གྲྭ་པ་མངོན་ཤེས་ཅན་གྱི་གཏེར་མ་ཛཾ་དམར་སྐོར་གྱི་ཐེམ་ཡིག་ནོར་བུའི་ཕྲེང་བ།
༼ཀ༽ གྲྭ་པ་མངོན་ཤེས་ཅན་གྱི་གཏེར་མ་ཛཾ་དམར་སྐོར་གྱི་ཐེམ་ཡིག་ནོར་བུའི་ཕྲེང་བ་ཞེས་བྱ་བ་བཞུགས་པའི་དབུ་ཕྱོགས་ལགས་སོ།།
ཨརྱ་ཛ་བྷ་ལ་ཡེ་ན་མོ། སྦྱིན་པའི་ཕར་ཕྱིན་འདོད་དགུ་ཀུན་གྱི་གཏེར། །མཁའ་མཉམ་སྐྱེ་དགུའི་གསོས་སུ་ངོམས་པར་མཛད། རྒྱལ་ཀུན་ཡབ་གཅིག་འཕགས་པ་ཛཾ་བྷ་ལར། །གུས་པས་འདུད་དོ་བཀའ་ཡི་གནང་བ་སྩོལ། ༼ཀ༽ །ཆ་ལག་མ་ནོར་ཚང་ལ་བསླད་མེད་ཕྱིར། །ཐེམ་ཡིག་བཀོད་པ་ནོར་བུའི་ཕྲེང་བ་ཡོད། ༼ཁ༽ །ཀུན་ཀྱང་ཡིད་ཆེས་དད་པ་སྐྱེ་བའི་ཕྱིར། །ཛཾ་དམར་ལོ་རྒྱུས་ཕན་ཡོན་གསལ་བ་ཡོད། ༼ག༽ །རྣལ་འབྱོར་སྤྲོས་མེད་སྒྲུབ་རྫས་དཀའ་བ་ལ། །ཆུ་ལ་བརྟེན་ནས་ཕྱི་ལྟར་སྒྲུབ་པ་ཡོད། ༼ངེ༽ །དམིགས་པ་དང་ནི་ལག་ལེན་གསལ་བའི་
ཕྱིར། །ཕྱི་སྒྲུབ་གཏོར་མའི་ཟིན་བྲིས་གསལ་བ་ཡོད། ༼ཅ༽ །ལོང་སྐབས་དང་ནི་དབང་སྐུར་བྱེད་པ་སོགས། །ཉེར་མཁོ་རྒྱུན་ཁྱེར་ཆུ་གཏོར་བསྡུས་པ་ཡོད། ༼ཆ༽ །སྒྲུབ་རྫས་གཞན་མང་མེད་ན་སྟབས་བདེ་བ། །གཏོར་མ་ལ་བརྟེན་ནང་ལྟར་སྒྲུབ་པ་ཡོད། ༼ཇ༽ །བཤམས་དང་བཅས་བཀོད་དམིགས་རིམ་ལ་སོགས་པ། །ནང་སྒྲུབ་ཟིན་བྲིས་ཤིན་ཏུ་གསལ་བ་ཡོད། ༼ཉ༽ །སྒྲུབ་རྫས་འཛོམས་ཤིང་ལག་ལེན་བརྩོན་པ་ལ། །གཱའུ་ལ་བརྟེན་གསང་ལྟར་སྒྲུབ་པ་ཡོད། ཏི༽ །རྫས་དང་ལག་ལེན་གནད་དུ་སྨིན་པ་ལ། །ཐོད་པ་ལ་བརྟེན་ཡང་གསང་སྒྲུབ་པ་
ཡོད། ༼ཐ༽ །བློ་དམན་ཕན་ཕྱིར་གབ་འཁྲུགས་བསལ་བ་ནི། །ཐོད་སྒྲུབ་ཟིན་བྲིས་ཤིན་ཏུ་གསལ་བ་ཡོད། ༼ད༽ །སྒྲུབ་པ་ཀུན་འདྲིལ་འདོད་དོན་ཀུན་འགྲུབ་པའི། །ཛཾ་དམར་ཙཀྲ་ལ་བརྟེན་སྒྲུབ་པ་ཡོད། ༼ན༽ །ལག་ལེན་གབ་པ་ཤིན་ཏུ་གསལ་བ་ཡི། །ཙཀྲའི་བྲི་ཐབས་ཟིན་བྲིས་ཆེ་ཆུང་ཡོད། ༼པ༽ །ཡོན་ཏན་མཁན་པོ་འགྲོ་དོན་རྒྱས་པའི་ཕྱིར། །སྒྲུབ་ཐབས་ཟབ་མོ་གསང་བའི་རྒྱ་ཅན་ཡོད། ༼ཕ༽ །ཆོས་འཁོར་སྐྱོང་དང་བསོད་ནམས་རྒྱས་པའི་ཕྱིར། །ཛཾ་དམར་སྒྲུབ་ཐབས་ཡིད་བཞིན་དབང་རྒྱལ་ཡོད། ༼བ༽ །དེ་ཡི་གཞུང་ནས་འབྱུང་བའི་ལས་ཚོགས་ནི། །ཆུ་དང་གཏོར་མ་སྦྱིན་ཐབས་རྩ་ཚིག་ཡོད། ༼མ༽ །བསྟན་པའི་བྱ་བ་རྒྱ་ཆེན་སྒྲུབ་ནུས་ཕྱིར། །ཛཾ་དམར་དབང་གི་སྒྲུབ་པ་ཟབ་མོ་ཡོད། ༼ཙ༽ ། དམིགས་པ་སྔགས་དང་རྫས་དང་ལག་ལེན་གྱི། །ཞལ་གདམས་ཉུང་ངུ་ཤིན་ཏུ་གསལ་བ་ཡོད། ༼ཚ༽ །བསོད་ནམས་ཡེ་ཤེས་ཚོགས་གཉིས་རྫོགས་པའི་ཕྱིར། །ཚོགས་མཆོད་ཟིན་བྲིས་འདོན་ཆ་གསལ་བར་ཡོད། ༼ཛ་༽ །ཚེ་བསོད་དཔལ་འབྱོར་དབང་ཐང་འཕེལ་བའི་ཕྱིར། །ཛཾ་དམར་རྒྱས་པའི་སྦྱིན་སྲེག་འདོན་ཆ་ཡོད། ༼ཝ༽ །གཞུང་དུ་མི་གསལ་དམིགས་པ་
ཕྱག་ལེན་སོགས། །སྦྱིན་སྲེག་ཞལ་ཤེས་གདམས་པ་བཀོད་པ་ཡོད། ༼ན༽ །ཁམས་གསུམ་སྣང་བ་དབང་དུ་བསྡུ་བའི་ཕྱིར། །དབང་གི་སྦྱིན་སྲེག་ཟབ་པའི་འདོན་ཆ་ཡོད། ༼ཟ༽ །དེ་ཡི་ཕྲིན་ལས་མྱུར་དུ་འགྲུབ་པའི་ཕྱིར། །ཞལ་ཤེས་གདམས་པ་ཤིན་ཏུ་ཟབ་པ་ཡོད། ༼འ༽ །རྣལ་འབྱོར་པ་དག་ཁ་ཟས་བཀྲེས་པ་ལ། །ཟས་སྒྲུབ་རྒྱུན་ཁྱེར་མན་ངག་ཟབ་མོ་ཡོད། ༼ཡ། །སྐལ་ལྡན་སློབ་མ་སྨིན་པར་བྱ་བ་ལ། །ཛཾ་དམར་དབང་དང་རྗེས་གནང་རྩ་ཚིག་ཡོད། ༼ར༽ །དེ་ཉིད་གཞན་ལ་སྤེལ་ཐབས་བདེ་བ་ཡི། །ཇོ་དམར་དབང་བསྐུར་བལྟས་ཆོག་བཀོད་པ་ཡོད། ༼ལ༽ །ཅི་བསམ་ལོངས་སྤྱོད་མྱུར་དུ་འོང་བའི་ཐབས། །མན་ངག་བསྲེ་ཐོད་གསང་བའི་རྒྱ་ཅན་ཡོད། ༼ཤ༽ །སྒྲུབ་ལ་བར་ཆད་བྱེད་པའི་སྒབ་འདྲེ་རྣམས། །མནན་ཐབས་གུད་དུ་སྦས་པ་ཟབ་མོ་ཡོད། །དེ་ཡི་མན་ངག་འདོན་ཆ་ལག་ལེན་རྣམས། །ཟིན་བྲིས་ནག་འགྲོས་གསལ་བར་བཀོད་པ་ཡོད། །༼ཧི། །ལིངྒ་བྲི་ཐབས་རྒྱས་སྐབས་སྔགས་ཀྱི་ཕྲེང་། །གསལ་བར་བཀོད་པའི་མན་ངག་ཟབ་མོ་ཡོད། ༼ཨ༽ །འགུགས་པའི་རྟགས་དང་ཉ་བོའི་གནས་ཡིག་དང་། །ནོན་པའི་
