས་པ་དེ་བརྟན་པར་བསྒོམ༔ ཏིཥྛ་བཛྲ༔ དེ་ནས་སྐུ་གཟུགས་ཐོགས་ལ་འདི་སྐད་དོ༔ ཧཱུྃ༔ འདི་ནི་འཕགས་མ་སྒྲོལ་མའི་སྐུ༔ ཁྱོད་ཀྱི་སྤྱི་བོར་བཞག་པ་ཡིས༔ འཕགས་མ་སྒྲོལ་
མའི་དབང་ཐོབ་ཅིང་༔ སྐུ་གསུང་ཐུགས་དབང་རྫོགས་པར་ཤོག༔ རྩ་སྔགས༔ ཨ་བྷི་ཥིཉྩ་ཧཱུྃ༔ དེ་ནས་བུམ་པ་སྤྱི་བོར་བཞག༔ ཧཱུྃ༔ བུམ་པ་འདི་ནང་འཕགས་མ་སྒྲོལ་མ་བཞུགས༔ ཁྱོད་ཀྱི་སྤྱི་བོར་བཞག་པ་ཡིས༔ འཕགས་མ་སྒྲོལ་མའི་དབང་ཐོབ་ཅིང་༔ སྐུ་གསུང་ཐུགས་དབང་རྫོགས་པར་ཤོག༔ རྩ་སྔགས༔ ཨ་བྷི་ཥིཉྩ་ཧཱུྃ༔ ཞེས་དང་ནས་ནི་ཐོགས་བྱས་ལ༔ ཧཱུྃ༔ ནས་ཀྱི་འབྲུ་ནི་རེ་རེ་ཡང་༔ འཕགས་མ་སྒྲོལ་མ་ཁྱོད་ཀྱི་ནི༔ སྤྱི་བོར་བཞག་པས་དབང་ཐོབ་ཅིང་༔ སྐུ་གསུང་ཐུགས་དབང་ཡོངས་རྫོགས་ཤོག༔ རྩ་སྔགས༔ ཨ་བྷི་ཥིཉྩ་ཧཱུྃ༔ དེ་ནས་ཕྲེང་བ་ཐོགས་བྱས་ལ༔ ཧཱུྃ༔ འདི་ནི་འཕགས་མ་སྒྲོལ་མ་ཡི༔ སྐུ་གསུང་ཐུགས་ཀྱི་ཕྲེང་བ་སྟེ༔ ཁྱོད་ཀྱི་ལག་ཏུ་གཏད་པ་ཡིས། འཕགས་མ་སྒྲོལ་མའི་དབང་ཐོབ་ཅིང་༔ སྐུ་གསུང་ཐུགས་དབང་རྫོགས་པར་ཤོག༔ རྩ་སྔགས་མཐར༔ ཨ་བྷི་ཥིཉྩ་ཧཱུྃ༔ དེ་ནས་རྡོ་རྗེ་སྙིང་གར་བཞག༔ ཧཱུྃ༔ འདི་ནི་འཕགས་མ་སྒྲོལ་མ་ཡི༔ ཐུགས་ཀྱི་རྟགས་ནི་རྡོ་རྗེ་སྟེ༔ ཁྱོད་ཀྱི་སྙིང་གར་བཞག་པ་ཡིས༔ འཕགས་མ་སྒྲོལ་མའི་དབང་ཐོབ་ཅིང་༔ སྐུ་གསུང་ཐུགས་དབང་རྫོགས་པར་ཤོག༔ རྩ་སྔགས་
མཐར༔ ཨ་བྷི་ཥིཉྩ་ཧཱུྃ༔ དེ་ནས་གཏོར་མ་སྤྱི་བོར་བཞག༔ ཧཱུྃ༔ འདི་ནི་འཕགས་མ་སྒྲོལ་མ་སྟེ༔ ཁྱོད་ཀྱི་སྤྱི་བོར་བཞག་པ་ཡིས༔ འཕགས་མ་སྒྲོལ་མའི་དབང་ཐོབ་ཤོག༔ སྐུ་གསུང་ཐུགས་དབང་རྫོགས་པར་ཤོག༔ རྩ་སྔགས་མཐར༔ ཨ་བྷི་ཥིཉྩ་ཧཱུྃ༔ དེ་ནས་ཕྱག་མཚན་ལག་ཏུ་གཏད༔ ཧཱུྃ༔ འདི་ནི་འཕགས་མ་སྒྲོལ་མ་ཡི༔ ཕྱག་མཚན་མཆོག་སྦྱིན་ཨུཏྤལ་ཁྱོད་ཀྱི་ལག་ཏུ་གཏད་པ་ཡིས༔ འཕགས་མ་སྒྲོལ་མའི་དབང་ཐོབ་ཅིང་༔ སྐུ་གསུང་ཐུགས་དབང་རྫོགས་པར་ཤོག་རྩ་སྔགས་མཐར༔ ཨབྷི་ཥིཉྩ་ཧཱུྃ༔ དེ་ནས་འཁོར་ལོ་ལག་ཏུ་གཏད༔ ཧཱུྃ༔ འདི་ནི་མཚོན་ཆའི་འཁོར་ལོ་སྟེ༔ དམ་ཚིག་མ་འདས་སྲུང་གྱུར་ན༔ སྐྱབས་འགྱུར་གལ་ཏེ་ཉམས་གྱུར་ན༔ ཚེ་ཡི་འདུ་བྱེད་ལྟུང་བར་བྱེད༔ དེ་བས་དམ་ལས་མ་འདའ་ཞིག༔ ཙཀྲ་ས་མ་ཡ་ཨ་བྷི་ཥིཉྩ་ཧཱུྃ་གཏོར་མའི་བཀའ་བསྒོ་ལུགས་གཉིས་གང་འོས་སྦྱར༔ མཆན། ས་གཞི་སྤོས་ཆུས་སོགས་བྱ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ རུ་ཅེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་ནག་པ་ཟླ་བའི་མར་ངོའི་ཚེས་བརྒྱད་སྒྲོལ་མ་དཀར་སྔོན་གཉིས་བྱོན་ནས་མགྲིན་གཅིག་ཏུ་གསུངས་སོ༔ ཞེས་པ་དབང་བཤད་ལོ་རྒྱུས་ཅུང་ཟད་སོགས་ཕྱག་ལེན་གྱིས་བརྒྱན་ཏེ༔ དགེ་སློང་པདྨ་མ་ཎིའི་བྲིས་
པ་ལ་ཉེས་འགལ་མཆིས་ན་བཤགས་ཤིང་དགེ་བས་གཞན་ཕན་རྒྱ་ཆེན་པོ་འབྱུང་བར་གྱུར་ཅིག༔ ༈ གཏོར་དབང་ལ་བླ་མ་བརྒྱུད་པ་སོགས་བཀའ་བསྒོ་བྱེད་སྲོལ་འདུག༔ ཤུ་བྷཾ༔ སརྦ་མངྒ་ལཾ།། དེས་འཕགས་མ་སྒྲོལ་མའི་དབང་ལེགས་པར་ཐོབ་པ་ཡིན་པས༔ རང་ཉིད་བྱང་ཆུབ་མ་ཐོབ་ཀྱི་བར་དུ་ཡི་དམ་དུ་བཟུང་སྙམ་པས་འདི་ཡི་རྗེས་ཟློས་མཛོད༔ གཙོ་བོས་ཇི་ལྟར་སོགས། །ས་གཞི་སྤོས་སོགས། ས་མ་ཡ་རྒྱ་རྒྱ་རྒྱ༔ ཁ་ཐཾ་གུ་ཧྱ༔ ཨོཾ་ཨརྒྷཾ་སོགས། ཨོཾ་འཁོར་བ་ལས་སྒྲོལ་སོགས་ཀྱིས་བསྟོད༔ མ་རྙེད་ཡོངས་སུ་སོགས། ཡིག་བརྒྱ་དང་། མདུན་བསྐྱེད་སྒྲོལ་མ་བདག་ལ་ཐིམ༔ དེ་ཡང་མི་དམིགས་རྒྱལ་བའི་ཡུམ༔ སྨྲ་བསམ་བརྗོད་མེད་སྟོང་པ་ཉིད༔ དགེ་བས་བདག་དང་འགྲོ་བ་ཀུན༔ བླ་མེད་བྱང་ཆུབ་ཐོབ་པར་ཤོག༔ བཀྲ་ཤིས་གང་ཤེས་བརྗོད༔ ཅེས་པའང་རཱ་ག་ཨ་སྱས་སྦྱར་བའོ༔ ཨོཾ༔ དབང་མཐར་གཏོར་མའི་བཀའ་བསྒོ་གནས་ལུགས། སླར་ཡང་གཏོར་མ་ལ་བརྟེན་ནས་བཀའ་བསྒོ་བ་ནི༔ ཨོཾ༔ བླ་མ་བརྒྱུད་རིམ་ནི༔ ཆོས་སྐུ་སྣང་བ་མཐའ་ཡས༔ ལོངས་སྐུ་ཐུགས་རྗེ་ཆེན་པོ༔ སྤྲུལ་སྐུ་སྲོང་བཙན་སྒམ་པོ༔ སློབ་དཔོན་པདྨ་འབྱུང་གནས༔ ཇོ་མོ་མཁར་ཆེན་མཚོ་རྒྱལ༔ ཆོས་རྒྱལ་ཁྲི་སྲོང་ལྡེའུ་
བཙན༔ ལྷ་སྲས་མུ་ཁྲི་བཙན་པོ༔ ཤུད་བུ་དཔལ་གྱི་སེངྒེ༔ རིག་འཛིན་འཇའ་ཚོན་སྙིང་པོ༔ ལོ་ཆེན་བཻ་རོ་ཙཱ་ན༔ སྤྲུལ་སྐུ་མི་འགྱུར་རྡོ་རྗེ༔ རཱ་ག་ཨ་སྱ་ལ་སོགས་པའི་བླ་མ་རྣམས་དང་༔ རྗེ་བཙུན་བཅོམ་ལྡན་འདས་འཕགས་མ་སྒྲོལ་མ་སྒྲོལ་དཀར་ཡིད་བཞིན་འཁོར་ལོ༔ འཕགས་མ་བཀྲ་ཤིས་དོན་ཀུན་སྒྲུབ་བྱེད༔ སྒྲོལ་སྔོན་འཇིགས་པ་བརྒྱད་སྐྱོབས༔ སེང་ལྡེང་ནགས་ཀྱི་སྒྲོལ་མ༔ འཕགས་མ་རིག་བྱེད་མ་ལ་སོགས་པའི་སྒྲོལ་མའི་རིག་བྱེད་བཅུ་གཅིག་རྣམས་ཀྱིས་རྡོ་རྗེའི་སློབ་མ་འདི་རྣམས་ལ་དབང་བསྐུར་བ་དང་བྱིན་གྱིས་བརླབ་པར་མཛད་དུ་གསོལ༔ ནད་གདོན་སྡིག་སྒྲིབ་བན་བྱེད་བོན་བྱད་གཏོར་ཁ་གཏད་ཁྲམ་ལ་སོགས་ཚེ་ཡི་བར་ཆད་ཐམས་ཅད་ཞི་ཞིང་མི་འབྱུང་བར་བྱིན་གྱིས་རློབས་ཤིག༔ ཚེ་དཔལ་བསོད་ནམས་ཡེ་ཤེས་ཡོན་ཏན་འབྱོར་པ་ལོངས་སྤྱོད་སྟོབས་ནུས་རླུང་རྟ་ཐམས་ཅད་ཡར་ངོའི་ཟླ་ལྟར་འཕེལ་ཞིང་རྒྱས་པར་མཛོད་ཅིག༔ ནམ་འཆི་བའི་ཚེ་ཞིང་མཆོག་བདེ་བ་ཅན་དུ་སངས་རྒྱས་སྣང་བ་མཐའ་ཡས་ཀྱི་ཞབས་དྲུང་དུ་སངས་རྒྱས་པར་མཛོད་ཅིག༔ མདོར་ན་འཁོར་བ་ངན་སོང་གི་སྡུག་བསྔལ་ཐམས་ཅད་ཞི་བར་མཛད་དུ་
གསོལ༔ འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་བསྒྲལ་དུ་གསོལ༔ སྐུ་དང་ཞིང་ཁམས་ལྷུན་གྱིས་གྲུབ་པར་མཛད་དུ་གསོལ༔ རྩ་སྔགས་མཐར༔ ཀཱ་ཡ་བ་ལི་ཏ་ཨ་བྷི་ཥིཉྩ་ཧཱུྃ༔ མཐར་ཤིས་པ་བརྗོད་ཅིང་མེ་ཏོག་འཐོར༔ ༈ གཏོར་མའི་བཀའ་བསྒོ་དཔལ་ཡུལ་ལུགས༔ སླར་ཡང་གཏོར་མས་བཀའ་བསྒོ་བ་ནི། གཏོར་དབང་གི་རྗེས་སྐྱོང་བར་འདོད་ན། གཏོར་མ་བཟུང་ལ། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། རྗེ་བཙུན་འཕགས་མ་སྒྲོལ་མ། གཏེར་སྟོན་མི་འགྱུར་རྡོ་རྗེ། མཁས་གྲུབ་ཀརྨ་ཆགས་མེད། རིག་འཛིན་ཀུན་བཟང་ཤེས་རབ་ལ་སོགས་པ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། འཕགས་མ་སྒྲོལ་མའི་ལྷ་ཚོགས་སྤྲུལ་པ་ཡང་སྤྲུལ་དང་བཅས་པས་བྱིན་གྱིས་བརླབས་པ་དང་དབང་བསྐུར་བར་མཛད་དུ་གསོལ། ནད་གདོན་སྡིག་སྒྲིབ་ལ་སོགས་མི་མཐུན་པའི་ཕྱོགས་ཐམས་ཅད་ཞི་བ་དང་། མཆོག་ཐུན་མོང་གི་དངོས་གྲུབ་སྩོལ་ཞིང་མཐུན་རྐྱེན་ཕུན་སུམ་ཚོགས་པར་མཛད་དུ་གསོལ། ནམ་འཆི་བའི་ཚེ་ནུབ་ཕྱོགས་བདེ་ཆེན་དག་པའི་ཞིང་དུ་འདྲེན་པར་མཛད་དུ་གསོལ།
ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱཿ ཀཱ་ཡ་ཝཀྐ་ཙིཏྟ་སརྦ་ཨ་བྷི་ཥིཉྩ་ཧཱུྃ༔ ཅེས་བརྗོད་ཅིང་གནས་གསུམ་དུ་བཞག་གོ །དེ་ནས་མེ་ཏོག་འཐོར་ཞིང་། ཨོཾ་འཁོར་བ་ལས་སྒྲོལ་ཏཱ་རེ་མ། །ཏུཏྟཱ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ཡུམ་གྱི་བཀྲ་ཤིས་ཤོག །ཅེས་དང་མཐར་བརྗོད། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།