གདན་བཞུགས་དང་པོ་བརྡའི་བསྐུལ་བ།
གདན་བཞུགས་དང་པོ་བརྡའི་བསྐུལ་བ་ནི། ཨེ་མ་སྔགས་ཀྱི་རིག་འཛིན་འདི། །ལས་ཀྱི་གདུལ་བྱ་མ་རྫོགས་པས། །སུན་མས་བསྐྱོད་པར་མི་འོས་ཤིང་། །ཆོས་དབྱིངས་༔ ཡེ་ཤེས་མཁའ་འགྲོ་ཡིས། །བཞུགས་པར་གནང་བ་བརྡ་ཡི་གདན། །འབུལ་ལོ་རྡོ་རྗེ་འཛིན་ལ་འབུལ། །ཨེ་མ་སྔགས་ཀྱི་རིག་འཛིན་འདི། །གདུལ་བྱའི་རེ་འདོད་མ་རྫོགས་པས། །སུན་མས་བསྐྱོད་པར་མི་འོས་ཤིང་། །སྟོང་ཉིད་ཡེ་ཤེས་མཁའ་འགྲོ་ཡིས། །བཞུགས་པར་གནང་བ་བརྡ་ཡི་གདན། །འབུལ་ལོ་རྡོ་རྗེ་འཛིན་ལ་འབུལ། །ཨེ་མ་སྔགས་ཀྱི་རིག་འཛིན་འདི། །གནས་ལུགས་ཀློང་དུ་གྱུར་ན་ཡང་། །ཞི་བར་བཞུགས་ཚད་མ་ཕེབས་པས། །སུན་མས་བསྐྱོད་པར་མི་འོས་ཤིང་། །ཡེ་ཤེས་མཁའ་འགྲོ་སྡེ་ལྔ་ཡིས། །བཞུགས་པར་གནང་བ་བརྡ་ཡི་གདན། །འབུལ་ལོ་རྡོ་རྗེ་འཛིན་ལ་འབུལ། །དེ་ནས་དོན་གྱི་གདན་ལ་བཞུགས་སུ་གསོལ། ཨཱཿ རིན་ཆེན་བྱོལ་སོང་ལ་སོགས་པའི། །ལྷ་ཀླུ་གནོད་སྦྱིན་གདན་མཆོག་ལ། །སློབ་དཔོན་དགོངས་པ་ཡེངས་མེད་ཀྱིས། །ཧེ་རུ་ཀ་དཔལ་བཞུགས་སུ་གསོལ། །འཕོ་འགྱུར་མེད་པའི་བཀའ་དྲིན་ཞུ། །བར་ཆད་ཞི་བར་
མངའ་གསོལ་ལོ། །ཨཱཿ རིན་ཆེན་འཁོར་ལོ་ནོར་བུ་དང་། །སྐྱོན་བྲལ་ཐབས་ཤེས་བརྡའ་གདན་ལ། །སློབ་དཔོན་དགོངས་པ་ཡེངས་མེད་ཀྱིས། །སྣང་སྲིད་ཟིལ་གནོན་བཞུགས་སུ་གསོལ། །གསལ་འགྲིབ་མེད་པའི་བཀའ་དྲིན་ཞུ། །ཚེ་དཔལ་རྒྱས་པའི་མངའ་གསོལ་ལོ། །ལྟ་བ་རྟོགས་པའི་གདན་ཁྲི་ལ། །སྒོམ་པ་རང་གསལ་བཞུགས་སུ་གསོལ། །སྤྱོད་པ་ཡེངས་མེད་བཀའ་དྲིན་ཞུ། །རང་གྲོལ་ཆེན་པོར་མངའ་གསོལ་ལོ། །སེམས་ཉིད་སྟོང་པའི་ཁྲི་གདན་ལ། །བྱར་རྫོགས་ཆེན་པོའི་རྣལ་འབྱོར་སྐུ། །ཡེ་ཤེས་ཉག་གཅིག་བཞུགས་སུ་གསོལ། །ཕྱོགས་ལྷོང་བྲལ་བའི་བཀའ་དྲིན་ཞུ། །སྣང་བ་སྟོང་པའི་ཁྲི་གདན་ལ། །སེམས་ཉིད་ཤར་ཆའི་ཡེ་ཤེས་སྐུ། །གཉིས་སུ་མེད་པར་བཞུགས་སུ་གསོལ། །མཚན་འཛིན་བྲལ་བའི་བཀའ་དྲིན་ཞུ། །ཨཱཿ དབྱིངས་ཀྱི་ཡེ་ཤེས་ཁྲི་གདན་ལ། །རིགས་གདངས་རྒྱལ་པོ་ལུ་གུ་རྒྱུད། །འཕོ་འགྱུར་རང་གྲོལ་བཞུགས་སུ་གསོལ། །མཚན་མ་ནུབ་པའི་བཀའ་དྲིན་ཞུ། །དེ་ནས་རྟགས་ཀྱི་བརྒྱན་གྱིས་ཆེ་བ་བསྐྱེད་པ་ནི། ཀྱཻ། དུས་གསུམ་རྒྱལ་བའི་གདུང་ཚབ་ལ། །གདན་བཞུགས་དང་པོ་མི་ཡི་
ཕུལ། །སྔགས་འཆང་རིག་འཛིན་བདག་གིས་སོ། །གདན་བཞུགས་གཉིས་པ་ལྷ་ཡིས་ཕུལ། །ཡེ་ཤེས་མཁའ་འགྲོ་སྡེ་ལྔས་སོ། གདན་བཞུགས་གསུམ་པ་རང་བྱུང་དུ། །བསྐྱེད་རྫོགས་བསྟན་པའི་མཐུ་ལས་གྲུབ། །སངས་རྒྱས་ཐུགས་རྗེ་ལས་བྱུང་བས། །རྟགས་ཀྱི་སྣ་ཚོགས་རྡོ་རྗེ་ནི། །ཕྲིན་ལས་རྣམ་བཞིའི་ཁ་དོག་གིས། །ཕྱོགས་ནས་ཡེ་ཤེས་འཇའ་འོད་བཀྲ། །ཤར་གྱི་ར་ལས་རྡོ་རྗེ་ནི། །ཞི་བ་རྡོ་རྗེ་རིགས་རྣམས་ཀུན། །ལྷུན་གྱིས་གྲུབ་པར་རྟགས་ཀྱི་རྒྱ། །ལྷོ་ཡི་ར་ལས་རིན་ཆེན་རིགས། །རྒྱལ་པའི་རིན་ཆེན་རིགས་རྣམས་ཀུན། །ལྷུན་གྱིས་གྲུབ་པར་རྟགས་ཀྱི་རྒྱུ། །ནུབ་ཀྱི་ར་ལས་པདྨ་ཡི། །དབང་གི་པདྨ་རིགས་རྣམས་ཀུན། །ལྷུན་གྱིས་གྲུབ་པ་རྟགས་ཀྱི་རྒྱ། །བྱང་གི་ར་ལས་རལ་གྲི་ཡི། །ཕྲིན་ལས་ཀརྨའི་རིགས་རྣམས་ལ། །མངའ་དབང་བསྒྱུར་བའི་རྟགས་ཀྱི་རྒྱ། །དབུས་སུ་ཡིད་བཞིན་དབང་གི་ནོར། །དགའ་བ་འཁྱིལ་པ་གྲུབ་པ་ནི། །ལས་ཀུན་ལྷུན་གྲུབ་རྟགས་ཀྱི་རྒྱ། །ལྷ་རྫས་ལས་བཞིའི་གདན་མཆོག་ལ། །རྐང་གཉིས་གཙོ་བོ་རྟགས་བཞུགས་ནས། །ཞབས་པད་བསྐལ་པ་ཇི་སྲིད་དུ། །
གཡོ་མེད་པ་ཡི་གཉིས་མེད་རྒྱས་འདེབས་ཤིང་། །འཕོ་འགྱུར་མེད་པའི་དགོངས་པར་བཞུགས་སུ་གསོལ། །མངྒ་ལཾ།།