སྒྲོལ་དཀར་བསྙེན་པའི་ཞལ་གདམས་ཉུང་ངུ་།
སྒྲོལ་དཀར་བསྙེན་པའི་ཞལ་གདམས་ཉུང་ངུ་བཞུགས་སོ།
ན་མོ་གུ་རུ་ཨཱརྱ་ཏཱ་རེ་ཡེ། འཇམ་དཔལ་རྩ་བའི་རྒྱུད་ཆེན་ལས། །བྱང་ཆུབ་སེམས་དཔའི་རིགས་རྣམས་ཀྱི། །རྗེས་སུ་རྗེ་བཙུན་སྒྲོལ་མ་འབྲངས། །རྟག་ཏུ་སྲུང་སྐྱོབ་བྱེད་པར་བཤད། །ཇོ་འབྲོམ་དྭགས་པོ་ནས་བཟུང་སྟེ། །ཞལ་གཟིགས་རྒྱུན་མི་འཆད་པའི་ལྷ། །ཡིད་བཞིན་འཁོར་ལོ་ཚེ་འཕེལ་མ། །ཚེ་བསྲིང་བར་ཆད་སེལ་བའི་མཆོག །མངོན་རྟོགས་རྒྱས་བསྡུས་གང་འདོད་འདོན། །ཡང་ན་དྲན་རྫོགས་ཡིད་ཀྱིས་བསྒོམས། །ཐུགས་ཀར་འཁོར་ལོ་ཟླ་བའི་མདོག །རྩིབས་བརྒྱད་གདན་ཐབས་གནས་པ་ཡི། །ལྟེ་བར་ཧཱུྃ་ཡིག་འགྲེང་ཐབས་གནས། །གཡས་
སུ་ཨོཾ་དང་གཡོན་དུ་ཧཱ། །ཧཱུྃ་དང་ཨོཾ་ཧཱའི་བར་དུ་ནི། །མ་མ་ཨཱ་ཡུཝཔུཎྱེ་ཛྙཱ་ན་པུཊྚི་ཀུ་རུ། །དེ་རྒྱབ་རྩིབས་བརྒྱད་སྟེང་དུ་ནི། །ཏཱ་རེ་ཏུཏྟ་རེ་ཏུ་རེ་སྭཱ། །དེ་རྒྱབ་མུ་ཁྱུད་རིམ་པ་གསུམ་ལ་ནི། །ནང་མར་དབྱངས་ཡིག་བཅུ་དྲུག་གཡོན་བསྐོར་ཏེ། །བར་མར་གསལ་བྱེད་སུམ་ཅུ་གཡས་སུ་བསྐོར། །དེ་རྒྱབ་རྟེན་འབྲེལ་སྙིང་པོ་གཡས་བསྐོར་ཏེ། །དེ་རྒྱབ་རྡོ་རྗེ་དཀར་པོ་ནས་ཙམ་བསྐོར། །དེ་རྒྱབ་མེ་རི་དཀར་པོ་སོར་གཅིག་ཚད། །ཀུན་ཀྱང་མུ་ཏིག་ཐིག་ལེ་བཞིན་དུ་དཀར། །འཁོར་ལོ་སྔགས་ཕྲེང་འཁོར་རྒྱུ་མེད་པ་སྟེ། །འོད་ཟེར་དཀར་པོ་ཕྱོགས་བཅུར་འཕྲོས་པ་
ཡིས། །རྒྱལ་བ་ཀུན་མཆོད་དེ་དག་བྱིན་རླབས་དང་། །འགྲོ་བའི་སྒྲིབ་བསལ་དེ་དག་ཚེ་བསོད་ནམས། །འབྱུང་ལྔ་ཉི་ཟླའི་བཅུད་བསྡུས་བདག་ལ་བསྟིམ། །དེ་ནི་བསྙེན་སྒྲུབ་དམིགས་པ་རྒྱས་པ་སྟེ། །རྒྱུད་དང་རྒྱ་གཞུང་བླ་མའི་མན་ངག་ཚང་། །ཇོ་བོ་རྗེ་ཡི་ལུགས་ཀྱི་བསྡུས་པ་ནི། །རང་ཉིད་སྒྲོལ་དཀར་གསལ་བའི་ཐུགས་ཀ་རུ། །འཁོར་ལོ་དཀར་པོ་རྩིབས་བརྒྱད་མུ་ཁྱུད་མེད། །སྟེང་གི་ཐད་དུ་ཨོཾ་ཡིག་བྱ་ལྟར་ལྡིང་། །འཁོར་ལོའི་ལྟེ་བའི་འོག་ཐད་ཧཱ་ཡིག་སྟེ། །རྩིབས་བརྒྱད་སྟེང་དུ་རྩིབས་ལ་མ་རེག་ཙམ། །ཏཱ་རེ་ཏུཏྟཱ་རེ་ཏུ་རེ་སཱ། །ཡིག་ངོ་ནང་དུ་བསྟན་ཏེ་གཡས་སུ་བཀོད། །འཁོར་ལོ་གཡས་སུ་འཁོར་བས་སྡིག་སྒྲིབ་བསལ། །འབྲུ་བརྒྱད་གཡོན་དུ་འཁོར་བས་ཚེ་བསོད་འཕེལ། །ཨོཾ་ཏཾ་ཧཱ་གསུམ་མི་གཡོ་བརྟན་པར་གནས། །སྒྲོལ་དཀར་དམིགས་རིམ་བསྡུས་པ་ཡིན། །དེ་ལྟར་དམིགས་རིམ་རྒྱས་བསྡུས་གང་བྱེད་ཀྱང་། །ཡིག་བཅུ་ཁོ་ན་བཟླས་པ་བསྙེན་པ་སྟེ། །ཨོཾ་ཏཱ་རེ་ཏུཏྟ་རེ་ཏུ་རེ་མ་མ་ཨཱ་ཡུཔུཎྱ་ཛྙཱ་ན་པུཏྟིཾ་ཀུ་རུ་སྭཱ་ཧཱ། ཡིག་བཅུ་འབུམ་ཕྲག་ཚར་ནས་འདི་ཉིད་འདོན། །དེ་ནི་སྒྲོལ་མ་དཀར་མོའི་ཚེ་སྒྲུབ་ཡིན། །རང་ངམ་ནད་པའི་མདུན་གྱི་ནམ་མཁའ་ལ། །
སྒྲོལ་མ་དཀར་མོ་སྐད་ཅིག་དྲན་རྫོགས་བསྒོམས། །པོ་ཏ་ལ་ནས་ཡིད་ཀྱིས་སྤྱན་དྲངས་བསྟིམ། །ཨརྒྷཾ་ལ་སོགས་སྔགས་དང་ཡིད་ཀྱིས་མཆོད། །ཨོཾ་འཁོར་བ་ལས་སྒྲོལ་ཏཱ་རེ་མ། །ཏུཏྟཱ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ལ་ཡང་ཕྱག་འཚལ་བསྟོད། །ནད་ཀྱི་འཇིགས་ལས་བསྐྱབ་ཏུ་གསོལ། །ཅེས་བརྗོད་དད་གུས་རྩེ་གཅིག་བྱ། །སྒྲོལ་མའི་སྐུ་ལས་བདུད་རྩིའི་རྒྱུན། །འོ་རྐྱལ་ཁ་ལྷུད་བཞིན་དུ་བབས། །རང་ངམ་ནད་པའི་ནད་དང་གདོན། །དག་ཅིང་ཤེལ་སྒོང་ལྟ་བུར་གྱུར། །ཨོཾ་ཏཱ་རེ་ཏུཏྟཱ་རེ་ཏུ་རེ་ནད་སརྦ་ཤཱནཾ་ཀུ་རུ་ཡེ་སྭཱ་ཧཱ། སྔགས་དེ་བརྒྱ་ལས་མི་ཉུང་བར་བཟླས། །སྒྲོལ་མ་འོད་ཞུ་ནད་པར་བསྟིམ། །དད་ལྡན་དམིགས་པ་གསལ་ན་ནི། །ཐུན་རེས་ནད་ལས་གྲོལ་འགྱུར་ཞེས། །བཀའ་གདམས་བླ་མ་རྣམས་ཀྱིས་གསུངས། །བདག་ཀྱང་ངེས་ཤེས་ལན་མང་ཐོབ། །ནད་ཀུན་སེལ་བའི་གདམས་པ་ཟབ། ༈ །གདོན་གྱི་རྩུབ་ཆ་ཆེ་དྲགས་ན། །གདོན་དེ་ཡིད་ཀྱིས་མདུན་དུ་བཀུག །སྭ་བྷཱ་ཝ་ཡིས་སྟོང་པར་སྦྱངས། །དེ་ཉིད་སྒྲོལ་མའི་སྐུ་རུ་བསྒོམ། །པོ་ཏ་ལ་ནས་སྤྱན་དྲངས་བསྟིམ། །རང་གི་ལུས་དང་ལོངས་
སྤྱོད་ཀུན། །མཎྜལ་བྱས་ཏེ་ལན་གསུམ་འབུལ། །ཨརྒྷཾ་ལ་སོགས་སྔགས་ཀྱིས་མཆོད། །ལྷ་དང་ལྷ་མིན་ཅོད་པན་སོགས། །བསྟོད་པ་ཤོ་ལོ་ཀ་གཅིག་བྱ། །རྗེ་བཙུན་འཕགས་མ་སྒྲོལ་མ་ཡིས། །བདག་གི་བར་ཆད་ཐམས་ཅད་སོལ། །ཚེ་དང་བསོད་ནམས་ཐམས་ཅད་འཕེལ་བར་མཛོད། །ཨོཾ་ཨཱརྱ་ཏཱ་རེ་བཛྲ་མུཿ ཞེས་བརྗོད་སེ་གོལ་གདབ་པ་ཡིས། །པོ་ཏ་ལ་རུ་གཤེགས་པར་བསམ། །དེ་འདྲ་ཡང་ཡང་བྱས་པ་ཡིས། །གདོན་ནི་ཇི་ལྟར་རྩུབ་གྱུར་ཀྱང་། །ཇེ་འཇམ་ཕྱིས་ནས་གདོན་མི་འབྱུང་། །འདྲེ་ངན་གཡང་དུ་ལེན་ཐབས་ཟབ། །སྔར་གྱི་དུས་སམ་ནམ་ཡང་རུང་། །རང་ཉིད་སྒྲོལ་མར་གསལ་བ་ཡི། །སྐུ་ཡི་འོད་ཟེར་ལས་གྲུབ་པའི། །ཕྱི་རོལ་རྡོ་རྗེ་མེ་རིས་གུར། །དེ་ནང་འཁོར་ལོ་རྩིབས་བརྒྱད་པ། །གུར་ཐབས་སྦྱབ་ཆོལ་ཁ་སྦྱོར་བཞིན། །སྟེང་དང་འོག་ཏུ་རྩིབས་གཉིས་རེ། །ཕྱོགས་མཚམས་བརྒྱད་དུ་རྩིབས་བརྒྱད་ནི། །རལ་གྲི་སོ་གཉིས་རྩེ་ལྟར་རྣོ། །སྔ་དྲོ་གཡས་དང་ཕྱི་དྲོ་གཡོན། །དྲག་ཏུ་འཁོར་བས་གནོད་བྱེད་གཏུབས། །སྟེང་འོག་རྩིབས་ནང་ཨོཾ་དང་ཧཱ། །ཡིག་འབྲུ་རེ་ཙམ་མེ་དཔུང་འབར། །དེ་དབུས་རང་ཉིད་སྒྲོལ་དཀར་གྱི། །ཕྱག་གཡས་མཆོག་སྦྱིན་
