ཛཾ་བྷ་ལ་དམར་པོའི་ཕྱི་སྒྲུབ་ཆུ་ལ་བརྟེན་པའི་ཟིན་བྲིས།
ཛཾ་བྷ་ལ་དམར་པོའི་ཕྱི་སྒྲུབ་ཆུ་ལ་བརྟེན་པའི་ཟིན་བྲིས་བཞུགས་སོ།
རྒྱ་གར་སྐད་དུ། ཨརྱ་ཛཾ་བྷ་ལ་ས་དྷ་ནི་ནཱ་མ། བོད་སྐད་དུ། འཕགས་པ་ཛཾ་བྷ་ལའི་སྒྲུབ་ཐབས་ཞེས་བྱ་བ། འཕགས་པ་ཛཾ་བྷ་ལ་ལ་ཕྱག་འཚལ་ལོ། །དེ་ལ་དང་པོ་སེམས་ཅན་ཐམས་ཅད་ཀྱི་དབུལ་བའི་སྡུག་བསྔལ་བསལ་བའི་ཕྱིར། བདག་གིས་ཛཾ་བྷ་ལ་བསྒྲུབ་སྙམ་པའི་བསམ་པ་དང་ལྡན་པས་བསྙེན་པ་ཅི་རིགས་བྱ། སྔོན་ལ་བསྙེན་པ་ཞག་བདུན་བྱས་ནས། དེ་ནས་རྒྱུན་དུ་སྒྲུབ་པ་བྱས་ན་ཤིན་ཏུ་ལེགས། ཆུ་སྦྱིན་པའི་ཐབས་ལ་ཟངས་གཞོང་དུ་སྔར་བཞིན་བསྐྱེད། ཆུ་རང་གིས་ལོངས་སྤྱོད། ཡང་ན་ཆུ་བོ་ཆེན་པོར་དོར་རོ། །འདི་ལ་སྒྲུབ་རྫས་ཅི་ཡང་མི་དགོས།
གཏོར་མ་མི་དགོས། ད་ནངས་རྒྱལ་བ་རྒྱ་མཚོ་འོད་འབར་སོགས་རང་གི་ཡི་དམ་གང་ཡིན་བདག་བསྐྱེད་ཚང་བར་འདོན། དེ་ནས་ནམ་ལངས་སམ་ཞོགས་ཕྱེད་དམ། ཉི་མ་རྩེ་ཤར་ལས་ཕྱི་མི་རུང་བར་ཆུ་སྦྱིན་གྱི་དབུ་བཙུགས་ཏེ་མདུན་དུ་ཟངས་གཞོང་ཀ་ཊོ་ར་བཞག །མདུན་དུ་ཆུ་ཟོམ་གང་དང་། དེ་བླུགས་པའི་ཟོམ་སོགས་བཞག །བདག་བསྐྱེད་སྐྱབས་སེམས་ད་ནངས་སོང་བས་འཐུས། རང་ཉིད་ཡི་དམ་གནས་འགྱུར་ནས་ཁ་སར་ཎི་བསྒོམས་ནའང་རུང་། མངོན་རྟོགས་མི་དགོས་དམིགས་པས་ཆོག །མངོན་རྟོགས་འདོན་ན་གཏོར་མ་བརྒྱ་རྩའི་མངོན་རྟོགས་དེ་བྱ། ཆུ་
སྦྱིན་དམིགས་པ་ནི་ཆུ་སྦྱིན་གཞུང་ན་གསལ་བ་དེ་ཡིན། ཆུ་སྦྱིན་རེ་རེ་ལ་སྐྱབས་འགྲོ་སེམས་བསྐྱེད། མངོན་རྟོགས་ཆུ་སྦྱིན་ཕྲའུ་ཟངས་གཞོང་དུ་བསྒྲེང་ཞིང་སྔགས་བརྒྱ་རྩ་རེ་རེ། དེ་ནས་བསྟོད་པ་ཉུང་ངུས་བསྟོད། དེ་ནས་སྲིན་ལག་གིས་ཆུ་ལ་རེག་ནས་ལོངས་སྤྱོད་དང་ཟས་ཀྱི་དངོས་གྲུབ་འདོད་ན་ལྕེ་ལ་བཞག །རྟ་ཕྱུགས་ནོར་སོགས་འདོད་ན་ལག་མཐིལ་གཡོན་དུ་བཞག་ནས་བཅང་བའི་ཚུལ་དུ་བྱ། དེ་ནས་བསྙེན་པ་བྱ་སྟེ་དམིགས་པ་བཅས། སྔགས་སྟོང་ཚོའམ་ལྔ་བརྒྱའམ་སུམ་བརྒྱའི་མཚམས་སུ་ཆུ་སྦྱིན་རེ་རེ་བྱ། དེ་ལྟར་ཉི་མ་མ་ནུབ་བར་དུ་བྱ། དེའི་བར་དུ་ཟངས་གཞོང་མ་བསྐུལ་བར། ཆུ་མ་ཤོང་ན་གཏོར་འགུ་སོགས་ཀྱིས་བཅུས་ནས་ཟོམ་བསོག་སར་བླུགས། ཉི་མ་ཐལ་བ་དང་། ཟངས་གཞོང་གི་ཛཾ་བྷ་ལ་འོད་དུ་ཞུ་ནས་ཛཾ་ཡིག་དམར་སེར་དུ་གྱུར་པ་དེ། གཞི་ལ་འདུག་ན་རང་གི་རྒྱབ་ཡོལ་ལ་བསྟིམ། ས་གཅིག་ཏུ་འདུག་པའི་ངེས་པ་མེད་ན་རང་གི་སྤྱི་བོར་བསྟིམ། དེ་ནས་ཟངས་གཞོང་གི་ཁ་ཁྱིམ་ཕུག་ཏུ་སྟོན་ལ་ཆུ་དེ་བསོག་སྣོད་བྱ། ཡི་དྭགས་ཆུ་སྦྱིན་བྱེད་ན་འདིར་བྱ། དེ་ནས་སྐབས་དེར་རང་གི་གཏོར་བསྔོས་སོགས་ཆག་མེད་ཀྱི་རིགས་གང་ཡོད་འདོན། གཏོར་མ་གསོས་ལ་ཛཾ་
དམར་ལས་བྱང་འདོན། དེ་ནས་ཁ་སར་པཱ་ཎི་མི་བསྒོམ་རང་གི་ཡི་དམ་གང་ཡིན་བདག་བསྐྱེད་བསྒོམ། མདུན་བསྐྱེད་གཏོར་མའི་རྩེར་ལས་བྱང་ལྟར་བསྒོམ། དེ་ནས་མ་གཉིད་བར་དུ་བསྙེན་པ་བྱ། མདུན་བསྐྱེད་མི་བསྡུ་བར་བཞག །ཉིན་དང་ནུབ་བསྙེན་པའི་ཚེ་དམིགས་པ་ནི། མདུན་གྱི་ཟངས་གཞོང་དུ་བསྒོམ་པ་དང་། ནུབ་གཏོར་མའི་རྩེར་བསྒོམ་པ་གཉིས་ཀ་འདྲ་སྟེ། ཐུགས་ཀར་ཡུམ་དང་། དེའི་ཐུགས་ཀར་ཛ་དང་ཧྲུསྔགས་ཀྱིས་བསྐོར་བ་གཡས་སུ་འཁོར་བར་བསྒོམ། རང་ཁ་སར་པཱ་ཎི་ཡི་དམ་གྱི་ཐུགས་ཀ་ནས་འོད་ཟེར་འཕྲོས་པས། མདུན་བསྐྱེད་ལ་ཕོག་བསྙེན་པ་བྱས་པས་ཐུགས་མཉེས་ནས་ནོར་གྱི་དངོས་གྲུབ་སྦྱིན་པར་བསྒོམ་ཞིང་སྔགས་བཟླ་བ་ནི་བསྙེན་པའོ། །ཛཾ་བྷ་ལའི་ཞལ་གསུམ་ནེའུ་ལེ་གཉིས། གནོད་སྦྱིན་ཕོ་མོ་གཉིས་ཏེ་ཞལ་བདུན་ནས། གསེར་གཡུ་བྱི་རུ་རིན་པོ་ཆེ་སྣ་ཚོགས་ཟད་མི་ཤེས་པར་སྤྲུལ་ནས། ཁ་ནས་ལྷུད་ལྷུད་སྐྱུགས་པས་རང་གི་ཁང་པ་དང་ས་སྐོར་གང་ནས་རིན་པོ་ཆེའི་གྲམ་པ་ཆེན་པོར་གྱུར་པར་བསྒོམ་ཞིང་བཟླ་བ་ནི་སྒྲུབ་པའོ། །དེ་ནས་ཐུགས་ཀའི་ཧི༔ལས་འོད་འཕྲོས་པ་ལས་ལྷ་མོ་དམར་མོ་གཡས་ལྕགས་ཀྱུ་གཡོན་ཞགས་པ་
