རྗེ་ཆོས་ཀྱི་དབང་ཕྱུག་གིས་མཛད་པའི་སྒྲོལ་དཀར་མངོན་རྟོགས་བསྡུས་པའི་ཟིན་བྲིས།
རྗེ་ཆོས་ཀྱི་དབང་ཕྱུག་གིས་མཛད་པའི་སྒྲོལ་དཀར་མངོན་རྟོགས་བསྡུས་པའི་ཟིན་བྲིས་བཞུགས་ལགས།།
ན་མོ་ཨརྱ་ཏཱ་རེ་ཡེ། སྒྲོལ་མ་མངོན་པར་འབྱུང་བའི་རྒྱུད་ཆེན་ལས། །དཀར་མོ་ཟླ་མདོག་སྒྲོལ་མ་ཕྱག་མང་འབྱུང་། །སྒྲོལ་མ་སྣ་ཚོགས་འབྱུང་བ་ལས། །ཞི་བའི་སྒྲོལ་མ་དཀར་མོ་འདི་དག་གསུངས། །རྡོ་རྗེ་གདན་བཞིའི་རྒྱུད་ལས་འདི་ཉིད་གསལ། །འདི་ལ་རྒྱ་གཞུང་བརྒྱད་ནི་ཡོད་པའི་ནང་། །པཎ་ཆེན་ངག་གི་དབང་ཕྱུག་གྲགས་པ་དེ། །སྒྲོལ་མ་བྱིན་རླབས་ཆེ་བས་འཆི་མེད་ཐོབ། །ཉི་མའི་ཟེར་ལ་ཆིབས་ནས་ནམ་མཁར་གཤེགས། །འཆི་བ་བསླུ་བའི་རྟོགས་པ་རྒྱས་པར་ནི། །འཆི་བསླུའི་མན་ངག་གྲུབ་ཆེན་ཁོང་གིས་མཛད། །དེ་ཡི་ནང་ནས་བསྡུས་པའི་སྒྲུབ་ཐབས་
འདི། །སློབ་མའི་ཐུ་བོ་པཎྜི་ཏ་ཡིས་མཛད། །ཇོ་འབྲོམ་ཡས་སྲས་སྐུ་མཆེད་རྣམ་གསུམ་གྱི། །འབྲལ་མེད་ལུས་དང་གྲིབ་བཞིན་དངོས་སུ་འགྲུབ། །དགེ་བཤེས་གླེ་ནག་པ་དང་བྱ་ཡུལ་པ། །དྭགས་པོ་དུས་མཁྱེན་འབྲི་སྟག་ཕག་གྲུ་སོགས། །བཀའ་བརྒྱུད་བླ་མ་རྣམས་ཀྱི་སྐུ་ཚེ་བསྲིངས། །ཕྲིན་ལས་འགྲོ་དོན་རྒྱས་བྱེད་ལྷ་འདི་ཡིན། །ཁྱད་པར་ཀཾ་ཚང་འདི་ཡི་དུས་བར་དུ། །ཞལ་གཟིགས་རྒྱུན་མི་འཆད་པས་བྱིན་རླབས་ཆེ། །ཁྱད་པར་རྒྱལ་བ་མཆོག་གི་སྤྲུལ་སྐུ་ཡི། །ཡི་དམ་བཀའ་བབ་མཆོག་ཏུ་གྱུར་པ་སྟེ། །འོད་དཔག་མེད་པའི་སྤྲུལ་པ་ཞྭ་དམར་ཅན། །འདི་ནི་
དེ་ཡི་ཡུམ་མཆོག་གོས་དཀར་མོ། །དེ་ཕྱིར་བཀའ་བབ་བརྒྱུད་པ་ཤིན་ཏུ་ཉེ། །ཁྱད་པར་ས་དམ་ཆོས་ཀྱི་རྒྱལ་པོ་དེས། །ཐུགས་དམ་བྱ་ཕྱིར་ཉུང་ངུ་འདི་ཉིད་གནང་། །སྐུ་ཚེ་མཐར་ཕྱིན་བཀའ་འགྱུར་པར་དུ་བཞེངས། །རྩེ་ཤག་དགོན་བཏབ་ཇོ་བོའི་གསེར་ཁང་ཕུབ། །གྲྭ་ཚང་ནང་པ་ཡིས་ནི་དུས་ཇ་བཙུགས། །རྒྱལ་བ་ཉིད་ཀྱིས་དབང་ལུང་གནང་བ་ཡིན། །བདག་ཀྱང་བསྙེན་སྒྲུབ་མང་ཐོབ་ཡི་དམ་བྱས། །དེ་ཕྱིར་བྱིན་རླབས་བརྒྱུད་ལྡན་ཡིད་ཆེས་གྱིས། །ཚིག་ཉུང་དོན་གསལ་གོ་བདེ་བདེ་བའི་ཕྱིར། །འདི་ལ་ཟིན་བྲིས་དགོས་པ་མེད་ནའང་། །འདི་ནི་སྤྱིར་དུ་བྱ་རྒྱུད་ཡིན་བཤད་ཀྱང་། །བླ་མེད་ལྟར་དུ་ཉམས་སུ་ལེན་པ་ཡིན། །དེ་ཕྱིར་གཙང་སྦྲ་ལ་སོགས་མེད་ཀྱང་རུང་། ༈ །སྐྱབས་འགྲོ་སེམས་བསྐྱེད་གཉིས་ནི་གོ་སླ་ཞིང་། །བསྐྱེད་རིམ་གཞུང་ལྟར་དྲན་རྫོགས་བསྒོམས་པས་འཐུས། །སྐུ་ལུས་འགྱིང་བག་མི་བྱ་དྲང་པོར་བསྒོམ། །དེ་ནི་ཚུལ་ཁྲིམས་གཙང་བའི་གནད་ཡོད་གསུངས། །ཕྱག་གཡོན་ཨུཏྤལ་རྩེ་མོ་གསུམ་པ་སྟེ། །གཡས་པ་མེ་ཏོག་བྲུལ་ཏེ་འབྲས་བུར་སྨིན། །གཡོན་པའི་ཁ་ནི་བྱེ་ལ་ཁད་པ་སྟེ། །དབུས་མ་མེ་ཏོག་རབ་ཏུ་རྒྱས་པ་སྟེ། །དུས་གསུམ་སངས་རྒྱས་
གསུམ་གྱི་ངོ་བོ་ཡིན། །ཕྱག་གཡོན་མཐེབ་སྲིན་སྦྱར་བའི་རྩེ་མོ་གསུམ། །གྱེན་དུ་བསྒྲེང་པ་དཀོན་མཆོག་གསུམ་པོ་མཚོན། །གདན་དང་རྒྱབ་ཡོལ་གཉིས་ཀ་ཟླ་བ་རྒྱས། །ན་བཟའ་ཐམས་ཅད་དཀར་པོ་ཁོ་ན་ཡིན། །སྤྱི་གཙུག་རིགས་བདག་འོད་དཔག་མེད་པ་བསྒོམས། །ཕྱག་གཡས་མཆོག་སྦྱིན་མཛད་པའི་འོག་ཏུ་ནི། །རང་གི་མི་ནོར་བསྒོམ་པ་སྲུང་བའི་མཆོག །སྐུ་ལུས་ནང་གི་སྟོང་པ་སང་ངེ་བ། །དེ་ཡི་སྤྱི་བོས་ནང་དུ་ཨོཾ་དཀར་པོ། །མགྲིན་པར་ཨཱདམར་རིང་ཆ་ཚེག་དྲག་བཅས། །ཐུགས་ཀའི་ཚེ་སྨད་ཧཱུྃ་ཡིག་སྔོན་པོ་སྟེ། །སངས་རྒྱས་ཀུན་གྱི་སྐུ་གསུང་ཐུགས་ཡིན་ནོ། ༈ །ཐུགས་ཀར་ཡིད་བཞིན་འཁོར་ལོ་བསྒོམ་པ་ནི། །བསྡུས་པ་དང་ནི་རྒྱས་པ་གཉིས་ཡོད་དེ། །གཞུང་འདི་ཇོ་བོ་རྗེ་ཡི་ལུགས་ཡིན་ནོ། །འཁོར་ལོ་དཀར་པོ་རྩིབས་བརྒྱད་མུ་ཁྱུད་མེད། །ཟླ་བའི་མདོག་ཅན་གདན་ཐབས་ཐུགས་ཀར་གནས། །ལྟེ་བར་ཧཱུྃ་ཡིག་དཀར་པོ་རིང་ཆ་ཅན། །འཁོར་ལོ་མ་རེག་ཙམ་དུ་བསྒྲེངས་ཏེ་གནས། །ཏཱཾ་ཡིག་སྟེང་གི་བར་སྣང་ཨོཾ་ཡིག་དཀར། །ཏཾཐད་འཁོར་ལོའི་འོག་ཏུ་ཧཱ་ཡིག་དཀར། །རྩིབས་བརྒྱད་སྟེང་དུ་མདུན་ནས་གཡས་བསྐོར་དུ། །ཡི་གེའི་ངོ་
