བླ་བསླུ།
བླ་བསླུ་བཞུགས་སོ། །འདིའི་ཆས་ལ། བླ་རྟགས་བླ་རྐང་བླ་གཡུ་བླ་མཚོ། བླ་བདུད་དང་ངར་གླུད་དགོས། འདིའི་ཆས་ལ་བླ་ཤིང་དཔག་བསམ་ལྗོན་ཤིང་། ཆུ་བོ་བརྒྱ་འབབ། བླ་བདུད་ནག་པོ། བླ་གླུད་ཆས་སྟན། ཤྭ་དཀར་ནག །བླ་མཚོ་བླ་རྟགས། བླ་གཡུ། བླ་རྐང་། སྲུང་མདའ་དཀར་པོ། ཚེ་ལྷ་དཀར་པོ་བྱའོ།
ཡི་དམ་ལྷ་ལ་ཕྱག་འཚལ་ལོ། །འདིར་བླ་གླུད་བྱེད་པ་ལ། བླ་གླུད་ཕོ་མོ་གང་ཡིན་པའི་གཟུགས་ཆས་དང་ལྡན་པར་བྱས། གྲུབ་ན་ཚེ་བདུད། བླ་རྟགས་གཡག་གང་ཡིན་པ་དང་། དེའི་བླ་བདུད་ཀྱི་མགོ་ཅན་བྱས་ལ་བཞག །བླ་རྐང་རྟེན་དུ་བཞུགས། གཞན་སྤྲོས་བཅས་ལ་ཤྭ་དང་། བླ་མཚོ་ནང་དུ་བླ་རྟགས་མར་ལ་བཅས་ཏེ་བཞག །བདེན་པའི་སྟོབས་ཀྱིས་བླ་ཁྱེར་མི་གདོན་བགེགས་བཀུག་གཞུག་བྱ། སྔགས་དྲུག་ཕྱག་དྲུག་གིས་བྱིན་བརླབས་བྱས་ལ། མདའ་དར་ལག་ཏུ་ཐོགས་ལ་འདི་སྐད་དོ། །ཧཱུྃ། ང་ནི་དུས་གསུམ་བཞུགས་པ་ཡི། །ང་ནི་དུས་གསུམ་སྔོན་དུ་བྱུང་། །ང་ནི་དུས་གསུམ་ད་ལྟར་གནས། །ང་ནི་དུས་གསུམ་སླད་ནས་འབྱོན། །དུས་
གསུམ་ཐམས་ཅད་ང་ཡི་དབང་། །ང་ནི་ཁྲག་འཐུང་ཆེན་པོ་སྟེ། །ཁམས་གསུམ་ཤ་ཁྲག་ང་ཡི་དབང་། །ང་ནི་རུས་འཆའ་ཆེན་པོ་སྟེ། །སྲིད་གསུམ་ཀེང་རུས་ང་ཡི་བདག །ང་ནི་ཤ་ཟ་ཆེན་པོ་སྟེ། །དབུགས་དང་བཀྲག་མདངས་ང་ཡི་བདག །དེ་ཕྱིར་སྣང་སྲིད་ལྷ་འདྲེ་ཀུན། །ང་ཡི་བཀའ་ལས་མ་འདའ་བར། །འདིར་བྱོན་ཚེ་སྲོག་གླུད་འདི་བཞེས། །ཚངས་པ་བརྒྱ་བྱིན་མན་ཆད་དང་། །ས་འོག་ལྟོ་འཕྱེ་ཡན་ཆད་ཀྱི། །སྣང་ཞིང་སྲིད་པའི་ལྷ་འདྲེ་ཀུན། །ས་ཆུ་བར་སྣང་ལ་གནས་པའི། །བྱམས་དང་གདུང་སེམས་ལྡན་པ་དག །གནོད་ཅིང་སྡང་
སེམས་ལྡན་པ་རྣམས། །དེ་ཕྱིར་ཐར་དང་གླུད་འདི་འགྱེད། །དེ་རིང་སྲོག་དང་བླ་བསླུའོ། །རིགས་དྲུག་སེམས་ཅན་ཐམས་ཅད་ལ། །བཅོམ་ལྡན་འདས་ཀྱི་བཀའ་ཡོད་ཀྱིས། །འདིར་མི་ཡོངས་བའི་དབང་ཡང་མེད། །བཀའ་ལ་མི་ཉན་གང་ཡང་མེད། །འབྲུ་བཅུད་བདུད་རྩི་གསེར་སྐྱེམས་བཞེས། །མི་ཡོངས་བ་ཡི་དབང་ཡང་མེད། །ལན་ཆགས་གླུད་ཀྱི་གཏོར་མ་ལ། །མི་ཟ་བ་ཡི་དབང་ཡང་མེད། །ངར་ལ་དེ་ནི་སྤྱན་འདྲེན་ན། །གླུད་ལ་དེ་ནི་ད་ཚུར་གཤེགས། །ཨ་ནཱི་སུ་ཏྲི་པྲ་དུ་ཛཿ ཨ་ཀཆུ་ཡ་ཛ་ཛཿ ཨ་གརྫ་ཧཱུྃ། །ཅེས་སྤྱན་དྲངས། གླུད་བསྔོ། ཧཱུྃ། །དེ་རིང་ཁམས་གསུམ་དབང་དུ་བསྡུས། །དེ་རིང་སྲིད་གསུམ་ཟིལ་གྱིས་གནོན། །དེ་རིང་དུག་གསུམ་རྩད་ནས་གཅོད། །དེ་རིང་སྐུ་གསུམ་ལྷུན་གྱིས་གྲུབ། །དེ་རིང་སྲིད་པའི་དལ་ཁ་སྒྱུར། །དེ་རིང་བླ་དང་སྲོག་བསླུའོ། །བདག་དང་རྒྱུ་སྦྱོར་ཡོན་བདག་གི །བླ་སྲོག་ཚེ་དང་དབང་ཐང་རྣམས། །ཚངས་པའི་འཇིག་རྟེན་མན་ཆད་དང་། །།ན་རག་དམྱལ་ཁམས་ཡན་ཆད་ཀྱི། །གདོན་བགེགས་ཇི་སྲིད་ཡོད་པ་ཡི། །གང་གི་ལག་ན་འདུག་ཀྱང་རུང་། །གཤིན་རྗེའི་བཀའ་སྒྲོམ་ནང་དུ་བཅུག་
