ཛཾ་དཀར་ཡི་དམ་ལྟར་སྒྲུབ་པ་དངོས་གྲུབ་གཏེར་མཛོད།
ཛཾ་དཀར་ཡི་དམ་ལྟར་སྒྲུབ་པ་དངོས་གྲུབ་གཏེར་མཛོད་ཅེས་བྱ་བ་བཞུགས་པའི་དབུའོ། །
ན་མོ་ལོ་ཀི་ཤྭ་ར་ཡེ། རིན་ཆེན་དཔུང་པའི་རྒྱ་གཞུང་ལས། རང་ཡང་ཛམྦྷ་ལ་རུ་བསྒོམ། །ཞེས་པ་དང་། དབང་ཆོག་ལས། སྐྱབས་འགྲོ་སེམས་བསྐྱེད་སྔོན་དུ་འགྲོ་བའི་བདག་བསྐྱེད་གཙོ་བོ་ཛ་དཀར་གྱི་སྒོམ་བཟླས་མཆོད་བསྟོད་བྱ་ཞེས་དང་། དཀོན་མཆོག་འབངས་ཀྱིས་ཛ་ལྷ་གཙོ་བོའི་བདག་བསྐྱེད་སྒོམ་བཟླས་མཆོད་བསྟོད་བྱ་ཞེས་གསུངས་པ་ལྟར། བདག་བསྐྱེད་ཡི་དམ་ལྟར་བསྒྲུབ་པའི་མན་ངག་ལ། སྐྱབས་འགྲོ་ནི། བདག་དང་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །མགོན་པོ་ཛཾ་བྷ་ལ་དཀར་པོའི་ལྷ་ཚོགས་འཁོར་དང་བཅས་
པ་རྣམས་ལ་སྐྱབས་སུ་མཆིའོ། །སེམས་ཅན་ཐམས་ཅད་ཀྱི་དབུལ་ཕོངས་བསལ་ནས་སྦྱིན་པའི་ཕར་ཕྱིན་ལ་འགོད་པའི་ཆེད་དུ། །བདག་གིས་ཛཾ་བྷ་ལ་དཀར་པོ་བསྒྲུབ་པར་བྱའོ། །སྐད་ཅིག་གིས་རང་ཉིད་ཛ་དཀར་དུ་གྱུར་པའི་ཐུགས་ཀ་ནས་འོད་ཟེར་འཕྲོས། སྟེང་འོག་ཕྱོགས་མཚམས་ཐམས་ཅད་རྡོ་རྗེ་དཀར་པོ་ཤ་སྟག་གི་གུར་བླ་བྲེ་དྲྭ་བ་རྭ་བ་དང་། ཡེ་ཤེས་ཀྱི་མེ་དཔུང་དཀར་པོ་འབར་བའི་དུམ་བུ་གཅིག་ཏུ་གྱུར། ཨོཾ་བཛྲ་རཀྵ་རཀྵ་ཧཱུྃ་སྭཱ་ཧཱ། རང་གི་ཐུགས་ཀའི་ཛཾ་ཡིག་ལས་འོད་ཟེར་འཕྲོས་པས་རང་བཞིན་གྱི་གནས་དང་པོ་ཊ་ལ་ནས་ཛ་དཀར་ལྷ་
ལྔའི་དཀྱིལ་འཁོར་བླ་མ་འོད་དཔག་མེད་དབུ་ལ་བཞུགས་པ་སྤྱན་དྲངས་བཛྲ་ས་མ་ཡ་ཛ༔ ཨརྒྷཾ་སོགས་ཀྱིས་མཆོད། འཇིག་རྟེན་མགོན་པོའི་སྤྱན་ཆབ་ལས་འཁྲུངས་ཤིང་། །གངས་རི་ལྟར་དཀར་ནོར་འཆང་ཀུན་གྱི་རྗེ། །མཁའ་འགྲོ་སྡེ་བཞིའི་བསྐོར་ལ་ཕྱག་འཚལ་བསྟོད། །སེར་སྣའི་ལས་ཀྱི་གདུང་བ་ཀུན་སེལ་ཞིང་། །སྐྱེ་དང་སྐྱེ་བར་ཁྱོད་ལ་གསོལ་འདེབས་ཀྱི། །རིན་ཆེན་བདུད་རྩིའི་གཏེར་གྱི་ཆར་རྒྱུན་གྱིས། །བདག་སོགས་དབུལ་བའི་སྡུག་བསྔལ་ཞི་བར་མཛོད། །བསྟོད་པ་བྱ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱི་ཞིང་། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ་གྱིས་སྡོམ་པ་བཟུང་། །
སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ཆེན་པོ་ལ་ཡུན་རིང་དུ་གནས་པར་གྱུར་ཅིག །ཚད་མེད་བཞི་བསྒོམ། ཚོགས་ཞིང་ལྟརྣམས་རང་གི་སྙིང་ཁར་ཐིམ་པར་གྱུར། ཨོཾ་སྭ་བྷ་ཝས་སྦྱངས་ཡེ་ཤེས་ཀྱི་ཚོགས་བསགས་ལ། སྟོང་པའི་ངང་ལས་འབྱུང་བ་རིམ་བརྩེགས་རི་རབ་ཀྱི་སྟེང་དུ་ཧཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་དང་བཅས་པ་མཚན་ཉིད་ཐམས་ཅད་ཡོངས་སུ་རྫོགས་པའི་ཕྱི་རོལ་གྱི་བར་མཚམས་རྣམས་སུ་རིན་པོ་ཆེ་སྣ་ཚོགས་ཀྱི་བྱེ་མ་བརྡལ་བ། དཔག་བསམ་ཤིང་གི་ཕྲེང་བ་བདུད་རྩིའི་ཆུ་མིག་དང་བུམ་པ་བཟང་པོའི་ཕྲེང་བ་དཀྲིག་པ། དེའི་ཕྱི་རོལ་དུ་རྡོ་རྗེ་རིན་པོ་ཆེའི་རྭ་བ་ཟླུམ་པོ་ཕྱི་རོལ་དུ་འོད་ཟེར་གྱི་ཕྲེང་བ་དང་བཅས་པའི་དབུས་སྣ་ཚོགས་པདྨ་དང་ཟླ་བ་རྒྱས་པའི་གདན་ལ་རང་སེམས་ཛཾ་ཡིག་དཀར་པོ་ལས་འོད་འཕྲོས། རྒྱལ་བ་སྲས་དང་བཅས་པ་ལ་མཆོད་པའི་སྤྲིན་གྱིས་མཆོད། །
སྦྱིན་པའི་ཕ་རོལ་ཏུ་ཕྱིན་པའི་དངོས་གྲུབ་ཐམས་ཅད་བསྡུས། སེམས་ཅན་ཐམས་ཅད་ཀྱི་བཀྲེས་སྐོམ་དང་དབུལ་བ་བསལ། བསོད་ནམས་དང་སྟོབས་འབྱོར་བསྡུས་ཛི་ལ་ཐིམ་པ་ལས་རིན་པོ་ཆེ་དཀར་པོའི་བེ་ཅོན་ཛ་གྱིས་མཚན་པ་དེ་ཡོངས་སུ་གྱུར་པ་ལས། རང་ཉིད་འཕགས་མཆོག་ཛཾ་བྷ་ལ་སྐུ་མདོག་དཀར་པོ་སྟོན་ཀའི་ཟླ་བའི་མདོག་ཅན་ཞལ་གཅིག་ཕྱག་གཉིས་སྤྱན་གསུམ་མཆེ་བ་ཅུང་ཟད་གཙིགས་ཤིང་བཞད་པ། ཕྱག་གཉིས་གཡས་རིན་པོ་ཆེ་དཀར་པོ་མེ་འབར་བའི་བེ་ཅོན་ཕྱར་བས་དབུལ་ཕོངས་བཟློག་ཅིང་། གཡོན་གཏེར་གྱི་ནེའུ་ལེ་བཙིར་བས་དགོས་འདོད་ཀྱི་ཆར་ཆེན་པོ་འབེབས་པ། ཡུམ་སངས་རྒྱས་ཌཱཀི་སྦས་པའི་ཚུལ་ཁ་ཊཾ་གི་རྣམ་པར་མཆན་ཁུང་ནས་ཡར་བསྒྲེང་བས་བདེ་སྟོང་གི་ཡེ་ཤེས་རྒྱས་ཤིང་མཆོག་གི་དངོས་གྲུབ་སྟེར་བ། ཐུང་ཞིང་ལྟོ་བ་འཕྱང་ལ་ཡན་ལག་རགས་པ་གནོད་སྦྱིན་གྱི་ངང་ཚུལ་ཅན། དབུ་སྐྲ་དཀར་སེར་གྱེན་དུ་བརྗེས་པ་ལ་རིན་པོ་ཆེ་སྣ་ཚོགས་ཀྱི་སྲོག་ཞུ་དང། རྣ་རྒྱན་དང་། མགུལ་ཆུ་དང་། དོ་ཤལ་དང་། སེ་རལ་ཁ་དང་། དཔུང་རྒྱན་དང་། ཕྱག་གདུབ་དང་། ཞབས་གདུབ་དང་། སྐ་རགས་དང་། འོག་པག་
གིས་སྤྲས་པ། དར་སྣ་ཚོགས་ཀྱི་སྟོད་གཡོགས་དང་སྨད་དཀྲིས་དང་། ཅོད་པན་དང་། དར་དཔྱངས་དང་། ཤམ་ཐབས་བྱས་པ་ལ། མུ་ཏིག་དཀར་པོའི་དྲ་བ་དང་། དྲྭ་ཕྱེད་ཆུན་འཕྱང་དུ་མས་ཉེ་བར་སྤྲས་པ། ཞབས་གཉིས་རྒྱལ་པོ་རོལ་པའི་སྟབས་ཀྱིས་གཡུ་འབྲུག་སྔོན་མོ་པདྨ་རཱ་གའི་ཟེ་བ་དང་མྱུར་མགྱོགས་རླུང་གི་གཤོག་པ་ཅན་ལ་ཆིབས་ཤིང་། འབྲུག་སྐད་ནམ་མཁའ་བར་སྣང་ཁྱབ་པར་སྒྲོགས་པས་སྒྲུབ་པ་པོའི་སྙན་གྲགས་ཕྱོགས་བཅུར་རྒྱས་པར་བྱེད་པ། སྐུའི་འོད་ཟེར་ལས་གྲུབ་པའི་མེ་དཔུང་དཀར་པོ་རབ་ཏུ་འཁྲུག་ཅིང་འབར་བས་བར་ཆད་ཐམས་ཅད་སྲེག་པར་བྱེད་པ། སྐུ་ལས་རང་འདྲ་བའི་སྤྲུལ་པ་དུ་མ་འཕྲོ་བ་དང་སྡུད་པའི་རང་བཞིན་ཅན་དུ་གྱུར་པའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་སྔོན། ཐུགས་ཀའི་དབུས་སུ་ཛཾ་ཡིག་དཀར་པོ་དེ་ལས་འོད་ཟེར་འཕྲོས་པས། རང་བཞིན་ཆོས་ཀྱི་དབྱིངས་ལྕང་ལོ་ཅན། པོ་ཊ་ལ་རྣམས་ནས་བསྒོམ་པ་དང་འདྲ་བའི་ཡེ་ཤེས་པ་དཔག་ཏུ་མེད་པ་དང་། དབང་ལྷ་སངས་རྒྱས་དང་བྱང་སེམས་ཀྱི་ཚོགས་དང་བཅས་པ་མདུན་གྱི་ནམ་མཁར་སྤྱན་