མཛད་པ་ནི། །ཞབས་ན་བསྲུང་བྱ་ཚུད་པར་བསྒོམ། །ཡི་གེ་བཅུ་པའི་སྔགས་འཇུག་ཏུ། །བདག་དང་བསྲུང་བྱ་ལ་རཀྵ་རཀྵ། །དེ་ཉིད་སྒོམ་བཟླས་བརྩོན་པ་ན། །བདུད་དང་འཕྲད་ཀྱང་མི་ཕམ་གསུངས། །སྒྲོལ་དཀར་བསྲུང་ཐབས་ཤིན་ཏུ་ཟབ། །དེ་ནས་འཇིགས་པ་ཀུན་སྐྱོབ་ནི། །དམིགས་པ་གོང་དང་འདྲ་བ་ལས། །འཁོར་ལོ་ཡངས་ཤིང་རྒྱ་ཆེའི་ནང་། །རང་གི་གཡས་གཡོན་མདུན་རྣམས་སུ། །བསྲུང་བྱ་གང་ཡོད་ཐམས་ཅད་འཁོད། །རང་ཉིད་སྒྲོལ་དཀར་ཐུགས་ཀ་ནས། །འོད་དཀར་ཟླ་བ་ཤར་ལྟར་འཕྲོས། །ཕྱོགས་བཅུའི་སངས་རྒྱས་བྱང་སེམས་ཀུན། །མདུན་གྱི་ནམ་མཁར་སྤྱན་དྲངས་ལ། །ཐམས་ཅད་སྒྲོལ་དཀར་སྐུར་གྱུར་ཏེ། །ཕྱག་གཡས་བུམ་པ་དཀར་པོའི་ནང་། །བདུད་རྩི་དཀར་པོའི་ཆུ་རྒྱུན་བབ། །རང་དང་བསྲུང་བྱ་ཐམས་ཅད་ཀྱི། །ཚེ་རབས་བསྐལ་པ་གྲངས་མེད་ནས། །འཇིགས་པ་འབྱུང་བའི་ལས་སྒྲིབ་དང་། །ད་ལྟའི་འཇིགས་པ་གང་ཡིན་པ། །ཐམས་ཅད་བཀྲུས་ཤིང་དག་གྱུར་ཏེ། །དྲི་མེད་ཤེལ་སྒོང་བཞིན་གྱུར་བསམ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྒྲེ་ཤཱནྟཾ་ཀུ་རུ་སྭཱ་ཧཱ། རྨེ་ཞེས་པའི་ས་དེ་རུ། །ནད་དང་གདོན་དང་
རིམས་ཡམས་དང་། །གཟའ་དང་རྒྱལ་པོའི་ཆད་པ་དང་། །དུག་མཚོན་མེ་ཆུའི་འཇིགས་པ་སོགས། །དོ་གལ་གང་ཆེ་སྦྱར་བར་བྱ། །ཀུན་ལ་འཇིགས་པ་བཅུ་དྲུག་བརྗོད། །དེ་ལྟར་ཞག་བདུན་ལ་སོགས་པ། །སྒྲུབ་པའི་ཉམས་དང་རྨི་ལམ་དུ། །སྐྲག་མི་དགོས་པའི་ལུང་བསྟན་ནམ། །ཡང་ན་བརྡ་ནི་སྟོན་པར་གྱུར། །དེ་བྱུང་ཉེས་སྐྱོན་མི་འབྱུང་སྟེ། །འཇིགས་སྐྱོབ་ལས་ཚོགས་ངོ་མཚར་ཅན། །ལན་མང་མྱོང་བས་འགྲུབ་པ་ཡིན། ༈ །འདི་ནི་བྱ་རྒྱུད་ཡིན་པའི་ཕྱིར། །སྒྲུབ་ཚེ་ཤ་ཆང་སྤང་དགོས་ཀྱང་། །གལ་ཏེ་སྤང་བར་མ་འཕྲོད་ན། །འོད་འབར་ཡང་ཟབ་ལ་སོགས་ཀྱི། །ཚོགས་འཁོར་ཉུང་ངུ་བྱས་པས་འཐུས། །ཚོགས་ཤ་ཚོགས་ཚང་འཛེམ་མི་རུང་། །རྒྱ་གར་རྒྱལ་རིགས་པཎྜི་ཏ། །ངག་གི་དབང་ཕྱུག་གྲགས་པ་དེ། སྒྲོལ་མ་དཀར་མོས་རྗེས་