ཛཾ་དཀར་གཞུང་རྒྱས་པའི་དོན་བསྡུས་རྒྱུན་ཁྱེར།
ཛཾ་དཀར་གཞུང་རྒྱས་པའི་དོན་བསྡུས་རྒྱུན་ཁྱེར་བཞུགས་སོ།། ཨོཾ་སྭ་བྷ་ཝ་ཤུདྡྷསརྦ་དྷརྨཱསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཨརྱ་ཛམྦྷ་ལ། །དཀར་པོ་ཞལ་གཅིག་ཕྱག་གཉིས་འབྲུག་ལ་ཞོན། །ཕྱག་གཡས་བེ་ཅོན་གཡོན་པས་ནེའུ་ལེ་ཡི། །དགོས་འདོད་རིན་ཆེན་ཆར་འབེབས་ཁ་ཊཾ་བསྣམས། །ཁྲོ་འཛུམ་ཉམས་ལྡན་སྤྱན་གསུམ་དབུ་སྐྲ་སེར། །རིན་ཆེན་སྣ་ཚོགས་ཡིད་འོང་རྒྱན་གྱིས་མཛེས། །འོད་དང་འོད་ཟེར་དཔག་ཏུ་མེད་པ་འཕྲོས། །འཇིག་རྟེན་ཁམས་ཀྱི་ཟས་ནོར་ཐམས་ཅད་བསྡུས། །རང་ལ་བྱིན་པས་དབུལ་བའི་སྡུག་བསྔལ་ཞི། །དགོས་འདོད་ཐམས་ཅད་ཡིད་བཞིན་འགྲུབ་གྱུར་ཅིག །ཨོཾ་པདྨ་ཀྲོ་དྷ་ཨརྱ་ཛཾ་བྷ་ལ་ཧྲི་ད་ཡ་ཧཱུྃ་ཕཊ། མང་དུ་བཟླ། ༀ་པདྨ་ཀྲོ་དྷ་ཨརྱ་ཛཾ་བྷ་ལ་ཧྲི་ད་ཡ་ཨརྒྷཾ་པཱཏྱཾ་པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་ཝི་དྱ་ཤབྟ་ཨཱཿཧཱུྃ། ཞེས་མཆོད་ལ། བསྟོད་པ་ནི། །འཇིག་རྟེན་དབང་ཕྱུག་ཐུགས་ཀྱི་སྤྲུལ་པ་ནི། །འགྲོ་ཀུན་དབུལ་བ་སེལ་མཛད་ནོར་གྱི་ལྷ། །དྲན་པ་ཙམ་གྱིས་རིན་ཆེན་ཆར་འབེབས་པའི། །འཕགས་པ་ཛཾ་བྷ་ལྷ་ལ་ཕྱག་འཚལ་བསྟོད། །དེ་ལྟར་མཆོད་ཅིང་གསོལ་བ་བཏབ་པའི་མཐུས། །ཚེ་འདིར་ནད་མེད་དགོས་འདོད་ཕུན་
སུམ་ཚོགས། །བསམ་པ་ཐམས་ཅད་ཡིད་བཞིན་འགྲུབ་པ་དང་། །ཕྱི་མ་བདེ་ཆེན་ཞིང་དེར་སྐྱེ་བར་ཤོག །ཨོཾ་ལས་རིན་ཆེན་སྣོད་ནང་དུ། །ལྷ་རྫས་དཀར་གསུམ་མངར་གསུམ་རྣམས། །ཁ་དོག་དྲི་རོ་ཕུན་ཚོགས་པའི། །ཟག་མེད་ཡེ་ཤེས་བདུད་རྩི་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱིཿ༔ ཨོཾ་པདྨ་ཀྲོ་དྷ་ཨརྱ་ཛཾ་བྷ་ལ་ཨི་དམ་བྷ་ལཾ་ཏ་ཁཱ་ཧི་ཁཱ་ཧི། མཆོད་སྦྱིན་གཏོར་མ་འདི་བཞེས་ལ། །འགལ་རྐྱེན་བར་ཆད་ཞི་བ་དང་། །ཚེ་དང་བསོད་ནམས་རྒྱས་པ་དང་། །འདོད་དགུ་ཆར་ལྟར་འབེབས་པར་མཛོད། །ཅེས་རྒྱ་གཞུང་གི་དོན་བསྡུས་ནས་རྒྱུན་ཁྱེར་དུ་ཨ་རཱ་གས་གསུངས་སོ། །སརྦ་མངྒ་ལཾ།། །།