དྲངས༔ བཛྲ་ས་མ་ཡ་ཛ༔ ཨརྒྷཾ་སོགས། ཛཿཧཱུྃ་བཾ་ཧོཿགཉིས་སུ་མེད་པར་གྱུར། དབང་ལྷས་དབང་བསྐུར་སྐུ་གང་དྲི་མ་དག །ཆུ་ཡི་ལྷག་མ་ཡར་ལུད་པ་ལས་རིགས་བདག་འོད་དཔག་མེད་པས་དབུ་བརྒྱན་པར་གྱུར། རང་ལས་སྤྲུལ་པའི་ལྷ་མོ་མཆོད་རྫས་ཐོགས་པ་དཔག་ཏུ་མེད་པས་བདག་ཉིད་ལ་མཆོད་ཅིང་བསྟོད་པར་གྱུར། ཨརྒྷཾ་སོགས་དང་། །འཇིག་རྟེན་མགོན་པོའི་སྤྱན་ཆབ་ལས་འཁྲུངས་ཤིང་། །གངས་རིའི་མདོག་མཚུངས་ནོར་འཆང་ཀུན་གྱི་རྗེ། །སེར་སྣའི་ལས་ཀྱི་གདུང་བ་ཀུན་སེལ་ཞིང་། །མཁའ་འགྲོ་སྡེ་བཞིའི་བསྐོར་ལ་ཕྱག་འཚལ་བསྟོད། །དེ་ལྟ་བུའི་མངོན་རྟོགས་མི་གསལ་ན་ངག་ཏུ་བརྗོད་ཅིང་གསལ་གདབ། ཡིད་ཀྱིས་གསལ་བར་སྒོམ་ནུས་ན་མངོན་རྟོགས་ངག་ཏུ་མ་བརྗོད་ཀྱང་ཆོག །དེ་ལྟ་བུའི་བསྐྱེད་རིམ་དེ་ཡང་རྣམ་པ་གསལ་ཞིང་སྤུ་རིས་དོད་པ་མེ་ལོང་ནང་གི་གཟུགས་བརྙན་ལྟ་བུ་གསལ་ཡང་རང་བཞིན་མེད་པའི་འཇའ་ཚོན་ལྟ་བུ་སྣང་ཞིང་སྟོང་ལ་ཆུ་ཟླ་ལྟ་བུར་བསྒོམ་པ་བསྐྱེད་རིམ་མོ། །དེ་ནས། རང་གི་ཐུགས་ཀར་པདྨ་དཀར་པོ་དང་ཟླ་བ་རྒྱས་པའི་སྟེང་དུ་ཡིད་བཞིན་ནོར་བུ་ཛཾ་ཡིག་དཀར་པོའི་མཚན་པའི་མཐར་བཟླ་བྱའི་སྔགས་ཕྲེང་མུ་ཏིག་གི་ཕྲེང་བ་ལྟ་བུར་གཡོན་དུ་བསྐོར་བར་དམིགས་ལ། དེ་ཀློག་པའི་ཚུལ་དུ་ཅུང་ཟད་བཟླས་པས།
དེ་ལས་འོད་ཟེར་དཀར་པོ་བྱུང་སྟེ་སྔགས་འབྲུ་མི་འཁོར་བར་འོད་ཟེར་དཀར་པོ་ཀྱི་ལི་ལི་འཁོར་བ་དང་། དེ་ནས་སྔགས་ཕྲེང་གཡས་སྐོར་དུ་ཀྱི་ལི་ལི་འཁོར་བར་བསྒོམ་པ་ནི། བསྙེན་པའོ།། སྔགས་ཕྲེང་དེ་ལས་འོད་ཟེར་དཀར་པོ་ཕྱོགས་བཅུར་འཕྲོས། སངས་རྒྱས་བྱང