འཕགས་པ་སྨུག་འཛིན་དཀར་པོ་ལྷ་ལྔའི་ལས་བྱང་འདོད་དགུའི་ཆར་འབེབས།
འཕགས་པ་སྨུག་འཛིན་དཀར་པོ་ལྷ་ལྔའི་ལས་བྱང་འདོད་དགུའི་ཆར་འབེབས་ཞེས་བྱ་བ་བཞུགས་སོ། །
ན་མོ་ཨརྱ་ཛཾ་བྷ་ལ་ཡེ། གཏོར་མ་རིན་པོ་ཆེའི་དབྱིབས་ཅན་དཀར་གསུམ་གྱིས་བརྒྱན་པར་བཤམས་ལ། ཨོཾ་སྭ་བྷ་ཝ་ཤུདྡྷསརྦ་དྷརྨ་སྭ་བྷ་ཝ་ཤུདྡྷོཉཧཾ། རིན་ཆེན་ལྔ་ལས་གྲུབ་པ་ཡི། །གཞལ་མེད་ཁང་གི་དབུས་སུ་ནི། །ཛཾ་ལྷ་སྐུ་མདོག་དཀར་པོ་སྟེ། །ཞལ་གཅིག་ཕྱག་གཉིས་གཡས་བེ་ཅོན། །ཕྱག་གཡོན་ནེའུ་ལེ་བསྣམས་པ་སྟེ། གྲུ་མོར་ཁ་ཊཾ་ག་ལྡན་པ། །དབུ་སྐྲ་དམར་སེར་གྱེན་དུ་བརྫེས། །སྤྱན་གསུམ་ཞལ་གདངས་རིན་ཆེན་གྱིས། །བརྒྱན་ལྡན་འབྲུག་ལ་ཆིབས་པའོ། །ཤར་དུ་རྡོ་རྗེ་ཊཱཀྐི་མ། །མཐིང་ནག་གཡས་ན་རྡོ་རྗེ་དང་། །གཡོན་པས་རྟེན་
འབྲེལ་ནོར་རྫས་འཛིན། །ལྷོ་རུ་རིན་ཆེན་ཌཱཀྐི་མ། །སེར་མོ་གཡས་ན་ནོར་བུ་དང་། །གཡོན་ན་རིན་ཆེན་བུམ་པ་འཛིན། །ནུབ་ཏུ་པདྨ་ཊཱཀྐི་མ། །དམར་མོ་གཡས་ན་པདྨ་དང་། །གཡོན་ན་འགུགས་བྱེད་ལྕགས་ཀྱུ་འཛིན། །བྱང་དུ་ལས་ཀྱི་ཌཱཀྐི་མ། །ལྗང་གུ་རྡོ་རྗེ་རྒྱ་གྲམ་གཡས། །གཡོན་པས་ནེའུ་ལེའི་རྐྱལ་པ་འཛིན། །ཀུན་ཀྱང་རིན་ཆེན་རྒྱན་ལྡན་ཞིང་། །ཕྱེད་བསྐུམ་ཚུལ་གྱིས་བཞུགས་པར་གྱུར། །གནས་གསུམ་ཨོཾ་ཨཱཿཧཱུྃ་གསུམ་དང་། །ཐུགས་དབུས་ནོར་བུ་ཛཾ་ཡིག་ལས། །འོད་འཕྲོས་ཡེ་ཤེས་སྤྱན་དྲངས་གྱུར། །སྤྱན་དྲངས་ཤིང་བཞུགས་སུ་གསོལ་
བ་ནི། ཧཱུྃ། སྔོན་གྱི་བསྐལ་པ་དང་པོ་ལ། །འཕགས་པ་སྤྱན་རས་གཟིགས་དབང་གིས། །འགྲོ་བའི་དབུལ་བ་སེལ་བའི་ཕྱིར། །སྤྱན་ཆབ་གཡས་ལས་སྤྲུལ་པའི་སྐུ། །ཛཾ་ལྷ་འབྲུག་ཞོན་ལྷ་ལྔ་པོ། །ཐུགས་རྗེའི་དབང་གིས་གཤེགས་སུ་གསོལ། །འཕགས་པ་ཐུགས་རྗེ་ཆེན་པོ་ཡི། །གནོད་སྦྱིན་རྒྱལ་པོའི་བུར་སྤྲུལ་ཚེ། །ཛཾ་བྷ་ལྷ་ཞེས་མཚན་གསོལ་ཏེ། །ནོར་ལྷའི་རྒྱལ་པོ་ཐུགས་རྗེ་ཅན། །སྨུག་འཛིན་དཀར་པོ་མཁའ་འགྲོའི་ཚོགས། །དངོས་གྲུབ་སྩོལ་ཕྱིར་གཤེགས་སུ་གསོལ། །བདག་གི་གནས་ཁང་