ཛཾ་དམར་རྒྱུན་ཁྱེར།
ཛཾ་དམར་རྒྱུན་ཁྱེར་བཞུགས་སོ།
མགོན་པོ་ཛཾ་བྷ་ལ་དམར་པོའི་གཞུང་ལས། བསྙེན་པ་ཅི་རིགས་བྱ། རབ་སྟོང་། འབྲིང་ལྔ་བརྒྱ། ཐ་མ་སུམ་བརྒྱ་ཆག་མི་རུང་། ཐོ་རངས་ཀྱི་ཆའམ་མཚན་མོའི་ཆ་ལ་བཟླ་ཞིང་། གོང་གི་དམིགས་པ་ཡང་ཡང་བསྒོམ། ནམ་ལངས་པ་དང་ཆུ་སྦྱིན་ལ་གཏོར་མ་བཏང་། རྒྱུན་དུ་བཟླས་པས་འགྲུབ་སྟེ། སྔོན་དུ་བསྙེན་པ་ཞག་བདུན་བྱས། དེ་ནས་རྒྱུན་དུ་བཟླས་པ་བྱས་ན་ལེགས། ཞེས་གསུངས་པས། ནུབ་བསྙེན་པ་དང་གཏོར་བསྔོས་གྲལ་གཏོར་མ་བསྔོ་བ་དང་། ནངས་སྔ་ཆུ་སྦྱིན་པ་གསུམ་དམ་ཚིག་ཡིན་པས་མ་ཆག་པར་གལ་ཆེ། དེ་ཡང་བསྙེན་པ་དེ་ཙམ་མ་ཆག་པར་མ་བྱུང་ན་ཆག་ཐེབས་བྱ། དེའང་མ་ལྕོགས་ན་སྟོང་མན་ཆད་ནས་ཚར་བདུན་ཡན་ནུབ་གང་ཐོན། ཚར་བདུན་སོགས་མ་ཐོན་ན། རང་ཉིད་ཡི་དམ་མམ། ཛཾ་
དམར་བྱེ་བ་ཕྲག་བརྒྱ་དུས་གཅིག་ལ་གསལ་བཏབ་ལ་སྔགས་ཅུང་ཟད་བཟླས་པས་ཀྱང་དམ་ཚིག་དང་མི་འགལ་བར་འགྱུར་རོ། །དམིགས་པ་ནི་རྩ་བའི་དམིགས་པ་ཉིད་ཡིན་ནོ། །རྒྱུན་ཁྱེར་གཏོར་ཆོག་མང་པོ་མ་ལྕོགས་ན་རྩ་སྔགས་ལ་བ་ལིཾ་ཏ་ཁཱ་ཧི་བཏགས་པས་ཀྱང་དམ་ཚིག་མི་འགལ་བ་ཙམ་འོང་། དེ་བས་རྒྱུས་ཙམ་བྱེད་ན། གཞུང་གི་བསྟོད་པ་དེ་བརྒྱུད་ཚིག་བྱིན་རླབས་ཆེ་བས་དེ་གཏོར་ཆོག་ཚིག་བསྒྱུར་ལ་འདོན། མངོན་རྟོགས་སྐད་ཅིག་ལ་གསལ་བཏབ་པས་ཆོག །ངག་ཏུ་བརྗོད་མི་དགོས། ནུབ་བསྙེན་པ་དུས་ཀྱང་མངོན་རྟོགས་སྐད་ཅིག་ལ་ཡིད་ཀྱིས་གསལ་བཏབ་ལ་བསྙེན། ངག་ཏུ་འདོན་མི་དགོས་པ་ཡིན། མཐར་རང་ལ་བསྟིམ། ཨོཾ་ཨཱ༔ཧཱུྃ་གིས་བྱིན་གྱིས་བརླབས། བདེ་གཤེགས་ཀུན་གྱི་གསུང་ལས་ལེགས་
