སྨུག་འཛིན་དམར་པོ་ཡམ་ཡུབ་ལས་བྱང་གཏོར་མ་ལ་བརྟེན་ནས་སྒྲུབ་པའི་འདོན་བསྒྲིགས་ཡིད་བཞིན་ནོར་བུ།
༼ཆ༽ གྲྭ་པ་མངོན་ཤེས་ཅན་གྱི་གཏེར་མ་སྨུག་འཛིན་དམར་པོ་ཡམ་ཡུབ་ལས་བྱང་གཏོར་མ་ལ་བརྟེན་ནས་སྒྲུབ་པའི་འདོན་བསྒྲིགས་ཡིད་བཞིན་ནོར་བུ་བཞུགས་སོ།།
དཀོན་མཆོག་གསུམ་དང་ཨརྱ་ཛཾ་བྷ་ལ་ལ་སྐྱབས་སུ་མཆིའོ། །དེང་ནས་སེམས་ཅན་ཐམས་ཅད་ཀྱི་དབུལ་ཕོངས་ཀྱི་སྡུག་བསྔལ་བསལ་བའི་ཕྱིར་མགོན་པོ་ཛཾ་བྷ་ལ་བསྒྲུབ་པར་བྱའོ། །ཨོཾ་སྭ་བྷཱ་ཝ་སོགས། བརྟན་གཡོ་ཐམས་ཅད་སྟོང་པར་གྱུར། དེའི་ངང་ལས་ཨ་ལས་ཟླ་བ་མ་ལས་ཉི་མ་པཾ་ལས་པདྨའི་གདན་གྱི་སྟེང་དུ་ཡི་གེ་ཛཾ་དམར་པོ་ལས་འོད་ཟེར་འཕྲོས། སེམས་ཅན་དབུལ་བའི་སྡུག་བསྔལ་བསལ། ཚུར་འདུས་ཛ་ལ་ཕོག །དེ་ཡོངས་སུ་གྱུར་པ་ལས་ཛཾ་བྷ་ལ་དམར་པོ་ཞལ་གསུམ་ཕྱག་དྲུག་པ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། སྐུ་
ཤིན་ཏུ་དམར་ཞིང་ཆགས་པ་སྒེག་པའི་ཉམས་དང་ལྡན་པ། ཀླུ་ཆེན་པོ་བརྒྱད་རིན་པོ་ཆེ་དུ་མས་སྤྲས་པ། ཞལ་གཡས་དཀར་བ། གཡོན་སྔོ་བ། རྩ་ཞལ་དམར་བ། ཕྱག་གཡས་དང་པོ་ན་རིན་པོ་ཆེ། བར་པ་ན་ལྕགས་ཀྱུ། གཡོན་དང་པོས་ཐོད་པ་རིན་པོ་ཆེས་བཀང་བ། བར་པ་ན་ཞགས་པ། ཐ་མ་གཉིས་ན་གཏེར་གྱི་ནེའུ་ལེ་བསྣམས་པ་བཙིར་བས་ནོར་བུ་སྐྱུགས་པ། ཞབས་བཞིའི་གནོད་སྦྱིན་ནོར་སྐྱུགས་གཉིས་མནན་པ་དེ་ལྟ་བུ་གསལ་བར་གྱུར། དེའི་ཐུགས་ཀར་ཧཱི༔དམར་པདྨ་དམར་པོ་ལས་ལྷ་མོ་ཀུ་རུ་ཀུལླེ་སྐུ་མདོག་དམར་མོ་ཞལ་གཅིག་
ཕྱག་བཞི་མ། དང་པོ་གཉིས་མདའ་གཞུ། འོག་མ་གཉིས་ལྕགས་ཀྱུ་ཞགས་པ་བསྣམས་པ། ཡབ་ཡུམ་གཉིས་ཀྱི་གནས་གསུམ་འབྲུ་གསུམ་དང་། ཐུགས་ཀའི་ཛཾ་དང་ཧྲིལས་འོད་འཕྲོས་པས་ཡེ་ཤེས་པ་སྤྱན་དྲངས། ཧཱུྃ། ཕྱོགས་བཅུ་དུས་གསུམ་སངས་རྒྱས་ཐམས་ཅད་ཀྱི། །སྦྱིན་པའི་ཕ་རོལ་ཕྱིན་པའི་རང་གཟུགས་ནི། །རྒྱལ་བ་ཀུན་གྱི་ཡབ་གྱུར་ཛཾ་བྷ་ལ། །མཆོད་པའི་གནས་འདིར་སྤྱན་འདྲེན་གཤེགས་སུ་གསོལ། །ཡབ་ནི་ས་བརྒྱད་སེམས་དཔའ་རིན་ཆེན་མང་། །ཡུམ་ནི་ཀླུ་མོ་པདྨའི་གཙུག་ཕུད་ཅན། །སྲས་ཀྱི་ཚུལ་བཟུང་ཨཅུ་ཛཾ་བྷ་ལ། །འགྲོ་བའི་དབུལ་ཕོངས་བསལ་ཕྱིར་གཤེགས་སུ་གསོལ། །གང་ཞིག་ཡིད་ལ་དྲན་པ་ཙམ་གྱིས་ཀྱང་། །ཚེ་དང་བསོད་ནམས་འབྱོར་པ་རྒྱས་མཛད་པ། །དངོས་གྲུབ་གཏེར་ཆེན་མགོན་པོ་ཛཾ་བྷ་ལ། །སྨུག་འཛིན་དམར་པོ་མྱུར་དུ་འདིར་བྱོན་ཅིག །སྦས་པའི་ཡུམ་མཆོག་ལྷ་མོ་རིག་བྱེད་མ། །ཁམས་གསུམ་སྲིད་གསུམ་དབང་དུ་བྱེད་པའི་ལྷ། །ཁྱོད་ཀྱི་ཐུགས་དམ་ཕྲིན་ལས་དུས་བབ་ཕྱིར། །ཀུ་རུ་ཀུལླེའི་ཕུག་ནས་གཤེགས་སུ་གསོལ། །རྣམ་ཐོས་སྲས་ཀྱི་དཀོར་བདག་ནོར་འཆང་བ། །གཏེར་
གྱི་བདག་པོ་ནོར་སྐྱུགས་ཕོ་དང་མོ། །རིན་ཆེན་ཆར་ཆེན་མྱུར་དུ་འབེབས་པའི་ཕྱིར། །སྐད་ཅིག་ཉིད་ལ་གནས་འདིར་གཤེགས་སུ་གསོལ། །བདག་གི་གནས་ཁང་རིན་ཆེན་གཞལ་ཡས་སུ། །བྱིན་གྱིས་རློབས་ལ་བརྟན་པར་བཞུགས་ནས་ཀྱང་། །སྔོན་གྱི་ཐུགས་དམ་དམ་བཅའ་ཇི་བཞིན་དུ། །འཛད་མེད་གཏེར་གྱི་དངོས་གྲུབ་བསྩལ་དུ་གསོལ། །ཨོཾ་ཨརྱཱ་ཛཾ་བྷ་ལ་ཀུ་རུ་ཀུལླེ་ཡཀྵེ་ཡཀྱི་བཛྲ་ས་མཱ་ཛ༔ཛཿཧཱུྃ་བཾ་ཧོཿ ཏིཥྛ་ལྷན། ས་མ་ཡ་ཧོ༔ ས་མ་ཡ་ཧཱུྃ། དེ་ནས་མཆོད་པ་ནི། ཧཱུྃ། མེ་ཏོག་བདུག་སྤོས་མར་མེ་དྲི་ཆབ་དང་། །བཤོས་གཙང་སྒྲ་དབྱངས་གཟུགས་སྒྲ་དྲི་རོ་རེག །དངོས་འབྱོར་ཡིད་སྤྲུལ་ཀུན་བཟང་མཆོད་པའི་ཚོགས། །སྨུག་འཛིན་ཡབ་ཡུམ་འཁོར་དང་བཅས་ལ་འབུལ། །དབང་པོ་ལྔ་ཡི་མེ་ཏོག་གསུར་ཆེར་སྤོས། །ཞུན་ཆེན་མར་མེ་མཁྲིས་པའི་གནེ་དང་། །བདུད་རྩི་ཞལ་ཟས་རྐང་གླིང་ཐོད་རྔ་རྣམས། །སྨུག་འཛིན་ཡབ་ཡུམ་འཁོར་དང་བཅས་ལ་འབུལ། །ཡབ་ཡུམ་གཉིས་སུ་མེད་པའི་མཁའ་གསང་ནས། །བྱང་ཆུབ་སེམས་ལྡན་ཐབས་དང་ཤེས་རབ་བཅུད། །དངོས་གྲུབ་དགའ་བཞི་ཡེ་ཤེས་བདེ་ཆེན་མཆོག །རྣམ་