པའམ། །དུར་ཁྲོད་བླ་རྐུན་བདག་མོའི་བླ་ཁྱེར་རམ། །གཤེད་བདག་གྲི་ཐོགས་ལ་སོགས་ཀྱིས། །སྡེ་བརྒྱད་གང་གི་ལག་ཏུ་འདུག་ཀྱང་རུང་། །དེ་རིང་བླ་གླུད་འབུལ་ལོ་བླ་སྲོག་བསླུ། །དུས་གསུམ་བདེ་གཤེགས་གཟུ་དང་དཔང་། །དེ་རིང་གླུད་འདི་བཞེས་ལ་མི་འདི་གློད། །བླ་གླུད་འབྲུ་མཆོག་ངར་གྱི་མི། །རྒྱུ་ནི་འབྲུ་སྣ་ལྔ་ལ་བྱས། །བསེ་རིམ་བམ་པོ་ཤ་རུ་བསྔོ། །ལུང་ཐང་མིག་ལ་ཞོ་ཤའི་སྙིང་། །དུང་ཆེན་གྲམ་པ་རུས་ལ་བསྔོ། །མཚལ་མཆོག་ལི་ཁྲི་ཁྲག་ཏུ་བསྔོ། །སོ་འདི་མགྲོན་བུ་ཐང་བཞེད་ལ། །ཟངས་ཀྱི་རྣ་བ་མཐིང་ཤུན་ཤངས། །ལྕམ་ཟེར་སྐུ་ལ་བྱི་རུའི་ལྗགས། །དབང་པོ་ལག་པ་ཟངས་ལྕགས་རྐང་། །མགོ་ལ་ཐོད་བཅིངས་ལུས་གོས་བཀོན། །སྐེད་ལ་ལིང་བཅིངས་ཞབས་ལ་ལྷམ། །མཛེས་པའི་ངར་གླུད་ངར་མི་འདི། །སྔགས་དང་ཕྱག་རྒྱས་བྱིན་གྱིས་བརླབས། །སྐྱེ་མཆེད་བཅུ་གཉིས་འདི་ལ་ཚང་། །ཁམས་ཆེན་བཅོ་བརྒྱད་འདི་ལ་ཚང་། །དབང་པོ་རྣམ་ལྔ་འདི་ལ་ཚང་། །།འདི་ནི་མི་ལས་དགའ་བའི་གླུད། །ཕོ་གླུད་ངར་མའི་ཆས་ཙམ་ན། །གཡུ་སྨུག་མགོ་ལ་དར་གོས་གསེར་དུ་ཚང་། །སྟག་རལ་
གཡས་ལ་གཟིག་ཤུབས་གཡོན། །སྐྱེས་བུ་དགྲ་ལ་ཆས་པ་འདྲ། །སྐྱེས་པ་ཕོ་ཡི་གླུད་དུ་འབུལ། །མོ་གླུད་ངར་མའི་ཆས་ཙམ་ན། །གསེར་དངུལ་མགོ་ལ་དར་ཟབ་ལུས། །རིན་ཆེན་རྒྱན་ཆ་སྣ་ཚོགས་མཛེས། །མོ་བཙུན་བག་ལ་ཆས་པ་འདྲ། །ཟ་མ་མོ་ཡི་གླུད་དུ་འབུལ། །རིན་ཆེན་ངར་གྱི་མི་ཆེན་ལ། །ལོ་ཡི་འཆི་སྐག་ཡོད་པ་ཡང་། །བླ་གླུད་ངར་མི་འདི་ལ་སྤོ། །ཟླ་བའི་འཆི་སྐག་ཡོད་པ་ཡང་། །བླ་གླུད་ངར་མི་འདི་ལ་སྤོ། །ཞག་གི་འཆི་སྐག་ཡོད་པ་ཡང་། །བླ་གླུད་ངར་མི་འདི་ལ་སྤོ། །སྤར་ཁའི་འཆི་སྐག་ཡོད་པ་ཡང་། །བླ་གླུད་ངར་མི་འདི་ལ་སྤོ། །སྨེ་བའི་འཆི་སྐག་ཡོད་པ་ཡང་། །བླ་གླུད་ངར་མི་འདི་ལ་སྤོ། །མགོ་ནད་སྤྲིན་ལྟར་འཐིབ་པ་ཡང་། །བླ་གླུད་ངར་མི་འདི་ལ་སྤོ། །རྣ་བ་འོན་དང་འཐིབ་པ་དེ། །བླ་གླུད་འདི་ཡི་རྣ་བར་སྤོ། །ལྕེ་ནད་འཚུབ་ཅིང་གཡོ་བ་ཡང་། །བླ་གླུད་འདི་ཡི་ལྕེ་ལ་སྤོ། །གློ་བ་ལུག་ལྟར་འཁུན་པ་ཡང་། །བླ་གླུད་འདི་ཡི་གློ་བར་སྤྲོ། །མཆིན་ནད་ཉ་ལྟར་འགྱུར་བ་དེ། །བླ་གླུད་འདི་ཡི་མཆིན་པར་སྤྲོ། །མཁལ་ནད་ཆུ་ལྟར་ཁོལ་བ་དེ། །བླ་གླུད་འདི་ཡི་མཁལ་མར་སྤྲོ། །ནང་ཆ་བུ་དགུ་ན་བ་