སྤྲུལ་ཞིང་། །ཐུགས་རྗེ་ཆགས་པས་སྐུ་མདོག་དམར་པོར་བཞུགས། །དབང་གི་ཕྲིན་ལས་རྫོགས་མཛད་ཛཾ་བྷ་ལ། །མ་ལུས་འགྲོ་བའི་རེ་སྐོང་འདིར་གཤེགས་བཞུགས༔ ཕུན་སུམ་ཚོགས་པའི་གཟུགས་སྒྲ་དྲི་རོ་རེག༔ མང་ཞིང་རྒྱ་ཆེ་བདུད་རྩིའི་མཆོད་གཏོར་བཞེས༔ གཡས་ཞལ་དཀར་བས་ལྷ་རྣམས་དབང་དུ་སྡུད༔ གཡོན་ཞལ་སྔོ་བས་ཀླུ་རྣམས་དབང་དུ་སྡུད༔ རྩ་ཞལ་དམར་བས་མི་རྣམས་དབང་དུ་སྡུད༔ སྲིད་གསུམ་དབང་དུ་སྡུད་པའི་ཕྲིན་ལས་མཛོད༔ ཞལ་གསུམ་ཕྱག་དྲུག་ཞབས་བཞིས་ནོར་སྐྱུགས་མནན༔ འགྲོ་བའི་རེ་སྐོང་ཡིད་བཞིན་རིན་པོ་ཆེ༔ ཁམས་གསུམ་འགུགས་པར་བྱེད་པའི་ལྕགགས་ཀྱུ་གཉིས༔ གཡས་གཉིས་དང་པོ་བར་པས་བསྣམས་པར་བྱེད༔ འཕགས་པ་སྨུག་འཛིན་ཡབ་ཡུམ་ཐུགས་དམ་བསྐང་༔ རིན་ཆེན་ཐོད་པ་ཞགས་པ་གཡོན་གཉིས་ན༔ ཐ་གཉིས་ནེའུ་ལེ་བཙིར་བས་རིན་ཆེན་འབེབས༔ རྣམ་མང་རིན་ཆེན་ནོར་གྱི་ཆར་པ་ཕོབ༔ མ་ལུས་འགྲོ་བའི་རེ་སྐོང་ཡབ་དང་ཡུམ༔ ནོར་སྐྱུགས་ཕོ་མོར་བཅས་ལ་གསོལ་ཞིང་མཆོད༔ སྐུ་ལ་རིན་ཆེན་དུ་མས་རྣམ་པར་བརྒྱན༔ ཀླུ་ཆེན་བརྒྱད་དང་ལྷ་ཡི་ན་བཟའ་
བཀླུབས༔ སྒེག་པའི་ཉམས་ལྡན་འགྲོ་བ་ཀུན་ཡིད་འགུགས༔ མགོན་པོ་ཛཾ་བྷ་ལ་ལ་ཕྱག་འཚལ་བསྟོད༔ བདག་ལ་ལོངས་སྤྱོད་ནོར་ཆེན་དངོས་གྲུབ་སྩོལ༔ ཨོཾ་ཛཾ་བྷ་ལ་ཛ་ལེནྡྲ་ཡེ་དྷ་ན་མེ་དྷི་གྷིསྭཱ་ཧཱ༔ བ་ལི་ཏ་ཁ་ཁ་ཁཱ་ཧི་ཁཱ་ཧི༔ ལན་གསུམ། བཛྲ་མུཿ ཞེས་པས་རང་གི་སྙིང་གར་བསྡུའོ༔ དེ་ལྟར་ཤོ་ལོ་ཀ་ཕྱེད་དྲུག་གི་ལས་བྱང་བསྐང་བ་གསོལ་ཁ་ཚང་། བརྩམས་པ་དང་མི་འདྲ་རྒྱུད་ཚིག་བྱིན་རླབས་ཆེ་སྟེ་བསྟོད་པའི་ཕྲེང་སྔགས་ཀྱང་ཡིན་པའོ། །ནངས་སྔ་ཆུ་སྦྱིན་ནི། ཆུ་བླུགས་པ་སོགས་མ་ཐོན་ཀྱང་དོ་དགོང་ནས་ཟངས་ཐེབ་ནང་དུ་ཡོན་ཆབ་གཅིག་བཤམས་ལ་བྲན་བཞག་ནས། ནངས་སྔ་ཆུ་ཕུལ་བ་གསོལ་བར་བསྒོམས་པས་ཆོག དེར་སྐད་ཅིག་གིས་ཛཾ་དམར་ཡབ་རྐྱང་བསྐྱེད་ནས་ཡེ་ཤེས་སྤྱན་འདྲེན་སོགས་མི་དགོས༔ དམ་ཡེ་དབྱེར་མེད་ལ་ཡུམ་མེད་པ། ཐུགས་ཀར་རཾ་ལས་མེ་འབར་བས་སྐོམ་པ་ལ་ཆུ་ཕུལ་བས་མཉེས་ནས་ཞལ་བདུན་ནས་རིན་པོ་ཆེ་སྐྱུགས་པ་ཡིད་ཀྱིས་བསྒོམ་ཞིང་སྔགས་བརྒྱ་རྩའམ་བདུན་ལས་མི་ཉུང་བ་བརྗོད་ནས། ཡིད་བཞིན་རིན་ཆེན་གཏེར་འདི་བསྒྲུབ་པ་དང་༔ མ་ལུས་འགྲོ་བའི་དབུལ་བ་བསལ་བའི་ཕྱིར༔ ནོར་ལྷ་ཀུན་གྱི་ནང་ནས་ཛཾ་བྷ་ལ༔ དམར་པོ་གསུང་གི་ལྷ་ལ་ཕྱག་འཚལ་བསྟོད༔ བདག་ལ་ལོངས་སྤྱོད་ནོར་ཆེན་དངོས་གྲུབ་སྩོལ༔ ཆུ་དེ་བྱང་ཆུབ་སེམས་ཀྱི་ངོ་བོ་དམར་ལྟེམ་མེ་
བ་དངོས་གྲུབ་བླངས་པར་བསྒོམས་ལ་སྲིན་ལག་གིས་ལྕེ་ལ་བཞག །དེ་མ་ལྕོགས་ན་བཞག་པའི་ཚུལ་བྱ། ཆུ་ལ་སྲིན་མཛུབ་སྦྱར་བ་ལྕེ་ལ་བཞག་ཚུལ་བྱས་ལ་དངོས་གྲུབ་ཐོབ་པར་བསམས་ལ། འདི་ཙམ་མ་ཆག་པ་གལ་ཆེ་ཞིང་། གལ་ཏེ་རྣམ་གཡེང་ཆེ་བས་ཆག་ཤོར་ན། དེ་དམ་ཚིག་གསོ་ཐབས་ནི། ཚེས་བརྒྱད་དང་། བཅོ་ལྔ། གནམ་གང་དང་མར་ངོའི་ཚེས་བརྒྱད་དམ་ཉི་ཤུ་གསུམ་ཉིན་ཆག་ཐེབས་ཀྱི་གཏོར་མ་ཆུ་གཏོར་བཏང་། དེ་ནུབ་ཆག་ཐེབས་ཀྱི་བསྙེན་པ། །གཏོར་བསྔོས་ཆག་ཐེབས་རྣམས་བྱའོ། །དུས་དེ་རྣམས་ནོར་ལྷ་རྒྱུ་བའི་དུས་ཁྱད་པར་ཅན་ཡིན་པ་དང་། འབུམ་འགྱུར་གྱི་དུས་ཀྱང་ཡིན་པས་ཆག་ཉམས་སོར་ཆུད་པར་འགྱུར་རོ། །ཞེས་པ་སློབ་བུ་པདྨ་ཡེ་ཤེས་ཀྱིས་བསྐུལ་བ་ལ་བརྟེན་ནས་ཤིང་སྤྲུལ་བདུད་རྩི་འཁྱིལ་བའི་ལོར་མེ་ཏོག་སེར་པོ་རྒྱས་པའི་ཕྲིན་ལས་འགྲུབ་པའི་ཟླ་བ་དམར་པོའི་ཕྱོགས་ཀྱི་ཚེས་བཅུའི་ཉི་དྲོས་རྒྱས་པའི་ཕྲིན་ལས་དབུ་བཙུགས་པར་ཤིས་པའི་དུས་ལ་བྲིས་པ་ལ་ཉེས་འགལ་མཆིས་ན་ལྷ་ལ་བཤགས་ཤིང་དགེ་བས་སེམས་ཅན་དཔག་ཏུ་མེད་པ་བདེ་སྐྱིད་ལོངས་སྤྱོད་ཕུན་སུམ་ཚོགས་པའི་རྒྱུ་རུ་གྱུར་ཅིག །ཁྱད་པར་དུ་དམ་པའི་ཆོས་སྒྲུབ་པ་རྣམས་ཀྱི་མཐུན་རྐྱེན་ཕུན་སུམ་ཚོགས་པའི་ཆེད་དུ། རཱ་ག་ཨ་སྱས་བྲིས་པ་མངྒ་ལཾ། །