སུ་བཟུང་། །འཆི་བ་བསླུ་བ་རྒྱས་པ་ནས། །སྒྲོལ་མ་དཀར་མོའི་སྒྲུབ་པ་བསྡུས། །དེ་ལས་བྱུང་བའི་འཆི་བསླུ་ཡི། །སྦྱིན་སྲེག་ལས་བཞི་རྒྱས་པ་།སྤྱི་ལྟར་ལེགས་པར་ཤེས་བྱས་ལ། །ཁྱད་པར་རྒྱས་པའི་ཐབ་གྲུབ་ན། །ཁ་ཁྱེར་རིན་པོ་ཆེ་ཡིས་མཚན་པ་ཡི། །དབུས་སུ་འཁོར་ལོ་རྩིབས་བརྒྱད་དཀར། །ལྟེ་བར་ཧཱུྃ་ཡིག་
མཚན་པ་བྲི། །དེ་སྟེང་ཤུག་ཤག་གྲུ་བཞི་བརྩེགས། །ཡམ་ཤིང་འོམ་བུ་སོགས་ལ་བྱ། །ཐབ་ཀྱི་དབུས་སུ་མེ་ལྷ་ནི། །མེ་ལྷའི་ཐུགས་ཀར་སྒྲོལ་དཀར་མོ། །ཐམས་ཅད་སྦྱིན་སྲེག་རྒྱས་པ་ལྟར། །ཡམ་ཤིང་མར་ཁུ་ཅི་ལྕོགས་འབུལ། །རམ་རྩི་བརྒྱ་དང་རྩ་བརྒྱད་ནི། །སྔགས་འདི་ཡིས་ནི་འབུལ་བར་བྱ། །ཨོཾ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ། ཚེ་ཕུན་སུམ་ཚོགས་པ་པུཏྟིཾ་ཀུ་རུ་སྭཱ་ཧཱ། རིམ་རྩི་ལོ་མ་རྙེད་ན་བཟང་། །མ་རྙེད་ན་རྩ་བ་རྙེད་ཀྱང་ཆོག །སྦྲང་རྩི་ཆུ་ཚན་ནང་དུ་སྤྱོད། །དེ་ཉིད་ཞོ་ཕུད་ཉུང་ངུ་བླུགས། །ཞོ་དེ་རམ་རྩིའི་ནང་དུ་བཏབ། །དེ་ནི་བསྲེག་རྫོ་ས་གཙོ་བོ་ཡིན། །ཡམ་ཤིང་དུརྦ་རམ་རྩི་གསུམ། །ཡེ་ཤེས་འཇིག་རྟེན་མེ་ཡི་ལྷ། །གཏོར་མ་གཉིས་དང་དེ་ལས་གཞན། །མེད་པར་སྦྱིན་སྲེག་བསྡུས་པ་སྟེ། །རྫས་གཅིག་བསྟན་པས་སྦྱིན་སྲེག་ཟེར། །དེ་ལས་གཞན་ཡང་གང་འཛོམ་ཙམ། །འབུལ་བར་སྦྱིན་སྲེག་འབྲིང་པོ་ཡིན། །སྦྱིན་སྲེག་རྗེས་རྣམས་ཐམས་ཅད་བཤམས། །རེ་རེ་ལའང་བརྒྱ་རྩ་རེ་འབུལ། །དེ་ནི་སྦྱིན་སྲེག་རྒྱས་པ་ཡིན། །དེ་ལྟར་བྱས་པའི་ཕན་ཡོན་ནི། །སྔོན་གྱི་ལས་མཐུ་ལས་བྱུང་བའི། །འཆི་བའང་ངེས་པར་བཟློག་