དེ། །བླ་གླུད་འདི་ཡི་ནང་ཆར་བསྔོ། །རྐང་ལག་གྲུམ་ཞིང་ན་བ་དེ། །བླ་གླུད་འདི་ཡི་རྐང་པར་སྤོ། །བླ་སྲོག་བསླུ་བའི་གླུད་དུ་འབུལ། །རྒྱས་པར་སྤྲོ་ན་སྣང་སྲིད་སྤྱི་བསྐང་བྱ། ཧཱུྃ། སྲིད་པའི་སྐོས་རྗེ་དམག་དཔོན་དང་། །གནམ་ལྷ་བྱང་ཆུབ་མན་ཆད་ནས། །རྒྱལ་པོ་ཐེའུ་ཡན་ཆད་དུ། །བླ་གླུད་འབུལ་ལོ་བླ་སྲོག་བསླུ། །གླུད་འདི་བཞེས་ལ་མི་འདི་གློད། །ཧཱུྃ། རེ་ལྡེ་མགོ་ཉག་མན་ཆད་ནས། །ནག་པོ་རབས་ཆད་ཡན་ཆོད་དུ། །བདུད་རྣམས་མ་ལུས་ཐམས་ཅད་ལ། །བླ་གླུད་འབུལ་ལོ་བླ་སྲོག་། བསླུ། །གླུད་འདི་འབུལ་ལོ་མི་འདི་གློད། །ཧཱུྃ། སྐོས་རྗེ་བཙན་པོ་མན་ཆོད་ནས། །ཤར་བ་ཕྲེང་ཐོགས་ཡན་ཆད་དུ། །བཙན་རྣམས་མ་ལུས་ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། རྨུ་རྗེ་བཙན་པོ་མན་ཆད་ནས། །རྨུ་བཙན་ལེགས་སྦྱོར་ཡན་ཆད་དུ། །རྨུ་རྣམས་མ་ལུས་ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། དགའ་བོ་འཇོག་པོ་མན་ཆད་ནས། །ནེའུ་སིང་དུང་སྐྱོང་ཡན་ཆད་དུ། །ཀླུ་རྣམས་མ་ལུས་
ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། གཟའ་ཆེན་བརྒྱད་པོ་མན་ཆད་ནས། །རྒྱུ་སྐར་ཉེར་བརྒྱད་ཡན་ཆད་དུ། །གཟའ་རྣམས་མ་ལུས་ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། གཙོ་བོ་ཡུམ་དྲུག་མན་ཆད་ནས། །འཇིག་རྟེན་མཁའ་འགྲོ་ཡན་ཆད་དུ། །མཁའ་འགྲོ་ཤུགས་འགྲོ་ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། མ་བདུད་རྒྱལ་མོ་མན་ཆད་ནས། །གྲོང་རྒྱུ་བསེན་མོ་ཡན་ཆད་དུ། །མ་མོ་མ་ལུས་ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ཀོང་བཙུན་དེ་མོ་མན་ཆད་ནས། །འབྲོག་བཙན་འཁོར་འདུས་ཡན་ཆད་དུ། །སྐྱོང་མ་ཡ་མ་ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། སྲོག་བདག་རྒྱལ་པོ་མན་ཆད་ནས། །བེ་དཀར་རྒྱལ་པོ་ཡན་ཆད་དུ། །རྒྱལ་པོའི་སྡེ་ཚོགས་ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། རྡོ་རྗེ་
ལེགས་པ་མན་ཆད་ནས། །ཐེའུ་ཕྲ་མོ་ཡན་ཆད་དུ། །བགེགས་རྣམས་མ་ལུས་ཐམས་ཅད་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ཚངས་པ་འཇིག་རྟེན་མན་ཆད་ནས། །ས་འོག་ལྟོ་འཕྱེ་ཡན་ཆད་དུ། །བཀའ་སྣང་ཞིང་སྲིད་པའི་ལྷ་འདྲེ་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ཤར་ཕྱོགས་ཚངས་པའི་འཇིག་རྟེན་ནས། །དབང་པོ་དཀར་པོ་རྡོ་རྗེ་འཛིན། །དྲི་ཟའི་གདོན་འཁོར་མང་པོ་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ཤར་ལྷོ་མེ་ལྷའི་འཇིག་རྟེན་ནས། །དྲང་སྲོང་དམར་སྐྱ་མེ་ཐབ་འཛིན། །མེ་ལྷའི་གདོན་འཁོར་མང་པོ་ལ། །བླ་གླུད་འབུལ་ལོ་བླ་སྲོག་བསླུ། །གླད་འདི་འབུལ་ལོ་མི་འདི་གློད། །ཧཱུྃ། ལྷོ་ཕྱོགས་གཤིན་རྗེའི་འཇིག་རྟེན་ནས། །གཤིན་རྗེ་ནག་པོ་བེ་ཅོན་འཛིན། །གྲུལ་བུམ་གདོན་འཁོར་མང་པོ་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ལྷོ་ནུབ་སྲིན་པོའི་འཇིག་རྟེན་ནས། །བདེན་བྲལ་ནག་པོ་རལ་གྲི་འཛིན། །སྲིན་པོའི་
གདོན་འཁོར་མང་པོ་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ནུབ་ཕྱོགས་ཀླུ་ཡི་འཇིག་རྟེན་ན། །ཆུ་བདག་དཀར་པོ་སྦྲུལ་ཞགས་འཛིན། །ཀླུ་ཡི་གདོན་འཁོར་མང་པོ་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ནུབ་བྱང་རླུང་ལྷའི་འཇིག་རྟེན་ན། །རླུང་ལྷ་ལྗང་གུ་བ་དན་འཛིན། །རིག་འཛིན་གདོན་འཁོར་མང་པོ་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། བྱང་ཕྱོགས་གནོད་སྦྱིན་དཀྱིལ་འཁོར་ནས། །ནོར་སྐྱོང་སེར་པོ་དབྱུག་ཐོ་འཛིན། །གནོད་སྦྱིན་གདོན་འཁོར་མང་པོ་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། བྱང་ཤར་འབྱུང་པོའི་འཇིག་རྟེན་ན། །དབང་ལྡན་དཀར་པོ་རྩེ་གསུམ་འཛིན། །འབྱུང་པོའི་གདོན་འཁོར་མང་པོ་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །སྡེ་བརྒྱད་ལ། ཧཱུྃ། ཤར་ཕྱོགས་དུང་མཁར་རྩེ་དགུ་ནས། །ལྷ་རབ་ཤམ་པོ་འཁོར་བཅས་ལ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་
གློད། །ཧཱུྃ། ཤར་ལྷོ་བྲག་དམར་རྩེ་རྒྱལ་ནས། །ཤུ་བ་སྲོག་ཟན་འཁོར་དང་བཅས། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ༔ ལྷོ་ཕྱོགས་གཤིན་ཡུལ་ཟངས་ཐང་ནས། །ཡ་མ་རཱ་ཙ་འཁོར་དང་བཅས། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ལྷོ་ནུབ་ཤེལ་མཁར་རྩེ་དགུ་ནས། །སྐུ་ལྷ་གསང་བ་འཁོར་དང་བཅས། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ནུབ་ཕྱོགས་འཇའ་ཚོན་གུར་ཁང་ནས། །སྲིད་པའི་རྒྱལ་མོ་འཁོར་དང་བཅས། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། ནུབ་བྱང་རིན་ཆེན་སྐུ་མཁར་ནས། །ཀཱ་ལ་ཡཀྵ་འཁོར་དང་བཅས། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། བྱང་ཕྱོགས་བདུད་ཡུལ་མུན་གླིང་ནས། །སྐོས་རྗེ་དྲང་དཀར་འཁོར་དང་བཅས། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། བྱང་ཤར་རྒྱ་མཚོ་དུག་རི་ནས། །འཆི་བདག་ཀླུ་བདུད་འཁོར་དང་བཅས། །བློ་གླུད་
འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །ཧཱུྃ། རི་རབ་གླིང་བཞིའི་ཕྱོགས་བཞི་ནས། །རྒྱལ་ཆེན་སྡེ་བཞིའི་བཀའ་འཁོར་དུ། །གཏོགས་པའི་དྲི་ཟ་གཤིན་རྗེ་དང་། །ཀླུ་དང་གནོད་སྦྱིན་ལ་སོགས་པ། །བླ་གླུད་འབུལ་ལོ་བླ་སྲོག་བསླུ། །གླུད་འདི་འབུལ་ལོ་མི་འདི་གློད། །དེ་ནས་ཞག་གྲངས་དུ་བྱས་ན་འདི་ཡན་འདོན། དེ་ནས་བླ་འགུགས་པ་ནི། བདེན་སྟོབས་བརྗོད་པ་ནི། ན་མོ། དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བདེན་པ་དང་། སངས་རྒྱས་ཀྱི་བདེན་པ་དང་། །ཆོས་ཀྱི་བདེན་པ་དང་། དགེ་འདུན་གྱི་བཀའ་བདེན་པ་དང་། བདེན་པ་ཆེན་པོའི་བཀའ་སྣང་ཞིང་སྲིད་པའི་ལྷ་འདྲེ། འཆི་བདག་བདུད་ཀྱི་ལག་ནས་རྒེ་ཞེས་བྱ་བའི། བླ་སྲོག་ཁྱེར་བ་ཡོད་ན་དཀོན་མཆོག་གསུམ་གྱི་བདེན་པས་གཟུགས་ཕུང་འདི་ལ་ཁུག་ཅིག །ཅེས་མང་དུ་བྱས་ལ་བཞག །དེ་ནས་བླ་རྟགས་མར་ལ་བཅས་པ་དེ་ཚེ་བདུད་སྔོན་དུ་ཞགས་པས་བཏགས་ཏེ་བཞག་ལ། རང་གིས་སྣལ་མ་དཀར་པོ་བཟུང་ལ་འདི་སྐད་དོ། ཀྱཻ། ལྷ་འདྲེ་གཉིས་ཀྱི་སོ་མཚམས་ནས། །ལྷ་དང་བདུད་གཉིས་བླ་ཚེ་རྩོད། །མི་བླ་བཙད་པས་ལྷ་སྲུང་རྒྱལ། །ཚེ་བདུད་ནག་པོ་ཁྱི་
མགོ་ཅན། །སྨུག་པོ་གདུང་གི་བླ་བདུད་ཡིན། །བདུད་པོ་ཁྱོད་ཀྱི་ཞགས་མིག་ན། །ཤེའུ་ཆུང་སྨུག་པོ་ཁྱེར་ཏེ་གདའ། །ཚེ་གླུད་སྲོག་སྐྱིན་འདི་བཞེས་ལ། །ཤེའུ་ཆུང་མི་ཡི་བླ་རུ་བསླུ། །བདུད་ཞགས་ནག་པོ་ཁྱེད་ཀྱིས་བསྐྱིལ། །བདུད་ཀྱི་ཁྲམ་ཁ་ཁྱོད་ཀྱིས་སྒྱུར། །ན་ངོ་ཤི་ལྟས་ཁྱོད་ཀྱིས་སྒྱུར། །མོ་ངན་རྩིས་ངན་ཁྱོད་ཀྱིས་སྒྱུར། །མགུརྨིས་ལྟས་པྲ་ངན་ཁྱོད་ཀྱིས་སྒྱུར། །ལྷ་འདྲེའི་དལ་ཁ་ཁྱོད་ཀྱིས་སྒྱུར། །དུས་མིན་འཆི་བ་ཁྱོད་ཀྱིས་སྒྱུར། ཀྱཻ། བདུད་པོ་ནག་པོ་རྒྱ་སྟག་མགོ །མིག་ཚངས་སྒ་ཡི་བླ་བདུད་ཡིན། །བདུད་པོ་ཁྱོད་ཀྱི་ཞགས་མིག་ན། །རྟེའུ་ཆུང་དམར་པོ་ཁྱེར་ཏེ་གདའ། །ཚེ་གླུད་སྲོག་སྐྱིན་འདི་བཞེས་ལ། །རྟེའུ་ཆུང་མི་ཡིས་བླ་རུ་བསླུ། །བདུད་ཞགས་ནག་པོ་ཁྱེད་ཀྱིས་བསྐྱིལ། །བདུད་ཀྱི་ཁྲམ་ཁ་ཁྱོད་ཀྱིས་སྒྱུར། །ན་ངོ་ཤི་ལྟས་ཁྱོད་ཀྱིས་སྒྱུར། །མོ་ངན་རྩིས་ངན་ཁྱོད་ཀྱིས་སྒྱུར། །རྨིས་ལྟས་པྲ་ངན་ཁྱོད་ཀྱིས་སྒྱུར། །ལྷ་འདྲེའི་དལ་ཁ་ཁྱོད་ཀྱིས་སྒྱུར། །དུས་མིན་འཆི་བ་ཁྱོད་ཀྱིས་སྒྱུར། ཀྱཻ། བདུད་པོ་ནག་པོ་དོམ་མགོ་ཅན། །ཨ་ལྕགས་འབྲུ་ཡི་བླ་བདུད་ཡིན། །བདུད་པོ་ཁྱོད་ཀྱི་ཞགས་མིག་ན། །
