གནོད་སྦྱིན་ཛཾ་བྷ་ལ་དམར་པོའི་སྒབ་འདྲེ་མནན་པའི་ཟིན་བྲིས་ནག་འགྲོས།
གནོད་སྦྱིན་ཛཾ་བྷ་ལ་དམར་པོའི་སྒབ་འདྲེ་མནན་པའི་ཟིན་བྲིས་ནག་འགྲོས་བཞུགས་སོ། །
ན་མོ་པདྨ་ཀྲོ་དྷ་ཡ༔ འདིར་ཛཾ་དམར་གསང་སྒྲུབ་ཀྱི་སྒབ་འདྲེ་མནན་པའི་ལས་རིམ་སྤྲོས་པ་ཉུང་ངུར་བགྱིས་པ་ལས་ལིངྒ་དཔེའུ་རིས་བཞིན་བྲིས་པ་ལྕགས་སམ་བྲུབ་ཁུང་དུ་བཅུག །ཕུང་རེ་ཚལ་བུ་རྡོ་ཡམ་ལ་ངོས་གཅིག་ལ་རྡོ་རྗེ་རྒྱ་གྲམ་དང་ལྷན་ཅིག་ལ་རི་རབ་བྲིས་པ་ཚོན་སྐུད་སྔོ་དམར་དང་ཡུགས་སའི་ཤི་སྐྲའི་སྐུད་པ། གུལ་ནག །ཡུངས་དཀར་ནག །ལྕགས་ཟངས་རག་རྡོའི་ཕྱེ་མ་ལ་དུག་ཁྲག་གིས་ངར་བླུད་པའི་ཐུན་རྫས། སཱཙྪ་དང་གདུང་རྟེན་གྱི་སྲོག་ཤིང་ཙནྡན་གང་རིགས། འབྲུ་སྨན་ཤིང་ཐོག་དར་སྣ་དང་རིན་པོ་ཆེས་བརྒྱན་པ། ཆང་ཕུད་སོགས་གསེར་སྐྱེམས་ཀྱི་ཡོ་བྱད་འོག་ཏུ་དགོས་པའི་རིགས་ཚང་བར་བཤམས། ཡི་དམ་གྱི་རྣལ་འབྱོར་གཞན་ནས་མི་དགོས། དེ་མིན་སྐྱབས་སེམས་སྔོན་འགྲོ། དྭིཞེས་བརྗོད་ནས་སྐད་ཅིག་ལ་སོགས་
བདག་བསྐྱེད་བསྡུས་པའི་གཞུང་བསྲང་ནས་བཟླས་དམིགས་མཆན་བུར་གསལ་སྟོང་བཟླས་པ་ནན་བཅར་བྱ། དེ་མཇུག་གསེར་སྐྱེམས་བཤམས་ལ། ཅུང་ཟད་སྤྲོས་པར་དགའ་ཞིང་ལྕོགས་ན་རྒྱུན་བསྙེན་བླ་མ་ཡི་དམ་མཁའ་འགྲོ་ཆོས་སྐྱོང་ལ་སྤྱི་གཏོར་འབུལ་བ་དང་། གནོད་སྦྱིན་གསང་སྒྲུབ་བཀའ་སྡོད་ལྷ་ཆེན་རྣམས་ཀྱི་ལས་བྱང་བསྡུས་པ་ཞིག་བཏང་། བསྡུ་ན་སྟེང་གི་ཆ་ལ་རིག་འཛིན་བརྒྱུད་པ། བར་དུ་ཡི་དམ། འོག་ཏུ་ཆོས་སྲུང་ནོར་ལྷ་གཏེར་བདག་དང་བཅས་པ་ལ་སྒྲུབ་པ་དང་མཆོད་པའི་ཡུལ་དུ་ལམ་གྱིས་གསལ་བཏབ་ལ་གསེར་སྐྱེམས་ནི། རཾ་ཡཾ་ཁཾ༔ ཨོཾ་ཨཱཿཧཱུྃ་གིས་བྱིན་གྱིས་བརླབས་ལ། ཧོ་དགོངས་སུ་གསོལ་ལོ༔ རིག་འཛིན་རྩ་བརྒྱུད་ཀྱི་བླ་མ་དམ་པ་རྣམས་དང་༔ མདོ་སྔགས་ཐེག་རིམ་
གསར་རྙིང་རྒྱུད་སྡེ་བཞིའི་ཡི་དམ་ཞི་ཁྲོའི་ལྷ་ཚོགས་དམ་པ་ཆོས་སྐྱོང་བའི་སྲུང་མ་ཕོ་རྒྱུད་མོ་རྒྱུད་སྤྱི་དང་༔ ཁྱད་པར་ཁམས་གསུམ་དབང་བྱེད་ནོར་བདག་ཛཾ་བྷ་ལ་ཡབ་ཡུམ་གཏེར་བདག་གནོད་སྦྱིན་བྱེ་བའི་ཚོགས་དང་བཅས་པ༔ ལས་བྱེད་གུ་ལང་དབང་ཕྱུག་ཁྱོ་ཤུག་གསང་བའི་མ་བཞི་འཇིག་རྟེན་དྲེགས་པའི་ཚོགས་དང་བཅས་པ་རྣམས་ལ་གསེར་སྐྱེམས་བདུད་རྩི་ཕུད་ཀྱི་མཆོད་པ་འབུལ་ལོ། །དགྱེས་པར་བཞེས་ལ་རིག་འཛིན་སྔགས་འཆང་བདག་གི་སྒྲུབ་པ་ལ་བར་དུ་གཅོད་ཅིང་ལོངས་སྤྱོད་མངའ་ཐང་ལ་འཁུ་སེམས་ལྡན་པའི་དམ་སྲི་འབྱུང་པོ་མནན་ཅིང་བཅིངས་བར་བྱེད་པ་ལ་ཁྱེད་རྣམས་ཀྱི་ཡེ་ཤེས་ཀྱི་སྤྱན་ཕྱེས། ལེགས་ཉེས་ཀྱི་སྟངས་ཆོད། བདེན་བརྫུན་གྱི་ཤན་ཐང་ཕྱེས་ལ། བར་ཆད་དམ་སྲི་འདུལ་བའི་ར་མདའ་མི་གཡེལ་ཞིང་ཕྲིན་ལས་གཉན་པོ་སྒྲུབ་པའི་སྡོང་གྲོགས་མཛད་དུ་གསོལ། ཅེས་ཕུད་འཐོར། བྲུབ་ཁུང་དུ་དམིགས་བྱ་བསྐྱེད་པ་ནི། ཨེ་ལས་བྱུང་བའི་གནམ་ལྕགས་ཀྱི་ཁང་སྒོམ་བཙོན་ཁང་འཇིགས་ཤིང་གཡོ་བ། ནད་དང་དུག་གི་རླངས་པ་སྔོ་དམར་འཁྲིགས་ཤིང་མཚོན་ཆའི་ཆར་པ་འབེབས་པ་མི་སྡུག་པའི་སྒྲས་ཁོལ་བ། མུན་ནག་རབ་ཏུ་འཁྲིགས་པའི་
དབུས་སུ། ཏྲི་ལས་གནོད་བྱེད་བསེ་རག་ལུས་གཅེར་བུ་རིད་པ་ཡན་ལག་ལྕགས་སྒྲོག་གིས་བསྡམས་པ། སྨེ་སྔགས་འོ་དོད་སྒྲོགས་ཤིང་ཤིན་ཏུ་ཉམ་ཐག་པའི་རྣམ་པ་ཅན་དུ་གྱུར། བདག་མདུན་གཉིས་ཀྱི་ཐུགས་ཀ་ནས་འགུགས་ཆིངས་སྡོམ་མྱོས་ཀྱི་ཕོ་ཉ་འགྱེད་པའི་དམིགས་པ་དང་བཅས། ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། དབང་ཆེན་པདྨ་རིགས་ཀྱི་ཁྲོ་བོ་རྟ་མཆོག་རྡོ་རྗེ་སྲིན་པོའི་ལྷ་ཚོགས་རྣམས་ཀྱི་བཀའ་བདེན་པ་དང་། དམ་པ་ཆོས་སྐྱོང་བའི་སྲུང་མ་ཕོ་རྒྱུད་མོ་རྒྱུད་རྣམས་ཀྱི་བཀའ་བདེན་པ་དང་། ཁྱད་པར་དུ་དབང་མཛད་གནོད་སྦྱིན་ཡབ་ཡུམ་ལས་བྱེད་མངག་གཞུག་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས་རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པས་གསང་བ་ཟབ་མོའི་དངོས་གྲུབ་སྒྲུབ་པ་ལ་བར་དུ་གཅོད་ཅིང་ཚེ་དང་ནོར་དང་བསོད་ནམས་ལ་གནོད་ཅིང་འཁུ་བར་བྱེད་པའི་གནོད་སྦྱིན་ཆེན་པོའི་སྒབ་འབྲང་ཟ་འདྲེ་བུམ་ལྟོ་ཅན་འཁོར་དང་བཅས་པ་དམིགས་པའི་རྟེན་འདི་ལ་ཁུག་ཅིག །བཛྲ་ཨང་ཀུ་ཤ་ཛ༔ ཞེས་ལྔའམ་བཅུའམ་ཉེར་གཅིག་
སོགས་ཡིད་མ་ཆེས་ཀྱི་བར་དུ་བཀུག །ཛཿཧཱུྃ་བཾ་ཧོཿ ཞེས་ཕྱག་རྒྱ་བཞི་ཡིས་བཅིངས་བའི་རྟེན་དང་གཉིས་སུ་མེད་པར་གྱུར། རང་ཉིད་རྟ་མགྲིན་དུ་གསལ་བའི་སྐུ་ལས་མེ་རླུང་གི་མཚོན་ཆ་ཁྲོ་ཚོགས་སྐར་ལྟར་འཕྲོས་པས་དམིགས་བྱའི་སྒོ་གསུམ་གཞོབ་རྒོད་ཐུལ་གྱིས་ཚིག་པར་མོས་ལ་དྲག་སྔགས་ཀྱི་ཤམ་བུར། སྒབ་འདྲེ་བསེ་རག་ཐམས་ཅད་ཀྱི་སྲོག་ལ་རྦད༔ སྙིང་ལ་རྦད༔ ལུས་ངག་ཡིད་གསུམ་མཱ་ར་ཡ་ཆིངས་ནན༔ ཨེ་ཧུར་ཤྲཱི་ཛཛ༔ བཏགས་པ་བརྒྱ་རྩ་སོགས་བཟླས་པས་ཐུན་ལ་སྔགས་ཤིང་བྲབ། དེ་ནས་ཕུང་རེ་བཀབ་ནས་རྡོ་གཡམ་རི་རབ་སྟེང་དང་རྡོ་རྗེ་རྒྱ་གྲམ་འོག་ཏུ་བསྟན་ནས་བཀབ་པས་མནན་ཅིང་། ཁང་ཁྲིའུ་སྟེང་དུ་གདུང་རྟེན་སཱཙྪགང་ཡོད་བཞུགས། དམིགས་པ། རང་གི་ཐུགས་ཀ་ནས་ལཾ་ཡིག་གསེར་གྱི་མདོག་ཅན་ཞིག་ཆད་པས་དམིགས་བྱའི་གནས་འབྱུང་བ་ས་གསེར་གྱི་རི་རབ་བང་རིམ་བཞི་ལྡན་ལྕི་ཞིང་འཐིབ་པ། དེའི་ཞབས་འབྱུང་བ་ལྔའི་རང་བཞིན་གྱི་རྡོ་རྗེ་རྒྱ་གྲམ། ཤར་གྱི་རྭ་གསུམ་སའི་རང་བཞིན་སེར་པོ། ལྷོའི་རྭ་བཞི་མེའི་རང་བཞིན་དམར་པོ། ནུབ་ཀྱི་རྭ་གསུམ་ཆུའི་རང་བཞིན་ནག་པོ། བྱང་གི་རྭ་གསུམ་རླུང་གི་རང་བཞིན་ལྗང་གུ། །ལྟེ་བ་ནམ་མཁའི་རང་བཞིན་སྔོན་པོའི་བདག་ཉིད་ཀྱིས་མནན་པས་ཁོའི་
