ཛཾ་དམར་གའུ་ལ་བརྟེན་ནས་སྒྲུབ་ཐབས།
༼ཉ༽ གྲྭ་པ་མངོན་ཤེས་ཅན་གྱི་གཏེར་མ་ཛཾ་དམར་གའུ་ལ་བརྟེན་ནས་སྒྲུབ་ཐབས་བཞུགས་སོ། །རྒྱ་གར་སྐད་དུ༔ ཨརྱ་ཛཾ་བྷ་ལ་སཱ་དྷ་ནི་ནཱ་མ༔ བོད་སྐད་དུ༔ འཕགས་པ་ཛཾ་བྷ་ལའི་སྒྲུབ་ཐབས་ཞེས་བྱ་བ༔ གའུ་ལ་བརྟེན་ནས་སྒྲུབ་པ་ནི༔ གའུ་ཟངས་སམ་རྫ་ལས་བྱས་པ་ལ་ལི་ཁྲིའམ་མཚལ་གྱིས་དམར་པོར་བྱུགས༔ འཁོར་ལོ་དཔེའུ་རིས་ཆུང་ལྟར་བྲིས༔ དེའི་ནང་དུ་རྩ་བའི་རྫས་ལ༔ རྒྱལ་པོའམ་བློན་པོ་ལྟ་བུ་འཇིག་རྟེན་ན་རྒྱལ་པོ་ལྟ་བུ་ཡིན་ཀྱང་དབང་ཆེ་བ་ལྟ་བུ་དབང་ཕྱུག་ཆེན་པོ་དགུའི་ཟས་ས༔ ཕྱུག་པོ་བུན་ཁ་མའི་ནས་སྣ་དང་ནོར་ར༔ གནག་རྟ་ལུག་ར་སོགས་པའི་སྤྲུ༔ འགའ་ཞིག་ནས་མཛོ་དྲེལ་སྤུ་མ་གཏོགས་པ་ལ་ཟེར། གསེར་དངུལ་ཟངས་ལྕགས་སོགས་རིན་པོ་ཆེ༔ ཞིང་དུལ་མའི་ས༔ ལུང་པ་ན་ཆེ་བ་གཅིག་ལ་ཟེར། ཁང་པ་བཀྲ་ཤིས་པའི་ས༔ དུས་རྒྱུན་དུ་ཕྱུག་པོའམ་བླ་མ་གྲུབ་ཐོབ་བྱོན་པའི་ཁང་ས༔ གནས་གཞི་རྒྱས་པའི་ཐབ་ཀྱི་ས༔ དགེ་བཤེས་བསོད་ནམས་ཅན་གྱི་གདན་ས༔ མི་བསོད་ནམས་ཅན་གྱི་གོས་དུམ༔ ག་པུར་ལ་སོགས་པའི་སྨན་སྣ་ལྔ༔ ཚོང་དུས་འཚོགས་པའི་ས༔ རྐུན་ཆེན་གྱི་ལག་པ༔ ཟས་སྣའི་རིགས་
འབྱོར་ཚད༔ ན་ཆུང་འཕྱོན་མའི་ཀ་ཆ༔ སྐྱེས་བུ་གཞོན་ནུའི་ནོར་སྣ༔ རྒྱལ་པོ་དགེ་བཤེས་བསོད་ནམས་ཅན་གྱི་སེམས་རྟེན༔ ཡོན་བདག་ཕྱུག་པོའི་སེམས་རྟེན༔ ལྔ་པོ་དེ་རྣམས་དབང་དུ་འདུ་བའི་རྫས༔ ལོ་ལེགས་པའི་སྙེ་མ༔ ཚོང་ལེགས་པའི་ནོར་དུམ་བུ༔ འབྲོག་ལེགས་པའི་མར༔ འབུལ་བ་མང་པོ་བྱུང་བའི་ནོར་སྣུ༔ རྒྱལ་པོས་ཁྲལ་ལ་བསྡུས་པའི་ནོར་སྣ་རྣམས་བསགས༔ རྒྱལ་ཕུར་དང་སྤེན་སྣར་ས་རི་བྲེ་ཕུར་སོགས་ལ་བསོགས༔ དེ་རྣམས་སྣ་ཚང་མ་རྙེད་ན་གང་འབྱོར་བསགས་ལ་འཁོར་ལོའི་ནང་དུ་བཅུག་ནས་འཁོར་ལོ་ཁེངས་པར་བྱའོ༔ ཁྱད་པར་དུ་ཡང་གང་འདོད་པའི་མིང་རྣམས་ཡི་གེར་བྲིས་ལ་དངོས་གྲུབ་སྩོལ་ཞེས་བྲིས་པ་བཅུག༔ འགྲུབ་སྦྱོར་དང་གཡང་སྐར་ལ་བབ་དུས་མཆོད་བསྟོད་བྱ༔ རང་ལ་འབུལ་བ་བྱུང་བའི་ཕུད་དང་ཟས་ཕུད་རྣམས་གའུར་བསྐྱལ༔ ལྷག་མ་དང་ཟས་སྣ་རྣམས་དངོས་གྲུབ་རྒྱུ་བསྲེ་ལ་ལོངས་སྤྱོད། གོས་སྣ་རྣམས་ལྷན་པ་རློན༔ ཛཾ་བྷ་ལ་དམར་པོའི་སྒྲུབ་ཐབས་ཐུན་མོང་མ་ཡིན་པ་རྫོགས་སོ༔ ཨྠྀི༔ འདིའི་ཞལ་ཤེས་ནི། རྫས་སྣ་ཐམས་ཅད་མ་འཛོམས་ན་ཡང་གང་རྙེད་རིམ་གྱིས་བསྣོན་པས་ཆོག །རྐུན་ཆེན་ལག་པ་རྙེད་དཀའ་བས་
ཚབ་ལ་དེའི་སོར་མོ་བྲེག་པ་རྙེད་ནའང་ཆོག །མ་རྙེད་ན་བྱི་བའི་ལག་པས་ཀྱང་རུང་སྟེ། སེམས་རྟེན་ཞེས་པ་ནི། དེའི་ཕྲེང་བ་ལ་བཏགས་པ་སོགས་དངོས་གཙང་། །གཡང་སྐར་འགྲུབ་སྦྱོར་སོགས་ལ་སྒྲུབ་པའི་མགོ་བཙུགས། གའུ་རིན་པོ་ཆེའི་གཞལ་ཡས་ཁང་། འཁོར་ལོ་ཛཾ་དམར། རྫས་སྣ་རྣམས་རི་པོ་ཆེ་སྣ་ཚོགས་སུ་བསམ། གཞན་ཡང་༔ མཆོད་གཏོར་བཤམས་ལུགས་སྒྲུབ་ལུགས་འདོན་ལུགས་ཐམས་ཅད་ཐོད་སྒྲུབ་དང་འདྲ། གའུ་རང་གི་དཀོར་ཁང་དུ་སྦ་ཟེར་བ་ཡང་འདི་ཟེར་བ་ཡིན་ཏེ་གཞན་དུ་བྲིས་པ་འཁྲུགས་པ་ཡིན། །ཞེས་པ་སྦྱིན་པས་བསྐུལ་ནས་རཱ་ག་ཨ་སྱས་སོ། །སརྦ་མངྒ་ལཾ།། །།