སུན་མའི་ཡར་ཞུས།
སུན་མའི་ཡར་ཞུས་བཞུགས་པའི་དབུ་ཕྱོགས་ལགས་སོ།། ཡར་སྔ། སློབ་དཔོན་སྤྲུལ་པའི་སྐུ་ལ་ཕྱག་འཚལ་ལོ། །སུན་ཟློག་མདོས་གཏོར་རྒྱས་བསྡུས་གང་བྱེད་ཀྱང་། །མཁའ་འགྲོའི་དར་ལམ་གཅོད་ཅིང་བསྟན་བཞུགས་བྱེད་ན། །བླ་མ། སྔགས་པ། སྐྱེས་པ། བུད་མེད་རིགས་བཟང་གང་ཡིན་ཀྱང་། བུ་མོ་གཙང་མ་བཞི་ལ་ཁྲུས་བྱས། རྒྱན་དྲུག་ལ་སོགས་མཁའ་འགྲོའི་ཆས་སུ་ཞུགས་ཏེ། གླུད་གཏོར་དྲུག་ཞུས་ལེན་གྱི་སྐབས་སུ་ལག་ལེན་ཚེ་སྒྲུབ་བརྟེན་བཞུགས་དང་བཅས་པ་ཞལ་ལས་ཤེས་པར་བྱའོ། །དེ་ནས་སུན་མའི་མགྲོན་རྣམས་ཀྱི། དལ་ལམ་དང་བཅས་ཏེ། བདེ་བ་ཅན་དུ་ཁྲིད་པའི་བྲོད་ཁ་འདིང་བ་ནི་འདི་སྐད་དོ། ༼ཀ༽ ཀྱཻ། རིགས་བཟང་ལྷ་ཡི་སྐྱེས་བུ་ཁྱེད། །ངེད་མཁའ་འགྲོ་རྣམས་ལ་ཚུར་ཉོན་དང་། །ཁྱེད་བོད་ཀྱི་ཡུལ་བས་སྡུག་པ་མེད། །ངེད་མཁའ་འགྲོའི་ཡུལ་བས་སྐྱིད་པ་མེད། །ཡེ་ཤེས་དབྱིངས་ཀྱི་ལྡིང་ཁང་ནས། །འཇའ་ཚོན་གུར་ཕུབ་ཀྱི་ལི་ལི། །གཉིས་མེད་མཁའ་ལྟར་དག་པའི་ཕོ་བྲང་ནས། །མེ་ཏོག་ཆར་འབབ་སི་ལི་ལི། །མི་མངོན་དབྱིངས་ཀྱི་ཕོ་བྲང་ནས། །གསེར་གྱི་ལྡིང་ཁང་ལྡེམས་སེ་ལྡེམ། །མཁའ་སྤྱོད་དག་པའི་ཕོ་བྲང་ནས། །མཁའ་འགྲོའི་ཚོགས་རྣམས་སྤུངས་སེ་སྤུང་། །ངེད་མཁའ་འགྲོའི་ཡུལ་བས་སྐྱིད་པ་
མེད། །ཁྱོད་བོད་ཀྱི་ཡུལ་བས་སྡུག་པ་མེད། །ཁྲེལ་ཕོངས་ལས་ལ་ཐར་དུས་མེད། །ཡིད་ཀྱི་ལས་ལ་ཐར་དུས་མེད། །རིགས་བཟང་ལྷ་ཡི་སྐྱེས་བུ་ཁྱེད། །ངེད་མཁའ་འགྲོའི་ཡུལ་དུ་ད་བཞུད་འཚལ། ༼ཁ༽ ཀྱཻ། རིགས་བཟང་ལྷ་ཡི་སྐྱེས་བུ་ཁྱེད། །ངེད་སུན་མ་རྣམས་ལ་ཚུར་གསོན་དང་། །འདོད་དགུ་འབྱུང་བའི་ཕོ་བྲང་ན། །ཅི་འདོད་གཏེར་གྱི་ལོངས་སྤྱོད་ཡོད། །དྲག་པོ་ཨེ་ཡི་གཞལ་ཡས་ན། །ཐོད་པའི་སྐུ་མཁར་ལྡེམ་པ་ཡོད། །མི་ལྤགས་གཡང་གཞི་རྒྱངས་སེ་རྒྱང་། །ཚིལ་ཆེན་མར་མེ་ཏ་ལེ་ཡོད། །ཤ་ཁྲག་གཏོར་མ་སྤུངས་སེ་ཡོད། །རཀྟའི་མཚོ་མོ་ཀྱི་ལི་ལི། །རུས་པའི་རྒྱན་ཆ་ཁྲོ་ལོ་ལོ། །ཚིལ་ཆེན་སྤོས་དུད་ཐུ་ལུ་ལུ། །མི་རྐང་གླིང་བུ་སྐད་རེ་བཟང་། །ངེད་མཁའ་འགྲོའི་ཡུལ་བས་བྲོད་པ་མེད། །གནས་དེ་རུ་གཤེགས་དང་དེ་རུ་སྐྱིད། །རིགས་བཟང་ལྷ་ཡི་སྐྱེས་བུ་ཁྱེད། །ཁྱེད་བོད་ཀྱི་ཡུལ་བས་སྡུག་པ་མེད། །ཆགས་སེམས་འདི་ལ་གྲོལ་དུས་མེད། །དེ་བས་ཨོ་རྒྱན་ཡུལ་དེར་དེངས།། ག༽ ཀྱཻ། རིགས་བཟང་ལྷ་ཡི་སྐྱེས་བུ་ཁྱེད། །ངེད་སུན་མ་རྣམས་ལ་ཚུར་གསོན་དང་། །ངེད་མཁའ་འགྲོའི་
གནས་དེ་ཉམས་རེ་དགའ། །དུར་ཁྲོད་ཆེན་པོའི་གནས་མཆོག་ནས། །མཁའ་འགྲོའི་གླུ་ལེན་ཀྱུ་རུ་རུ། །དར་དཀར་རྒྱལ་མཚན་པུ་རུ་རུ། །དར་ནག་རུ་མཚོན་ལྷབས་སེ་ལྷུབ། །རྦ་གླིང་སྙུག་གླིང་ཀྱུ་རུ་རུ། །གསེར་གྱི་ཉི་མ་ཀྱི་ལི་ལི། །དངུལ་གྱི་ཟླ་བ་ཏ་ལ་ལ། །སྐར་ཕྲན་ཚོམ་བུ་ཤིགས་སེ་ཤིག །གནས་དེ་རུ་འདོང་དང་དེ་རུ་སྐྱིད།། ༼ང༽ ཀྱཻ། རིགས་བཟང་ལྷ་ཡི་སྐྱེས་བུ་ཁྱེད། །ཁྱེད་བོད་ཀྱི་ཡུལ་བས་སྡུག་པ་མེད། །བོད་ཀྱི་ཡུལ་བས་དོག་པ་མེད། །བདུད་རྩིའི་ཆུ་ལ་བཏུང་རྒྱུ་མེད། །༈ ཡེ་ཤེས་དབྱིངས་ལ་བཞུགས་རྒྱུ་མེད། །མེ་ཏོག་གླིང་ལ་བལྟ་རྒྱུ་མེད། །མཛེས་པའི་ཡིད་ལ་གདུང་རྒྱུ་མེད། །དེ་བས་བོད་ཀྱི་ཡུལ་དེ་སྡུག །རིགས་བཟང་ལྷ་ཡི་སྐྱེས་བུ་ཁྱེད། །འདི་ན་མཁའ་འགྲོའི་ཡུལ་དེར་གཤེགས། །མཁའ་འགྲོའི་ཡུལ་དེ་གནས་རེ་བཟང་། །རིན་ཆེན་གསེར་གྱི་ལྡིང་ཁང་ནས། །ཁ་བད་གཡུ་ལས་བྱས་པ་ཡོད། །རིན་ཆེན་དངུལ་གྱི་སྐུ་མཁར་ལ། །ཁ་བད་ལྕགས་ལས་བྱས་པ་ཡོད། །རིན་ཆེན་ལྕགས་ཀྱི་སྐུ་མཁར་ལ། །ཁ་བད་བྱི་རུས་བྱས་པ་ཡོད། །རིན་ཆེན་ཟངས་ཀྱི་སྐུ་མཁར་ལ། །ཁ་
བད་མཆོང་ལས་བྱས་པ་ཡོད། །དེ་འདྲའི་གཞལ་ཡས་ཉམས་རེ་དགའ། །དེ་འདྲའི་གནས་སུ་དང་རེ་སྤྲོ། །གནས་མཆོག་དེ་རུ་ད་བཞུད་འཚལ།། ༼ཅ༽ ཀྱཻ། རིགས་བཟང་ལྷ་ཡི་སྐྱེས་བུ་ཁྱོད། །ངེད་སུན་མ་རྣམས་ལ་ཚུར་གསོན་དང་། །ཨོ་རྒྱན་ཡུལ་དེར་ད་འགྲོ་རན། །མི་འགྲོ་བ་ཡི་དབང་ནི་མེད། །བྱ་མང་སྐད་སྙན་རྩེ་རེ་རེ། །གཅན་གཟན་ངར་སྐད་འུ་རུ་རུ། །རྒྱན་ཆ་མང་པོ་ཁྲོ་ལོ་ལོ། །ཅོད་པན་དར་དཔྱངས་པུ་རུ་རུ། །ཐོད་རྔ་སྟག་སྤྱོད་ཁྲོ་ལོ་ལོ། །སིལ་སྙན་མང་པོ་སི་ལི་ལི། །ཨ་ལ་ལ་ཏེ་ཉམས་རེ་དགའ། །རིགས་བཟང་ལས་ཅན་ད་རེས་རྙེད། །ཨུ་རྒྱན་ཡུལ་དེར་ཁྲིད་ནས་འགྲོ། །དཔའ་བོ་རྣམས་ཀྱི་ཕོ་ཉ་འཇུག །དཔའ་མོ་རྣམས་ཀྱི་འཕྲིན་བྱེད་འཇུག །གསེར་གྱི་གདུ་བུ་ཁྲ་ལ་ལ། །དངུལ་གྱི་མགུལ་རྒྱན་ཝངས་སེ་ཝང་། །དེ་བས་མཁའ་འགྲོའི་ཡུལ་དེར་གཤེགས། །ངེད་མཁའ་འགྲོའི་ཡུལ་དེང་ད་གཤེགས་ཤིག ། ༼ཆ༽ ཀྱཻ། དམ་ཚིག་ལྡན་པའི་རྣལ་འབྱོར་ཁྱེད། །རིགས་བཟང་ལྷ་ཡི་སྐྱེས་བུ་འདི། །ངེད་མཁའ་འགྲོའི་ཡུལ་དེར་མི་བཏང་ན། །ཤ་ཁྲག་གླུད་འདི་ཚུལ་ལ་བྱིན། །ལྤགས་པ་རུས་པའི་གླུད་
ཅིག་བྱིན། །སྐྲ་དང་བ་སྤུའི་གླུད་ཅིག་བྱིན། །ངེད་ནི་མི་སྡོད་འགྲོ་བ་ཡིན། །༼ཇ༽ ཀྱཻ། ཁྱེད་ནི་བྱང་ཆུབ་སེམས་དཔའ་སྟེ། །རང་དོན་དྲི་མས་མ་གོས་སོ། །མཁའ་མཉམ་འགྲོ་ལ་ཁྱེད་ཐུགས་བརྩེ། །ཁྱེད་ནི་དཔའ་བོ་ཆེན་པོ་སྟེ། །བདུད་དང་མུ་སྟེག་རྡུལ་དུ་རློགས། །ཁྱེད་ནི་ཡེ་ཤེས་སེམས་དཔའ་སྟེ། །འཁོར་བའི་སྐྱོན་གྱིས་ཁྱོད་མ་གོས། །བསྟན་པ་ཡུན་རིང་བསྲུང་བའི་ཕྱིར། །ཁྱེད་ཀྱི་བཀའ་ཉན་བསྒྲུབ་པར་བགྱི། །ཅེས་མཁའ་འགྲོའི་སུན་མ་རྣམས་ཀྱིས་གནང་བ་བྱིན་པས་བསམ་མོ། །མཁའ་འགྲོའི་སུན་ཟློག་གི་ཞུས་ལེན་དོལ་ལམ་བདུན་པ་གོང་མ་རྫོགས་སོ། །གནད་རྣམ་ཞལ་ཤེས་སོ། །དཔེ་འདི་བྲིས་པའི་དགེ་བས་འགྲོ་བ་སྐྱེས་བུ་དམ་པ་རྣམས་ཀྱི་སྐུ་ཚེ་མཐའ་རུ་ཕྱིན་ནས་འགྲོ་དོན་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག །མངྒ་ལཾ། ། ༈ སུན་ཟློག་གི་ཆ་ལག་འདི་སྔར་ལྷ་ཐོག་རྒྱལ་པོས་བཞེངས་པའི་རྭ་ག་བཀའ་འབུམ་དཔེ་རྙིང་དཀར་ལེབ་དགོན་དུ་ཡོད་པ་པོད་འཐོར་བུའི་ནང་དུ་བཞུགས་ཡོད་པས་འདིར་བྲིས་པ་ཡིན། འདི་ལ་དཔེ་ཚན་བཅུ་གསུམ་ཡོད་ལགས།