ཡོན་ཏན་མཁན་པོ་ཕྲིན་ལས་འགྲོ་དོན་ཆུང་བ་རྒྱས་པར་བྱེད་པའི་མན་ངག
ཡོན་ཏན་མཁན་པོ་ཕྲིན་ལས་འགྲོ་དོན་ཆུང་བ་རྒྱས་པར་བྱེད་པའི་མན་ངག་བཀའ་རྒྱ་ཅན་གཞན་ལ་སྤེལ་བའི་སྲོལ་མེད་དོ།།
ན་མོ་ཀརྨ་དེ་ཝ་པུཤྲཱི་ཡེ། མགོན་པོ་ཛཾ་བྷ་ལ་ལ་ཕྱག་འཚལ་ལོ། །ཡོན་ཏན་མཁན་པོ་ཕྲིན་ལས་འགྲོ་དོན་རྣམས། །ཆུང་བར་འགྱུར་ན་བསྙེན་སྒྲུབ་མཆོད་གཏོར་བརྩོན། །རང་ཉིད་ཛཾ་ལྷ་དམར་པོ་ཞལ་གཅིག་པ། །ཕྱག་གཉིས་གཡས་པས་ཐོད་ཁྲག་གཡོན་ནེའུ་ལེ། །དར་དང་རིན་ཆེན་རྒྱན་ལྡན་འདོར་ཐབས་བཞེངས། །ཐུགས་ཀར་ཡི་གེ་ཛཾ་ཡིག་མཚན་པའོ། །དེ་ཡི་ཞབས་འོག་ཨ་པར་ཙིཏྟ་སྔོ། །དར་སྔོན་བེར་གྱོན་ལྕགས་ཀྱུ་ཞགས་པ་ཐོགས། །ཞབས་གཉིས་འདོར་ཐབས་ཐུགས་ཀར་ཧྲཱིཿཡིས་མཚན། །དེ་ཡི་ཞབས་འོག་ཐེའུ་རང་ལས་མཁན་གསུམ། །སྔོན་པོ་གཅེར་
བུ་ཨ་ཙ་ར་ཡི་གཟུགས། །མཚན་མ་གྱེན་བསྒྲེང་རྒྱུག་ཅིང་འཕྱོང་བའི་ཚུལ། །གསུམ་ཀའི་ཐུགས་ཀར་ཡི་གེ་ཏྲི་ཡིག་མཚན། །རང་ཉིད་ཛཾ་ལྷས་ཨ་པར་ཙིཏྟ་མནན། །ཙིཏྟས་འོག་གི་ཐེའུ་རང་སྤུན་གསུམ་མནན། །གཅིག་གིས་གཅིག་གཟིར་འོག་མས་མ་བཟོད་ནས། །རང་འདྲའི་ལས་མཁན་ཡུལ་ཕྱོགས་ཁྱབ་པར་འཕྲོས། །ཡོན་ཏན་མཁན་པོ་སུ་ལ་མཁོ་ཚད་ཀུན། །ལྕགས་ཀྱུས་སྙིང་བཟུང་ཞགས་པས་མགུལ་ནས་བཅིངས། །རང་དབང་མེད་པར་རང་གི་མདུན་དུ་ཁྲིད། །གུས་ཤིང་འདུད་ནས་གསོལ་བ་འདེབས་པར་བསྒོམ། །བསྙེན་པ་ཅུང་ཟད་བཟླ། །
བདག་མདུན་རང་རང་ཐུགས་ཀར་རང་རང་སྔགས། །གཡས་བསྐོར་དྲག་ཏུ་འཁོར་བར་བསྒོམ་པ་དང་། །བདག་ལས་འོད་འཕྲོས་མདུན་བསྐྱེད་ལྷ་རྣམས་བསྐུལ། །གོང་མས་ལྟའོག་མ་གཟིར་བས་སྤྲུལ་པ་འགྱེད། །ཡོན་ཏན་མཁན་པོ་སུ་ལ་མཁོ་ཚད་ཀུན། །ལྕགས་ཀྱུས་སྙིང་བཟུང་ཞགས་པས་མགུལ་ནས་བཅིངས། །རང་དབང་མེད་པར་རང་གི་མདུན་དུ་ཁྲིད། །གུས་ཤིང་འདུད་ནས་གསོལ་བ་འདེབས་པར་བསྒོམ། །བསྙེན་པ་དུས་བཞི་ལ་སུམ་བརྒྱ་རེ་ཞལ་ཤེས་བཞིན་བཟླ། དེ་ནས་མཐུན་གཏོར་ཟུར་གསུམ་ཤ་ཁྲག་གིས་བརྒྱན་པ་ཅིག །འབྲིང་མར་དང་ཐུད་དང་ཐ་མ་མཐེབ་སྐྱུ་བཞག་ལ་བྲན། ཨོཾ་ཨཱཿཧཱུྃ་ཧ་ཧོ༔ཧི༔ ཞེས་བདུད་རྩིས་རང་བཞིན་ཟས་སྣ་ཚོགས་སུ་བསྒོམས་ལ། ཨོཾ་ཛཾ་བྷ་ལ་ཛ་ལེནྡྲ་ཡེ་ཧྲཱིཿ ཨ་པར་ཙིཏྟ་ཛཛ༔ ཏྲིའུ་ཏྲིའུ་ནཱ་ག་པ་ཏི་ཏྲིའུ། ཨི་དཾ་བ་ལིཾ་ཏ་ཁ་ཁ་ཁཱ་ཧི། ལན་གསུམ་བརྗོད། ཧཱུྃ། དཔལ་ལྡན་མགོན་པོ་ཛཾ་བྷ་ལ༔ མྱུར་དུ་དྲག་ཏུ་བསྐུལ་བའི་ཚེ༔ སྐུ་མདོག་དམར་ལ་འོད་ཟེར་འཕྲོ༔ ཕྱག་གཡས་རིན་ཆེན་ཐོད་ཁྲག་བསྣམས༔ གཡོན་པས་གཏེར་གྱི་ནེའུ་ལེ་བཙིར༔ ཞབས་གཉིས་ཨ་པར་ཙིཏྟ་གཟིར༔ དར་དང་རིན་ཆེན་རྒྱན་ཆ་ཁྲོལ༔ འདིར་གཤེགས་བརྒྱན་པའི་གཏོར་མ་
བཞེས༔ ཐུགས་དམ་དམ་བཅའི་དུས་ལ་བབ༔ དགོས་འདོད་ལོངས་སྤྱོད་ཆར་ལྟར་ཕོབ༔ བཅོལ་བའི་ཕྲིན་ལས་དུས་ལ་བབ༔ གནོད་སྦྱིན་གཞན་གྱིས་མི་ཐུབ་པ༔ སྐུ་མདོག་སྔོན་པོ་བརྗིད་པའི་ཞལ༔ སྐུ་ལ་དར་སྔོན་བེར་ཆེན་གསོལ༔ དབུ་སྐྲ་རལ་པའི་ཐོར་ཚུགས་བཅིངས༔ རིན་ཆེན་རྒྱན་ཆ་ཀུན་གྱིས་བརྒྱན༔ ཞབས་གཉིས་འདོར་ཐབས་ལས་མཁན་གཟིར༔ ཕྱག་གཉིས་ལྕགས་ཀྱུ་ཞགས་པ་བསྣམས༔ འདིར་གཤེགས་བརྒྱན་པའི་གཏོར་མ་བཞེས༔ སྟོབས་དང་འབྱོར་བའི་དངོས་གྲུབ་སྩོལ༔ ཞབས་འོག་གནོད་སྦྱིན་ཐེའུ་རང་གསུམ༔ མདོག་སྔོན་ཨ་ཙ་ར་ཡི་གཟུགས༔ དབུ་སྐྲ་ཐོར་ཅོག་ཨག་ཚོམ་རིང་༔ གཅེར་བུ་ལིང་ག་གྱེན་དུ་བསྒྲེང་༔ ཕྱག་ན་ལྕགས་ཀྱུ་ཞགས་པ་ཐོགས༔ སྲིད་པའི་རླུང་བཞིན་ཀུན་ཏུ་རྒྱུ༔ འདིར་གཤེགས་བརྒྱན་པའི་གཏོར་མ་བཞེས༔ བདག་ཅག་རྣལ་འབྱོར་སྒྲུབ་པ་པོ༔ ཕྲིན་ལས་འགྲོ་དོན་རྒྱས་པར་མཛོད༔ ལས་བྱེད་མཁའ་འགྲོ་སྐུ་མདོག་དམར༔ གཅེར་བུ་མེ་ཏོག་དམར་པོ་དང་༔ དར་དམར་རིན་ཆེན་རྒྱན་གྱི་མཛེས༔ ཕྱག་ན་ལྕགས་ཀྱུ་ཞགས་པ་འཛིན༔ ཀུ་རུ་ཀུལླེའི་སྤྲུལ་པ་