ནི་ནང་དུ་བསྟན་བྱས་ཏེ། །ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། །དེ་རྣམས་ཀློག་པའི་ཚུལ་དུ་བཟླས། །དེ་ནས་འཁོར་ལོ་གཡས་གཅིག་ཡིག་འབྲུ་གཡོན། །དང་པོ་དལ་ལ་དེ་ནས་ཇེ་མགྱོགས་འཁོར། །ཨོཾ་ཏཱཾཿཧཱ་གསུམ་གཡོ་འགུལ་མེད་པར་གནས། །དེ་ནི་འཁོར་ལོ་བསྡུས་པའི་སྒོམ་ལུགས་ཡིན། ༧ །གལ་ཏེ་འཁོར་ལོ་རྒྱས་པ་སྒོམ་འདོད་ན། །གཞུང་ཚིག་སྒྱུར་ནི་མི་དགོས་ཡིད་ཀྱིས་བསྒོམས། །འཁོར་ལོ་རྩིབས་བརྒྱད་མུ་ཁྱུད་རིམ་པ་ལྔ། །དེ་ནི་སྔོན་ལྟར་ཏཱཾ་ཡིག་བསྒྲེངས་ཐབ་གནས། །དེ་ཡི་གཡས་སུ་ཨོཾ་དང་གཡོན་དུ་ཧཱ། །ཧཱུྃ་ཡིག་མཐའ་རུ་འདོད་གསོལ་ཡི་གེ་སྟེ། །མ་མ་ཨཱ་ཡུ་པུཎྱེ་ཛྙཱ་ན་པུཊྚིཾ་ཀུ་རུ། །མ་མ་ཞེས་པ་བདག་ཅེས་པ་སྟེ། །རང་དོན་ཡིན་ན་དེ་ཡིས་ཆོག་པ་སྟེ། ༧ །བླ་མ་སྦྱིན་བདག་ལ་སོགས་སྐུ་རིམ་ལ། །མ་ཡི་ཚིག་གི་མཚམས་སུ་མིང་བཅུག་སྟེ། །རྩིབས་བརྒྱད་ནང་དུ་སྔོན་ལྟར་ཡིག་འབྲུ་བརྒྱད། །དེ་རྒྱབ་མུ་ཁྱུད་ནང་མར་མདུན་ནས་བརྩམས། །དབྱངས་ཡིག་བཅུ་དྲུག་གཡོན་བསྐོར་དག་ཏུ་གནས། །མུ་ཁྱུད་གཉིས་པར་གསལ་བྱེད་གཡས་བསྐོར་དུ། །གསུམ་པར་རྟེན་འབྲེལ་སྙིང་པོ་གཡས་བསྐོར་ཏེ། །བཞི་པ་རྡོ་རྗེའི་ཕྲེང་བ་ནས་འབྲུ་ཙམ། །ལྔ་པར་མེ་
རི་དཀར་པོ་སོར་གཅིག་ཙམ། །ཐམས་ཅད་མུ་ཏིག་མདོག་ཅན་འོད་ཟེར་འཕྲོ། །འདི་ལ་སྔགས་ཕྲེང་འཁོར་ལོ་འཁོར་རྒྱུ་མེད། །དེ་ལྟར་འཁོར་ལོ་རྒྱས་བསྡུས་གང་སྒོམ་ཡང་། །འཁོར་ལོ་ཡིག་འབྲུ་ས་བོན་བཅས་པ་ལ། །འོད་ཟེར་དཀར་པོ་འཕྲོས་པས་བདག་ལུས་གང་། །ནད་གདོན་སྡིག་སྒྲིབ་དུས་མིན་འཆི་བ་སོགས། །བ་མོར་ཉི་ཟེར་ཕོག་ལྟར་གསལ་བར་བསྒོམས། །འོད་ཟེར་ཕྱིར་འཕྲོས་འཇིག་རྟེན་ཐམས་ཅད་ཁྱབ། །སངས་རྒྱས་ཐམས་ཅད་མཆོད་ཅིང་ཐུགས་རྒྱུད་བསྐུལ། །སེམས་ཅན་ཀུན་ལ་ཕོག་པས་སྡིག་སྒྲིབ་དག །ཐམས་ཅད་སྒྲོལ་མའི་སྐུར་གྱུར་སྔགས་སྒྲ་སྒྲོག །དེ་དག་ཀུན་གྱི་ཡོན་ཏན་ཡེ་ཤེས་དང་། །བྱིན་རླབས་ཚེ་དང་བསོད་ནམས་དངོས་གྲུབ་དང་། །འབྱུང་བ་ལྔ་ཡི་བཅུད་དང་ནུས་པ་ཀུན། །འོད་ཟེར་དཀར་པོའི་རྣམ་པར་ཚུར་ཐོན་ནས། །རང་གི་ཐུགས་ཀའི་ཡིག་འབྲུ་ལ་ཐིམ་པས། །ཚེ་དང་བསོད་ནམས་ཡེ་ཤེས་རྒྱས་པར་བསྒོམས། །བསྲུང་བྱ་གཞན་གྱི་རིམ་གྲོ་བྱེད་ན་ནི། །འོད་ཟེར་རང་དང་བསྲུང་བྱ་རྣམས་ལ་ཐིམ། །བསྙེན་པའི་སྔགས་འདི་ཡི་གེ་བཅུ་པ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། གདན་ཐོག་གཅིག་གིས་སྒྲུབ་པ་བྱེད་ན་
