རྨུགས་འཛིན་དམར་པོའི་ཙཀྲ་ལ་བརྟེན་ནས་སྒྲུབ་ཐབས།
༼ད༽ གྲྭ་པ་མངོན་ཤེས་ཅན་གྱི་གཏེར་མ་རྨུགས་འཛིན་དམར་པོའི་ཙཀྲ་ལ་བརྟེན་ནས་སྒྲུབ་ཐབས་བཞུགས་སོ༔
རྒྱ་གར་སྐད་དུ༔ ཨརྱ་ཛཾ་བྷ་ལ་སཱ་དྷ་ན་མཿ བོད་སྐད་དུ༔ འཕགས་པ་ཛཾ་བྷ་ལའི་སྒྲུབ་ཐབས་ཞེས་བྱ་བ༔ ཛཾ་བྷ་ལ་ཡིད་བཞིན་ནོར་བུའི་ལྷ་ལ་ཕྱག་འཚལ་ལོ༔ འཕགས་པ་ཛཾ་བྷ་ལ་སྒྲུབ་པར་འདོད་པས་ལུག་སྙེ་མོ་དཀར་མོའི་སྙིང་ཤུན་གྱི་ནང་དུ༔ དར་དམར་པོ་ལ་འཁོར་ལོ་འདི་བྲིས་ཏེ༔ རཏྣ་ལྔ་དང་དེས་བཀང་ལ༔ དར་དམར་པོས་དྲིལ་ལ་དཀྱིལ་འཁོར་འཁོར་སྟེང་དུ་བཞག་ལ༔ གཏོར་མའི་ཡོ་བྱད་དང་ཆང་ཕུད་བཤམས་ཏེ༔ རང་ཉིད་ཛཾ་བྷ་ལ་དམར་པོ་ཞལ་གཅིག་ཕྱག་གཉིས་པ་གཡས་ནོར་བུ་བསྣམས་ནས༔ གཡོན་གཏེར་གྱི་ནེའུ་ལེ་འཛིན་པ་སྐད་ཅིག་གིས་
བསྐྱེད་ལ༔ དེའི་སྙིང་ཁར་ཡི་གེ་ཧཱི༔དམར་པོ་དེ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས༔ གནོད་སྦྱིན་གྱི་གནས་རྣམས་དང་༔ རཏྣའི་འབྱུང་གནས་རྣམས་ནས་ནོར་བུ་རིན་པོ་ཆེ་བཀུག་སྟེ༔ བདག་གི་གནས་ཁང་ཁེངས་པར་བསམ་ཞིང་སྔགས་འདི་ཞག་བདུན་སྒྲུབ་སྟེ༔ ཨོཾ་ཛཾ་བྷ་ལ་དྷ་ན་ཨ་མུ་ཀ་བཱ་སུ་སིདྡྷི་མ་ཡ་མ་ལ་འདུས༔ ནོར་རྫས་ཐམས་ཅད་བདག་ལ་དུང་དུང་འདུས་འདུས་སྭཱ་ཧཱ༔ དེ་ལྟར་བཟླས་པས་རྟགས་ནི་རྨི་ལམ་དུ་ནོར་རྫས་སྟེར་བ་དང་༔ བསྙེན་བཀུར་བྱེད་པ་དང་༔ རིན་པོ་ཆེའི་གླིང་དུ་ཕྱིན་པ་དང་༔ རིན་པོ་ཆེའི་འབྱུང་གནས་ནས་ནོར་རྫས་མང་པོ་བྱུང་བ་
རྨིས་སོ༔ དངོས་སུ་ཡང་ཟས་ནོར་སྟེར་བ་འབྱུང་ངོ་༔ གའུ་རང་གི་དཀོར་མཛོད་དུ་སྦའོ༔ གཏོར་མ་འབུལ་བ་ནི་འདིའོ༔ ཛཾ་བྷ་ལ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཞེས་པས་ཕུལ་ལོ༔ དེ་ལྟར་ཕུལ་ནས་ལོངས་སྤྱོད་ཕུན་སུམ་ཚོགས་པར་འགྱུར་རོ༔ དཔལ་ཛཾ་བྷ་ལའི་སྒྲུབ་ཐབས་སློབ་དཔོན་པདྨ་འབྱུང་གནས་ཀྱིས་མཛད་པ་རྫོགས་སོ༔ ཨྠྀི༔ ༈ འདིའི་ཞལ་ཤེས་ལ། མགོ་ན་ཧཱིཟེར་བ་འཁོར་ལོའི་རྒྱབ་ཏུ་བྲི་རྒྱུ་ཡིན་ལ། དེས་བཀང་ཞེས་པ་ནི། གའུ་ཅན་ནས་བཤད་པའི་གཡང་རྫས་གང་འཛོམ་གྱིས་ཁ་བཀང་། སྙིང་ཤུན་གྱི་ཕྱི་ནས་དར་དམར་པོས་དྲིལ། གཞན་སྒྲུབ་ལུགས་གཏོར་སྒྲུབ་དང་འདྲ་སྟེ། སྒྲུབ་གཏོར་གྱི་ཚབ་ལ་འཁོར་ལོ་བཞག་རྒྱུ་ཡིན། གཞན་མཆོད་གཏོར་བཤམས་ལུགས་འདོན་ལུགས་གཏོར་སྒྲུབ་དང་འདྲ་སྟེ། ཅུང་ཟད་མི་འདྲ་བའི་ཁྱད་པར་ནི། མངོན་རྟོགས་ཀྱི་གཞུང་ནས་བཤད་པ་ལྟར། ཕྱག་གཉིས་ནོར་བུ་དང་ནེའུ་ལེ་འཛིན་པ། ཞབས་གཉིས་བཞེངས་སྟབས་ཐུགས་སྲོག་ས་བོན་ཧིབསྐྱེད། དེ་ཡིད་ཀྱིས་བསྒོམས་ཀྱང་ཆོག །སྤྱན་འདྲེན་མཆོད་པ་ཡན་ཆོད་ལས་བྱང་གཞུང་ལྟར་ལ། བསྟོད་པ་ནི་གཞུང་གི་སྐྱུར་ལ། ཡིད་བཞིན་རིན་ཆེན་གཏེར་འདི་བསྒྲུབ་
པ་ལ༔ མ་ལུས་འགྲོ་བའི་དབུལ་བ་བསལ་བའི་ཕྱིར༔ ནོར་ལྷ་ཀུན་གྱིས་ནང་ནས་ཛཾ་བྷ་ལ༔ དམར་པོ་གསུང་གི་ལྷ་ལ་ཕྱག་འཚལ་བསྟོད༔ གཏོར་བསྔོས་ཀྱི་སྔགས་ཀྱང་གཞུང་འདི་ནས་འབྱུང་བ་ལྟར་དང་། དམིགས་པ་ནི་གཞུང་འདི་ནས་བྱུང་ལྟར་དང་། སྒྲུབ་ཡུན་ཞག་བདུན་ལས་མི་ཉུང་བར་སྐབས་དང་བསྟུན། ཞེས་རཱ་ག་ཨ་སྱས་ཞལ་ཤེས་སུ་བཀོད་པའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།