འབྲོང་བེའུ་སྨུག་པོ་ཁྱེར་ཏེ་གདའ། །ཚེ་གླུད་སྲོག་སྐྱིན་འདི་བཞེས་ལ། །འབྲོང་ཆུང་མི་ཡི་བླ་རུ་བསླུ། །བདུད་ཞགས་ནག་པོ་ཁྱེད་ཀྱིས་བསྐྱིལ། །བདུད་ཀྱི་ཁྲམ་ཁ་ཁྱོད་ཀྱིས་སྒྱུར། །ན་ངོ་ཤི་ལྟས་ཁྱོད་ཀྱིས་སྒྱུར། །མོ་ངན་རྩིས་ངན་ཁྱོད་ཀྱིས་སྒྱུར། །རྨིས་ལྟས་པྲ་ངན་ཁྱོད་ཀྱིས་སྒྱུར། །ལྷ་འདྲེའི་དལ་ཁ་ཁྱོད་ཀྱིས་སྒྱུར། །དུས་མིན་འཆི་བ་ཁྱོད་ཀྱིས་སྒྱུར། ཀྱཻ། བདུད་པོ་ནག་པོ་སྤྱང་ཀིའི་མགོ །ཞང་ཞུང་དབྲ་ཡི་བླ་བདུད་ཡིན། །བདུད་པོ་ཁྱོད་ཀྱི་ཞགས་མིག་ན། །དུང་གི་ལུ་གུ་ཁྱེར་ཏེ་གདའ། །ཚེ་གླུད་སྲོག་སྐྱིན་འདི་བཞེས་ལ། །ལུ་གུ་མི་ཡི་བླ་རུ་བསླུ། །བདུད་ཞགས་ནག་པོ་ཁྱེད་ཀྱིས་བསྐྱིལ། །བདུད་ཀྱི་ཁྲམ་ཁ་ཁྱོད་ཀྱིས་སྒྱུར། །ན་ངོ་ཤི་ལྟས་ཁྱོད་ཀྱིས་སྒྱུར། །མོ་ངན་རྩིས་ངན་ཁྱོད་ཀྱིས་སྒྱུར། །རྨིས་ལྟས་པྲ་ངན་ཁྱོད་ཀྱིས་སྒྱུར། །ལྷ་འདྲེའི་དལ་ཁ་ཁྱོད་ཀྱིས་སྒྱུར། །དུས་མིན་འཆི་བ་ཁྱོད་ཀྱིས་སྒྱུར། ཀྱཻ། བདུད་པོ་ནག་པོ་ཟངས་འཕར་མགོ །ཞང་པོ་སྒ་ཡི་བླ་བདུད་ཡིན། །བདུད་པོ་ཁྱོད་ཀྱི་ཞགས་མིག་ན། །གཡུ་ཡི་ར་ཐོང་ཁྱེར་ཏེ་གདའ། །ཚེ་གླུད་སྲོག་སྐྱིན་འདི་བཞེས་ལ། །ར་ཐོང་མི་ཡི་བླ་རུ་བསླུ། ཀྱཻ། བདུད་
པོ་ནག་པོ་གཟིག་གི་མགོ །དབལ་ཟླ་གཉིས་ཀྱི་བླ་བདུད་ཡིན། །བདུད་པོ་ཁྱོད་ཀྱི་ཞགས་མིག་ན། །ཟངས་ཁྱི་དམར་པོ་ཁྱེར་ཏེ་གདའ། །ཚེ་གླུད་སྲོག་སྐྱིན་འདི་བཞེས་ལ། །ཟངས་ཁྱི་མི་ཡི་བླ་རུ་བསླུ། །བདུད་ཞགས་ནག་པོ་ཁྱོད་ཀྱིས་བསྐྱིལ། །བདུད་ཀྱི་ཁྲམ་ཁ་ཁྱོད་ཀྱིས་སྒྱུར། །ན་ངོ་ཤི་ལྟས་ཁྱོད་ཀྱིས་སྒྱུར། །མོ་ངན་རྩིས་ངན་ཁྱོད་ཀྱིས་སྒྱུར། །རྨིས་ལྟས་པྲ་ངན་ཁྱོད་ཀྱིས་སྒྱུར། །ལྷ་འདྲེའི་དལ་ཁ་ཁྱོད་ཀྱིས་སྒྱུར། །དུས་མིན་འཆི་བ་ཁྱོད་ཀྱིས་སྒྱུར། །ཅེས་ཞགས་པ་དཀར་ནག་ཕྱེས་ལ། བླ་རྟགས་བླ་མཚོའི་ནང་དུ་འཕངས་ལ་གཡས་སུ་ལན་གསུམ་དཀྲུགས་ནས་ཡར་ལྷ་སྲུང་དང་བསྲུང་བྱ་ལ་ཁ་གྱུ་ན་བཟང་། དེ་མིན་ན་ད་རུང་རིམ་གྲོ་དགོས། ཤྭ་ལ་མིག་མང་དུ་བྱས། དེ་ནས་བླ་མཚོ་དཀྲུགས་ལ། ཀྱཻ། བླ་མཚོ་བདུད་རྩི་རོལ་པའི་མཚོ། །གཡས་སུ་ལན་གསུམ་དཀྲུགས་པ་ཡིས། །བོད་མིའུ་རུས་དྲུག་བླ་རྟགས་འདི། །བསླུ་མེད་དཀོན་མཆོག་བདེན་པ་ཡིས། །ལེགས་ཉེས་པྲ་བརྟག་བསྟན་དུ་གསོལ། །ཞེས་དཀྲུག་གོ །དེ་ནས་ཞྭ་དཀར་ནག་འཕང་བ་ནི། ཀྱཻ། སྐྱབས་གསུམ་བསླུ་མེད་དཀོན་མཆོག་བདེན་པ་ཡིས། །དེང་འདིར་རྒྱུ་སྦྱོར་ཡོན་བདག་ལ། །ལེགས་ཉེས་གྲྭ་ལ་
