ཛཾ་བྷ་ལ་དམར་པོའི་རྟེན་འཛུགས་དགོས་འདོད་བསམ་འཕེལ་གྱི་ཟིན་བྲིས་ཕྱག་ལེན་དང་བཅས་པ་མཐོང་བ་ཀུན་གསལ་འདོད་དགུ་ཀུན་འབྱུང་།
༼ཎ༽ཛཾ་བྷ་ལ་དམར་པོའི་རྟེན་འཛུགས་དགོས་འདོད་བསམ་འཕེལ་གྱི་ཟིན་བྲིས་ཕྱག་ལེན་དང་བཅས་པ་མཐོང་བ་ཀུན་གསལ་འདོད་དགུ་ཀུན་འབྱུང་ཞེས་བྱ་བ་བཞུགས།
རྒྱ་གར་སྐད་དུ༔ ཨརྱ་ཛཾ་བྷ་ལ་སཱ་དྷ་ནི་ནཱ་མ༔ བོད་སྐད་དུ༔ འཕགས་པ་ཛཾ་བྷ་ལའི་སྒྲུབ་ཐབས་བཅས་ལ། གཏོར་མ་རབ་དར་གོས་དམར་པོ་ལ་དཔེའུ་རིས་ལྟར་ཚེམ་ལ་དར་དམར་ཞིག་ལ་ཛོ་དམར་མངོན་རྟོགས་ལྟར་བྲིས་ལ། དེའི་རྒྱབ་ཏུ་སྔགས་འདི་རབ་གསེར། འབྲིང་དངུལ། ཐ་མ་མཚལ་གྱིས་བྲི། ༀ་ཛཾ་བྷ་ལ་ཛ་ལེནྡྲ་ཡེ་དྷ་ན་མེ་དྷི་ཧཱུྃསྭཱ་ཧཱ༔ ཨོཾ་ཛ་བྷ་ལ་ཛ་ལེནྡྲ་ཡེ་ཀུ་རུ་ཀུལླེ་ཧིསརྦ་ལོ་ཀ་ཝཱ་ཤཾ་ཀུ་རུ་ཧིས་སྨུག་འཛིན་དམར་པོ་རྟེན་འདིར་བརྟན་པར་བཞུགས་ལ་སྒྲུབ་པ་པོ་ལ་འཆི་མེད་ཚེའི་དངོས་གྲུབ་སྩོལ། འཛམ་གླིང་གཏེར་གྱི་དངོས་གྲུབ་སྩོལ། །
བསོད་ནམས་ནོར་གྱི་དངོས་གྲུབ་སྩོལ། །རྨ་གཡང་ཟས་ཀྱི་དངོས་གྲུབ་སྩོལ། །ལྷབ་ལྷུབ་གོས་ཀྱི་དངོས་གྲུབ་སྩོལ། །བང་མཛོད་འབྲུ་ཡི་དངོས་གྲུབ་སྩོལ། །སྲ་བརྟན་གོ་ཆའི་དངོས་གྲུབ་སྩོལ། །དར་ཟབ་རྫས་ཀྱི་དངོས་གྲུབ་སྩོལ། །རིན་ཆེན་གསེར་གཡུའི་དངོས་གྲུབ་སྩོལ། །རྐང་བཞི་ཕྱུགས་ཀྱི་དངོས་གྲུབ་སྩོལ། །སྙན་གྲགས་གདུལ་བྱའི་དངོས་གྲུབ་སྩོལ། །འཇིག་རྟེན་ཁམས་འདིར་གནས་པའི་གསེར་དངུལ་ཟངས་ལྕགས་གཡུ་བྱི་རུ་ནོར་བུ་རིན་ཆེན་ཇ་དར་རྟ་གླང་ནོར་ར་ལུག་ཞིང་ཁང་འབྲུ་བང་མཛོད་འཇིག་རྟེན་གྱི་ཟས་ནོར་མཁོ་རྒུ་ཐམས་ཅད་ཀྱི་དངོས་གྲུབ་སྩོལ་ཅིག །