མཐུ་སྟོབས་ནུས་པ་གཅིག་ཆར་དུ་ཟད་ཅིང་འགུལ་མི་ནུས་པའི་ཁར། རང་ཉིད་ཡི་དམ་ང་རྒྱལ་བརྟན་པས་ཞབས་ཀྱིས་གསེར་རིའི་རྩེ་ནས་མནན་པས་བསྐལ་པའི་བར་དུ་ལྡང་བའི་དབང་མེད་པར་མོས་ལ། ཏྲི་ཛསྟམྦྷ་ཡ་ནན༔ དུ་དུ་གནོད་བྱེད་བུམ་ལྟོ་ཅན་དྲི་ཛནས༔ དངོས་གྲུབ་ལ་བར་དུ་གཅོད་པའི་སྒབ་འདྲེ་བསེ་རག་ཐམས་ཅད་མཱ་ར་ཡ་རྦད༔ སྟམྦྷ་ཡ་ཆིངས་ནན༔ ཞེས་གཙོ་བོར་བཟླ། ཐུན་མཐར་ཡང་སྲུང་མ་རྣམས་ལ་ར་མདའ་བཅོལ་ཕྱིར་གསེར་སྐྱེམས་གོང་བཞིན་ཚར་རེས་བསྔོས་ལ་ཕྲིན་ལས་བཅོལ། ནམ་མཁའ་མེད་པར་གྱུར་ན་ཡང་༔ སོགས་ཀྱིས་བདེན་ཚིག་བརྗོད་ལ་ངེས་ཤེས་བསྐྱེད། དེ་ལྟ་བུའི་ཐུན་ཞག་གྲངས་བསྐྱེད་པའི་དང་པོའི་ཆར་དགུག་གཞུག །བར་དུ་གཟིར་སྔགས། ཐ་མར་མནན་སྔགས་རྣམས་རྟགས་དང་གོ་བསྟུན་ནན་ཆེར་བྱ། ལས་འཇུག་བསྡུ་ཚེ། །རྭ་དང་དབུལ་པོ་མཛོ་ཐོད་ལ་སོགས་པའི་སྣོད་དུ་འདྲེ་ལྟེབ་ཀྱིས་བཅུག་ལ་ཚོན་སྐུད་དང་། ཡུགས་སའི་སྐུས་བཅིང་ལ་ཐུན་རྫས་འབྲུ་ངན་སྦྲང་མ་སློག་གཙང་མི་ཁའི་རྫས་དང་ལྷན་ཅིག་བཅུག་པའི་ཁ་རོ་གཡམ་གྱིས་བཅད། ཕྱི་ནས་ཕུང་རེའི་ཚོན་སྐུད་ཀྱིས་བཅིངས། རྩང་རྩེར་བཙུགས་པ་ལྷ་ཁང་སྒོ་ཐེམ། མཆོད་རྟེན་གྱི་འོག་ཏུ་སོགས་གནོན་ཡུལ་གང་བདེར་གནོན་པ་ལས་འཆི་བདག་ཞལ་དབྱེ་སོགས་གཞན་མའི་རྒྱས་གདབ་མི་དགོས་པ་ཡིན་ནོ། །ཞེས་པ་འདིའང་ཐམས་ཅད་
མཁྱེན་པ་དཀོན་མཆོག་གར་དབང་རྒྱ་མཚོས་ལྗགས་བསྒྲིགས་མཛད་པ་ལས། ཕྲན་ཆུང་རཏ་ཤྲཱི་ལས་བསམ་གཏན་གྱི་ཁང་བུར་རང་གཞུང་དུ་བྲིས་པའི་དགེ་བས་ཟབ་ཆོས་བསྟན་པ་རྒྱས་པའི་རྒྱུར་བསྔོའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།