ཛཾ་དམར་གྱི་དབང་བསྐུར་གསལ་བར་བཀོད་པ།
༼ར༽ །གྲྭ་པ་མངོན་ཤེས་ཅན་གྱི་གཏེར་མ་ཛཾ་དམར་གྱི་དབང་བསྐུར་གསལ་བར་བཀོད་པ་བཞུགས་སོ། །
རྒྱ་གར་སྐད་དུ༔ ཨརྱ་ཛཾ་བྷ་ལ་ས་དྷ་ནི་ནཱ་མ༔ བོད་སྐད་དུ༔ འཕགས་པ་ཛཾ་བྷ་ལའི་སྒྲུབ་ཐབས་ཞེས་བྱ་བ༔ འཕགས་པ་ཛཾ་བྷ་ལ་ལ་ཕྱག་འཚལ་ལོ༔ ཛཾ་བྷ་ལ་དམར་པོའི་དབང་བསྐུར་བ་ནི། གནས་དབེན་པར་མཎྜལ་མདའ་གང་བྱས་ལ་པདྨ་འདབ་བརྒྱད་བྱ། དེའི་ནང་དུ་ཆང་ཐོད་པ་གང་ལ་བུ་རམ་བཏབ་པ་ཞིག་བཞག །གཏོར་མ་རིན་ཆེན་འབར་བ་ལ་ཤ་དང་བུ་རམ་དང་མར་གྱིས་བརྒྱན། ཤར་དུ་བུམ་པ། ནུབ་ཏུ་ཆུ་སྦྱིན་གྱི་སྣོད་ཟངས་གཞོང་དུ་སྐུ་བཞག་ལ༔ ཞེས་གསུངས་པས་མཎྜལ་འཛོམས་ན་གཞི་བཏིང་ཞིང་། མ་འཛོམས་ན་འབྲུའི་ཚོམ་བུའི་ཆོག །དབང་སྒྲུབ་ནི་ལས་བྱང་ཚར་གཅིག་བཏོན་པས་བདག་མདུན་བུམ་གསུམ་གཏོར་མའི་རྩེ་དང་ཐོད་པའི་ནང་དུ་ཛམྦྷ་ལ་ལྷ་
ལྔ་སོ་སོར་དུས་གཅིག་བསྒོམས་པས་ཆོག །དེ་ནས་བསྙེན་པ་བརྒྱ་རྩ་ཡན་ཆད་ཅི་འགྲུབ་བྱས་ལ། བུམ་ལྷ་འོད་དུ་ཞུ་ནས་བདུད་རྩི་དཀར་པོ་དང་། ཐོད་པའི་ལྷ་འོད་དུ་ཞུ་ནས་བདུད་རྩི་དམར་པོར་གྱུར་པར་བསྒོམ། དེ་ནས་སློབ་མ་ཁྲུས་བྱས། རིན་པོ་ཆེའམ་ཟངས་ཀྱི་རིགས་སོགས་དབང་ཡོན་དུ་ཕུལ་བ་དེ་དངོས་གྲུབ་ཀྱི་ཐོག་མར་འབྱུང་ངོ་། །སྟོང་པར་ཕུལ་མི་རུང་རྟེན་འབྲེལ་གྱིས་གནད་ཆེ་བས་རང་ལ་མེད་ན་གཞན་ནས་གཡར་པོའི་ཚུལ་བྱས་ནས་མདུན་དུ་བཞག་པ་གལ་ཆེ། མཎྜལ་ཕུལ་ལ། དུས་གསུམ་སངས་རྒྱས་ཐམས་ཅད་དང་། །དཔལ་ལྡན་བླ་མའི་བཀའ་དྲིན་གྱིས། །བདག་ལ་ཛཾ་དམར་ཡབ་ཡུམ་གྱི། །དབང་རྣམས་རྫོགས་པར་བསྐུར་དུ་གསོལ། །དཀོན་མཆོག་གསུམ་
ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཨོཾ་སྭ་བྷ་ཝ་སོགས་ནས། །སློབ་མ་མི་དམིགས་པར་སྟོང་པར་གྱུར་ནས་མངོན་རྟོགས་ལས་བྱང་ལྟར་ལ་དབྱེར་མེད་སྤྱན་དྲངས། རོལ་མོ་དབྱངས་དང་བཅས། སྐད་ཅིག་ཉིད་ལ་གནས་འདིར་གཤེགས་སུ་གསོལ། །རྩ་སྔགས་དང་། །ཨོཾ་བཛྲ་ཨཱ་བེ་ཤ་ཡ་ཨ་ཨཱ༔ ཞེས་མང་དུ་བརྗོད། རྡོ་རྗེ་སྤྱི་བོར་བཞག་ལ། ཏིཥྛ་བཛྲ། བུམ་པ་ལག་ཏུ་ཐོགས་ལ། ཇི་ལྟར་བལྟམས་པ་རྩམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་ནི་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་དབང་བསྐུར་སྐུ་གང་དྲི་མ་དག་ཆུའི་ལྷག་