རིན་ཆེན་གྱི། །གཞལ་ཡས་ཁང་དུ་བྱིན་གྱིས་རློབས། །དུས་རྣམས་རྟག་ཏུ་བརྟན་པར་བཞུགས། །འགྲོ་བའི་རེ་འདོད་བཀང་བ་དང་། །ཆོས་མཐུན་འབྱོར་པ་སྤེལ་བའི་ཕྱིར། །ཐུགས་རྗེའི་དམ་ཚིག་རྗེས་དགོངས་ལ། །བདག་གིས་བསམ་པ་འགྲུབ་པར་མཛོད། །ཨོཾ་པདྨ་ཀྲོ་དྷ་ཨརྱ་ཛཾ་བྷ་ལ་ས་པཱ་རི་ཝཱ་ར་བཛྲ་ས་མ་ཡ་ཛ༔ ཛཿཧཱུྃ་བཾ་ཧོཿ པདྨ་ཀ་མ་ལཱ་ཡ་ས༔ ས་མ་ཡ་ཧ་ན་ཧ་ན་ཧཱུྃ་ཕཊ། དབང་ལྷ་རིགས་ལྔ་སྤྱན་དྲངས་དབང་བསྐུར་བས། དབང་རྟགས་འོད་དཔག་མེད་སོགས་དབུ་རྒྱན་གྱུར། ཨོཾ། དངོས་སུ་འབྱོར་དང་
ཡིད་ཀྱིས་རྣམ་སྤྲུལ་པའི། །།ཉེར་སྤྱོད་སྣ་བདུན་འདོད་པའི་ཡོན་ཏན་ལྔ། །ཞིང་ཁམས་རྒྱ་མཚོ་མཆོད་སྤྲིན་ཐམས་ཅད་པ། །བློ་ཡིས་བླངས་ཏེ་འབྲུག་ཞོན་ལྷ་ལྔ་མཆོད། །ལྷ་ཡི་དབང་པོ་ལྷ་མིན་གཡུལ་རྒྱལ་བས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བའི་རྣམ་འཕྲུལ་ཛཾ་དཀར་ལྷ་ལྔ་ལ། །བཀྲ་ཤིས་རྫས་རྟགས་དག་གིས་མཆོད་པར་བགྱི། །རིན་ཆེན་གདུགས་དང་གསེར་ཉ་པདྨ་དུང་། །བུམ་པ་རྒྱལ་མཚན་དཔལ་བེའུ་འཁོར་ལོ་སྟེ། །ལྷ་ཡི་དགའ་ཚལ་མཛེས་པར་བྱེད་པ་ཡི། །བཀྲ་ཤིས་རྟོགས་བརྒྱད་དག་ནི་དབུལ་བར་བགྱི། །མི་དབང་རིན་ཆེན་སྣ་བདུན་འདི་དག་ནི། །ཛཾ་དཀར་ཡུམ་དང་བཅས་པ་མ་ལུས་པ། །བཤམས་ཤིང་ཡིད་ཀྱིས་དམིགས་ཏེ་ཕུལ་བ་ཡི། །འགྲོ་བ་མི་ཟད་གཏེར་ལ་སྤྱོད་པར་ཤོག །ཨོཾ་པདྨ་ཀྲོ་དྷ་ཨརྱ་ཛཾ་བྷ་ལ་ཧྲི་ད་ཡ་ཧཱུྃ་ཕཊ༔ ས་པ་རི་ཝཱ་ར་ཨརྒྷཾ་ནས། ཤབྡ་པཉྩ་པཱུ་ཛ། ཨཊྚ་མངྒ་ལཾ་དྲྭ་བྱ་ཨཏྠ་མངྒ་ལཾ་ཧེ་ཏུ། སབ་རཏྣ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ། དེ་ནས་གཏོར་མ་དཀར་གསུམ་ཅི་འབྱོར་བཤམས་ལ། ཨོཾ་ཨཱཿཧཱུྃ༔ གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། །རིན་ཆེན་སྣོད་དུ་གཏོར་མ་