་སེམས་ཐམས་ཅད་ལ་མཆོད་པའི་སྤྲིན་དུ་གྱུར་ནས་མཆོད། སྐུ་གསུང་ཐུགས་ཀྱི་དངོས་གྲུབ་བྱིན་རླབས་ཐམས་ཅད་འོད་ཟེར་དཀར་པོའི་རྣམ་པར་རང་ལ་བསྡུ་བ་དང་། སྔགས་ཕྲེང་འཁོར་བཞིན་འོད་ཟེར་སེམས་ཅན་ཐམས་ཅད་ལ་ཕོག་པས་བཀྲེས་སྐོམ་དབུལ་ཕོངས་ཀྱི་དུཁ་གསལ་ནས་འཕགས་པ་སྨུག་འཛིན་གྱི་གོ་འཕང་ལ་བཀོད། འཇིག་རྟེན་གྱི་ལྷ་འདྲེ་མི་གསུམ་གྱི་བསོད་ནམས་དཔལ་འབྱོར་ཐམས་ཅད་འོད་ཟེར་དཀར་པོའི་རྣམ་པར་བསྡུས་ནས་རང་ཉིད་ལ་ཐིམ་པས་བསོད་ནམས་དབང་ཐང་རྒྱས་པར་བསམས་ལ་བཟླ་བ་ནི་ཉེ་བར་བསྙེན་པའོ། །ཐུགས་ཀའི་ནོར་བུ་ཇི་ཡིག་སྔགས་ཕྲེང་དང་བཅས་པ་ལས་འོད་ཟེར་དཀར་པོ་འཕྲོས་པས་ལུས་ཀྱི་ནང་ཐམས་ཅད་གང་བས་ཚེ་རབས་འཁོར་བ་ཐོག་མ་མེད་པ་ནས་བསགས་པའི་སེར་སྣ་དང་། འཕྲོག་པ་བཅོམ་པ་བརྐུས་པ་ལ་སོགས་པའི་སྡིག་སྒྲིབ་ཐམས་ཅད་དག །འོད་ཟེར་ཉི་མའི་ཟེར་
ལྟ་བུ་བ་སྤུའི་བུ་ག་ནས་འཕྲོས། འོད་ཟེར་རེ་རེའི་རྩེ་ལ་ཛཾ་དཀར་རེ་རེ་བཞུགས་པའི་ནེའུ་ལེ་དང་རིན་པོ་ཆེའི་བེ་ཅོན་ལས་རིན་པོ་ཆེ་སྣ་ཚོགས་ཀྱི་ཆར་སི་ལི་ལི་བབས་པས་ཕྱོགས་དང་གནས་ཁང་ཐམས་ཅད་ཕྱུར་བུར་གང་བས་དབུལ་བ་དང་བྲལ་བར་བསྒོམས་ལ་ཅི་ནུས་བཟླ་བ་སྒྲུབ་པའོ། །ཡང་ཐུགས་ཀའི་འོད་ཟེར་ཕྱི་སྣོད་ཀྱི་འཇིག་རྟེན་ལ་ཕོག་པས་བདེ་བ་ཅན་གྱི་ཞིང་ཁམས་ལྟ་བུར་བྱས། གནས་ལ་ཕོག་པས་པོ་ཊ་ལར་བྱས། གནས་ཁང་ལ་ཕོག་པས་རིན་པོ་ཆེའི་གཞལ་ཡས་ཁང་དུ་བྱས། སེམས་ཅན་ཐམས་ཅད་ལ་ཕོག་པས་ཛཾ་དཀར་ཤ་སྟག་ཏུ་གྱུར། དེ་ཐམས་ཅད་ཀྱིས་སྔགས་སྒྲ་འུ་རུ་རུ་སྒྲོགས་པས་རིན་པོ་ཆེ་སྣ་ཚོགས་ཀྱི་ཆར་སི་ལི་ལི་འབབ་པར་བསྒོམས་ལ་བཟླ་བ་ནི་སྒྲུབ་པ་ཆེན་པོའོ། །དེ་ཡན་ཆད་བསྐྱེད་པའི་རིམ་པ་སྟེ་ཉིན་མོའི་རྣལ་འབྱོར་རོ། ༈ །དེ་ཡང་རྒྱ་གཞུང་ལས། དེ་ནས་དུས་རྟག་ཏུ་སྲོད་ལ་རྣམ་པར་མི་རྟོག་པའི་ངང་ལ་བཞག་ཅེས་གསུངས། ནུབ་མུན་རུབ་ནས་སྐྱེ་འགྲོ་ཐམས་ཅད་ཇི་ལྟར་གསལ་བ་དེ་རང་ལ་བསྡུ། ཕྱི་སྣོད་པོ་ཊ་ལ་དང་བདེ་བ་ཅན་གསལ་བ་དེ་གཞལ་ཡས་ཁང་ལ་བསྡུ། དེ་ཡང་རང་ཉིད་ལ་བསྟིམ། འབྲུག་རང་ཉིད་ལ་བསྡུ། རང་ཉིད་དབུ་ནས་མར། ཞབས་ནས་ཡར་བསྡུས་ལ་ཐུགས་ཀའི་སྔགས་ཕྲེང་ལ། དེ་ནོར་བུ་ལ། ནོར་བུ་ཛ་ཡིག་ལ་ཐིམ་དེ་ཐིག་ལེ་མུ་
ཏིག་གི་མདོག་ཡུངས་ཀར་ཙམ་ལ་ཡུན་རིང་དུ་སེམས་བཟུང་བ་མཚན་བཅས་ཞི་གནས་སོ། །དེ་ནས་ཐིག་ལེ་ཡང་འཇའ་ཡལ་བ་ལྟར་སོང་ནས་སེམས་གང་ལ་ཡང་མི་རྟོག་པ་བཞག་པ་ནི། མཚན་མེད་ཞི་གནས་སོ། །སེམས་རྣམ་རྟོག་འཕྲོ་ཡང་རུང་སྟེ་དེའི་ངོ་བོ་ལ་ཅེར་གྱིས་བལྟས་པས་རང་བཞིན་མེད་པར་ལྷག་གིས་མཐོང་བ་ལྷག་མཐོང་ངོ་། །དེ་ཡང་རྣམ་རྟོག་རེ་སྐྱེས་ཤིང་དེ་ཡི་ངོ་བོ་ལ་ཅེར་གྱིས་ལྟ་བ་ཐ་མ་རྣམ་རྟོག་སྐྱེས་པ་དང་མཉམ་དུ་དྲན་པས་འཛིན་ནས་ཤར་གྲོལ་དུ་སོང་སྟེ་དྲན་ཙམ་དུ་ཉམས་ལེན་སྟེང་ནས་སླེབས་ན་འབྲིང་ངོ་། །བལྟ་བྱ་ལྟ་བྱེད་དང་བྲལ་ཏེ་སོ་མ་ལྷུག་པར་རང་བབས་སུ་བཞག་པས་དྲན་རིག་ཐམས་ཅད་ཆུ་ལ་ཆུ་རླབས་ལྟར་ཉམས་ལེན་གྱི་ངང་དུ་ཐིམ་ན་རབ་ཡིན་པས་དེ་ལྟར་རྫོགས་རིམ་མི་རྟོག་ཡེ་ཤེས་ཁོ་ན་བསྒོམ་ཞིང་རྣམ་པར་མི་རྟོག་པའི་སྔགས་ཁོ་ན་བཟླའོ། །དེས་ནི་མཆོག་གི་དངོས་གྲུབ་དང་། ཐུན་མོང་ངམ་བཟའ་བཏུང་འདུ་བ་གཉིས་ཀ་འགྲུབ་བོ། །དེ་ནི་རྫོགས་པའི་རིམ་པ་མཚན་མོའི་རྣལ་འབྱོར་རོ། །།ནངས་ནུབ་སོགས་ལ་སྐད་ཅིག་དྲན་རྫོགས་སུ་ཛ་དཀར་དམ་ཡེ་དབྱེར་མེད་པ་རིགས་བདག་སྤྱི་བོར་རང་ཆསསུ་བཞུགས་པ་གཅིག་ཆུ་ལས་ཉ་ལྡང་བའི་ཚུལ་དུ་བསྐྱེད། དེ་ལྟར་བསྐྱེད་མཁན་སེམས་ཡིན་སེམས་སྟོང་པ་ཉིད་ཡིན་སྟོང་པ་ཉིད་ཆོས་སྐུ་ཡིན། སེམས་སྟོང་པ་ཉིད་རྟོགས་པའི་ངང་ལས་བསྐྱེད་རིམ་གསལ་བ་འཇའ་ཚོན་ལྟ་བུ་ཡིན། དེ་གསལ་སྟོང་ཟུང་འཇུག་ཡིན་པ་ཤེས་པར་བྱས་ལ་ཉམས་ལེན་གྱི་དྲན་རྫི་དང་མ་བྲལ་བའི་ངང་ནས་བསྐྱེད་རིམ་བསྒོམས་པས་
བསྐྱེད་རྫོགས་ཟུང་འཇུག་གོ །མཆོག་ཐུན་མོང་གི་དངོས་གྲུབ་ཚེགས་ཆུང་ངུའི་བདེ་བླག་ཏུ་ཐོབ་པའི་ཐབས་ཟབ་མོ་འདི། དབྱིག་མདའ་བླ་མ་ཀརྨ་བརྩོན་འགྲུས་ཀྱིས་བསྐུལ་བར་དགེ་སློང་ཨ་རཱ་གས་བཀོད་པ་ལ་ཉེས་པ་གང་མཆིས་ཛཾ་ལྷ་ཉིད་ལ་བཤགས་ཤིང་དགེ་བས་སེམས་ཅན་ཐམས་ཅད་དབུལ་ཕོངས་དང་བྲལ་ནས་བདེ་བ་ཅན་དུ་སྐྱེ་བར་གྱུར་ཅིག །མངྒ་ལཾ།། ༈ སྤྱོད་ལམ་ལམ་ཁྱེར་ཁྱེར་བདེ་བ་བཞུགས་སོ།། ན་མོ་ལོ་ཀི་ཤྭ་ར་ཡ། ཛམ་དཀར་ཡི་དམ་ལྟར་སྒྲུབ་པའི་སྤྱོད་ལམ་རྣལ་འབྱོར་ནི་ནངས་པར་རྣལ་སད་མ་ཐག་ཌཱཀི་བཞིས་རོལ་མོའི་སྒྲས་མ་རིག་གཉིད་ལས་བསླང་བར་མོས་ལ་ཙོག་པུར་བྱ། མལ་ནས་ལངས་ནས་ཆོས་སྐུ་སྟོང་པའི་ངང་ལས་ཐུགས་རྗེ་སྒྱུ་མའི་སྐུ་ཛཾ་ལྷ་དཀར་པོ་ཝལ་གྱིས་གསལ་བཏབ་ལ་སེམས་ཅན་གྱི་དོན་དུ་བཞེངས་པར་བསམ་སྟེ། གོས་རྣམས་ལྷ་རྫས་གོས་ཀྱི་དར་སྣ་ཚོགས་སྟོད་གཡོགས་དང་སྨད་དཀྲིས། སྐ་རགས་ལྷམ་སྒྲོག་སོགས་རིན་པོ་ཆེའི་རྐང་གདུབ་དང་། རིན་པོ་ཆེའི་སྐེད་ཆིངས་ཕྲེང་བ་སོགས་རིན་པོ་ཆེའི་རྒྱན་དུ་བྱིན་གྱིས་བརླབས་ཤིང་གྱོན། འགྲོ་བའི་ཚེ་རང་ཉིད་གི་གཡས་ཕྱོགས་སུ་དཔག་བསམ་ཤིང་གི་རྩེར་པདྨ་དང་ཟླ་བའི་གདན་ལ་སངས་རྒྱས་ཐམས་ཅད་འདུས་པའི་ངོ་བོ་ཛཾ་དཀར་ལྷ་ལྔ་གསལ་བ་ལ་སྐོར་བ་བྱེད་པར་མོས་ལ་འགྲོའོ། །འདུག་པའི་ཚེ་ཁང་པ་དེ་རིན་ཆེན་གཞལ་ཡས་ཁང་། གདན་པདྨ་དང་ཟླ་བའི་གདན་ལ་དམིགས་ནས་སྲིད་ཞིའི་མཐའ་ལ་མི་གནས་པ་ནམ་མཁའ་ཇི་སྲིད་འགྲོ་བའི་དོན་དུ་ལྡང་བར་བསམ་ལ་འདུག་གོ །ཟ་བའི་
