ཨོ་རྒྱན་རིན་པོ་ཆེའི་གསོལ་འདེབས་བར་ཆད་རྐྱེན་སེལ་སུན་ཟློག
ཨོ་རྒྱན་རིན་པོ་ཆེའི་གསོལ་འདེབས་བར་ཆད་རྐྱེན་སེལ་སུན་ཟློག་བཞུགས་སོ།
ན་མོ་གུ་རུ་དྷེ་ཝ་དྷཀི་ནཱི། གནས་སྤྱི་བོའི་གཙུག་རོལ་སྟེང་གི་ཆར། །འཇའ་འོད་དཔུང་འཁྲིགས་པའི་གུར་ནང་ནས། །རྗེ་རྫོགས་པའི་སངས་རྒྱས་པདྨ་འབྱུང་། །སྐུ་དཀར་གསལ་སྟོན་ཀའི་ཟླ་རྒྱས་བཞིན། །ཞལ་འཛུམ་མཛེས་སྤྱན་གཉིས་ཞི་མ་ཁྲོ། །དབུ་པད་ཞྭ་རྒོད་ཀྱི་ལྡེམ་འཕྲུ་ཅན། །སྐུ་ཟབ་བེར་ཆོས་གོས་རྣམ་གསུམ་གསོལ། །ཕྱག་རྡོ་རྗེ་བྷནྡྷ་ཚེ་བུམ་བསྣམས། །ཡུམ་སྦས་ཚུལ་ཁ་ཊཾ་མཆན་ཁུང་བརྟེན། །ཞབས་རྡོ་རྗེ་སྐྱིལ་ཀྲུང་པད་ཟླའི་སྟེང་། །ཡེ་གདོད་ནས་དམ་ཡེ་དབྱེར་མེད་གྱུར། །ཕྱི་ནམ་མཁས་གར་ཁྱབ་འཁོར་འདས་ཀུན། །
རྗེ་པད་འབྱུང་སྐུ་གསུང་ཐུགས་ཀྱིས་ཁྱབ། །གནས་ཞིང་ཁམས་རྒྱ་མཚོ་མ་ལུས་པ། །རྗེ་པད་འབྱུང་སྐུ་ལ་ཐམས་ཅད་རྫོགས། །རྗེ་སངས་རྒྱས་ཐམས་ཅད་འདུས་པའི་ཐུགས། །ཐུགས་ཆོས་སྐུའི་ངོ་བོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ཡུམ་ཆོས་སྐུ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དམ་ཆོས་ཐམས་ཅད་འདུས་པའི་གསུང་། །གསུང་ལོངས་སྐུའི་ངོ་བོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ཡུམ་ལོངས་སྐུ་མཁའ་
འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགེ་འདུན་ཐམས་ཅད་འདུས་པའི་སྐུ། །སྐུ་སྤྲུལ་སྐུའི་ངོ་བོ་པདྨ་འབྱུང་། །བདག་གསོལ་བ་འདེབས་སོ་ཐུགས་རྗེས་ཟུངས། །ཡུམ་སྤྲུལ་སྐུ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་པད་འབྱུང་སྐུ་ཡི་གནས་ལྔ་ལ། །དཔལ་རིགས་ལྔའི་དཔའ་བོ་ཌཱཀྐི་ཚོགས། །བདག་གསོལ་བ་འདེབས་སོ་ཐུགས་རྗེས་ཟུངས། །ཡུམ་ཡེ་ཤེས་མཁའ་འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་པད་འབྱུང་སྐུ་ཡི་རྩ་གནས་ལ། །ཡུལ་ཉེར་བཞིའི་དཔའ་བོ་ཊཀྐིའི་ཚོགས། །བདག་གསོལ་བ་འདེབས་སོ་ཐུགས་རྗེས་ཟུངས། །ཕ་གནས་སྐྱེས་ཞིང་སྐྱེས་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་པད་འབྱུང་སྐུ་ཡི་ཆ་ལུགས་ལ། །མ་ཌཱཀྐི་འབུམ་ཚོ་ཉི་ཤུའི་ཚོགས། །བདག་གསོལ་བ་འདེབས་སོ་ཐུགས་རྗེས་ཟུངས། །མ་འབུམ་ཕྲག་མཁའ་འགྲོའི་
སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་ཤར་དུ་བསྐྱོད་ཙ་ན། །ཤར་ཞི་མཛད་རྡོ་རྗེ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །ཤར་རྡོ་རྗེ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཆེ་ཡི་དངོས་གྲུབ་སྩོལ། །རྗེ་དགོངས་པ་ལྷོ་རུ་བསྐྱོད་ཙ་ན། །ལྷོ་རྒྱས་མཛད་རཏྣ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །ལྷོ་རིན་ཆེན་མཁའ་འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་ནུབ་ཏུ་བསྐྱོད་ཙ་ན། །ནུབ་དབང་མཛད་པདྨ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །ནུབ་པདྨ་མཁའ་འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་བྱང་དུ་བསྐྱོད་ཙ་ན། །བྱོང་དྲག་མཛད་ཀརྨ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །བྱང་ལས་ཀྱི་མཁའ་འགྲོའི་སུན་མ་
ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་དབུས་སུ་བསྐྱོད་ཙ་ན། །དབུས་ལྷུན་གྲུབ་བུདྡྷ་ཐོད་ཕྲེང་རྩལ། །བདག་གསོལ་བ་འདེབས་སོ་ཐུགས་རྗེས་ཟུངས། །དབུས་སངས་རྒྱས་མཁའ་འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་ཕྱོགས་མཚམས་བསྐྱོད་ཙ་ན། །སྐུ་གང་འདུལ་གུ་རུ་མཚན་བརྒྱད་མཆོག །བདག་གསོལ་བ་འདེབས་སོ་ཐུགས་རྗེས་ཟུངས། །མ་དུར་ཁྲོད་མཁའ་འགྲོའི་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་བོད་ཡུལ་བསྐྱོད་ཙ་ན། །དཔལ་རྡོ་རྗེ་གྲོ་ལོད་ཞི་མ་ཁྲོ། །བདག་གསོལ་བ་འདེབས་སོ་ཐུགས་རྗེས་ཟུངས། །སྲིང་བརྟན་མ་བཅུ་གཉིས་སུན་མ་ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །རྗེ་དགོངས་པ་དྲག་པོར་ཁྲོས་ཙ་ན། །དཔལ་གུ་རུ་དྲག་པོ་ཁྲོ་བོའི་རྒྱལ། །བདག་གསོལ་བ་འདེབས་སོ་ཐུགས་རྗེས་ཟུངས། །བཀའ་སྣང་སྲིད་ལྷ་འདྲེའི་སུན་མ་
ཟློག །རྐྱེན་དུས་མིན་འཆི་བའི་བར་ཆད་སོལ། །མཆོག་ཐུན་མོང་ཚེ་ཡི་དངོས་གྲུབ་སྩོལ། །མི་བདག་གི་ལུས་དང་ལོངས་སྤྱོད་རྣམས། །དཔེ་ཀུན་བཟང་མཆོད་སྤྲིན་ལྟ་བུར་གྱུར། །རྗེ་པད་འབྱུང་མཁའ་འགྲོའི་ཚོགས་ལ་འབུལ། །བདག་དེ་ལྟར་མཆོད་ཅིང་གསོལ་བཏབ་པས། །ཕྱག་ཚེ་བུམ་ནང་ནས་བདུད་རྩི་བབས། །རྐྱེན་བར་ཆད་ནད་གདོན་སྡིག་སྒྲིབ་དག །ལུས་དྲི་མེད་ཤེལ་སྒོང་ལྟ་བུར་གྱུར། །རྗེ་པད་འབྱུང་འོད་ཞུ་བདག་ལ་ཐིམ། །མི་བདག་དང་དབྱེར་མེད་གཅིག་ཏུ་འདྲེས། །རྗེ་ཨུ་རྒྱན་གུ་རུ་ཚེ་དཔག་མེད། །དུས་སྟན་ཐོག་འདི་ལ་འགྲུབ་གྱུར་ནས། །བདག་འཆི་མེད་རྡོ་རྗེའི་སྐུ་ཐོབ་ཤོག །ཨོཾ་ཨཱཿཧཱུྃ་བཛྲ་གུ་རུ་པདྨ་ཨཱ་ཡུ་སིདྡྷི་ཧཱུྃ་ཧཱི༔ གུ་རུ་ཚེ་དཔག་མེད་ཀྱི་སྔགས་འདི་ཅི་ནུས་བཟླའོ། །ཨོཾ་དྷ་ཀ་ནི་ཧཱུྃ༔ ས་ར་ན་ན་མུ་ཁུ་ས་དུ་ན་ཟློག །སུན་མ་བཟློག་པའི་སྔགས་འདི་དུས་བཟང་དུས་བརྒྱའམ་ཉེར་གཅིག་གམ་བདུན་ཙམ་བཟླའོ། །ཧཱུྃ་དྷ་ར་དྷ་དྷ། མཁའ་འགྲོ་མ་རྣམས་ཁྲོས་པའི་སྔགས་འདི་གལ་ཆེ་ན་ཅུང་ཟད་བཟླས་མང་བར་མི་བྱའོ། །ཞེས་པ་འདི་རཱ་ག་ཨ་སྱས་ནད་དྲག་པོའི་བཏབ་ནས་འཆི་བའི་རྟགས་མང་དུ་ཚང་ནས་བྱུང་དུས། འདི་ལྟར་ཡིད་ཀྱིས་གསོལ་བ་བཏབ་པས། ཕྱིས་ནད་ལས་གྲོལ་ཏེ་དུས་གཞན་ལ་མི་ཕན་
མི་སྲིད་སྙམ་ནས་ཡི་གེར་བཀོད་པ་ཡིན།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།