བསྣམས་པ་གྲངས་མེད་པ་སྤྲོས་ཏེ། འཇིག་རྟེན་ཁམས་ཀྱི་ཟས་ནོར་རྣམ་པ་གང་འདོད་པ་ཇ་དརའབྲུ་རྟ་དྲེལ་ནོར་ཕྱུགས་སོགས་ལྕགས་ཀྱུས་བཟུང་། ཞགས་པས་བཅིངས་ནས་རང་གི་གནས་དང་ས་སྐོར་དེར་མི་ཤོང་བ་ཙམ་དུ་གང་བར་བསྒོམ་ཞིང་བཟླ་བ་ནི་ལས་སྦྱོར་རོ། །མཚན་ལ་ནི་དམིགས་པ་དེ་གསུམ་ཁོ་ནའོ། །ཉིན་ལ་དེ་ནས་མདུན་གྱི་ཐུགས་ཀའི་ལྷ་མོ་འོད་དུ་ཞུ་ནས་ཐུགས་ཀའི་ཧྲིལ་ཐིམ། ཧཱིཛ་ལ་ཐིམ་པས་ཡབ་རྐྱང་པར་གྱུར་པའི་ཐུགས་ཀའི་ཛཾ་གྱི་འོག་ཏུ་རཾ་དེ་ལས་མེ་འབར་བ་སོགས་གཞུང་གི་ཆུ་སྦྱིན་དམིགས་པ་དང་བཅས་ཆུ་སྦྱིན་པ་གནད་འབེབས་ཏེ། བསྙེན་སྒྲུབ་ལས་གསུམ་གནད་ལ་འབེབས་པ་དང་བཞི་ཀ་ཉིན་བར་གྱི་ཐུན་རེ་རེ་ལ་རྫོགས་པར་བྱའོ། །དེ་ལ་སྔགས་སྟོང་ཚོ་རེ་ལ་ཐུན་རེ་རེ་བྱས་ན་ལེགས་ཏེ། ཆུ་སྦྱིན་སྟོང་ཚིག་གི་མཆོད་པའོ། །ཆུ་སྦྱིན་ནང་ཛཾ་ལུ་ཡོད་ན་ལེགས། མེད་ན་ནས་འབྲུ་ཅུང་ཟད་བཏབ། མང་པོའི་སྲོལ་མེད་དོ། །ཆུ་གཙང་ནི་མཆོད་པའི་གཙོ་བོ་ཡིན་ནོ། །དེ་ལ་བསྙེན་པ་གྲངས་ཀ་ངེས་པ་མེད་དུས་ནི་ཞག་བདུན་ནོ། །རྟགས་ནི་ནོར་སྒྲུབ་སྤྱི་དང་འདྲ་སྟེ་ཁྱད་པར་ནི་ཆར་ཆེན་པོ་འབེབས་པར་རྨིས་ན་བཟང་བའོ། །འདིའི་རྫས་སླ་ཞིང་སྟབས་བདེ་བས་ཀུན་
ལ་ཕན་ནོ། །གེགས་སེལ་དགོང་མོ་སེང་གདོང་མ་སོགས་ཟློག་སྔགས་མང་ཉུང་ཅི་ཐོན་བཟླས་ལ། སྒྲུབ་པའི་བར་ཆད་དམ་སྲི་ཐམས་ཅད་ལག་གཉིས་ཉི་ཟླའི་བར་དུ་བརྡབས་པས་ཐལ་བ་རྡུལ་བུན་དུ་སོང་བར་བསྒོམ་ཞིང་བདུད་བཟློག་བྱའོ། །དངོས་གྲུབ་སྒྲུབ་པ་འདི་བགེགས་ཆེ་བ་ཡིན་པའི་ལོ་རྒྱུས་ཡོད་དོ། །བྱང་བདག་བཀྲ་ཤིས་སྟོབས་རྒྱལ་དང། མགར་དམ་པ་གོང་མ་སོགས་འབྲི་གུང་པ་རྣམས་ཀྱིས་ཛཾ་དམར་ཆུ་སྦྱིན་འདི་ཁོ་ན་ལ་ནོར་ལྷའི་མཆོག་ཏུ་མཛད་དེ། གཞན་ལ་རྫི་མི་བསྒྲགས་པར་ཤིན་ཏུ་གསང་ནས་ཡི་དམ་བྱེད་པ་ཡིན་པར་འདུག་སྟེ། དངོས་གྲུབ་ཀྱང་རྒྱ་ཆེར་བྱུང་བར་སྣང་ངོ་། །ནོར་བུའི་རྒྱུད་ལས། བཅོམ་ལྡན་འདས་ནྱ་གྲོ་ཏའི་ཚལ་ན་འཁོར་མང་པོ་དང་ཐབས་ཅིག་ཏུ་བཞུགས་པའི་ཚེ། །བྱང་ཆུབ་སེམས་དཔའ་སྤྱན་བཟང་པོ་དབུལ་བ་ཕོངས་པ་དང་ནད་དང་ཚེ་ཐུང་བ་རྣམས་དེ་ལས་ཐར་བ་དང་། བསོད་ནམས་དང་། དཔལ་དང་། གྲགས་པ་དང་། ཚེ་རིང་བ་དང་། །བདེ་བ་འདོད་པས་ཇི་ལྟར་བྱ་ཞུས་པས། དེ་ལྟར་ཕུན་སུམ་ཚོགས་པར་འདོད་པས་བྱང་ཆུབ་སེམས་དཔའ་ནོར་བུ་བཟང་པོ་དང་། ཆུ་སྦྱིན་བཟང་མོའི་བུ་དང་། ཨར་ཛཾ་བྷ་ལ་ཞེས་བྱ་བ་
ཡོད་དེ། དེ་ལ་ཆུ་སྦྱིན་པས་ནི་དེའི་ལྷག་མའི་དྲི་མ་གསུམ་ཡང་དག་ཅིང་། མཉམ་པའི་ས་བཅུ་ལ་གནས་ནས་ཕྱིར་མི་ལྡོག་པར་འགྱུར་ཞིང་། གང་གི་བྱེད་པ་པོ་དེ་ཡང་རྒྱུད་ཕུན་སུམ་ཚོགས་པ་ནི་ཐོབ་པ་ལྟ་ཅི་སྨོས། འབྲས་བུ་ས་བཅུ་ལ་གནས་པར་འགྱུར་ཞེས་དང་། སྔ་མོ་ཡང་ན་ཕྱི་དྲོ་གོང་། །བཟའ་དང་ཅུང་ཟད་མི་བྲེལ་དུས། གཟུངས་བཀླག་དེ་རྗེས་ཆུ་སྦྱིན་བྱ། །ལྷག་མའི་ཆུ་རྣམས་ཕྱིས་བྲན་ལ། །ཡི་དྭགས་རྣམས་ལ་སྦྱིན་པར་བྱ། །དེ་བྱིན་བསོད་ནམས་བསོད་མཐའ་ཡས། །སངས་རྒྱས་བགྲང་དུ་འདས་པ་ལ། །སྐྱེ་བ་བདུན་དུ་ཚོགས་བསགས་པས། །ཆུ་སྦྱིན་ཡོན་ཏན་མཐའ་བསམ་མཐའ་ཡས། །ཇི་ཡིག་དངོས་པོར་བསྡུས་བྱས་ལ། །བདག་གི་སྤྱི་བོའི་གཙུག་ཏུ་བསྐུར། །དེ་ལ་བསོད་ནམས་འབྱུང་བར་བསམ། །ཞེས་བཀའ་སྩལ་པའི་ཕྱིར་ཕན་ཡོན་དེ་ལྟར་ལགས་ཤིང་། གཟུངས་བཀླག་ཅེས་པའི་དོན་བསྙེན་པ་ལ་འདུས་སོ། །དགོང་མོ་ཉི་མ་ཐལ་ཀ་ཆུ་སྦྱིན་གྱི་ཆུ་ལྷག་ཅི་གདའ་དེ་ལ་ཛི་ལྷའི་གཏོར་ཆུ་བསྲེས་ལ་ཡི་དྭགས་ལ་ཆུ་སྦྱིན་གཅིག་བྱས་ན་ཕན་ཡོན་ལྷག་པར་ཆེའོ། །ཞེས་རཱ་ག་ཨ་སྱས་ཡེ་ཤེས་ཀྱི་བསྙེན་སྒྲུབ་བྱེད་དུས་འཕྲལ་དུ་བྲིས་པ་སྟེ་འགྲོ་བ་མང་པོ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །ཤུ་བྷཾ།། །།