སུན་བཟློག་བསྡུས་པའི་བཅའ་ཐབས།
ན་མོ་གུ་རུ་ཌཱཀི་ནཱི་ཡེ། བླ་མ་དང་མཁའ་འགྲོའི་ཚོགས་ལ་ཕྱག་འཚལ་ལོ། །སུན་ཟློག་བསྡུས་པའི་བཅའ་ཐབས་ནི། །ཕུག་གཏོར་ཚོགས་དང་གཏོར་འབུལ་དང་། །དཀར་གཏོར་སྔོན་འགྲོ་སྤྱི་དང་མཚུངས། །ཁྲོལ་མང་ལ་སོགས་སྣོད་ཀྱི་ནང་། །ཕུབ་ཞིབ་སོགས་ཀྱིས་ཕྱུར་བུར་བཀང་། །དེ་ལ་འཇིམ་ཞལ་བྱས་པའི་སྟེང་། །རི་རབ་བང་རིམ་བཞི་པ་བྲི། །དེ་སྟེང་དཔལ་གཏོར་ཟུར་གསུམ་པ། །རྐང་གང་ལས་ནི་མི་ཆུང་བཅའ། །མར་རྒྱན་དང་བཅས་ཁྲུ་གང་ཡིན། །དེ་ཡི་སུམ་གཉིས་སླེབས་པ་ཡི། །ཟུར་གསུམ་བཞི་ནི་ཕྱོགས་བཞིར་བཞག །དེ་ལྟར་གཏོར་མ་ལྔ་པོ་དེ། །རྩེ་དང་སྐེད་པ་རྩ་བ་རྣམས། །ཡེ་ཤེས་དང་ནི་འཇིག་རྟེན་གྱི། །དཔའ་བོ་དཔའ་མོ་སྡེ་ལྔ་ཡིན། །དེ་རྒྱབ་ཆུང་བ་བཞི་པོ་ཡི། །སུམ་གཉིས་སླེབས་ཙམ་བཅུ་གཉིས་བཞག །རྩེ་མོ་བརྟན་མ་བཅུ་གཉིས་དང་། །སྨད་རྣམས་དེ་ཡི་འཁོར་རྣམས་སོ། །དེ་རྒྱབ་དེ་ལས་ཆུང་བ་ཡི། །དམར་གཏོར་བཅུ་དང་དཀར་གཏོར་གསུམ། །སྡེ་བརྒྱད་ལྷ་ཀླུ་ཕྱི་རྒྱུད་པ། །ཟུར་གསུམ་རྣམས་ལ་ཁྲག་གིས་བྱུག །དཀར་རྒྱན་ཤ་རྒྱན་གཉིས་ཀ་བྱ། །རྩེ་ལ་བཀྲ་ཤིས་རྟགས་བརྒྱད་དང་། །
རྒྱལ་སྲིད་སྣ་བདུན་ལ་སོགས་པ། །བསྐང་འབྲས་ཐམས་ཅད་ཚང་བར་བཙུགས། །མར་ཐུད་སོགས་ཀྱི་རིལ་བུ་བཅུག །གཏོར་མའི་རྩེ་ལྔ་མཁའ་འགྲོ་ལྔ། །དབུས་སུ་དཔའ་བོ་སྟག་ཆས་ཅན། །སྟག་ལ་ཙཀཱི་དང་། །ལྷ་མོ་བོང་ཞོན་ཙཀླུ་བཙུགས། །ཤར་དུ་དྲེལ་ཞོན་ལྷོར་སྟག་ཞོན། །ནུབ་ཏུ་འབྲུག་ཞོན་བྱང་དུ་ནི། །རྨ་བྱ་ཞོན་པའི་མཁའ་འགྲོ་མ། །ཙཀྱི་བསྡུས་ད་གས། །ནམ་གདུགས་ཆོས་འབྱུང་ཟུར་དྲུག་ཕུབ། །ཤིང་རིས་མདའ་བཀྲ་འཕང་བཀྲ་རྣམས། །བཅུ་གསུམ་གྲངས་དང་མཉམ་པར་བྱ། །རྩང་བསྐོར་ཚོན་སྐུད་སྣ་ལྔས་དཀྲི། །མདོས་མདུན་མཆོད་པ་སྣ་བདུན་བཤམས། །བཅའ་སྟག་རིན་ཆེན་འབར་བ་ལ། །པད་འདབ་དག་གིས་བསྐོར་བར་བྱ། །ཡིད་ཆགས་བཀྲོལ་རྫས་ཐེབ་ཙེའི་ནང་། །ཕྱག་མཚན་ལྔ་པོ་པར་དུ་བཏབ། །གཙོ་བོ་གང་རུང་གཅིག་གིས་ནང་། །ས་ཉོབ་གྲུ་བཞིར་བསྐོར་བའི་སྟེང་། །འཇིམ་པའི་མཁར་ནི་ནག་པོ་བྱ། །སྟེང་དུ་ནམ་མཁའ་ཤིང་རིས་བཙུགས། །དེ་ཡི་གཡས་གཡོན་གཉིས་པོ་རུ། །བུད་མེད་ནག་མོ་བྱ་ནག་དང་། །འུག་པ་ཞོན་པ་གཉིས་ཀྱི་གཟུགས། །མདུན་དུ་བུད་མེད་དམར་མོ་ནི། །སོར་བཞི་ཙམ་པ་བཅུ་གཅིག་བཅའ། །
གཙང་མའི་ཟན་ལ་སྐུ་གླུད་ནི། །གལ་ཆེན་ཡིན་ན་སྣོད་གཞན་དུ། །ཚོན་བཅའ་སྲོལ་ལ་ཡོད་འདུག་སྟེ། །སྐུ་གླུད་འཁྱུད་གང་ཙམ་རེར་ཆོག །བླ་མ་ཡིན་ན་སེངྒེ་ཆིབས། །སྐྱེས་པ་ཡིན་ན་བྱ་རྒོད་ཆིབས། །བུད་མེད་ཡིན་ན་རྟ་ལ་ཆིབས། །ཤིན་ཏུ་མཛེས་ལ་དོད་པར་བྱ། །ཡོན་བདག་མི་ཡི་མགོ་དྲང་བཅའ། །སུན་ཟློག་ནང་གི་གཙོ་བོའི་དྲུང་། །རིགས་བཞིས་མཁའ་འགྲོའི་བར་བར་བཞག །ལོགས་སུ་ངར་མི་མཐོ་གང་ཙམ། །གོས་དུམ་བསྐོན་ཤིང་དྲི་གླུད་བསྐོར། །དེ་ཡི་ནང་དང་མར་སུན་ནང་། །སུན་ཟློག་དགོས་པ་མ་གཏོགས་པ། །སྤྱི་ཡི་གླུད་ནི་མི་བླུག་གོ །རྫོངས་འདེབས་རྒྱུ་ཡི་འབྲུ་སྣ་དང་། །ལྡོང་ལ་ཤ་བ་འབྲུ་ལ་རྐྱང་། །དབྲ་ལ་གཡག་དང་སྒ་ལ་ར། །གང་ལ་བླ་བའི་བླ་ནི་རབ། །མ་རྙེད་ལུག་གི་བརླ་ལ་བྱ། །ཚྭཡིག་ཡོན་བདག་དུ་ཡོད་གྲོངས། །ཨོཾ་བཛྲ་ཨ་ཡུཥེ་སྭཱ་ཧཱ། །ཞེས་བྲི་ཚོན་སྐུད་སྣ་ལྔས་དཀྲིས། །དེ་ལ་སྐུད་དཀར་རིང་པོ་བཏགས། །ཤིང་ནག་གཅིག་གིས་ཁྲམ་ཤིང་བྱ། །དེ་གཉིས་སྦྲེལ་ལ་མདོས་དྲུང་བཞག །དེ་ནས་དེ་རྣམས་སྤོས་རུམ་བྱ། །སྔོན་འགྲོ་ལྕོག་རྡོག་གཅིག་བཤམས་ནས། །དལ་ཁྲམ་བཀྱག་རྒྱུའི་ལཱ་
བ་དང་། །མེ་རུ་གཉིས་དང་དབུ་བརྒྱན་འཚགས། །དེ་ནས་མཁའ་འགྲོའི་ལས་བྱང་སོགས། །འདོན་ཆ་འགྲིག་ཆོག་ལྟ་བུ་སྟེ། །གཞན་ནས་ཚིག་གཅིག་སབ་མི་དགོས། ༈ །ལྷོ་ནུབ་ནུབ་བྱང་ནུབ་སྟོད་སྨད། །དེ་བཞི་གར་གཙང་མ་གཏོགས་པ། །གཞན་དུ་འབུལ་ནི་མི་རུང་གསུངས། །རེ་ཞིག་མདོས་དེ་ཐང་ལ་བཞག །དང་པོ་དཀར་གཏོར་བགེགས་གཏོར་ཕུལ། །དེ་ནས་ཆད་མདོ་བརྟན་སྐྱོང་བྱ། །ཟོར་བཏོན་དེ་ཉིད་ཟོར་དུ་འཕངས། །སུན་ཟློག་ཕུལ་ལ་སྐུ་གླུད་བསྲེགས། །ས་མགྲོན་རྡོ་མགྲོན་ཤི་བསྒྲག་བྱ། །གཏོར་མ་ཕལ་ཆེར་དངོས་གྲུབ་བྱ། །མེ་ཟོར་བཏོན་ནས་མེ་འགལ་འཕངས། །ཁྱིམ་དུ་ཕྱིན་ནས་ཐག་ཡག་དང་། །ཚེ་འགུགས་བཀྲ་ཤིས་རྗེས་ཆོག་རྣམས། །མཁའ་འགྲོའི་ལས་བྱང་མཇུག་ལྟར་རོ། །རྐྱེན་ཟློག་མཆོག་ཏུ་གྱུར་པ་འདི། །སྔགས་འཆང་རཱ་ག་ཨ་སྱ་ཡིས། །རང་དང་གཞན་ལ་ཕན་ཕྱིར་བསྒྲིགས། །འགལ་འཁྲུལ་ཉེས་པའི་ཆ་མཆིས་ན། །མ་མོ་མཁའ་འགྲོའི་ཚོགས་ལ་བཤགས། །འདི་ཕྱིའི་སྒྲིབ་པར་མ་གྱུར་ཅིག །འདིར་འབད་དགེ་བ་གང་མཆིས་དེས། །བསྟན་འཛིན་སྐྱེས་བུ་དམ་པ་རྣམས། །སྙུང་བྲལ་ལོ་བརྒྱ་འཚོ་བཞེས་ཤིང་། །བསྟན་
འགྲོའི་དོན་ཆེན་འགྲུབ་པར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།