རཏྣ་སརྦ་སིདྡྷི་ཕ་ལ་ཧཱུྃ། ཨོཾ་ཧྲཱིཿཛཾ་བྷ་ལ་ཛ་ལེནྡྲ་ཡེ་འགྲོ་བ་མི་ཡི་ཙིཏྟ་ལ་ཨ་པ་ར་ཙིཏྟ་ཛ༔ ཨོཾ་ཧྲཱི༔ཛཾ་བྷ་ལ་རཏྣ་ཨ་མུ་ཀ་ཨ་ཀར་ཡ་ཛ༔ འཇིག་རྟེན་གྱི་ཆེ་བཙན་ཡོན་ཏན་དང་ལྡན་པ་བཟང་བཙུན་གྲགས་གསུམ་ལྡན་པའི་རྒྱལ་བློན་འབངས་གསུམ། བན་སྔགས་བོན་གསུམ་སྐྱེས་པ་བུད་མེད་སྐྱེ་འགྲོ་ཕོ་མོ་སྟེང་འོག་བར་གསུམ་གྱི་ལྷ་ཀླུ་མིའི་ལུས་ངག་ཡིད་གསུམ་ཚེ་དང་བསོད་ནམས་ཁ་རྗེ་དབང་ཐང་འབྱོར་པ་རླུང་རྟ་བླ་གཟའ་སྙན་གྲགས་གདུལ་བྱ་ཕྲིན་ལས་ལོངས་སྤྱོད་རྟ་གླང་ནོར་ར་ལུག་མཛོ་གཡག་རྐང་འགྲོ་ཡུལ་མཁར་འབྲུ་བང་མཛོད་གསེར་དངུལ་ལྕགས་གོ་མཚོན་ཟས་གོས་ཇ་དར་གོས་ཐམས་ཅད་དབང་དུ་སྡུས་ཤིག །ནོར་རྫས་ཐམས་ཅད་བདག་ལ་དུང་དུང་བསྡུས་བསྡུས། མགོ་ནག་མི་ཡི་སེམས་དཀྲུགས་ལ་སྙིང་འཕྱོ་རུ་ཆུག །རྐང་པ་འགྲོ་རུ་ཆུག །འཇིག་རྟེན་ཁམས་ཀྱི་སྐྱེ་འགྲོ་ཕོ་མོ་ཐམས་ཅད་ཡིད་ཀྱི་རྣམ་པར་ཤེས་པ་རང་དབང་མེད་པར་ཁུག་ལ་ཤོག །སརྦ་ལོ་ཀ་པཱ་ཤཾ་ཀུ་རུ་ཧཱུྃ། ཁམས་གསུམ་སྲིད་གསུམ་ཟས་ནོར་ལོངས་སྤྱོད་སརྦ་ལོ་ཀ་ཨཾ་ཀུ་ཤ་ཛཛ༔ སྐུ་གཟུགས་སྔགས་རྣམས་མགོ་མཇུག་མ་ལོག་པར་བཞག །ནང་དུ་འབྲུ་སྣ་ལྔ། སྨན་སྣ་ལྔ། རིན་ཆེན་ལྔ། དྲི་ལྔ། སྙིང་
པོ་ལྔ། ཇ་དར་ཟས་སྣ་གཡང་རྫས་རྣམས་ཀྱིས་ལེགས་པར་བཀང་། འོག་ཏུ་གཏོར་མའི་སྨད་ཆ་ལ་གཞན་ནས་བྱུང་བའི་གཡང་འགུགས་དང་གནོད་སྦྱིན་འཁོར་ལོ་རྣམས་བཞག་ན་ལེགས། མེད་ཀྱང་རུང་། དེ་ནི་རབ་དར་གཏོར་རྟེན་འཛུགས་སོ། ༈ །འབྲིང་དུ་བྱེད་ན་གཏོར་མ་རས་བསེ་ལ་བཟོ་ཚོན་རྩི་གཙང་སྦྲ་སོགས་ལེགས་པར་བྱེད། །སྐུ་གཟུགས་སྔགས་སོགས་གོང་དང་འདྲ། ཞབས་བསྡམས་ཤིང་ཤུག་པ་སོགས་ཀྱིས་ལེགས་པར་བསྡམས་ནས་འབུ་སྲིན་ནང་དུ་མི་འཇུག་པ་བྱ། དེ་ལྟར་གྲུབ་ན་འབྲིང་དུའོ། ༈ །ཐ་མ་ཟས་སྣ་ལ་གཏོར་མ་གོང་ལྟར་བཅའ། སྐུ་གཟུགས་སྔགས་རྣམས་ཤོག་གུ་ལ་བྲི། མར་ཁུ་ནང་དུ་དྲངས་པས་རུལ་བ་སོགས་མི་འབྱུང་། ལེགས་པར་སྐུ་ཡི་གཡས་ཕྱོགས་ནས་དྲིལ། སྐུ་ནང་དུ་བསྟན་ལ་གཏོར་མའི་ནང་དུ་བཞག །དེ་ནི་རྟེན་གཏོར་ཐ་མའོ། །རི་ཁྲོད་རྟོགས་ལྡན་སོགས་ཡིན་ན་མཚམས་བསྒྲུབས་ཚར་ནས་གྲོལ་ཉིན་ཟས་གཏོར་ཡིན་ན་དངོས་གྲུབ་བྱ། སྐུ་གཟུགས་སྔགས་རྣམས་ཁྱེར་སོང་ནས་རྗེས་སུ་རྟེན་འཛུགས་ཉིན་དར་དང་རས་བསེ་ཡིན་ན་ཆག་གྲུམ་མ་ཤོར་བར་ཁུར་སོང་ན་ཆོག །རྟག་ཏུ་འདུག་པ་རྣམས་ཀྱི་གཏོར་མ་
རྟེན་འཛུགས་ཡིན་པས་གཡོ་འགུལ་མེད་པར་བྱས་ལ་རྟེན་དུ་བཞག །ལྷ་སྤྱན་དྲངས་གཏོར་མ་ལ་བསྟིམ། གཏོར་མ་རབ་འབྲིང་གང་ལ་ཡང་རྟེན་གཏོར་མདུན་དུ་གཏོར་མ་དེ་འདྲ་གཅིག་ཟས་སྣ་ལ་བཅའ། རྟེན་གཏོར་ལྷ་བསྐྱེད་རྟེན་དང་། མདུན་གྱི་གཏོར་མ་མཆོད་གཏོར་ཡིན་པས་རྒྱུན་དུ་ནམ་འདོན་གསོ་བྲན་བྱ། དེ་ལྟར་རྟེན་གཏོར་རབ་འབྲིང་ཐ་མ་གང་བྱེད་ཀྱང་ཡིད་བཞིན་ནོར་བུ་ལས་ཁྱད་པར་ལྷག །ལོངས་སྤྱོད་ཛ་བྷ་ཉིད་དང་མཉམ་པར་ཡིན། །དགོས་འདོད་བསམ་པ་ཡིད་བཞིན་འགྲུབ་པར་འགྱུར། །གསར་རྙིང་རྟེན་གཏོར་མང་པོའི་འབྲུ་དོན་དང་། །ཛཾ་བྷ་ལ་ཉིད་ཀྱི་རང་གཞུང་ལ་བསྟུན་ནས་མན་ངག་ཞལ་ཤེས་མང་པོས་ཁ་བརྒྱན་བྱས་ནས། ༧ རཱ་ག་ཨ་སྱས་རང་གཞན་ལ་ཕན་ཕྱིར་བྲིས། དགེ་བས་དབུལ་ཕོངས་ཅན་ལ་ཕན་ཐོགས་རྒྱ་ཆེར་སརྦ་མངྒ་ལཾ།། །།