མ་ཡར་ལུད་པ་ལས་འོད་དཔག་མེད་པས་དབུ་བརྒྱན་པར་གྱུར། ནོར་གྱི་དབང་ཕྱུག་རིན་ཆེན་གཏེར་མངའ་ཞིང་། །གནོད་སྦྱིན་ནོར་འཆང་མང་པོའི་འཁོར་གྱིས་བསྐོར། །བྱང་ཕྱོགས་སྐྱོང་བའི་མགོན་པོ་ཛམྦྷ་ལ། །དངོས་གྲུབ་མཆོག་སྩོལ་སྐུ་ཡི་བཀྲ་ཤིས་ཤོག །ཅེས་བཀྲ་ཤིས་འོག་མ་ཀུན་ལ་འགྲེས། དེས་སྐུའི་དབང་ཐོབ། ལུས་ཀྱི་སྒྲིབ་པ་དག །འདིའི་སྐུ་བསྒོམ་པ་ལ་དབང་། འབྲས་བུ་སྤྲུལ་པའི་སྐུར་འགྲུབ་པར་དབང་ངོ་། །ཐོད་པ་ལག་ཏུ་བཞག་ལ། ཁམས་གསུམ་སྙིང་ཁྲག་བསྡུས་པའི་བཅུད༔ བྱང་ཆུབ་སེམས་ནི་དམར་ལ་དྭངས༔ ཁམས་གསུམ་དབང་དུ་བྱེད་པའི་རྫས༔ བུ་ཡིས་བླངས་པས་དངོས་གྲུབ་ཐོབ༔ ཛཾ་བྷ་ལ་ཛ་ལེནྡྲ་ཡ་དྷ་ན་མེ་དྷི་ཧཱུྃསྭཱ་ཧཱ༔ ཨ་བྷི་ཥིཉྩ་ཨཱ༔ ཞེས་བདུད་རྩི་བླུད། །ནོར་གྱི་དབང་ཕྱུག་སོགས། གསུང་གི་བཀྲ་ཤིས་ཤོག །དེས་ངག་གི་སྒྲིབ་པ་དག༔ གསུང་གི་དབང་ཐོབ། ངག་ལ་ནུས་པ་འབྱུང་། འབྲས་བུ་ལོངས་སྐུ་འགྲུབ་པར་དབང་ངོ། །གཏོར་མ་རིན་ཆེན་འབར་བ་སྦྱིན་ལ། ཡིད་བཞིན་རིན་ཆེན་འབར་བ་ཡི། །ཁམས་གསུམ་ཀུན་གྱི་ནོར་བསྡུས་པས། །འདོད་དགུ་ཆར་འབེབས་དབང་གི་རྒྱལ། །བུ་ལ་བྱིན་པས་
དངོས་གྲུབ་ཐོབ། །ཛཾ་བྷ་ལ་ཛ་ལེནྡྲ་ཡེ་ཨ་བྷི་ཥིཉྩ་ཧཱུྃ། ནོར་གྱི་དབང་ཕྱུག་སོགས། ཐུགས་ཀྱི་བཀྲ་ཤིས་ཤོག །འོ་དེས་སེམས་ཀྱི་སྒྲིབ་པ་དག །ཐུགས་ཀྱི་དབང་ཐོབ། །འབྲས་བུ་ཆོས་སྐུ་འགྲུབ་པར་འགྱུར་བའོ། །དེ་ནས་ཆུ་སྦྱིན་བྱས་ཏེ། མདུན་དུ་པཱ་ཨཱི་མ་ཡིག་ལས་བྱུང་བའི། །ཞེས་པ་ནས། གནས་ཁེངས་པར་གྱུར་གྱི་བར་འདོན་སྔགས་བཟླ་ཞིང་སློབ་དཔོན་གྱིས་ཆུ་ཅུང་ཟད་ཕྱར་ཞིང་། སློབ་མ་ལ་ཕྱར་བཅུག །སློབ་དཔོན་སློབ་མ་གཉིས་ཀས་སྔགས་བརྒྱ་ཚར་བརྗོད། སློབ་མས་རྗེས་ཟློས་བྱ་ཞིང་། ཨརྒྷཾ་སོགས། བདེ་གཤེགས་ཀུན་གྱི་གསུང་ལས་ལེགས་སྤྲུལ་སོགས་ཤཱ་ལོ་ཀ་གཅིག་གི་རྗེས་ཟློས་བཅུག །དེ་ནས་ཇི་བྷ་ལའི་ཞལ་དང་ནེའུ་ལེ་ནོར་སྐྱུགས་གསུམ་ལ་རེག་པར་བསྒོམ། བྱང་ཆུབ་སེམས་ཀྱི་ཆུ་དམར་པོ་ལྕེ་ཐོག་ལ་བཞག་སྟེ་དངོས་གྲུབ་བླངས། ཨོཾ་ཨཱཿཧཱུྃ། ཆུ་དེ་རང་གིས་ཅུང་ཟད་ལོངས་སྤྱོད། །ཆུ་དེ་རང་གི་འཐུང་ཆུ་ནང་དུ་བླུགས། དེ་ནས་ལྷ་སྒོམ་པ་དང་སྔགས་འདྲེས་པའི་རྗེས་གནང་ནི། ཨོཾ་སྭ་བྷ་ཝས་སྦྱངས། བརྟན་གཡོ་ཐམས་ཅད་སྟོང་པར་གྱུར། དེའི་ངང་ལས་ཁྱེད་རང་གི་མདུན་གྱི་གཏོར་མ་འདི་ཞེས་པ་ནས་ནོར་སྐྱུགས་གཉིས་མནན་པ་དེ་ལྟ་བུ་ཞིག་བསྒོམ། ཞེས་པའི་བར་ཆུ་སྦྱིན་རྒྱས་པའི་ནང་ལྟར་རོ། །དེ་ནི་ལྷ་བསྒོམ་པའི་རྗེས་གནང་ངོ་། །ད་ཁྱེད་རང་གིས་ངེད་ལ་མེ་ཏོག་
དམར་པོའི་ཕྲེང་བ་ཞིག་ཕུལ་བའི་མོས་པས་འདིའི་རྗེས་ཟློས་མཛོད། ཛཾ་དམར་ཡབ་ཡུམ་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་བསྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །ཕྲིན་ལས་རྫོགས་པར་མཛད་དུ་གསོལ། །སློབ་དཔོན་གྱིས་རྡོ་རྗེ་མེ་ཏོག་མགོར་བཞག་ལ། ཇོ་དམར་ཡབ་ཡུམ་འདི་ལ་བསྩལ་ལགས་ཀྱིས། ཞེས་སོགས་སྔོན་ལྟར་བརྗོད། །རྒྱུད་སྡེ་རྣམས་ནས་འབྱོར་པ་ཐོབ་པའི་དབང་གི་གཙོ་བོ་རྒྱལ་སྲིད་སྣ་བདུན་ཡིན་པར་བཤད་པ་མཐའ་བརྟེན་ནི། ལྷ་རྫས་ལས་བྱས་ལྟེ་བ་ཤིན་ཏུ་ཟླུམ། །ཞེས་སྤྲོ་ན་བསྐུར། ཐུན་མོང་གི་དངོས་གྲུབ་མྱུར་དུ་ཐོབ་པར་བྱ་བའི་ཕྱིར། གཏོར་མ་འདི་ཉིད་ཛཾ་དམར་ཡབ་ཡུམ་སྟེང་གི་ཆ་ལ་བརྒྱུད་པའི་བླ་མ་དང་བཅས་པ་ཁྱེད་རང་གི་སྤྱི་བོར་བྱོན་པ་འོད་དུ་ཞུ་སྟེ་ཁྱེད་རང་ལ་ཐིམ་པར་བསྒོམ། ཞེས་གཏོར་མ་སྤྱི་བོར་བཞག །ཡིད་བཞིན་རིན་ཆེན་གཏེར་འདི་བསྒྲུབ་པ་ལ། །མ་ལུས་འགྲོ་བའི་དབུལ་བ་སེལ་བའི་ཕྱིར། །ནོར་ལྷ་ཀུན་གྱི་ནང་ནས་ཛཾ་བྷ་ལ། །དམར་པོ་ཡབ་ཡུམ་འཁོར་བཅས་དབང་བསྐུར་རོ། །བཅོམ་ལྡན་ཕྱག་ན་རྡོ་རྗེ། མཁའ་འགྲོ་མ་ཚོགས་ཀྱི་དངོས་གྲུབ། སློབ་
