དར་དམར་ལ་འཁོར་ལོ་བྲི་བ།
དར་དམར་ལ་འཁོར་ལོ་བྲི་བ་ནི༔ ལྟེ་བར་ཨོཾ། དེའི་མུ་ཁྱུད་ནང་མ་ལ་ཡི་གེ་ཤོང་ཙམ་དུ༔ ཛཾ་བྷ་ལ་ཛ་ལེནྡྲ་ཡེ་དྷ་ན་མེ་དྷི་དྷིསྭཱ་ཧཱ། ཞེས་པ་བྲི། དེའི་ཕྱི་རིམ་མུ་ཁྱུད་ལ་རིན་ཆེན་སྣ་བདུན་གྱི་སྙིང་པོ་བྲི། དེའི་ཕྱི་རིམ་སོར་གཉིས་ཀྱི་ཚད་ཙམ་ལ་པདྨ་འདབ་མ་བརྒྱད་ལ་བཀྲ་ཤིས་རྟགས་བརྒྱད་བྲི་བར་བྱ། དེའི་ཕྱི་རིམ་མུ་ཁྱུད་ལ་གཟུངས་ཀྱི་སྙིང་པོའི་མཇུག་ཏུ་སརྦ་ལོ་ཀ་ཝཱ་ཤཾ་ཀུ་རུ་ཞེས་པ་ཕྱི་རོལ་དུ་འཁོར་ལོ་རྩིབས་བཅུ་དྲུག་པ་བྲི། དེ་ནས་གནོད་སྦྱིན་ཕོ་བརྒྱད་མོ་བརྒྱད་ཀྱི་སྙིང་པོ་བྲི། དེའི་མུ་ཁྱུད་ལ་རྣམ་སྲས་ནོར་རྒྱུན་མའི་གཟུངས་བྲི། དེའི་ཕྱི་རིམ་ལ་བདག་ལ་གསེར་དངུལ་ཟངས་ལྕགས་གཡུ་བྱི་རུ་མུ་ཏིག་རྟ་བ་ལང་གནག་ལུག་ཞིང་ཁང་འབྲུ་བང་མཛོད་གོས་དར་ལ་སོགས་པའི་དམར་པོ་མཛོ་གཡག་འཇིག་རྟེན་ཁམས་ཀྱི་ནོར་གྱི་དངོས་གྲུབ་འདོད་དགུ་ཐམས་ཅད་སྩོལ་ཞེས་བྲི། དེའི་ཕྱི་རིམ་ཛཾ་བྷ་ལ་དམར་པོའི་ཞལ་བྲིའོ༔ ཛཾ་དམར་རྒྱན་དང་བཅས་པ་བྲི་ཞལ་ཤེས་ཡིན། དེ་ནས་རབ་གནས་མངའ་གསོལ་བྱེད། གའུ་ཐོད་པ་སོགས་སྐབས་དང་སྦྱར་དེ་རྣམས་ཀྱི་ནང་དུ་བཅུག་བང་མཛོད་དུ་སྦས། དུས་སུ་མངའ་གསོལ་བས་ཡིད་བཞིན་ནོར་བུ་བསམ་འཕེལ་དང་འདྲའོ༔
ཟབ་པ་ལས་ཆེར་ཟབ་པ་གདམས་པ་ཟབ་མོ་འདི་ནི་ཤིན་ཏུ་གསང་བར་བྱའོ། །ཛཾ་དམར་འཁོར་ལོ་འདི་ནང་ན་གཞུག་པ་ཙམ་གྱིས་ཀྱང་ལོངས་སྤྱོད་ལྷུན་གྲུབ་འབྱུང་ངོ་༔ ཨོཾ་ཧྲཱིཿཛཾ་བྷ་ལ་ཛ་ལེན་ཡེ་འགྲོ་བ་མིའི་ཙིཏྟ་ལ་ཨ་པ་ར་ཙིཏྟ་ལ་ཛཔ༔ ཨོཾ་ཧྲཱིཿཛཿཧཱུྃ་ཛཾ་བྷ་ལ་རཏྣ་ཨ་མུ་ཀ་ཨ་ཀརྨ་ཡ་ཛཿཛཿནོར་རྫས་ཐམས་ཅད་བདག་ལ་དུང་དུང་བསྡུས་བསྡུས༔ མགོ་ནག་མིའི་སེམས་དཀྲུག་དཀྲུག་སྙིང་འཕྱོ་རུ་ཆུག༔ རྐང་པ་འགྲོ་རུ་ཆུག༔ ཡིད་ཀྱི་རྣམ་པར་ཤེས་པ་རང་དབང་མེད་པར་ཁུག་ལ་ཤོག༔ སརྦ་ལོ་ཀ་ཝཱ་ཤཾ་ཀུ་རུ་ཧཱུྃ༔ ཚེག་བར་གྱི་མཚམས་བདུན་ཡོད༔ ཨྠྀི༔ རྩིབས་བཅུ་དྲུག་གི་གནོད་སྦྱིན་ཕོ་མོ་བཅུ་དྲུག་ཤར་དུ་མ་ཎི་བྷ་དྲ༔ དེའི་མཆན་ཙནྡྲ་ཀཱནྟེ་ལྟ་བུའི་ཕོ་མོ་སྤེལ་མ་ཡིན། ལར་དབུས་ཀྱི་ས་བོན་སྐུ་འདྲའི་མགོ་ངོས་ལ་དབུ་སྟོན། གཞན་སྔགས་འཁོར་ཐམས་ཅད་སྔགས་མགོ་ས་བོན་གྱི་མདུན་སྐུ་འདྲའི་འདོམས་བར་ནས་བཟུང་དགོས། སྔགས་རིང་སྒོམ་ལུགས་ནི་ཕྱག་གཡས་ཀྱི་དང་པོ་ལ། ཨོཾ་ཧྲཱིཿཛཾ་བྷ་ལ་ཛ་ལེནྡྲ་ཡེ། བར་མ་ལ། འགྲོ་བ་མིའི་ཙིཏྟ་ལ་ཨ་པར་ཙིཏྟ་ཛ༔ ཐ་མ་ལ། ཨོཾ་ཧྲཱིཿཛཿཧཱུྃ་ཛཾ་བྷ་ལ་རཏྣ་ཨ་མུ་ཀ་ཨ་ཀརྨ་ཡ་ཛཿཛཿདེ་གསུམ་སྔགས་མགོ་སོར་རྩེ་ནས་བཟུང་།
གཡོན་གསུམ་སྔགས་མགོ་དཔུང་པ་ནས་བཟུང་། གཡོན་དང་པོ་ལ། ནོར་རྫས་ཐམས་ཅད་བདག་ལ་དུང་དུང་བསྡུས་བསྡུས། བར་པ་ལ། མགོ་ནག་མིའི་སེམས་དཀྲུག་དཀྲུག །སྙིང་འཕྱོ་རུ་ཆུག །ཐ་མ་ལ་རྐང་པ་འགྲོ་རུ་ཆུག །ཞབས་གཡས་ནང་མ་ལ། ཡིད་ཀྱི་རྣམ་པར་ཤེས་པ་རང་དབང་མེད་པར་ཁུག་ལ་ཤོག །སོར་རྩེ་ནས་མགོ་བཟུང། གཡོན་ནང་མ་ལ། སརྦ་ལོ་ཀ་ཝཱ་ཤཾ་ཀུ་རུ་ཧཱུྃ། པུས་མོ་ངོས་ནས་མགོ་བཟུང་སྒྲི། ཤིན་ཏུ་རྒྱ༔ ཤིན་ཏུ་རྒྱ༔ ཤིན་ཏུ་རྒྱ༔ ཁ་ཐཾ༔ རྒྱ་རྒྱ་རྒྱ།