བླ་བསླུ་བཞུགས་པའི་དབུ་ཕྱོགས།
བླ་བསླུ་བཞུགས་པའི་དབུ་ཕྱོགས་ལགས་སོ།
བླ་བསླུ་བྱེད་པར་འདོད་ན། དང་པོ་སྐྱབས་འགྲོ་སེམས་བསྐྱེད་བྱ། རང་ཉིད་སྐད་ཅིག་གིས་ཡི་དམ་གང་ཡིན་དེ་བསྒོམ། མདའ་གཅིག་།འཕང་གཅིག །དར་དམར་པོ་དཀར་པོ་ཁ་གང་། སྐུད་པ་སྣ་ལྔ་མེ་ལོང་གཅིག་དོང་ཙེ་གཅིག །དེ་རྣམས་མདའ་ཡི་མགུལ་དུ་བཏགས་ལ། ཤ་བརླ་གཡས་པ་གཅིག་གོ་ར་གཅིག །ཤ་ཆང་མར་ཐུད་ཟས་སྣ་ཚོགས། ཤ་རུ་དཀར་པོ་གཅིག་ཡོན་བདག་གི་ལོ་སྐྱའི་གོས་དང་སྦྱར་ལ་གཟུངས་ཚེ་དཔག་མེད་ཀྱི་སྙིང་པོ་བརྗོད་ལ། བླ་བསླུ་ངར་མི་ལྔ་མར་མེ་ལྔ། ཟན་ཆངས་ལྔ་མཐེབ་ཀྱུ་ལྔ་བྱས་ལ། ལོ་མཐུན་པའི་མི་གཅིག་གིས་གཡས་ན་མདའ་དར་གཡུག་ཅིང་གཡོན་ན་ནད་པའི་གོས་བཟུང་ལ། ཕྱོགས་བཞི་མཚམས་བརྒྱད་ལ་འབོད་པར་བྱའོ། །བླ་ཁུག་མི་ཁུག་རྒྱུ་མ་ལ་ཚད། སྔོན་དང་འདྲ་ན་མ་ཁུག་
རྟགས་ལྷག་ན་བཟང་བ་ཡིན། ཆད་ན་མི་འཆི་བའི་རྟགས་ཡིན། འབྲུ་བྲེ་གང་གི་སྟེང་དུ་ཡོན་བདག་གི་ཕོར་ནང་ཟས་སྣ་ཡོད་ཚད་བཤམས། ཁྱིམ་སྒོའི་མཐང་དཀྱིལ་དུ་འཐག་འདི་སྐད་དོ།། ཀྱཻ། ཚངས་པ་ལ་སོགས་ལྷ་ཆེན་བརྒྱད། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །ལྷ་ཡི་ལག་ནས་མི་བླ་བསླ། །ཉི་མ་ལ་སོགས་གཟའ་ཆེན་བརྒྱད། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །གཟའ་ཡི་ལག་ནས་མི་བླ་བསླུ། །དུ་བ་མཇུག་རིང་ལ་སོགས་པའི། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །གཟའ་བདུད་ལག་ནས་མི་བླ་བསླུ། །དབང་ལྡན་ལ་སོགས་ཕྱོགས་སྐྱོང་
བཅུ། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །ཕྱོགས་སྐྱོང་ལག་ནས་མི་བླ་བསླུ། །ཆུ་ལྷ་སྲིན་པོ་ལ་སོགས་པའི། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །ཆུ་ལྷ་སྲིན་པོའི་ལག་ནས་མི་བླ་བསླུ། །རླུང་ལྷ་གཟའ་སྐར་ལ་སོགས་པའི། །རྩང་ཀུན་ལ་སོགས་ས་