དཔོན་དྷ་ན་ཀོ་ཤ། རྒྱལ་པོ་སུ་ཁ་དེ་ཝ། སློབ་དཔོན་པདྨ་འབྱུང་གནས། གཏེར་སྟོན་གྲྭ་པ་མངོན་ཤེས། ཉེ་གནས་བྲག་ནག་པ། བླ་མ་མངའ་རི་པ། གོ་ལུང་པ་ནམ་མཁའ་རྒྱལ་མཚན། གོ་ལུང་པ་མདོ་སྡེ་དཔལ། གྲུབ་ཆེན་ཨོ་རྒྱན་དཔལ་ལ་སོགས་པ་བརྒྱུད་པའི་བླ་མ་རྣམས་དང་། རིགས་བདག་སྣང་བ་མཐའ་ཡས། མགོན་པོ་ཛཾ་བྷ་ལ་དམར་པོ། གཡས་ཞལ་དཀར་པོ་ཛཾ་དཀར། གཡོན་ཞལ་ཛཾ་ནག །གསང་ཡུམ་སྒྲོལ་མ་དམར་མོ་རིག་བྱེད་མ། སྐུ་རྒྱན་ཡེ་ཤེས་ཀླུ་བརྒྱད། གདན་ཁྲི་ནོར་སྐྱུགས་ཕོ་མོ། །བཀའ་སྡོད་ཨ་པར་ཙིཏྟ་ལ་སོགས་པ་ནོར་ལྷ་བྱེ་བ་བདུན་འབུམ་གྱི་ཚོགས་དང་བཅས་པས་སློབ་མ་འདི་རྣམས་ལ་བྱིན་གྱིས་བརླབ་པ་དང་དབང་བསྐུར་བར་མཛད་དུ་གསོལ། དབུལ་ཕོངས་སྐལ་ངན་མུ་གེ་ཐམས་ཅད་ཞི་བར་མཛད་དུ་གསོལ། ཚེ་དང་བསོད་ནམས་དཔལ་དང་འབྱོར་པ་འཁོར་དང་ལོངས་སྤྱོད་ཐམས་ཅད་ཟླ་བ་ཡར་གྱི་ངོ་ལྟར་འཕེལ་ཞིང་རྒྱས་པར་མཛད་དུ་གསོལ། ཁམས་གསུམ་སྲིད་གསུམ་ལྷ་འདྲེ་མི་གསུམ་ཐམས་ཅད་དབང་དུ་འདུ་བར་མཛད་དུ་གསོལ། གོད་ཁ་སྙིང་སྟོང་ཐམས་ཅད་བཟློག་པར་མཛད་དུ་གསོལ། ཚེ་
རབས་ཐམས་ཅད་དུ་འབྱོར་པ་ཕུན་སུམ་ཚོགས་ཤིང་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ནས་མྱུར་དུ་སངས་རྒྱས་པར་མཛད་དུ་གསོལ། རྩ་སྔགས་དང་། ཀཱ་ཡ་ཝཱཀྐ་ཙིཏྟ་ཨ་བྷི་ཤིཉྩ་ཨོཾ་ཨཱཿཧཱུྃ་སྭཱ་ཧཱ། ཞེས་གནས་ལྔར་གཏུགས། བསོད་ནམས་རི་བོ་བཞིན་དུ་སོགས་བརྗོད། འོ་དེས་ཛི་དམར་གྱི་དབང་རྒྱས་པ་ཐོབ་པ་ཡིན་པས་འདི་ཉམས་སུ་ལེན་ནས་དཀོན་མཆོག་ལ་མཆོད་པ་དང་། དབུལ་ཕོངས་ལ་སྦྱིན་པ་གཏོང་། དངོས་གྲུབ་ཀྱི་ཕུད་ཀྱིས་ལྷ་དང་བླ་མ་ཡང་མཆོད་སྙམ་པ་གྱིས་ལ་འདིའི་རྗེས་ཟློས་མཛོད། གཙོ་བོའི་ཇི་ལྟར་སོགས་དང། མཎྜལ་བྱ། རྗེས་ལ་ཛཾ་དམར་གྱི་ཚོགས་འཁོར་བྱས་ལ་རོལ། ཛཾ་བྷ་ལ་དམར་པོའི་དབང་གི་ལུང་འདི་འབོགས་པ་ལ་འབུལ་བ་མེད་པར་བྱ་མི་རུང་ངོ་། །ཆེ་འབྱོར་ཆུང་འབྱོར་འབུལ་ལ་དབང་བླངས། དེ་ལྟར་བྱས་པས་སློབ་མ་ལ་བྱིན་རླབས་འཇུག་གོ །ཨྠ྄ྀི། གཏེར་གཞུང་ལ་དབང་གི་རྩ་ཚིག་ལས་མེད་དེ། ངག་ལས་ཤེས་དགོས་པས་དགེ་སློང་སྦྱིན་པས་བསྐུལ་ནས། རཱ་ག་ཨ་སྱས་ངག་ནས་སྨྲས་པ་ལྟར་བསྐུལ་བ་པོས་ཡི་གེ་བྲིས་པའོ། །སརྦ་མངྒ་ལཾ་བྷ་ཝནྟུ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།