ཛཾ་དམར་གཏོར་ཆོག་ཉུང་བསྡུས།
ཛཾ་དམར་གཏོར་ཆོག་ཉུང་བསྡུས་ནི། ན་མོ། དཀོན་མཆོག་གསུམ་དང་ཛཾ་བྷ་ལ། །བྱང་ཆུབ་བར་དུ་སྐྱབས་སུ་མཆི། །འགྲོ་བའི་དབུལ་ཕོངས་བསལ་བའི་ཕྱིར། །བདག་གི་ཛཾ་ལྷ་བསྒྲུབ་པར་བྱ། །ཨོཾ་སྭ་བྷ་ཝ་སོགས། སྟོང་པའི་ངང་ལས་རང་མདུན་དུ། །པད་ཉི་ཟླ་སྟེང་ཛ་ཡིག་ལས། །འོད་འཕྲོས་ཡོངས་སུ་གྱུར་པ་ལས། །ཛཾ་ལྷ་དམར་པོ་སྒེག་པའི་ཉམས། །གཡས་དཀར་གཡོན་སྔོ་དབུས་ཞལ་དམར། །ཕྱག་དྲུག་དང་པོ་རིན་ཆེན་ཐོད། །བར་པས་ལྕགས་ཀྱུ་ཞགས་པ་དང་། །མཐའ་གཉིས་གཏེར་གྱི་ནེའུ་ལེ་བསྣམས། །ཀླུ་བརྒྱད་དར་དང་ནོར་བུའི་བརྒྱན། །ཞབས་བཞི་གནོད་སྦྱིན་ནོར་སྐྱུགས་མནན། །དེ་ཡི་ཐུགས་ཀར་ཧཱི༔ཡིག་ལས། །ཀུ་རུ་ཀུལླེ་སྐུ་མདོག་དམར། །ཞལ་གཅིག་ཕྱག་གཉིས་གར་སྟབས་བཞུགས། །ཕྱག་བཞི་དང་པོའི་མདའ་གཞུ་འགེངས། །འོག་མས་ལྕགས་ཀྱུ་ཞགས་པ་བསྣམས། །ཐུགས་ལས་ལྷ་མོ་གྲངས་མེད་འཕྲོས། །ཀུན་གྱི་གནས་གསུམ་འབྲུ་གསུམ་དང་། །ཐུགས་སྲོག་ཛཾ་ལས་འོད་འཕྲོས་པས། །རང་བཞིན་གནས་ནས་སྤྱན་དྲངས་སོ། །ཧཱུྃ། རང་བཞིན་དག་པའི་གཞལ་ཡས་ནས།
བདེ་གཤེགས་ཀུན་གྱི་གསུང་སྤྲུལ་ཏེ། །བསོད་ནམས་ལོངས་སྤྱོད་ཀུན་གྱི་བདག །སྨུག་འཛིན་དམར་པོ་གཤེགས་སུ་གསོལ། །ཨོ་རྒྱན་རང་བྱུང་གནས་མཆོག་ནས། །དུས་གསུམ་སངས་རྒྱས་བསྐྱེད་པའི་ཡུམ། །དབང་གི་རང་བཞིན་དངོས་གྲུབ་ཅན། །ཀུ་རུ་ཀུལླེ་གཤེགས་སུ་གསོལ། །ལྕང་ལོ་ཅན་གྱི་གནས་མཆོག་ནས། །རྣམ་ཐོས་སྲས་ཀྱི་དཀོར་སྲུང་སྟེ། །རིན་ཆེན་ཆར་རྒྱུན་འབེབས་མཛད་པ། །ནོར་སྐྱུགས་ཡབ་ཡུམ་གཤེགས་སུ་གསོལ། །ཛཾ་ལྷ་ཡབ་ཡུམ་འཁོར་དང་བཅས། །འགྲོ་བའི་དོན་དུ་བྱོན་པ་ལེགས། །རབ་ཏུ་གུས་པར་ཕྱག་འཚལ་ཞིང་། །སྣ་ཚོགས་པདྨ་ཉི་ཟླའི་སྟེང་། །དགྱེས་ཤིང་བརྟན་པར་བཞུགས་སུ་གསོལ། །ཨོཾ་ཛཾ་བྷ་ལ་ཡཀྵ་ཛཿཧཱུྃ་བཾ་ཧོཿ ཧཱུྃ། ཛཾ་ལྷ་ཡབ་ཡུམ་འཁོར་བཅས་ལ། །དངོས་འབྱོར་ཡིད་ལས་སྤྲུལ་པ་ཡི། །ཉེར་སྤྱོད་བདུན་དང་འདོད་ཡོན་ལྔ། །བཀྲ་ཤིས་རྟགས་བརྒྱད་རིན་ཆེན་བདུན། །གསང་བའི་རིག་མ་བཅུ་དྲུག་དང་།། ཛ་གད་ཚྭ་ས་ཞུན་མར་དང་། །རིན་ཆེན་འབྲུ་སྨན་དར་ཟབ་བཅས། །དཀར་དམར་རྒྱན་ལྡན་བ་ལིཾ་ཏ། །གུས་པས་འབུལ་གྱིས་བཞེས་སུ་གསོལ། །དགྱེས་པའི་ཚུལ་གྱིས་
བཞེས་ནས་ཀྱང་། །བསོད་ནམས་ནོར་གྱི་དངོས་གྲུབ་སྩོལ། །འཛམ་གླིང་གཏེར་གྱི་དངོས་གྲུབ་སྩོལ། །རྨ་གཡང་ཟས་ཀྱི་དངོས་གྲུབ་སྩོལ། །ལྷབ་ལྷུབ་གོས་ཀྱི་དངོས་གྲུབ་སྩོལ། །བང་མཛོད་འབྲུ་ཡི་དངོས་གྲུབ་སྩོལ། །རྐང་བཞི་ཕྱུགས་ཀྱི་དངོས་གྲུབ་སྩོལ། །སྙན་གྲགས་གདུལ་བྱའི་དངོས་གྲུབ་སྩོལ། །འཛད་མེད་གཏེར་གྱི་༔ དངོས་གྲུབ་སྩོལ། །སྔོན་གྱི་ཐུགས་དམ་མ་གཡེལ་བར། །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ་ལས་རིན་པོ་ཆེའི་སྣོད་དུ་གཏོར་མ་མང་ཞིང་རྒྱ་ཆེ་བའི་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ། ལན་གསུམ་དང་། ཨོཾ་ཛམྦྷ་ལ་ཛ་ལེནྡྲ་ཡེ་དྷ་ན་མེ་དྷི་ཧི༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་འབུལ། ཨརྒྷཾ་སོགས་ཀྱིས་མཆོད། བསྟོད་པ་ནི། བདེ་གཤེགས་ཀུན་གྱི་གསུང་ལས་ལེགས་སྤྲུལ་ཞིང་། །ཐུགས་རྗེས་ཆགས་པས་སྐུ་མདོག་དམར་པོར་བཞུགས། །དབང་གི་ཕྲིན་ལས་རྫོགས་མཛད་ཛམྦྷ་ལ། །མ་ལུས་འགྲོ་བའི་རེ་སྐོང་ཕྱག་འཚལ་བསྟོད། །ཅེས་པ་ཙམ། སྤྲོ་ན་བསྟོད་པ་རྒྱས་པར་བྱ། འཕགས་པ་ཛཾ་ལྷ་ཡབ་ཡུམ་དགོངས་སུ་གསོལ། །བདག་ནི་ཐོག་མེད་དུས་ནས་
ད་ལྟའི་བར། །རྐུ་འཕྲོག་རློམ་སེམས་སེར་སྣ་བགྱིས་པ་སོགས། །དབུལ་ཕོངས་སྦེ་ཏའི་རྒྱུ་བསགས་ཅི་མཆིས་པ། །རབ་ཏུ་གནོང་ཞིང་འགྱོད་པས་མཐོལ་ལོ་བཤགས། །འདི་ཕྱི་སྒྲིབ་པར་མི་འགྱུར་དངོས་གྲུབ་སྩོལ། །ཅེས་ཡི་གེ་བརྒྱ་པ་བཟླ། འདི་བྲིས་ཉེས་བཤགས་དགེ་བ་བྱང་ཆུབ་བསྔོ། །ཞེས་པ་སྤྲུལ་སྐུ་བ་ལྷ་མོས་བཞེད་པ་ལྟར་ཀརྨ་ཨ་རཱ་གས་སྦྱར་བའོ། །མངྒ་ལཾ།། །།