ནི། །དུས་ཀྱི་བསྙེན་པ་རབ་ལ་ཟླ་བ་དྲུག །འབྲིང་གསུམ་ཐ་མ་ཞག་ནི་ཉེར་གཅིག་གོ །ཡང་མཐའ་ཞག་བདུན་གྱིས་ཀྱང་ཆོག་པར་བཤད། །གྲངས་ཀྱི་བསྙེན་པ་འབུམ་ཕྲག་བཅུ་ཡིན་ཏེ། །སྙིགས་མའི་དུས་འདིར་བཞི་འགྱུར་ཐོན་ན་རབ། །ཐ་མ་འབུམ་ཕྲག་གསུམ་གྱིས་འགྲུབ་པ་སྟེ། །ཡང་ན་འབུམ་ཕྲག་གཅིག་གིས་ཆོག་པར་བཤད། །དེ་ལྟར་བསྙེན་པ་ཅི་ཙམ་ཐོན་པ་ཡི། །བཅུ་ཆའི་ཚད་ཙམ་སྒྲུབ་པའི་སྔགས་འདི་སྦྱར། །ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨ་ཡུ་པུཎྱེ་ཛྙཱ་ན་པུཎྚི་ཀུ་རུ་ཡེ་སྭཱ་ཧཱ། གལ་ཆེན་བསྲུང་བྱ་ཡོད་ན་མ་ཡི་ནང་། །དེ་ཡི་མིང་དེ་རྒྱ་སྐད་བསྒྱུར་ལ་བཅུག །གལ་ཏེ་སྒྲུབ་པ་མ་ཐོན་རྒྱུན་ཁྱེར་ལ། །སྔགས་ཐུང་སྟོང་རེ་སྔགས་རིང་བརྒྱ་རེ་སྦྱར། །སྔགས་ཐུང་དེ་ཉིད་བརྒྱ་རེ་རྒྱུན་ཁྱེར་ལ། །སྔགས་རིང་དེ་ཉིད་བཅུ་རེ་བཟླས་པ་བྱ། །སྒྲོལ་མའི་དབང་ཐོབ་ཡི་དམ་གྲལ་ཙམ་ནས། །སྔགས་རིང་སྔགས་ཐུང་བརྒྱ་རེ་ཆག་མེད་དམ་ཚིག་ཡིན། །རྗེས་ནི་འོད་ཞུ་སྟོང་པར་བསྡུ་བ་དང་། །བསྔོ་བ་ལ་སོགས་གཞུང་ཚིག་རང་གི་འཐུས། །གལ་ཏེ་འདི་ཡིས་མཚམས་སྦྱོར་བྱེད་ན་ནི། །ཐུན་མཚམས་སླར་ཡང་སྒྲོལ་མའི་སྐུར་གསལ་ནས། །སྤྱོད་ལམ་གང་དགོས་བྱ་བ་འགྲུབ་པ་ཡིན། །
དེ་ཚེ་འམ་ནི་སྲོད་ཀྱི་དུས་ལ་སོགས། །སྲུང་འཁོར་བསྒོམ་པར་འདོད་ན་འདི་ལྟར་བསྒོམ། །རང་གི་ཐུགས་ཀའི་འཁོར་ལོ་ཡིག་འབྲུ་ལས། །འོད་ཟེར་དཀར་པོ་ཟླ་བའི་མདོག་ལྟར་འཕྲོས། །ལུས་གང་འོད་ཟེར་ཕྱི་རུ་འཕྲོས་པ་ལས། །འཁོར་ལོ་དཀར་པོ་གུར་ཐབས་རྩིབས་བཅུ་པ། །ཕྱོགས་མཚམས་རྩིབས་བརྒྱད་དེ་དང་འོག་རྩིབས་བཅུ། །སྦུབ་ཆོལ་ཁ་སྦྱོར་ལྟ་བུ་ནང་སྟོང་པ། །མུ་ཁྱུད་དང་བཅས་འཁོར་ལོའི་ལྟེ་བ་དེར། །རང་ཉིད་སྒྲོལ་མར་གསལ་བའི་གཡས་གཡོན་དུ། །རང་གི་བསྲུང་བྱ་ཐམས་ཅད་གུས་པར་འཁོད། །རྩིབས་བཅུ་ནང་དུ་སྟེང་འོག་ཨོཾ་ཧྥུདང་། །རྩིབས་བརྒྱད་ཡིག་འབྲུ་བཅུ་པོ་མེ་འབར་བསྒོམ། །རྩིགྲོས་རྣམས་རལ་གྲི་སོ་གཉིས་ལྟ་བུ་ལ། །སྲུབ་མེད་རྣོ་ཞིང་གཡས་སུ་དྲག་ཏུ་འཁོར། །སླར་ཡང་ཐུགས་ལས་འོད་ཟེར་དཀར་པོ་འཕྲོས། །བདག་གཞན་ནད་གདོན་བར་ཆད་ཞི་བར་བྱ། །འཁོར་ལོའི་ཕྱི་རོལ་འོད་ཟེར་དཀར་པོའི་གུར། ༧ །འོད་ཟེར་སེར་པོ་འཕྲོས་པས་ཚེ་བསོད་རྒྱས། །དེ་རྒྱབ་འོད་ཟེར་སེར་པོའི་གུར་དུ་གྱུར། ༧ །དམར་པོ་འཕྲོས་པས་སྣང་སྲིད་དབང་དུ་བསྡུས། །དེ་རྒྱབ་འོད་ཟེར་དམར་པོའི་གུར་དུ་གྱུར། ༧ །སྔོན་
པོ་འཕྲོས་པས་བདུད་བཞི་ཚར་བཅད་ཏེ། །དེ་རྒྱབ་འོད་ཟེར་སྔོན་པོའི་གུར་དུ་གྱུར། ༧ །ལྗང་གུ་འཕྲོས་པས་ཕྲིན་ལས་སྣ་ཚོགས་འགྲུབ། །དེ་རྒྱབ་འོད་ཟེར་ལྗང་གུའི་གུར་དུ་གྱུར། །འོད་ཟེར་མཐིང་ཀ་འཕྲོས་པས་དེ་དག་ཀུན། །བརྟན་པར་བྱས་ཤིང་དེ་རྒྱབ་མཐིང་ཀའི་གུར། ༧ །དེ་རྒྱབ་རྡོ་རྗེ་དཀར་པོའི་གུར་ཁང་དང་། །དེ་རྒྱབ་མེ་རི་དཀར་པོ་བར་མེད་འབར། །གུར་ཁང་དྲུག་གི་མཚམས་དང་འཁོར་ལོའི་ནང་། །མེ་ཏོག་ཨུཏྤལ་སྔོན་པོས་ཤིག་སེར་གང་། །གཞུང་དུ་ཟུང་འཇུག་སྐུ་ཡི་ཞེས་པའི་དོན། །དེ་ལྟར་ལྷ་དང་འཁོར་ལོ་གུར་ཁང་རྣམས། །སྣང་སྟོང་སྒྱུ་མ་ཆུ་ཟླ་འཇའ་ཚོན་ལྟར། །སེམས་ངོ་གཤིས་དང་མ་བྲལ་ངང་ནས་བསྒོམ། །འདི་ནི་སྒྲོལ་དཀར་སྤྲོས་མེད་རྫོགས་རིམ་སྟེ། །སྲུང་འཁོར་བསྒོམ་པ་འདི་ལས་ལྷག་པ་མེད། །སྲོད་ལ་ཐུན་རེ་མ་ཆག་བསྒོམ་ན་ནི། །བདུད་དང་འཕྲད་ཀྱང་ཕམ་པར་མི་འགྱུར་གསུངས། །མཐར་ནི་གུར་རྣམས་ཕྱི་ནས་རིམ་པ་བཞིན། །གཅིག་ནི་གཅིག་ཐིམ་ཐམས་ཅད་རང་ལ་ཐིམ། །རང་ཉིད་ཐུགས་ཀའི་ཡིག་འབྲུ་ཏིལ་ཐིམ། །དེ་ཡང་མཐའ་ནས་གྱེན་རྫོགས་སྟོང་པར་ཡལ། །ཅི་ཡང་མི་དམིགས་སྨྲ་བསམ་བརྗོད་དང་བྲལ། །
འཕགས་བཞི་སྐྱེད་བྱེད་ཆོས་སྐུ་ཡུམ་ཆེན་མོ། །དོན་དམ་སྒྲོལ་མ་རང་རིག་སེམས་ཉིད་དུ། །ངོ་ཤེས་དོན་དམ་སྐྱོང་བས་འཁོར་བ་སྒྲོལ། །ས་ལམ་ཡོན་ཏན་སྐྱེ་བའི་མ་ཡིན་པས། །དེ་ཕྱིར་སེམས་ཉིད་སྒྲོལ་མ་ཡིན་ཞེས་བྱ། །གལ་ཏེ་འདི་ཉིད་བསྙེན་སྒྲུབ་མཚམས་བྱེད་ན། །དཀར་གསུམ་ཤ་ཆང་མ་འདྲེས་གཏོར་མ་བཤམས། །ཨ་ཀཱ་རོ་ཡི་སྔགས་ཀྱིས་བྱིན་གྱིས་བརླབས། །བཛྲ་ས་མཱ་ཛ་ཡིས་སྤྱན་འདྲེན་ལ། །རྩ་སྔགས་བྷ་ལི་ཁཱ་ཧི་བཏགས་ལ་འབུལ། །ཨནྡྷུ་ལ་སོགས་སྔགས་ཀྱིས་མཆོད་བྱས་ནས། །མཆོད་བསྟོད་ནང་གི་སྒྲོལ་དཀར་བསྟོད་པ་འདོན། །གཤེགས་སམ་རྟེན་ལ་ཐིམ་སོགས་ཅི་བདེར་བསྒོམས། །ཐུན་དྲུག་ཐུན་བཞི་ཐུན་གསུམ་གང་འགྲུབ་བྱ། །ཐུན་མཚམས་དགེ་སྦྱོར་ཆག་མེད་གང་དགོས་བྱ། །ཚོགས་རྫས་མིན་པའི་ཤ་ཆང་སྒོག་ཙོང་སྤང་། །ཆབ་ལེན་ལ་སོགས་གཙང་སྦྲ་ཅི་ནུས་འབད། ༧ །རྟགས་ནི་མ་སྲིང་བུད་མེད་གོས་དཀར་ཅན། །མཛེས་སྡུག་རྒྱན་ལྡན་བཟའ་བཏུང་རིན་ཆེན་གཏེར། །ལོངས་སྤྱོད་དཀར་གསུམ་བདུད་རྩི་ལ་སོགས་ཟ། །མེ་ཏོག་དམར་པོ་ཁོ་ན་མ་ཡིན་པ། །མེ་ཏོག་ཚལ་དུ་ཕྱིན་དང་ཨུཏྤལ་འཐུ། །འཇིགས་སྐྲག་ལས་
ཐར་གྱེན་དུ་འགྲོ་བ་དང་། །གོས་དཀར་གྱོན་དང་རྒྱན་གོས་བཟང་པོ་ཐོགས། །ཉི་ཟླ་ཤར་དང་རོལ་མོའི་སྒྲ་སྒྲོག་དང་། །སཱཙྪ་ལུང་དུ་སྟོན་ནམ་་་་་་བརྒྱུན་ཉུང་ཤོས། །སཱཙྪ་དཀར་པོ་མང་པོ་མཐོང་བ་དང་། །སཱཙྪ་གྲངས་ཀ་མཐོང་བ་ཚེ་ཡི་ཚད། །སཱཙྪམཐོང་དང་བརྡབ་རྨིས་བར་ཆད་ཟློག །ཚེ་འདིར་ནད་གདོན་འཇིགས་པ་ཀུན་ལས་ཐར། །ཕྱི་མ་བདེ་ཆེན་ཞིང་ཁམས་པོ་ཏ་ལར། །སྐྱེས་ནས་ངན་སོང་སྒྲ་ཡང་མི་ཐོས་གསུངས། །གལ་ཏེ་ཟླ་བ་དྲུག་ཏུ་གཉིད་སྤངས་ནས། །བྱ་བ་གཞན་སྤང་རྩེ་གཅིག་བསྒོམས་བྱས་ན། །ལུས་འདི་ལ་ནི་འཆི་མེད་འགྲུབ་པར་གསུངས། །དཔེར་ན་ངག་གི་དབང་ཕྱུག་གྲགས་པ་བཞིན། །འདི་ཡི་ལས་ཚོགས་དཔག་ཏུ་མེད་ན་ཡང་། །ཉེར་མཁོ་སྟབས་བདེ་ཅུང་ཟད་འདིར་བརྗོད་ན། །ཆུ་དང་དགྲ་དང་ལམ་ངན་ལ་སོགས་པ། །འཇིགས་སྐྲག་ཡོད་པའི་ཕྱོགས་སུ་འགྲོ་བའི་དུས། །དེ་ཡི་ཐད་ཀྱི་ནམ་མཁར་སྒྲོལ་མ་བསྒོམས། །ཚུར་ལ་ཞལ་གཟིགས་སྐུ་ནི་ཤིན་ཏུ་ཆེ། །ཕྱག་གཡས་སྐྱབས་སྦྱིན་མཛད་པའི་ཞབས་སུ་ནི། །རང་དང་ཁལ་མ་ལ་སོགས་འགྲོ་བར་བསྒོམ། །ཨོཾ་ཏཱ་རེ་ཏུཏྟ་རེ་ཏུ་རེ། འཇིགས་པ་སྨྲེ་ཤཱནཾ་ཀུ་རུ་ཡེ་སྭཱ་ཧཱ། ཞེས་པའི་སྔགས་