བདག་རྣམས། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །ས་བདག་ལག་ནས་མི་བླ་བསླུ། །རྒྱལ་རིགས་སེར་པོ་ལ་སོགས་པའི། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །ཀླུ་རྒྱལ་ལག་ནས་མི་བླ་བསླུ། །ཡུལ་འཁོར་སྲུང་ལ་སོགས་པ་ཡིས། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །རྒྱལ་ཆེན་ལག་ནས་མི་བླ་བསླུ། །དྲི་ཟ་གྲུལ་བུམ་ལ་སོགས་པའི། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །གནོད་སྦྱིན་ལག་ནས་མི་བླ་བསླུ། །མ་ཎི་བྷ་ཊ་ལ་སོགས་ནོར་སྲུང་བཞིས། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །ནོར་ལྷའི་ལག་ནས་མི་བླ་བསླུ། །གཙུག་ཕུད་གནོད་སྦྱིན་བདུད་རིགས་རྣམས། །བཀྲ་ཤིས་གཙང་མའི་ཡོན་ཆབ་འདི་བཞེས་ལ། །བདུད་ཀྱི་ལག་ནས་མི་བླ་བསླུ། །སྨིན་དྲུག་ལ་སོགས་རྒྱུ་སྐར་རྣམས། །བཀྲ་
ཤིས་གཙང་མའི་ཡོན་ཆབ་འདི་བཞེས་ལ། །རྒྱུ་སྐར་ཉེར་བརྒྱད་ལག་ནས་མི་བླ་བསླུ། །ཆོས་ཀྱི་རྒྱལ་པོ་ལ་སོགས་པའི། །གཤིན་རྗེའི་ལག་ནས་མི་བླ་བསླུ། །དམུ་ཡི་ལག་ནས་མི་བླ་བསླུ། །བདུད་ཀྱི་ལག་ནས་མི་བླ་བསླུ། །ཡུལ་ལྷའི་ལག་ནས་མི་བླ་བསླུ། །དགྲ་ལྷའི་ལག་ནས་མི་བླ་བསླུ། །ཐབ་ལྷའི་ལག་ནས་མི་བླ་བསླུ། །ཁྱིམ་ལྷ་གེལ་ཐུང་ལག་ནས་མི་བླ་བསླུ། །རྒྱུ་སྦྱོར་ཡོན་གྱི་བདག་པོ་ཁྱོད། །ཕར་ལོ་མ་འགྲོ་ཚུར་ལ་ཤོག །ཁྱོད་ནི་གཤིན་རྗེའི་ཡུལ་དུ་ཅི་ལ་འགྲོ། །གཤིན་རྗེའི་འཇིགས་པ་ཞེ་རེ་ཆེ། །གཤིན་རྗེའི་ཡུལ་དུ་སྐྱུག་རེ་བྲོ། །གཤིན་རྗེའི་ཡུལ་དུ་མ་འགྲོ་ཞིག །ཁྱོད་གཤིན་ལམ་སྐྱ་མོར་ཅི་ལ་འགྲོ། །གཤིན་ཆུ་རབ་མེད་ཅི་ལ་བརྒལ། །ཕར་ལ་མ་འགྲོ་ཚུར་ལ་ཤོག །མི་ངོ་ཆེན་ཅན་གྱིས་བོས་པ་ཡིན། །མི་ངོ་ཤེས་ཅན་དང་འགྲོགས་ལ་ཤོག །གསུང་སྙན་གྲགས་པའི་སྐད་ལ་ཉོན་ལ་ཤོག །སིལ་སྙན་ཌཱ་རུའི་སྐད་ལ་ཉོན་ལ་ཤོག ། སྔགས་འཆང་བདག་གི་སྐད་ལ་ཉོན་ལ་ཤོག །དར་དཀར་གཡབ་པའི་ཕྱོགས་ལ་འགྲོགས་ལ་ཤོག །མདའ་མོ་ལྟོང་བཟང་འདི་ལ་བརྟེན་ལ་ཤོག །གསེར་འཕང་གཡུ་འཕང་འདི་