པྲ་བརྟག་སྟོན། །རྒྱུ་སྟག་བུ་ཆུང་ཁྱི་རྒོད་དང་། །རལ་པ་ཅན་གྱིས་ཤཱ་དཔོན་མཛོད། །རྒྱལ་ལོ་རྒྱལ་ལོ་ལྷ་རྒྱལ་ལོ། །ཞེས་འཕང་། བླ་རྐང་དང་། བླ་རྟགས་ཡར་བླངས་ཕུག་ཏུ་བཞག །བླ་གཡུ་མགུལ་དུ་བཏགས། བླ་གཡུ་ནི་སྔོན་ནས་བདུད་ཀྱི་ཀ་སྒྲོམ་ནང་དུ་བཞག །དེ་ནས་ད་ལྟ་ཡར་བླང་ངོ་། །དེ་ནས་བླ་གླུད་འབུལ་བ་ནི། གཞན་སྔར་ལྟར་ཕྱིར་བཤམས། ཀྱཻ། ད་ནི་བདུད་ལ་ལམ་བསྟན་ནོ། ད་ནི་གླུད་ལ་ལམ་བསྟན་ནོ། །གླུད་དང་ཡས་བརྫང་ཤར་དུ་རྫོང་། །སེང་གེ་དཀར་མོའི་ཁ་ནང་ན། །གཡུ་འབྲུག་སྔོན་མོ་ཁྱེར་ཏེ་གདའ། །སེང་གེ་བདུད་ཀྱི་སྤྲུལ་པ་ཡིན། །གཡུ་འབྲུག་མི་ཡི་བླ་རྟགས་ཡིན། །སེང་གེ་ཁྱོད་ལ་གླུད་མདོས་འབུལ། །གཡུ་འབྲུག་མི་ཡི་བླ་རུ་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། ཀྱཻ། གླུད་དང་ཡས་བརྫང་ལྷོ་རུ་རྫོང་། །རྒྱ་སྟག་དམར་པོའི་ཁ་ནང་ན། །དྲེལ་ཆུང་དམར་པོ་ཁྱེར་ཏེ་གདའ། །རྒྱ་སྟག་བདུད་ཀྱི་སྤྲུལ་པ་སྟེ། །དྲེལ་ཆུང་མི་ཡི་བླ་རྟགས་ཡིན། །རྒྱ་སྟག་ཁྱོད་ལ་གླུད་མདོས་འབུལ། །དྲེལ་ཆུང་མི་ཡི་བླ་རུ་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་
གསོལ། ཀྱཻ། གླུད་དང་ཡས་བརྗོང་ནུབ་ཏུ་རྫོང་། །ནུབ་སྐྱ་ཁྲ་ཧོར་བའི་ཁ་ནང་ན། །བྱིའུ་ཆུང་དམར་པོ་ཁྱེར་ཏེ་གདའ། །སྐྱ་ཁྲ་བདུད་ཀྱི་སྤྲུལ་པ་སྟེ། །བྱིས་ཆུང་མི་ཡི་བླ་རྟགས་ཡིན། །སྐྱ་ཁྲ་ཁྱོད་ལ་གླུད་མདོས་འབུལ། །བྱིས་ཆུང་མི་ཡི་བླ་རུ་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། ཀྱཻ། གླུད་དང་ཡས་བརྫོང་བྱང་དུ་རྫོང་། །སྲམ་ཐང་སྔོན་མོའི་ཁ་ནང་ན། །གསེར་གྱི་ཉ་མོ་ཁྱེར་ཏེ་གདའ། །སྲམ་ཐང་བདུད་ཀྱི་སྤྲུལ་པ་སྟེ། །ཉ་མོ་མི་ཡི་བླ་རྟགས་ཡིན། །སྲམ་ཐང་ཁྱེད་ལ་གླུད་མདོས་འབུལ། །འདོད་ཡོན་རྫོ་ངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། ཀྱཻ། གླུད་དང་ཡས་བརྫང་ཤར་ལྷོར་རྫོང་། །དོམ་བུ་ཐུག་དཀར་ཁ་ནང་ན། །བྲེ་སྔོན་འབྲོང་བུ་ཁྱེར་ཏེ་གདའ། །དོམ་བུ་བདུད་ཀྱི་སྤྲུལ་པ་སྟེ། །འབྲིང་བུ་མི་ཡི་བླ་རྟགས་ཡིན། །དོམ་བུ་ཁྱེད་ལ་གླུད་མདོས་འབུལ། །འབྲོང་བུ་མི་ཡི་བླ་རུ་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། ཀྱཻ། གླུད་དང་ཡས་བརྫོང་ལྷོ་ནུབ་རྫོང་། །
སྤྱང་ཐང་སྔོན་མོའི་ཁ་ནང་དུ། །དུང་གི་ལུ་གུ་ཁྱེར་ཏེ་གདའ། །སྤྱང་ཐང་བདུད་ཀྱི་སྤྲུལ་པ་སྟེ། །ལུ་གུ་མི་ཡི་བླ་རྟགས་ཡིན། །སྤྱང་ཐང་ཁྱེད་ལ་གླུད་མདོས་འབུལ། །ལུ་གུ་མི་ཡི་བླ་རུ་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། ཀྱཻ། གླུད་དང་ཡས་བརྫང་ནུབ་བྱང་རྫོང་། །འཕར་བ་དམར་མོའི་ཁ་ནང་ནས། །གཡུ་ཡི་ར་ཐོང་ཁྱེར་ཏེ་གདའ། །འཕར་བ་བདུད་ཀྱི་སྤྲུལ་པ་སྟེ། །ར་ཐོང་མི་ཡི་བླ་རྟགས་ཡིན། །འཕར་བ་ཁྱེད་ལ་གླུད་མདོས་འབུལ། །ར་ཐོང་མི་ཡི་བླ་རུ་