ཛཾ་དམར་གྱི་སྒབ་འདྲེ་མནན་ཐབས།
༼ཧ༽ ཛཾ་དམར་གྱི་སྒབ་འདྲེ་མནན་ཐབས་ནི༔ ཁྱི་ར་ལི་ལིའི་ཁྲག་མུ་ཟི་བཙན་དུག་གིས་དགུ་གསུམ་དག་ལ་གྲོ་ཤོག་ལ་ལིངྒ་ཡི་གེ་བྲི༔ ལྟེ་བར་ཏྲིའི་མཐར་གནོད་བྱེད་བྱ་མཆུ་བྲེལ་ཕོངས་ཅན་མཱ་ར་ཡ་ནན་ཛཛནན། སྒབ་འདྲེ་བྲེལ་ཕོངས་ཅན་ཨངྐུ་ཤ་ཛར༔ རྩིབས་བཞི་ལ༔ ཨོཾ་བཛྲ་པཱ་ཎི་ཧཱུྃ༔ ཏྲི་ནན་ཙིཏྟ་རྦད་ནན༔ ཧུར་ཐུམ་ཛ༔ ཡཀྵ་ནག་པོ་གནོད་བྱེད་བྲེལ་ཕོངས་བྱ་མཆུ་ཅན་གྱི་སྙིང་ལ་གཟེར་གཟེར་བྲེང་ཤག་སརྦ་ཏྲི་ནན་ཛཛ༔ དེ་རྒྱབ་མུ་ཁྱུད་ལ༔ སྒབ་འདྲེ་གནོད་བྱེད་བྱ་མཆུ་ཅན་ཡཀྵ་ཧུར་ཤྲཱི་ཛ༔ བྱ་མགོ་མཱ་ར་ཡ་ཛཿཧཱུྃ་བཾ་ཧོཿ གནོད་བྱེད་བྱ་མགོ་ཅན་ཨེ་ཌི་ཧུར་ཤྲཱི་ཛམཱ་ར་ཡ་རྦད་རྦད༔ སརྦ་ཆུད་སྲོག་ལ་གཟེར་གཟེར༔ དེ་དག་ཡིག་མགོ་ཕྱིར་བསྟན༔ དེ་རྒྱབ་མི་ལུས་བྱ་མགོ་ཅན་རྐང་ལག་ལྕགས་སུ་བཅུག་པ་མཆུ་ནང་རྡོ་རྗེ་རྒྱ་གྲམ་དང་ཕྱི་རིམ་ལ༔ ཛཾ་བྷ་ལ་རིགས་ལྔ་སྒྲུབ་པ་ལ་གནོད་བྱེད་བྱ་མཆུ་ཅན་ལ་སོགས་པ་སྲིད་པའི་འདྲེ་དགུ༔ གཙུག་ལག་གི་གདོན་བཅུ༔ ཚེ་བསོད་ནམས་ལ་གནོད་པ༔ སྒོའི་ནོར་ལ་གནོད་པ༔ ཕུག་གིས་སྲིས་ལ་གནོད་པ༔ བསྟན་པ་ལ་གནོད་པར་བྱེད་པའི་བགེགས་རིགས་སྟོང་ཕྲག་བརྒྱད་ཅུ་རྩ་བརྒྱད་མཱ་ར་ཡ་ནན་ནན༔
བྱེར་བྱེར་ཛ་ཛཿ ཡིག་མགོ་ཕྱིར་བསྟན་བྲི༔ མནན་པ་སཱཙྪ་ནག་པོ་དེ་ནང་དུ་བཞི་ལྟེབ་བྱས་ལ་ཁྱི་ནག་གིས་སྤུས་བཅིངས༔ བཀུག་གཞུག་མང་དུ་བྱེད༔ གོང་གི་སྔགས་རྣམས་བརྒྱ་སྟོང་ཅི་འགྲུབ་བཟླ༔ གད་པ་ནག་པོ་ཁ་བྱང་དུ་རྒྱུ་བའི་འོག་ཏུ་མནན༔ འདི་མནན་ལུགས་རྒྱས་པ་ཡིན༔ བསྡུས་པ་གཞན་དུ་གསལ༔ འདི་མཚམས་རྒོད་ལྡེམ་གཏེར་མ་ཟ་འདྲེ་ཁ་ཆིངས་སྔགས་འཛུད་མཆན། མནན་པའི་ཐོད་པ་དེ་ཉིད་གནམ་ལྕགས་རྡོ་རྗེ་ཕ་ལམ་ལས་གྲུབ་པའི་སྟེང་འོག་བར་མཚམས་མེད་པར་ཁྲོ་བོ་དང་ཁྲོ་མོ་རྣམས་ཀྱིས་བསྲུང་བར་བསྒོམ༔ རྒྱལ་བ་ཐམས་ཅད་ཀྱི་མཐུ་སྟོབས་ནུས་པས་རྒྱས་གདབ༔ བདེན་པའི་ཚིག་གིས་གཟིར༔ དྲག་རྩལ་སྟོབས་ཀྱིས་མནན་པར་བསམ༔ དེ་ཉིད་ལས་ཀྱི་གཤིན་རྗེ་གླང་གི་མགོ་ཅན་ཞལ་དུ་བཟུང་ནས་ཐར་མེད་རྒྱས་གདབ་པར་བསམ༔ ཧཱུྃ༔ གནོད་པར་བྱེད་པའི་དམ་སྲིད་ཁྱོད༔ ཉ་མོ་རྟ་རུ་སོང་ཡང་མ་ལྡང་ཞིག༔ དཀར་སྒོང་རྟ་རུ་སོང་ཡང་མ་ལྡང་ཞིག༔ གཡའ་མ་ར་རུ་སོང་ཡང་མ་ལྡང་ཞིག༔ ཅེས་བརྗོད་རང་འཐག་ཡ་ཐོད་རི་རབ་མ་ནོར་བར་སྟེང་ནས་མནན༔ སླར་དབང་ཆེན་གསེར་གྱི་ས་གཞི་སེར་པོ་གྲུ་བཞི་བང་རིམ་གསུམ་པ༔ དེའི་སྟེང་
བཾ་ལས་ཆུའི་དཀྱིལ་འཁོར་ཟླུམ་པོ་སུམ་བརྩེགས་དཀར་པོ༔ དེའི་སྟེང་རཾ་ལས་མེ་དཀྱིལ་དམར་ནག་གྲུ་བཞི་པ༔ ཐོག་མ་གསུམ་གསུམ་བརྩེགས་པས་མནན་པར་བསམ༔ ལཾ་ལཾ་སྟམྦྷ་ཡ་ནན༔ སས་མནན༔ ཝཾ་ཝཾ་སྟམྦྷ་ཡ་ནན༔ ཆུས་མནན༔ རཾ་རཾ་སམྦྷ་ཡ་ནན༔ མེས་མནན༔ དེ་ལྟར་ཚར་གསུམ་གྱིས་རིམ་པ་དགུ་ཡིས་མནན༔ དེ་སྟེང་དྲག་པོའི་ཤིང་ལ་སྲོག་ཤིང་བྱས་པའི་བཅའ་ཏི་བང་རིམ་གསུམ་པ་བུམ་པ་དང་བཅས་པའམ་མེད་ན་སཱཙྪ་ནག་པོ་གཅིག་བཞག༔ ཨོཾསྭ་བྷ་ཝས་སྦྱངས། སྟོང་པའི་ངང་ལས་འཁོར་ལོ་དཀར་པོ་ཨོཾ་གྱིས་མཚན་པ་ལས་རྣམ་པར་སྣང་མཛད་སྐུ་མདོག་དཀར་པོ་བྱང་ཆུབ་མཆོག་གི་ཕྱག་རྒྱ་ཅན༔ དར་དང་རིན་པོ་ཆེས་བརྒྱན་པ༔ ལོངས་སྤྱོད་རྫོགས་པའི་ཆ་ལུགས་ཅན་དུ་གསལ་བའི་གནས་གསུམ་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས༔ ཨོཾ་བཛྲ་ས་མ་ཡ་ཛ༔ ཛཿཧཱུྃ་བཾ་ཧོཿ གཉིས་སུ་མེད་པར་གྱུར༔ ཨོཾ་བེ་རོ་ཙ་ན་ཨརྒྷཾ་སོགས་ཀྱིས་མཆོད༔ རྣམ་པར་སྣང་མཛད་འོད་དུ་ཞུ་བ་ལས་ཐུབ་པ་ནག་པོ་སྐུ་མདོག་དུག་ཧ་ལིའི་མདོག་ལྟ་བུ་གཡས་གསེག་ཤང་གཡོན་མཉམ་བཞག་གི་སྟེང་ན་ལྷུང་བཟེད་འཛིན་པ་གཅིག་ཏུ་གྱུར༔
དེ་འོད་དུ་ཞུ་ནས་མཆོད་རྟེན་ནག་པོ་གཞོམ་མེད་དུ་གྱུར༔ དེ་ཆུས་བཅག་ལ་དམ་པར་བྱས༔ རྟ་བྲོ་བརྡུང་ལ་རྒྱས་གདབ་བོ༔ ཨྠྀི༔