སྟེ༔ བསེ་ལམ་མཁའ་འགྲོའི་ངོ་བོ་ཉིད༔ བྱེ་བ་དུང་ཕྱུར་འཇིག་རྟེན་གང་༔ འདིར་གཤེགས་བརྒྱན་པའི་གཏོར་མ་བཞེས༔ སྣང་སྲིད་ཐམས་ཅད་དབང་དུ་སྡུད༔ བཅོལ་བའི་ཕྲིན་ལས་འགྲུབ་པར་མཛོད། ༀ་ཛཾ་བྷ་ལ་ཛ་ལེནྡྲ་ཡེ་ཧྲཱིཿ ཨ་པ་ར་ཙིཏྟ་ཧཱུྃ་ཧཱུྃ་ཛ༔ཛ༔ ཏྲིའུ་ཏྲིའུ་ནཱ་ག་པ་ཏི་ཏྲིའུ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི། ལན་གསུམ་བརྗོད། བསྙེན་པ་བརྒྱ་སྟོང་ཁྲི་སོགས་གང་མོས་བཟླ༔ ཡོན་ཏན་འགྲིམ་སྒོ་ཅི་ཡང་མེད་པའི་མིས། །འདི་ཉིད་བསྒྲུབས་ནས་ཟླ་ཤས་ཙམ་སོང་ནས། །གདུལ་བྱའི་སྒོ་འབྱེད་དེ་ནས་ཇེ་རྒྱས་འགྲིམ། །ཞག་གཅིག་ཙམ་ཡང་གདུལ་བྱས་མི་ཁོམ་པ། །ཟླ་མཚམས་ཙམ་ཡང་འདུག་ཏུ་མི་བཅུག་པ། །དེ་འདྲ་མང་པོ་བྱུང་བ་མྱོང་བས་འགྲུབ། །གཡེང་བ་ཆེ་དྲགས་ཐུགས་དམ་མི་འཕེལ་ན། །འཁོར་ལོ་བཀྲོལ་ལ་སྔགས་ཀྱི་བཟླས་འཕྲོ་བཅད། །དེས་ཀྱང་མི་ཕན་དེ་མུས་འབྱམས་ཉན་གདའ། །དེ་ཚེ་ཞེ་བཅད་གྱིས་ལ་བསྒྲུབ་ལ་འབུངས། །གནད་ཀྱི་ཞལ་ཤེས་གཉིས་ནི་ཐུགས་ལ་གབ། །འདི་བྲིས་ཉེས་ལྟུང་ལྟུང་བཤགས་ལྷ་ལ་བཤགས། །འདི་ཕྱིར་གང་དུའང་སྒྲིབ་པར་མ་གྱུར་ཅིག །འདི་བྲིས་དགེ་བའི་རྩ་བ་མཆིས་སྲིད་ན། །བླ་མ་མཚན་ལྡན་ཁྱི་ལྟར་མི་འཁྱམས་པ། །འགྲོ་བ་ཀུན་གྱིས་གཙུག་ཏུ་བཀུར་བར་ཤོག །རྫུན་ཟོབ་ཁྲམ་གྱིས་མི་མགོ་བསྐོར་བའི་མིས། །འདི་ཉིད་བསྒྲུབས་ན་འདི་ཡི་གཏེར་སྲུང་ནི། །གཉན་ཆེན་ཐང་ལྷ་འཁོར་དང་བཅས་པ་ཡིས། །དེ་ཡི་
བསམ་པ་བསྒྲུབ་ཏུ་མ་བཅུག་ཅིག །བཀའ་འདིའི་སྲུང་མ་གཏེར་སྲུང་ཁྱོད་ཀྱིས་མཛོད། །ད་ལམ་སྙིང་གི་སློབ་བུ་ཁྱོད་ཉིད་ལ། །དཔེ་ཆ་མང་པོ་བྲིས་པའི་ཚག་གླར་སྦྱིན། །སྙིང་གི་སློབ་མ་རེ་ཙམ་མ་གཏོགས་པ། །མང་དུ་སྤེལ་བས་གསང་བའི་དམ་ཚིག་ཉམས། །གདམས་པ་འཆལ་བས་ཁ་འབྱང་མཁའ་འགྲོ་འཁྲུག །ལོག་ཚོགས་མང་པོས་གཞི་འགྱུར་ངན་སོང་རྒྱུ། །དེ་བས་གསང་བའི་དམ་ཚིག་ཐུབ་པར་སྲུངས། །དེ་སྐད་རཱ་ག་ཨ་སྱས་འཕྲལ་དུ་བྲིས། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།