འགྱུར་ཞེས། །རྒྱ་གཞུང་ཉིད་ནས་གསུངས་པ་ཡིན། །འདི་ནི་དེ་ཡི་ལས་ཚོགས་ཏེ། །ཞིབ་པར་ཁོ་བོས་བྱས་པ་ཡི། །ལས་བཞིའི་སྦྱིན་སྲེག་དཔེའུ་རིས་བཅས། །སྔར་ནས་ཕྱག་ཏུ་འབུལ་ཡོད་པ། །དེ་ལ་གཟིགས་རྟོགས་ཞིབ་པར་མཛོད། །འདི་ན་ཡི་གེ་དཔེ་ཆ་མེད། །དབོན་པོའི་རེ་ན་བཟུང་ཟིན་ལས། །འདི་ན་མི་འདུག་ངེས་པ་ཡིན། །སྤྲེལ་ལོ་འདི་ཡི་སྦྱིན་སྲེག་ནི། །གཞན་ལ་བྱེད་ནི་བཅོལ་ན་ལེགས། །དྭ་ཐོགས་མེ་སྒོ་མི་མཐུན་པས། །སྦྱིན་སྲེག་ཡང་ཡང་གཟིགས་མི་བྱ། །བྱ་ལོ་ཚེས་ནས་ཉིད་ཀྱིས་ཀྱང་། །བསྙེན་པའི་ཁ་སྐོང་ལ་དམིགས་ནས། །སྦྱིན་སྲེག་ཅི་འགྲུབ་བླུགས་ན་ལེགས། །དེ་སྐད་ནང་ཆེན་ཨ་ཉོག་ཅེས། །སེམས་དཔའ་ཆེན་པོའི་བཀས་བསྐུལ་ནས། །རཱ་ག་ཨ་སྱས་སྨྲས་པ་ལྟར། །པདྨ་ཡེ་ཤེས་ཞེས་བྱས་བྲིས། །དགེ་བས་མཐོང་ཐོས་དྲན་རེག་ཀུན། །འཇིགས་པ་ཀུན་ལས་ཐར་གྱུར་ནས། །ཡིད་བཞིན་འཁོར་ལོ་འགྲུབ་གྱུར་ཅིག །འཆི་བསླུའི་དེ་ཡི་སྦྱིན་སྲེག་དམིགས་པ་ནི། །མེ་ལྷ་དང་ནི་སྒྲོལ་དཀར་གྱི། །སྐུ་ལས་འོད་ཟེར་དཀར་པོ་ནི། །འཇམ་ཞིང་བདེ་བའི་རེག་བྱ་ཅན། །འཕྲོས་ནས་ཚངས་བུག་ནས་ཞུགས་པས། །ལུས་ཀུན་ཁྱབ་པས་དུས་
མིན་པར། །འཆི་བས་རྐྱེན་རྣམས་ཐམས་ཅད་ནི། །བ་མོར་ཉི་ཟེར་ཕོག་པ་ལྟར། །འོད་ཟེར་ལྕགས་ཀྱུའི་རྣམ་པ་དེས། །ལུས་གང་ཚེ་ཡི་དངོས་གྲུབ་ཐོབ། །དེ་ལྟར་བསྒོམ་ཞིང་སྦྱིན་སྲེག་བླུགས། །ཐག་རིང་ཕྱོགས་སུ་འགྲོ་བའི་ཚེ། །འགྲོ་བའི་ཕྱོགས་ཀྱི་ནམ་མཁའ་ལ། །སྒྲོལ་མ་ཚུར་ལ་ཞལ་གཟིགས་པས། །ཕྱག་གཡས་སྐྱབས་སྦྱིན་མཛད་པ་ཡི། །འོག་ཏུ་ཡར་ལ་འགྲོ་བར་བསྒོམས། །སྔགས་སམ་བསྟོད་པ་འདོན་ཅིང་འགྲོ། །མགོ་ཐོན་ལམ་བསྲུང་ཟབ་མོ་ཡིན། །ཆུ་དང་གཡང་ས་ལ་སོགས་པ། །དམིགས་པ་གསལ་ན་ཤིན་ཏུ་ཕན། །སརྦ་མངྒ་ལཾ། །བཀྲ་ཤིས། ཞལ་དྲོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།