གྲྭ་པ་མངོན་ཤེས་ཅན་གྱི་གཏེར་མ་ཛཾ་དམར་ཆུ་སྦྱིན་བསྡུས་པ།
༼ཅ༽ གྲྭ་པ་མངོན་ཤེས་ཅན་གྱི་གཏེར་མ་ཛཾ་དམར་ཆུ་སྦྱིན་བསྡུས་པ་བཞུགས་སོ། །མདུན་དུ་པཾ་ཨོཾ་རཾ་ཡིག་ལས་བྱུང་བའི། །པདྨ་ཟླ་བ་ཉི་མའི་སྟེང་དུ་ཛཾ། །དེ་ལས་འོད་འཕྲོས་འཕགས་པ་ཐམས་ཅད་མཆོད། །སེམས་ཅན་ཀུན་གྱི་དབུལ་བའི་སྡུག་བསྔལ་བསལ། །བྱིན་རླབས་དངོས་གྲུབ་ཚུར་འདུས་ཡོངས་གྱུར་ལས། །ཛཾ་ལྷ་དམར་པོ་གཡས་དཀར་གཡོན་སྔོའི་ཞལ། །ཕྱག་དྲུག་དང་པོས་ནོར་བུ་རིན་ཆེན་ཐོད། །བར་པས་ལྕགས་ཀྱུ་ཞགས་པ་ཐ་མ་གཉིས། །ནེའུ་ལེ་བཙིར་བས་རིན་ཆེན་ཆར་པ་འབེབས། །ཞབས་བཞིས་འདོར་སྟབས་ནོར་སྐྱུགས་ཕོ་མོ་མནན། །ཁྲོ་འཛུམ་དར་དང་རིན་ཆེན་བརྒྱན་པ་ཡི། །ཐུགས་ཀར་རཾ་ཡིག་མེ་འབར་ཞལ་དུ་བྱུང་། །སྒོམས་པས་གདུང་ལ་ཆུ་ཕུལ་སྐོམ་པ་ཞི། །མཉེས་ནས་ནེའུ་ལེ་བཙིར་ཞིང་ནོར་སྐྱུགས་མནན། །ནོར་བུ་བསྐྱུགས་པས་གནས་ཁང་ཁེངས་པར་གྱུར། །ཨོཾ་ཛཾ་བྷ་ལ་ཛ་ལེནྡྲ་ཡ་དྷ་ན་མེ་དྷི་ཧཱུྃསྭཱ་ཧཱ། ཆུ་སྦྱིན་ལ། །ཨརྒྷཾ་༴ བདེ་གཤེགས་ཀུན་གྱི་གསུང་ལས་ལེགས་སྤྲུལ་ཞིང་། །ཐུགས་རྗེ་ཆགས་པས་སྐུ་མདོག་དམར་པོར་བཞུགས། །དབང་གི་ཕྲིན་ལས་རྫོགས་མཛད་ཛམྦྷ་ལ། །མ་
ལུས་འགྲོ་བའི་རེ་སྐོང་ཕྱག་འཚལ་བསྟོད། །དེའང་ཆུ་སྦྱིན་དུ་འདོན། ཐུགས་ཀའི་ཧཱུྃལས་ཀུ་རུ་ཀུ་ལླེ་དམར། །ལྷ་མོ་ལྕགས་ཀྱུ་ཞགས་པ་འཛིན་པའི་ཚོགས། །གྲངས་མེད་འཕྲོས་ནས་འདོད་དགུ་དབང་སྡུད་གྱུར། །ཞེས་ནུབ་མོ་བསྙེན་པའང་ཉིན་བསྙེན་པའི་དུས་སོ། །ནངས་སྔ་མོར་ཆུ་སྦྱིན། ཅེས་པ་འདི་གྲྭ་པ་མངོན་ཤེས་ཅན་གྱི་གཏེར་ཁ་ལས་བྱུང་བའི་ཛཾ་དམར་གྱི་ཆུ་སྦྱིན་བསྡུས་པ། ༧ རཱ་ག་ཨ་སྱས་བྲིས་པ་སརྦ་མངྒ་ལཾ།། །།