རོལ་སྨུག་འཛིན་ཡབ་ཡུམ་དགྱེས་པར་རོལ། །རིན་ཆེན་གདུགས་མཛེས་གསེར་གྱི་ཡུ་བ་ཅན། །དྲི་མེད་གསེར་ཉ་གཡུ་ཡི་གཤོག་པ་མཛེས། །འདབ་བཟང་ངད་ལྡན་སྣ་ཚོགས་པདྨའི་ཚལ། །རིན་ཆེན་གཡས་འཁྱིལ་དཀར་ཟླུམ་སྒྲ་དབྱངས་ཅན། །བདུད་རྩིའི་བུམ་པ་དཔག་བསམ་ཁ་རྒྱན་སྤྲས། །ཡིད་བཞིན་གཏེར་འབྱུང་ཁོང་སེང་དཔལ་བེའུ། །མི་ནུབ་ཆོས་ཀྱི་རྒྱལ་མཚན་རབ་ཏུ་བརྟན། །སྲིད་པའི་དྲྭ་བ་འཇོམས་བྱེད་འཁོར་ལོ་སྟེ། །རྟེན་འབྲེལ་རྟགས་ཀྱི་བཀྲ་ཤིས་རྣམ་བརྒྱད་འདི། །སྨུག་འཛིན་ཡབ་ཡུམ་འཁོར་དང་། བཅས་ལ་འབུལ། །ཐུགས་རྗེས་འགྲོ་བའི་དོན་དུ་དགོངས་ནས་ཀྱང་། །འགྲོ་རྣམས་བཀྲ་ཤིས་དཔལ་ལ་སྤྱོད་པར་ཤོག །མི་དབང་རིན་ཆེན་སྣ་བདུན་འདི་དག་ནི། །སྨུག་འཛིན་དམར་པོ་ཡབ་ཡུམ་འཁོར་བཅས་ལ། །དངོས་དང་ཡིད་ཀྱིས་བཤམས་ཤིང་འབུལ་བ་ཡིས། །འགྲོ་བ་མི་ཟད་གཏེར་ལ་སྤྱོད་པར་ཤོག །ཨརྱ་ཛཾ་བྷ་ལ་ཀུ་རུ་ཀུལླེ་ཡཀྱི་ཡཀྱི་པུཉྫ་དྷཱ་པེ་སོགས། ཤརྡ་སརྦ་པཱུ་ཛ་ཨཊྚ་མངྒ་ལ་ཧེ་ཏུ་སབྟ་རཏྣ་པྲ་ཏཱིཙྪ་སྭཱ་ཧཱ། གཏོར་མ་འབུལ་བ་ནི། ཟངས་གཞོང་ནང་དུ་ཟན་དང་། ཆང་དང་། ཤ་དང་། མར་ཁུ་དང་། བུ་
རམ་དང་། ཟས་རྣམ་པ་སྣ་ཚོགས་དང་། ནས་ལ་སོགས་པའི་འབྲུ་སྣ་ཚོགས་པ་མང་ཞིང་རྒྱ་ཆེ་བ་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱི༔ ལྗགས་རྡོ་རྗེའི་སྦུ་གུ་ཅན་གྱིས་གསོལ་བས་མཉེས་ནས་ནོར་གྱི་དངོས་གྲུབ་སྩོལ་བར་གྱུར། ཨོཾ་ཛཾ་བྷ་ལ་ཛ་ལེནྡྲ་ཡེ་དྷ་ན་མེ་དྷི་ཧཱུྃསྭཱ་ཧཱ། ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་འབུལ། བསྟོད་པ་ནི། ཧཱུྃ། བདེ་གཤེགས་ཀུན་གྱི་གསུང་ལས་ལེགས་སྤྲུལ་ཞིང་། །ཐུགས་རྗེ་ཆགས་པས་སྐུ་མདོག་དམར་པོར་བཞུགས། །དབང་གི་ཕྲིན་ལས་རྫོགས་མཛད་ཛཾ་བྷ་ལ། །མ་ལུས་འགྲོ་བའི་རེ་སྐོང་ཕྱག་འཚལ་བསྟོད། །གཡས་ཞལ་དཀར་བས་ལྷ་རྣམས་དབང་དུ་སྡུད། །གཡོན་ཞལ་སྔོ་བས་ཀླུ་རྣམས་དབང་དུ་སྡུད། །རྩ་ཞལ་དམར་བས་མི་རྣམས་དབང་དུ་སྡུད། །སྲིད་གསུམ་དབང་དུ་སྡུད་ལ་ཕྱག་འཚལ་བསྟོད། །ཞལ་གསུམ་ཕྱག་དྲུག་ཞབས་བཞིས་ནོར་སྐྱུགས་མནན། །འགྲོ་བའི་རེ་སྐོང་ཡིད་བཞིན་རིན་ཆེན་བསྣམས། །ཁམས་གསུམ་འགུགས་པར་བྱེད་པའི་ལྕགས་ཀྱུ་གཉིས། །གཡས་གཉིས་དང་པོ་བར་པས་བསྣམས་པར་མཛད། །རིན་ཆེན་ཐོད་པ་
ཞགས་པ་གཡོན་ན་བསྣམས། །ཐ་གཉིས་ནེའུ་ལེ་བཙིར་ཞིང་རིན་ཆེན་འབེབས། །རྣམ་མང་རིན་ཆེན་ནོར་གྱི་ཆར་འབེབས་པ། །མ་ལུས་འགྲོ་བའི་རེ་སྐོང་ཕྱག་འཚལ་བསྟོད། །སྐུ་ལ་རིན་ཆེན་དུ་མས་རྣམ་པར་བརྒྱན། །ཀླུ་ཆེན་བརྒྱད་དང་ལྷ་ཡི་ན་བཟའ་བཀླུབས། །སྒེག་པའི་ཉམས་ལྡན་འགྲོ་བ་ཀུན་ཡིད་སྡུད། །མགོན་པོ་ཛཾ་བྷ་ལ་ལ་ཕྱག་འཚལ་བསྟོད། །བདག་ལ་ལོངས་སྤྱོད་ནོར་ཆེན་དངོས་གྲུབ་སྩོལ། །ཅེས་བསྟོད། ༀ་ཛཾ་བྷ་ལ་ཛ་ལེནྡྲ་ཡ་དྷ་ན་མེ་དྷི་གྷིསྭཱ་ཧཱ། ཞེས་བསྙེན་པ་བྱས་པས་མཉེས་ནས་ནོར་གྱི་དངོས་གྲུབ་སྩོལ་ནས་ཕྱིན་པར་བསམ་མོ། །བསྙེན་པ་ཅི་རིགས་བྱའོ། །རབ་སྟོང་ཚོ། འབྲིང་སུམ་བརྒྱ། ཐ་མ་ཡང་བརྒྱ་ཆག་མི་རུང་ངོ་། །ཐོ་རངས་ཀྱི་ཆའམ་མཚན་མོའི་ཆ་ལ་བཟླ་ཞིང་མན་ངག་ལྟར་དམིགས་པ་ཡང་ཡང་བསྒོམ་ཞིང་རང་གི་སྙིང་ཁར་བསྡུ། བཛྲ་མུ༔ གཏོར་མ་རང་གིས་ལོངས་སྤྱོད། གཏོར་མ་ལ་བརྟེན་ནས་སྒྲུབ་པའོ། །རྒྱུན་དུ་བཟླས་པས་འགྲུབ་སྟེ་སྔོན་ལ་བསྙེན་པ་ཞག་བདུན་དུ་བྱས་ནས་དེ་ནས་རྒྱུན་དུ་བསྒྲུབས་ན་ཤིན་ཏུ་ལེགས། ཞེས་རང་གི་སློབ་བུ་འགའ་ཞིག་ལ་ཕན་པའི་ཕྱིར། རཱ་ག་ཨ་སྱས་བསྒྲིགས་པ་སྟེ་འདི་མང་དུ་སྤེལ་ན་གཡང་ཤོར་ནས་རང་གི་འཚོ་བ་བྲལ་བས་བཀའ་རྒྱ་དམ་པར་གྱིས། དགེ་ལེགས་ཡོན་ཏན་གྱི་དཔལ་ལ་ལོངས་སྤྱོད་པར་ཤོག། །།