འདི་བཟླས་ཤིང་འགྲོ་བའམ། །ཕྱག་འཚལ་ཉེར་གཅིག་སྒྲོལ་དཀར་བསྟོད་པ་འདོན། །དེ་ཡིས་འཇིགས་པ་ཐམས་ཅད་སྐྱོབས་པར་བཤད། །མགོ་ཐོན་ལམ་སྲུང་མཆོག་ཏུ་གྱུར་པ་ཡིན། །གལ་ཏེ་རང་དང་གཞན་དག་ན་གྱུར་ན། །ཡིད་ཀྱིས་སྒྲོལ་དཀར་ནམ་མཁར་སྤྱན་དྲོངས་ལ། །དེ་ཡི་སྐུ་ལས་བདུད་རྩི་འོ་མ་ལྟར། །ལྷུད་ལྷུད་བབས་པས་རང་ངམ་ནད་པ་ཡི། །ཚངས་བུག་ནས་ཞུགས་ལུས་ཀུན་ཐམས་ཅད་བཀྲུས། །ནད་གདོན་ཀུན་དག་ཤེལ་སྒོང་ལྟ་བུར་གྱུར། །ཨོཾ་ཏཱ་རེ་ཏུཏྟཱ་རེ་ཏུ་རེ་ཤཱནྟིཾ་ཀུ་རུ་ཡེ་སྭཱ་ཧཱ། ཅི་ནུས་བཟླས་རྗེས་སྒྲོལ་མ་ནད་པར་ཐིམ། །མིག་སོགས་ཚ་ནའང་སྔགས་ཆུའི་སྔགས་མཆིལ་བྱུག །དམིགས་པ་གསལ་ཞིང་དད་གུས་ཆེ་བ་ན། །ཐུན་རེ་བྷེ་པས་ནད་པ་ལ་ཕན་པར། །མང་པོ་བྱུང་ཞེས་བཀའ་གདམས་རྣམས་ཀྱིས་གསུངས། །རང་དང་བསྲུང་བྱ་འཁོར་ཚོགས་བཅས་པ་རྣམས། །དམག་ཇག་ཆོམ་རྐུན་རྒྱལ་པོའི་ཆད་པ་རྣམས། །ནད་གདོན་ཡམས་ནད་འཚེ་བའི་རིགས་གྱུར་ཀུན། །ཞི་ཞིང་བསྲུང་བའི་སྔགས་དམིགས་མཆོག་གྱུར་པ། །གོང་དུ་ཤེས་པའི་སྲུང་འཁོར་རྒྱ་ཆེན་བསྒོམ། །དེ་ནས་རང་ཉིད་སྒྲོལ་མའི་གཡས་གཡོན་མདུན། །
བསྲུང་བྱ་ཐམས་ཅད་ཟླ་བའི་གདན་ལ་བསྒོམས། །རང་གི་ཐུགས་ལས་འོད་ཟེར་འཕྲོས་པ་ཡིས། །སངས་རྒྱས་བྱང་ཆུབ་སེམས་དཔའ་ཐམས་ཅད་ནི། །སྒྲོལ་དཀར་སྐུར་གྱུར་ནམ་མཁར་སྤྱན་དྲངས་ལ། །ཀུན་ཀྱང་ཕྱག་ན་བུམ་པ་དཀར་པོ་ནི། །བདུད་རྩིའི་རྒྱུན་བབ་བསྲུང་བྱ་ཐམས་ཅད་ཀྱིས། །འཇིགས་པ་དེ་དག་འབྱུང་བའི་ལས་སྒྲིབ་དག །ནད་གདོན་ཀུན་དག་ཤེལ་སྒོང་ལྟ་བུར་གྱུར། །རང་གི་ཐུགས་ཀའི་འཁོར་ལོ་ཡིག་འབྲུ་ལས། །འོད་ཟེར་དཀར་པོ་དཔག་མེད་འཕྲོས་པ་ཡི། །འཇིགས་དང་གནོད་པ་ལ་སོགས་གང་ཡིན་དེ། །མྱུར་བར་བཅོ་ལྔའི་ཟླ་ཤར་ལྟར་གསལ་བསྒོམ། །ཨོཾ་ཏཱ་རེ་ཏུཏྟཱ་རེ་ཏུ་རེ་སོགས། །སྤྱི་ལ་འཇིགས་པ་བཅུ་དྲུག་ཅེས་པའམ། །བྱེ་བྲག་འཇིགས་པ་སྨྲེ་སོགས་ཤཱནྟིཾ་ཀུ་རུ་ཡེ་སྭཱ་ཧཱ། འཇིགས་དང་མ་བྲལ་བར་དུ་རྒྱུན་ཁྱེར་ལ། །ཤིན་ཏུ་སྐྲག་ན་ཞག་བདུན་མཚམས་བྱས་བསྒྲུབས། །ཐུན་མཚམས་གཏོར་བསྔོས་འདོད་གསོལ་གང་བདེར་བྱ། །འཇིགས་དང་བྲལ་བའི་རྨིས་ལྟས་གསལ་བའམ། །ཡང་ན་ལུང་བསྟན་ཚིག་དང་ཡི་གེ་མཐོང་། །དེ་བྱུང་འཇིགས་པ་གང་ལའང་ཡ་ང་མེད། །སྲུང་བའི་སྐུད་པ་སྔགས་མར་ལ་སོགས་པར། །ཨ་མྲྀ་ཏ་སོགས་སྔགས་