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། ཀྱཻ། གླུད་དང་ཡས་བརྫང་བྱང་ཤར་རྫོང་། །དྲེད་མོང་རལ་ཆེན་ཁ་ནང་ན། །གསེར་གྱི་ཕྱི་བ་ཁྱེར་ཏེ་གདའ། །དྲེད་མོང་བདུད་ཀྱི་སྤྲུལ་པ་རེད། །ཕྱི་བ་མི་ཡི་བླ་རྟགས་ཡིན། །དྲེད་མོང་ཁྱོད་ལ་གླུད་མདོས་འབུལ། །ཕྱི་བ་མི་ཡི་བླ་རུ་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། ཀྱཻ། གླུད་དང་ཡས་བརྫང་སྟེང་དུ་རྫོ་ང་། །ཡ་བདུད་རྒྱལ་པོའི་ཁ་ནང་དུ། །ཡོན་བདག་བླ་ཚེ་
ཁྱེར་ཏེ་གདའ། །ཡ་བདུད་བདུད་ཀྱི་སྤྲུལ་པ་སྟེ། །ཡོན་བདག་གླུད་ཀྱི་བདག་པོ་ཡིས། །ཡ་བདུད་ཁྱོད་ལ་གླུད་ཡས་འབུལ། །ཡོན་བདག་ཚེ་སྲོག་གླུད་ཀྱིས་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། ཀྱཻ། གླུད་དང་ཡས་བརྫང་འོག་ཏུ་རྫོང་། །མ་བདུད་རྒྱལ་མོའི་ཁ་ནང་ན། །ཡོན་བདག་བླ་ཆེ་ཁྱེར་ཏེ་གདའ། །མ་བདུད་བདུད་ཀྱི་སྤྲུལ་པ་སྟེ། །ཡོན་བདག་གླུད་ཀྱི་བདག་པོ་ཡིས། །མ་བདུད་ཁྱེད་ལ་གླུད་ཡས་འབུལ། །ཡོན་བདག་ཚེ་སྲོག་གླུད་ཀྱིས་བསླུ། །འདོད་ཡོན་རྫོངས་འདེབས་ལམ་བསྟན་ནོ། །རྐྱེན་དང་བར་ཆད་བསྒྱུར་དུ་གསོལ། །འདི་ནས་འོག་གི་ཕྱོགས་རོལ་ན། །ཆོས་ཀྱི་རྒྱལ་པོའི་བཀའ་འཁོར་དུ། །ཨ་ཝ་གླང་མགོ་ལ་སོགས་པ། །ཁྲམ་ཐོགས་གཤིན་རྗེ་བསམ་མི་ཁྱབ། །ཚེ་གླུད་སྲོག་སྐྱིན་འདི་བཞེས་ལ། །བླ་སྲོག་ཉམས་པ་གླུད་ཀྱིས་བསླུ། །རྒྱལ་པོ་དེ་ཡི་གཡས་ཕྱོགས་ན། །བྱི་ན་ཡ་ཀ་ལ་སོགས་པའི། །ཕོ་གདོན་མང་པོ་འཁོར་དང་བཅས། །ཕོ་བླ་ཁྱེར་བ་གླུད་ཀྱིས་བསླུ། །རྒྱལ་པོ་དེ་ཡི་གཡོན་ཕྱོགས་ན། །ཁ་འབར་མ་མོ་ལ་སོགས་
པའི། །མོ་གདོན་མང་པོ་འཁོར་དང་བཅས། །མོ་བླ་ཁྱེར་བ་གླུད་ཀྱིས་བསླུ། །རྒྱལ་པོ་དེ་ཡི་མདུན་ཕྱོགས་ན། །ནམ་གྲུ་ཁྱི་མགོ་ལ་སོགས་པའི། །ཆུང་གདོན་མང་པོ་འཁོར་དང་བཅས། །ཆུང་བླ་ཁྱེར་བ་གླུད་ཀྱིས་བསླུ། །རྒྱལ་པོ་དེ་ཡི་རྒྱབ་ཕྱོགས་ནི། །ནད་བདག་གོད་འདྲེ་བསམ་མི་ཁྱབ། །འདྲེ་སྲིན་གདོན་འཁོར་མང་པོ་ལ། །བླ་སྲོག་ཉམས་པ་གླུད་ཀྱིས་བསླུ། །གླུད་འདི་བཞེས་ལ་འགྲོ་བར་གྱིས། །ཚེ་སྲོག་ཉམས་པ་སོར་ཆུད་མཛོད། །ཕྱིན་ཆད་འཁོར་འདི་མོ་གནོད་པར། །ཞི་དང་ཕན་པའི་སེམས་ཀྱིས་གཤེགས། །བཛྲ་མུ༔ ཅེས་བླ་གླུད་ཆེན་མོ་སློབ་དཔོན་དགའ་རབ་རྡོ་རྗེ་དང་། པདྨ་འབྱུང་གནས་ཀྱིས་མཛད་པ་ལས། མན་ངག་གདམས་པ་རྣམས་ཀྱིས་དོན་རྒྱས་པར་སྤྲོས་ཏེ་ཕྱོགས་གཅིག་ཏུ། གསེར་འཕྱང་གི་ལོ་ལ། རྭ་ག་ཨ་སྱས་བསྒྲིགས་པ་འདིས་སེམས་ཅན་ཐམས་ཅད་ལ་ཕན་ཐོགས་པར་གྱུར་ཅིག །མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།