མནན་པའི་ཞལ་ཤེས།
༼ཨ༽ མནན་པའི་ཞལ་ཤེས་ནི། ན་མ་ཨར་གུ་རུ་ཝེ། ཁམས་གསུམ་དབང་དུ་བྱེད་པའི་ཛ་བྷ་ལ་དམར་པོའི་བསྙེན་སྒྲུབ་ཀྱི་ཞལ་ཤེས་ནི་བླ་མ་རིན་པོ་ཆེས་གསུང་རྒྱུན་བྲི་བར་བྱའོ། །དེའང་བླ་མའི་ཞལ་ནས་འདྲེ་མནན་ཚར་ནས་ལྷ་འགྲུབ་ཚར་བ་ཡིན་གསུངས་པས། ཐོག་མར་སྒབ་འདྲེ་མནན་པ་ལ། རང་གི་དྲི་མ་ཁ་རླངས་སོགས་མ་ཕོག་པར་བྱས། དུག་ཤོག་ལ་བྱ་ནག་གི་ཁྲག་གམ། དུག་ཁྲག་སྣག་ཚ་བསྲེས་པས། གནོད་བྱེད་བྲེལ་ཕོངས་ཅན་གྱི་ལིངྒ་མི་ལུས་བྱའི་མགོ་ཅན། ཡན་ལག་ལྕགས་སྒྲོག་གིས་བསྡམས་པ། །དཔུང་མགོ་དང་སྤུས་མགོ་བཞིར་ཛཿཧཱུྃ་བཾ་ཧོཡིས་གཟེར་གྱིས་བསྡམས། སྙིང་གར་ཏྲིའི་མཐར་གནོད་བྱེད་བྲེལ་ཕོངས་ཅན་གྱི་ལུས་ངག་ཡིད་གསུམ་སྟམྦྷ་ཡ་ནནགྱིས་བསྐོར༔ མགོར་ནན་ནན༔ རྣ་བར་འོན་འོས༔ མིག་ལ་ལོང་ལོང་༔ ཁ་ལ་ཐཾ༔ དཔུང་པར་ཆག་ཆག༔ བླ་ལ་བླ་དྭགས༔ རྐང་པར་ཞ་ཞ༔ གསང་གནས་སུ་ཕཊ། རྐང་འོག་ནས་བརྩམས་ཏེ། ཨོཾ་ཏྲི་དྷ་ཡཀྵ་སོགས་ཀྱི་མཐར་དམོད་བཅོལ་དང་བཅས་པས་བསྐོར། དེ་རྒྱབ་ཛ་དང་ཁྲམ་རིས་བསྐོར། དེ་ནས་འབྱུང་བཞིའི་ཁྲུས་བྱས་ལ། བྲུབ་ཁུང་རེ་བ་ནག་པོའི་སྟེང་དུ་
བཞག །དེ་ནས་རང་ཉིད་ཕྱག་ན་རྡོ་རྗེ་གང་རུང་གི་ང་རྒྱལ་དང་ལྡན་པས་དེའི་བསྙེན་པ་ཅུང་ཟད་བྱས་པའི་མཐར། མདུན་དུ་གནོད་བྱེད་དེ་བདེན་བདར་བཀུག་གཞུག་མང་དུ་བྱས་ལ་མཐར་ངག་འདོན་ལ། ཨོཾ་ཏྲི་དྷ་ཡཀྵ་ཏྲི་མཱ་ར་ཡ་ཁུག་ནན། དུ་ན་བར་ཆོད་གནོད་བྱེད་ཨ་ར་ནན་ཧྲིཛཙཱ་བྷ་ཡ་ནཱན། ཨོཾ་ཏྲི་དུ་ན་ཡཀྵ་ཏྲི་མཱ་ར་ཡ་ཁུག་ནན། དུ་ན་བར་ཆོད་གནོད་བྱེད་ཨར་ནན། ཧཱིཛ་ཧཱུྃ་བྷ་ཡ་ནན། ཨོཾ་ཏྲི་བྷ་ཡཀྵ་ཏྲི་མཱ་ར་ཡ་ཁུག་ནན། དུ་ན་བར་ཆོད་གནོད་བྱེད་ཨར་ནན་ཧཱིསྟམྦྷ་ཡ་ནན། ཞེས་དྲག་ཏུ་བཟླ་ཞིང་སྐབས་སུ་ཧུ་གདབ་པའི་ཐུན་གྱིས་བྲབ། དེ་ལྟ་བུའི་ཐུན་བཞིའི་རྣལ་འབྱོར་གྱི་ཞག་གསུམ་མམ་བཞིའམ་ལྔའམ་དྲུག་སོགས་རྨི་ལམ་རྟགས་མ་བྱུང་བར་དུ་བསྒྲུབས་ལ་དེ་ནས་ལིངྒ་ཤི་ལྟེབ་བྱས་ལ་རེ་བས་བཏུམ་ལ་གད་པ་ནག་པོའམ་ལྷ་ཁང་མཆོད་རྟེན་ཞབས་སུ་སཱཙྪནག་པོས་མནན་ལ་བཞག་གོ །རྟགས་ནི་བྱ་རྙི་ལ་བཟུང་བ་དང་བསད་པ། གཞན་ཡང་མི་དང་། གཅན་གཟན་བྱ་རིགས་རི་དྭགས་དུད་འགྲོ་འབུ་སྲིན་སོགས་གང་རུང་རྣམས་བཟུང་བ། བསད་པ། བཅོམ་པ། ཤིང་བཅད་པ། ཆུ་བསྒྱུར་བ། བྲ་བྱི་བསད་པ། རང་རྒྱལ་བ་སོགས་རྨིས་ན་འགྲུབ་རྟགས་
སོ། །དྲིན་ཆེན་རཱ་ག་ཨ་སྱས་གསུང་རྒྱུན་ལྟར་བཱིརྱ་སཱ་ག་རས་བྲིས་པའོ། །།མངྒ་ལཾ།། ༈ འདིའི་དཔེའུ་རིས་གཅིག་ལ། བྱ་མཆུ་ཅན་གྱི་སྙིང་གར་ཛ་ཏྲི་ཏྲ་ལིངྒའི་མགོ་ཐོག་ནས་བཟུང་། ཡིག་མགོ་ནང་དུ་བསྟན་ལ། ཨོཾ་བྱི་ཞུ་ཙ་ར་ཡ་ཨུ་ཙ་ཏ་ཡ་ཕཊ༔ ཨོཾ་ཨཱཕཊ་ཙིཏྟ་ཨུ་ཙ་ཏ་ཡ་ཕཊ། ཅེས་དམོད་བཅོལ་ཚིག་གིས་བསྐོར། སྔགས་ལྔ་བརྒྱ་བསྒྲུང་ལ་ཁྱི་ནག་སྤུས་དྲིལ་ལ་མནན་ཟེར་བའང་འདུག ༈ ལིང་ཁྲུས་བྱེད་པ་ལ། རྫས་ལ། སྐྱེར་ཤུན། གླང་རུ། བྲ་བོ། གུ་གུལ་དེ་རྣམས་མེ་ལ་བསྲེགས་ལ་ལིངྒར་བདུག །སྔགས་ལ། ཨེ་ཀ་ཤིག་ཤིག །ཨེ་ཀ་ཁྲོལ་ཁྲོལ། ན་ར་ཤིག་ཤིག །ན་ར་ཁྲོལ་ཁྲོལ། ཡ་མ་ཤིག་ཤིག །ཡ་མ་ཁྲོལ་ཁྲོལ། གཟའ་བདུད་ཡ་མ་ཤིག་ཤིག གཟའ་བདུད་ཡ་མ་ཁྲོལ་ཁྲོལ། དགེ་བསྙེན་ཡ་མ་ཤིག་ཤིག །དགེ་བསྙེན་ཡ་མ་ཁྲོལ་ཁྲོལ། བདུད་ཡ་མ་ཤིག་ཤིག །བདུད་ཡ་མ་ཁྲོལ་ཁྲོལ། བཙན་ཡ་མ་ཤིག་ཤིག །བཙན་ཡ་མ་ཁྲོལ་ཁྲོལ། དེ་ནས་འབྱུང་ལྔའི་ཁྲུས་ནི། འཁོར་ལོ་དང་ལིངྒ་འདི་རྣམས་ལ་བདག་ཅག་སྒྲུབ་པ་པོ་འཁོར་དང་བཅས་པ་རྣམས་ཀྱི་དྲི་མ་ཁ་རླངས་སོང་བ་དེ། ས་ཡི་ལྷ་མོས་བསལ་
དུ་གསོལ། ཆུ་ཡི་ལྷ་མོས་བསལ་དུ་གསོལ། རླུང་གི་ལྷ་མོས་བསལ་དུ་གསོལ། མེ་ཡི་ལྷ་མོས་བསལ་དུ་གསོལ། ནམ་མཁའི་ལྷ་མོས་བསལ་དུ་གསོལ། ཞེས་པས་ཁྲུས་བྱས་རང་གིས་འཐུང་བར་བྱའོ། །དེ་ནས་བཀུག་གཞུག་ལ་སོགས་ལན་གྲངས་ལྟར་བྱའོ། །འདི་མེད་ན་བྱིས་པས་རྡོ་བརྩེགས་པ་དང་འདྲ་བ་དེ་བས་འདི་ལ་ནན་ཏན་བྱའོ།། །།