ཟག་མེད་ཀྱི། །ཡེ་ཤེས་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ། ནོར་ལྷ་རྣམས་ཀྱི་ལྗགས་ཀྱི་པདྨོ་ནི། །ནོར་བུའི་དབྱིབས་ཅན་འོད་ཀྱི་སྦུ་གུ་ཡིས། །གཏོར་མ་དྲངས་ཏེ་གསོལ་བས་དགྱེས་པར་གྱུར། །ཨོཾ་པདྨ་ཀྲོ་དྷ་ཨརྱ་ཛམྦྷ་ལ་ཧྲིདཱ་ཡ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཛྲ་ཌཱཀྐི་ནཱི་ཁཱ་ཧི། རཏྣ་ཊཱཀྐི་ནཱི་ཁཱ་ཧི། པདྨ་ཊཱཀྐི་ནཱི་ལཱ་ཧི། ཀརྨ་ཊཱཀི་ནཱི་ཁཱ་ཧི། དཀོན་མཆོག་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །ལན་ཆགས་བུ་ལོན་བྱང་གྱུར་ཅིག །རྣམ་བཞི་མགྲོན་གྱི་ཚོགས་རྣམས་ལ། །ཚད་མེད་མཆོད་སྦྱིན་འདི་བསྔོས་པས། །བདག་དང་སེམས་ཅན་ཐམས་ཅད་ཀུན། །ལོངས་སྤྱོད་ལྡན་ཞིང་ཚོགས་རྫོགས་ནས། །མྱུར་དུ་སངས་རྒྱས་ཐོབ་པར་ཤོག །ཅེས་དང་། བསྟོད་པ་ནི། ཨེ་མ་ཧོ། འཇིག་རྟེན་དབང་ཕྱུག་ནོར་བདག་སྐུ་སྤྲུལ་འཕགས་པ་ནི། །གཏི་མུག་རྣམ་དག་ཆོས་དབྱིངས་ཡེ་ཤེས་ངོ་བོ་ཉིད། །ཞལ་གཅིག་ཕྱག་གཉིས་དབུ་སྐྲ་དམར་སེར་ནོར་བུའི་བརྒྱན། །ཤ་རྒྱས་གསུས་འཕྱང་སྣ་ཚོགས་དར་གྱི་ན་བཟས་བཀླུབས། །ཕྱག་
གཡས་བེ་ཅོན་འཛིན་པས་འཇིག་རྟེན་དབང་དུ་བསྡུས། །གཡོན་པས་ནེའུ་ལེ་འཛིན་པས་ལོངས་སྤྱོད་ཆར་བཞིན་འབེབས། །སྐུ་མདོག་དཀར་ལ་དམར་བའི་མདངས་ཆགས་འབྲུག་ལ་ཆིབས། །སྣ་ཚོགས་རིན་ཆེན་རྒྱན་གྱིས་མཛེས་ལ་ཕྱག་འཚལ་བསྟོད། །གཡོན་གྱི་གྲུ་མོར་རྡོ་རྗེ་ཁ་ཊཾ་བསྣམས་པ་ནི། །ཉིད་ཀྱི་སྐུ་ལ་གཉིས་མེད་འཁྲིལ་བའི་ཡུམ་མཆོག་མཚོན། །སྤྱན་གསུམ་ཁྲོ་གཉེར་ཅུང་ཟད་བསྡུས་པ་ཞི་ཁྲོའི་ཚུལ། །ཡིད་ལ་རེ་བའི་འབྲས་བུ་སྦྱིན་ལ་ཕྱག་འཚལ་བསྟོད། །ཤར་དུ་ཞེ་སྡང་རྣམ་དག་མེ་ལོང་ཡེ་ཤེས་སྐུ། །རྡོ་རྗེ་མཁའ་འགྲོ་མཐིང་ནག་ཞལ་གཅིག་ཕྱག་གཉིས་པ། །གཡས་པས་རྡོ་རྗེ་གཡོན་པས་རྟེན་འབྲེལ་ནོར་རྫས་འཛིན། །བགེགས་རིགས་ཀུན་འཇོམས་རྡོ་རྗེ་མཁའ་འགྲོར་ཕྱག་འཚལ་བསྟོད། །ལྷོ་རུ་སེར་སྣ་རྣམ་དག་མཉམ་ཉིད་ཡེ་ཤེས་སྐུ། །རིན་ཆེན་མཁའ་འགྲོ་སེར་མོ་ཞལ་གཅིག་ཕྱག་གཉིས་མ། །གཡས་པས་ནོར་བུ་གཡོན་པས་།རིན་ཆེན་བུམ་པ་འཛིན། །དབྱིག་གིས་ཆར་འབེབས་རིན་ཆེན་མཁའ་འགྲོར་ཕྱག་འཚལ་བསྟོད། །ནུབ་ཏུ་འདོད་ཆགས་རྣམ་དག་སོར་རྟོག་ཡེ་ཤེས་སྐུ། །པདྨ་མཁའ་འགྲོ་དམར་