རྟགས་ཡིག་གསང་བ་ཞལ་ཤེས་ཡོད། ཊ༽ །གཏེར་གཞུང་རྩ་ཚིག་སྒབ་འདྲེ་བྲེལ་ཕོངས་ཅན། །མནན་ཐབས་གུད་དུ་སྦས་པ་ཉུང་ངུ་ཡོད། ༼༩༽ །སྔགས་ལ་བརྟེན་ནས་ནུས་པ་ལྡན་པ་དང་། །ཟ་འདྲེ་ཁ་ཆིངས་རྒོད་ལྡེམ་གཏེར་མ་ཡོད། ༼?༽ །གནོད་སྦྱིན་ཛི་ལྷའི་གསང་སྒྲུབ་ཟབ་མོ་ཡི། །སྒབ་འདྲེ་མནན་ཐབས་ཆོས་གླིང་གཏེར་མ་ཡོད། ༼ཎ༽ །རབ་འབྲིང་ཐ་མའི་འབྱོར་པ་ལ་བརྟེན་ནས། །ཛཾ་དམར་རྟེན་འཛུགས་འདོད་དགུ་ཀུན་འབྱུང་ཡོད། ༼༽ །སྤྲོས་མེད་རྒྱུན་གྱི་ཉམས་ལེན་བྱེད་པའི་ཐབས། །རྒྱུན་ཁྱེར་ཟིན་བྲིས་གསལ་བར་བཀོད་པ་ཡོད། །དེ་ལྟར་ཆོས་ཚན་སུམ་ཅུ་རྩ་ལྔ་པོ། །བྱིན་རླབས་བརྒྱུད་ལྡན་གཏེར་ཁ་ལས་བྱུང་བ། །རྩ་བའི་གཞུང་ལ་རྗེ་བཙུན་ཆགས་མེད་ཀྱི། །སྙན་བརྒྱུད་ཞལ་གདམས་གསལ་བར་བྱས་ཏེ་བཀོད། །ཕྱི་རབས་རྣམས་ལ་ཕན་ཕྱིར་སྦྱིན་པར་མཛད། །དེས་ན་སྙིགས་མའི་དུས་སུ་འདིར་བརྩོན་རིགས། །ཨེ་མ་པདྨའི་ཐུགས་བཅུད་སྨུག་འཛིན་གྱི། །མན་ངག་ཟབ་མོ་འཛིན་མའི་ཁོང་དུ་སྦས། །སྔོན་སྨོན་མཐུ་ལྡན་གྲྭ་པ་མངོན་ཤེས་ཀྱིས། །གངས་རིའི་ལྗོངས་ཀྱི་བསྟན་འགྲོའི་དཔལ་དུ་བཙས། །གྲུབ་པའི་སྤྱི་མེས་མཁས་པའི་ཚོགས་
རྣམས་ཀྱིས། །ཏི་ལ་ཀ་ཡི་ཨུ་པ་དེ་ཤ་རུ། །ཡང་ཡང་གདམས་པས་སྙིང་གི་ནོར་བུ་འདི། །སྣོད་དང་ལྡན་ལས་གཞན་གྱིས་ལྟ་ཅི་ཞིག །རང་ཕྱོགས་འཆོས་པའི་བྱ་བ་གྱི་ན་མོས། །ཟབ་དོན་ཡང་དག་རྒྱུ་བའི་ལམ་བཞིན་བསླད། །བཅོས་མེད་ཁྲེལ་བའི་གནས་ནས་ངོམས་ལགས་ན། །སྐྱེ་འགྲོའི་བདེ་སྐྱིད་དགུན་དུ་བན་བུན་གྱུར། །དེ་ཕྱིར་མན་ངག་ཟབ་མོའི་ལས་ཚན་རྣམས། །མི་འདོར་མུན་རུམ་གློག་འགྱུ་སྲིད་པ་ན། །ཚང་ཕྱིར་ཐེམ་གྱིས་བཏབ་འདི་དམ་ལྡན་ལས། །གཞན་ལ་མི་སྤེལ་ཟབ་དོན་གསང་བའི་རྒྱ། །དེ་སྐད་གནས་མདོའི་རྗེས་འཇུག་ཐ་ཤལ་པ། །ཨོ་རྒྱན་བསམ་གཏན་གླིང་ཞེས་བྱ་བས་སྦྱར། །ཉེས་འགལ་མཆིས་ན་སྲུང་མའི་ཚོགས་ལ་བཤགས། །དགེ་བས་ཆོས་འདི་མི་ནུབ་དར་ཞིང་རྒྱས། །བསྟན་དང་འགྲོ་བའི་བདེ་སྐྱིད་དགུང་ལ་རེག །ཕན་བདེའི་འབྲས་བུ་ཡུན་དུ་ཁྱབ་གྱུར་ཅིག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།