ལ་བརྟེན་ལ་ཤོག །མ་མོ་མཁའ་འགྲོའི་ལག་ནས་མི་བླ་བསླུ། །འགོང་པོའི་ལག་ནས་མི་བླ་བསླུ། །རྒྱལ་འགོང་ལག་ནས་མི་བླ་བསླུ། །གྲི་བོ་གྲི་མོས་ལག་ནས་མི་བླ་བསླ། །མཐུ་ཆེན་གཉན་གྱི་སྲུང་མ་མཁྱེན། །བླ་ཡོད་མེད་གཉིས་ཀྱི་སོ་མཚམས་སུ། །བསྐལ་པ་སྟོང་གི་ལམ་དུ་སོང་། །སྙིང་རེ་རྗེ་ལ་ཤ་རེ་ཚ། །ཁྱོད་མི་ཡུལ་བུ་ཚ་ཅི་ལ་བྱེད། །ཤར་བདུད་ཤར་བཙན་ལག་ནས་མི་བླ་བསླུ། །ལྷོ་བདུད་ལྷོ་བཙན་ལག་ནས་མི་བླ་བསླུ། །ནུབ་བདུད་ནུབ་བཙན་ལག་ནས་མི་བླ་བསླུ། །བྱང་བདུད་བྱང་བཙན་ལག་ནས་མི་བླ་བསླུ། །བླ་རྡོ་གནམ་ལ་མ་འཕུར་ཅིག །བླ་རྡོ་ས་ལ་མ་འཛུལ་ཅིག །བདུད་དང་བཙན་གྱི་ལག་ནས་མི་བླ་བསླུ། །བླ་རྔ་གནམ་ལ་མ་གཡུག་ཅིག །བླ་རྔ་ས་ལ་མ་འཛུགས་ཤིག །བླ་བདག་རང་གི་གོ་ཟས་ཡོད། །བླ་ཡི་བརྟེན་ས་མདའ་དར་ཡོད། །གསལ་བྱེད་ལྷ་ཡི་མེ་ལོང་ཡོད། །ཡི་གེའི་བདག་པོ་སྟོང་ཙེ་ཡོད། །རྒྱན་ཆའི་དར་ཚོན་སྣ་ལྔ་ཡོད། །ཚོན་གྱི་སྐུད་པ་སྣ་ལྔ་ཡོད། །ཁྱོད་ཕར་ལ་མ་འགྲོ་ཚུར་ལ་ཤོག །མཛའ་བོ་ཤག་རོགས་འདི་ན་ཡོད། །ཁྱོད་ལ་ཁ་ཟས་ཤ་ཆང་གོས་ནི་འདི་ན་ཡོད། །ཁྱོད་ཀྱི་སྤུན་
དང་ཕུ་ནུ་འདི་ན་ཡོད། །ཇ་ཆང་འོ་མ་འཚམས་པ་ཡོད། །བོས་པའི་སྐད་ལ་ཉོན་ལ་ཤོག །ཅི་འདོད་སྨོན་ལམ་བཏབ་པ་བཞིན། །ཚེ་རིང་ནད་མེད་ཕུན་ཚོགས་ལྔ། །ཡིད་བཞིན་ནོར་བུ་འོད་ལྡན་པ། །བདེ་ལེགས་ཐམས་ཅད་འབྱུང་བའི་བཀྲ་ཤིས་ཤོག །སངས་རྒྱས་སྐུ་གསུམ་བརྙེས་པའི་བཀྲ་ཤིས་ཤོག །ཅེས་བཀྲ་ཤིས་བརྗོད་བསྔོ་བ་སྨོན་ལམ་གྱིས་རྒྱས་བཏབ། ༈ དེ་ནས་ཡང་ཕོ་མོ་གང་ཡིན་ཀྱང་ཚེ་འགུགས་བྱ། སྨོན་ལམ་བཏབ་བཀྲ་ཤིས་བརྗོད། ཨ་རཱ་གས་མཛད་པའོ། །ཞལ་དྲོ། དགེའོ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།