མོར་ཞལ་གཅིག་ཕྱག་གཉིས་མ། །གཡས་པས་པདྨ་གཡོན་པས་འགུགས་བྱེད་ལྕགས་ཀྱུ་འཛིན། །འགྲོ་རྣམས་དབང་སྡུད་པདྨ་མཁའ་འགྲོར་ཕྱག་འཚལ་བསྟོད། །བྱང་དུ་ཕྲག་དོག་རྣམ་དག་བྱ་གྲུབ་ཡེ་ཤེས་སྐུ། །ལས་ཀྱི་མཁའ་འགྲོ་ལྗང་གུ་ཞལ་གཅིག་ཕྱག་གཉིས་མ། །གཡས་པས་རྒྱ་གྲམ་གཡོན་པས་ནེའུ་ལེའི་རྐྱལ་པ་འཛིན། །ལས་ཀུན་འགྲུབ་མཛད་སྣ་ཚོགས་མཁའ་འགྲོར་ཕྱག་འཚལ་བསྟོད། །འགྲོ་བ་དབུལ་བའི་སྡུག་བསྔལ་གཟིགས་གྱུར་ནས། །འཇིག་རྟེན་མགོན་པོའི་སྤྱན་ཆབ་ལས་འཁྲུངས་པའི། །གངས་རི་ལྟར་དཀར་ནོར་འཆང་ཀུན་གྱི་རྗེ། །མཁའ་འགྲོ་བཞི་ཡིས་བསྐོར་ལ་ཕྱག་འཚལ་བསྟོད། །སེར་སྣའི་ལས་ཀྱི་མེ་ཡིས་གདུང་བ་སེལ། །སྐྱེ་དང་སྐྱེ་བར་ཁྱོད་ལ་གསོལ་འདེབས་ཀྱི། །ད་ཆེན་བདུད་རྩི་གཏེར་གྱི་ཆར་རྒྱུན་གྱིས། །བདག་སོགས་དབུལ་བའི་སྡུག་བསྔལ་ཞི་བར་མཛོད།། ༈ ཨོཾ་པདྨ་ཀྲོ་དྷ་ཨརྱ་ཛམྦྷ་ལ་ཧྲིདཱ་ཡ་ཧཱུྃ་ཕཊ༔ བཛྲ་ཌཱཀྐི་ནཱི། རཏྣ་ཊཀྐི་ནི། པདྨ་ཊཱཀྐི་ནི། ཀརྨ་ཀི་ནཱི། པི་ཤ་ནི་སརྦ་སིདྡྷི་སྭཱ་ཧཱ། ཞེས་པའོ། །སྨི། མཆན། འདིར་བསྙེན་པ་ཅི་འགྲུབ་བྱ། ཐུན་བསྡུ་བའི་ཚེ། ལྷ་ལྔ་རང་གི་སྙིང་ཁར་ཐིམ། །
ལོངས་སྤྱོད་སྤྲིན་བཞིན་འདུ་བར་གྱུར། །མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་བསྩལ་བ། །དེ་ཀུན་མགོན་པོས་བཟོད་པར་གསོལ། །ཅེས་སྔགས་འཆང་རཱ་ག་ཨ་སྱས་རང་གཞན་ཀུན་ལ་ཕན་པའི་ཕྱིར། རཏྣ་དཱི་པས་མཛད་པའི་ཟིན་བྲིས་ལྟར་བྲིས་པའོ། །དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཏེ། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་ནི་ཐོབ་པར་ཤོག །བསྔོ་སྨོན་བཀྲ་ཤིས་རྒྱས་གདབ་བོ། །ཞེས་རཏ་དཱི་པས་མཛད་པའི་སྒྲུབ་ཐབས་ཀྱི་མཛེས་རྒྱན་དུ། སྔགས་འཆང་རཱ་ག་ཨ་སྱས་བདག་གཞན་ཀུན་ལ་ཕན་པའི་ཕྱིར་བྲིས་པའོ། མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།