ཚེ་སྣོད་རིན་པོ་ཆེའི་སྣོད་དང་ཟས་བདུད་རྩི་དཀར་གསུམ་ལ་སོགས་སུ་བསམས་ལ། ཨོཾ་ཨཱཿཧཱུྃ་གིས་བྱིན་གྱིས་བརླབས་ལ་རང་ཛ་དཀར་དུ་གསལ་བའི་ལུས་ནང་སྟོང་ཞིང་གསལ་བ། ལྟོ་བ་མེ་ཉམས་ཀྱི་རླུང་ངམ་ཨ་ཐུང་གི་་མེ། ཁ་དབང་གི་ཐབ་ཁུང་ཟླ་གམ། ལག་གཉིས་སྒང་གཟར་དང་བླུགས་གཟར་ལྕེ་མེ་ལྕེའི་རང་བཞིན་དུ་གྱུར། ཡེ་ནས་གནས་པ་དེ་གསལ་གདབ། རང་གི་སྙིང་ཁར་ཛ་དཀར་ལྷ་ལྔ་ཡེ་ཤེས་དམ་ཚིག་དབྱེར་མེད་སྐུར་བསྒོམས་ནས། བཟའ་བཏུང་ཐམས་ཅད་བསྲེག་བླུག་ཏུ་དམིགས་ཤིང་། འབུལ་བ་ཞལ་དུ་ལྷག་ལྷག་སོང་ནས་ཐུགས་དགྱེས་སྐུ་ལས་བདུད་རྩི་བབས་པས་ལུས་ཁེངས་པར་བསྒོམས་པས་ཚོགས་རྫོགས་ཤིང་ལུས་ཟུངས་འཕེལ་ལོ། །ཉལ་བའི་ཚེ་སྣོད་བཅུད་།ཐམས་ཅད་རང་ལ་བསྡུའོ། །དེ་ཡང་ཇི་ཡིག་ལ་བསྟིམ་དེ་ཡང་མི་དམིགས་པའི་ངང་ལ་ཉལ་བས་གཉིད་དུ་སོང་། རྨི་ལམ་མ་བྱུང་བའི་བར་དུ་འོད་གསལ་ཡུད་ཙམ་འཆར་བ་དེ་ངོས་ཅི་ཟིན་བྱའོ། །དེ་ལ་ཡུན་རིང་དུ་གོམས་ན་འཆི་དུས་ཡང་འོད་གསལ་ངོས་ཟིན་ནས་འཆི་བ་ཆོས་སྐུར་སངས་རྒྱས་སོ། །གལ་ཏེ་རྨི་ལམ་རྨིས་ན་རྨི་ལམ་དུ་ངོ་ཤེས་པར་བྱས་ལ་ཛཾ་དཀར་གྱི་བསྐྱེད་རིམ་བསྒོམ་པར་བྱའོ། །དེ་ལ་ཡང་གོམས་ན་བར་དོར་བསྐྱེད་རིམ་ཟིན་ནས་བར་དོ་ལོངས་སྐུར་སངས་རྒྱས་སོ། །ཐུན་གྱི་མཇུག་ཐམས་ཅད་དུ། འདི་ལྟར་བགྱིས་པའི་དགེ་བའི་རྩ་བ་འདིས་བདག་སོགས་བདེ་བ་ཅན་གྱི་ཞིང་ཁམས་དེར་སྐྱེ་བར་གྱུར་ཅིག །ཅེས་བརྗོད། ཞིང་དེར་སྐྱེ་བ་སྤྲུལ་པའི་སྐུར་སངས་རྒྱས་སོ། །ཞེས་རཱ་ག་ཨ་སྱས་
བཀོད་པ་ཟབ་པའི་གདམས་པ་སྤྱི། མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།