འཇམ་དཔལ་སྒྲུབ་ཐབས་རྩ་ཚིག
འཇམ་དཔལ་སྒྲུབ་ཐབས་རྩ་ཚིག་བཞུགས་སོ། །བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་བའི་དོན་དུ་བཅོམ་ལྡན་འཇམ་དཔལ་བསྒྲུབ། །འགྲོ་ཀུན་བདེ་ལྡན་སྡུག་བསྔལ་ཀུན་བྲལ་ཞིང་། །བདེ་ལས་ཉམས་མེད་བཏང་སྙོམས་ལ་གནས་ཤོག །སྭ་བྷཱ་ཝ་སོགས། སྟོང་པའི་ངང་ལས་པཾ་པཾ་ཨ་དཀར་ལས། །རྒྱ་མཚོའི་སྟེང་དུ་པདྨ་ཟླ་བ་བསམ། །དེ་སྟེང་རང་སེམས་ཨ་དཀར་ཉིད་གྱུར་ཏེ། །འོད་འཕྲོས་དོན་བྱས་འདུས་པ་ལས་ལྷར་གྱུར། །ཞལ་གཅིག་ཕྱག་གཉིས་མཆོག་སྦྱིན་ཨུཏྤལ་བསྣམས། །རྡོ་རྗེའི་སྐྱིལ་ཀྲུང་འོད་ཟེར་རབ་འཕྲོ་བ། །དར་དཀར་ན་བཟའ་རིན་ཆེན་རྒྱན་གྱིས་སྤྲས། །སྟོན་ཟླའི་མདོག་ཅན་ལང་ཚོ་ལྡན་པར་བསྒོམ། །གནས་གསུམ་འབྲུ་གསུམ་འོད་ཀྱི་ཡེ་ཤེས་མཚན། །དབང་ལྷས་དབང་བསྐུར་རིགས་བདག་གིས་མཚན་པའི། །སྙིང་དབུས་ཟླ་བའི་དཀྱིལ་འཁོར་རྩིབས་དྲུག་པ། །འབྲུ་དྲུག་ཡི་གེ་བཀོད་པས་གཡས་གཡོན་འཁོར། །ཤུགས་དྲག་རྩེ་མོ་རྣོ་ཞིང་རབ་དཀར་བ། །ཉེས་འཇོམས་སྟོབས་ལྡན་མྱུར་འཛིན་རབ་གསལ་གྱུར། །ཨོཾ་ཝཱ་ཀྱེ་དཾ་ན་མཿ ཐུན་མཚམས་སུ། འཇམ་དཔལ་མདུན་གྱི་ནམ་མཁར་
བཞུགས་པར་གྱུར། །ཨོཾ་ཝཱ་ཀྱེ་དཾ་ན་མཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་ཏུ་གསལ། །འཇིག་རྟེན་གསུམ་ན་མུན་སེལ་བ། །འཇམ་པའི་དབྱངས་ལ་ཕྱག་འཚལ་ལོ། །བཅོམ་ལྡན་འཕགས་པ་འཇམ་དཔལ་གྱིས་བདག་ལ། །ཤེས་རབ་ཕུན་སུམ་ཚོགས་པ་བསྐྱེད་དུ་གསོལ། །གྲེ་ཕུག་ཨ་དཀར་དག་ལས་འོད་འཕྲོས་པས། །རྒྱལ་བ་ཀུན་གྱི་བློ་གྲོས་དཔག་མེད་དག །བསྡུས་ནས་ཁོང་དུ་ཐིམ་པས་ལུས་ཁེངས་པས། །མི་བརྗེད་དྲན་པའི་གཟུངས་ནི་འདི་ཐོབ་གྱུར། །ཅེས་པ་འདི་ཀརྨ་དོན་གྲུབ་ཀྱི་རྒྱུན་གྱི་ཐུགས་དམ་གྱི་ཆེད་དུ་རྒྱ་གཞུང་ནས། ཨ་རཱ་གས་བསྡུས་པའོ། །འདིར་འབད་བསོད་ནམས་ཉིན་བྱེད་ཀྱིས། །བདག་བློའི་ཆུ་སྐྱེས་རབ་འཛུམ་ཞིང་། །འཆད་རྩོད་རྩོམ་པའི་དྲི་བསུང་གིས། །སྲིད་ཞིའི་ཁྱོན་ཀུན་ཁྱབ་གྱུར་ཅིག། །།