རྒྱུན་ཁྱེར་དུ་ཟས་སྒྲུབ་བྱེད་པ།
༼འ༽ རྒྱུན་ཁྱེར་དུ་ཟས་སྒྲུབ་བྱེད་ན། ཕྱེ་མར་གྱི་ནང་དུ་ཟས་སྣ་རྙེད་ཚད་བསྲེས་ནས་བྲན། མངོན་རྟོགས་འདོན་མི་དགོས་ཏེ་ཐབ་ཀའམ་མདུན་གྱི་མེ་ནང་དུ་དམ་ཡེ་དབྱེར་མེད་ཛཾ་བྷ་ལ་བསྐྱེད། སྤྱན་འདྲེན་མི་དགོས། ཨོཾ་ཨཱཿཧཱུྃ་ཧ་ཧོ་ཧི༔ ལན་གསུམ་གྱི་ཕྱེ་མར་བྱིན་གྱིས་བརླབས་ནས་རྒྱས་པའི་སྦྱིན་སྲེག་སྔགས་རཏྣ་སིདྡྷི་ཅན་གྱི་བརྒྱ་རྩ་ཕུལ། །ཨགྷཾ་སོགས་ཀྱིས་མཆོད། བདེ་གཤེགས་ཀུན་གྱི་སོགས་ཀྱི་ཤོ་ལོ་ཀ་གཅིག་གིས་བསྟོད། ཨོཾ་ཨཱཧུཾ་ཞེས་ཛཾ་བྷ་ལ་འོད་དུ་ཞུ་ནས་རང་ལ་ཐིམ་པར་བསྒོམ། དེ་ལྟར་འཚོ་བ་སྲབ་དུས་ཟླ་ཤས་ཙམ་རྒྱུན་ཁྱེར་བྱས་པས་སྒྲུབ་རྒྱགས་ཀྱིས་ཐབས་མི་ཆག་པར་འབྱུང་ངོ་། །ཞེས་སྦྱིན་སྲེག་ཞལ་ཤེས་འདི་དགེ་སློང་སྦྱིན་པས་བསྐུལ་བ་ལྟར། རཱ་ག་ཨ་སྱས་སྨྲས་ཏེ་བསྐུལ་བ་པོ་ཡིས་ཡི་གེར་བྲིས་པ་སརྦ་མངྒ་ལཾ།། ༈ ཛཾ་བྷ་ལ་ལ་ཀླུ་བརྒྱད་ཀྱིས་བརྒྱན་ཅེས་པ་ནི། མཐའ་ཡས་སྔོན་པོས་དབུ་སྐྲ་བཅིངས། །འཇོག་པོ་དམར་པོས་རྣ་བ་བརྒྱན། །པདྨ་དཀར་པོས་མགུལ་རྒྱན་བྱས། །རིགས་ལྡན་ཁྲ་བོས་དཔུང་རྒྱན་བྱས། །དུང་སྐྱོང་སེར་པོའི་ལག་གདུབ་བྱས། །པད་ཅན་ནག་པོའི་རྐང་གདུབ་བྱས་པའོ།།