ཀྱིས་བསང་སྦྱངས་བྱ། །སྭ་བྷ་ཝ་དང་སྔགས་ཀྱིས་སྟོང་པར་སྦྱངས། །དེ་ནས་དེ་ཉིད་སྒྲོལ་མའི་སྐུར་བསྒོམས་ཏེ། །པོ་ཏཱ་ལ་ནས་ཡིད་ཀྱིས་སྤྱན་དྲངས་བསྟིམ། །ཡི་གེ་བཅུ་པོའི་སྭཱ་ཧཱའི་གོང་དེ་རུ། །བཏགས་ལ་སྔགས་ཆུ་སྔགས་མར་ལ་སོགས་ལ། །ནད་གདོན་སརྦ་ཤཱནྟཾ་ཀུ་རུ་སྦྱར། །སྲུང་སྐུད་རཀྵ་རཀྵ་སྦྱར་བར་བྱ། །རྟ་ཕྱུགས་ལ་སོགས་འཆ་བསྲུང་ཕྱིར་ཡིན་ན་ནི། །གཅན་གཟན་ཆོམ་རྐུན་སརྦ་རཀྟ་སྦྱར། །སྲུང་སྐུད་དཀར་པོར་མདུད་པ་ཉེར་གཅིག་བྱ། །མདུད་པ་རེ་ལ་སྒྲོལ་མ་རེ་རེ་བསྒོམ། །དེ་དག་གང་མང་སྔགས་བཟླས་ཕུ་བཏབ་ནས། །སྒྲོལ་དཀར་འོད་ཞུ་སོ་སོར་ཐིམ་དམིགས་ལ། །བཏགས་དང་བྱུག་སོགས་གང་དགོས་སྐབས་དང་སྦྱར། །འདི་ནི་རྒྱུད་དང་རྒྱ་གཞུང་ལ་སོགས་ནས། །གསུངས་པའི་མན་ངག་ཟབ་མོ་ཁྱབ་ཆེན་ཡིན། །མདོར་ན་འཇིགས་པ་ཐམས་ཅད་སེལ་བ་དང་། །སྒྲོལ་མ་ལས་ལྷག་གཅིག་ཀྱང་མེད་པ་དང་། ༧ །སྤྱན་ནི་སྐད་ཅིག་གློག་དང་འདྲ་མ་གསུངས། །མདོར་ན་འཇིགས་སྐྲག་གང་དང་གང་བྱུང་ཡང་། །སྒྲོལ་མའི་སྤྲུལ་པས་མི་སླེབས་མི་སྲིད་དེ། །འདི་ཡི་སྨོན་ལམ་ཐུགས་བསྐྱེད་སྟོབས་ཆེན་ཡིན། །འོན་ཀྱང་རང་ཉིད་
སྐྱབས་སུ་མ་སོང་ན། །དེ་རུ་ཕེབས་ཀྱང་སྐྱོབ་རྒྱུ་མེད་པ་ཡིན། །སྐྱབས་ཞུས་ན་ནི་སྔོན་གྱི་ལས་ངན་གྱི། །རྣམ་སྨིན་མ་གཏོགས་ཐམས་ཅད་སྐྱོབ་པར་ངེས། །ཞེས་གསུངས། ཤཱཀྱའི་དགེ་ཚུལ་པདྨ་ཐབས་མཁས་ཀྱིས། །བསྐུལ་ཕྱིར་རཱ་ག་ཨ་སྱས་ཐུན་མཚམས་ཤིག །སྨྲས་པ་བསྐུལ་བ་པོ་དེས་ཡི་གེར་བཀོད། །འཁྲུལ་པ་མེད་པས་བཤགས་བྱ་མ་མཆིས་ཤིང་། །དགེ་བས་འགྲོ་ཀུན་འཇིགས་ལས་གྲོལ་བར་ཤོག །སརྦ་མངྒ་ལཾ། །འདི་བྲིས་དགེ་བས་མཁའ་མཉམ་སེམས་ཅན་ཀུན། །འཕགས་མ་སྒྲོལ་མའི་གོ་འཕང་མྱུར་ཐོབ་ཤོག །བཀྲ་ཤིས་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།