ཛཾ་ལྷ་ལ་དམར་པོའི་རྒྱུན་ཁྱེར་ནོར་བུའི་བང་མཛོད།
ཛཾ་ལྷ་ལ་དམར་པོའི་རྒྱུན་ཁྱེར་ནོར་བུའི་བང་མཛོད་བཞུགས་སོ། །ཨོཾ་ཨཱཿཧཱུྃ་གིས་བྱིན་བརླབས་ནས། བདེ་གཤེགས་ཀུན་གྱི་གསུང་ལས་ལེགས་སྤྲུལ་ཞིང་༔ ཐུགས་རྗེས་ཆགས་པས་སྐུ་མདོག་དམར་པོར་བཞུགས༔ དབང་གི་ཕྲིན་ལས་རྫོགས་མཛད་ཛཾ་བྷ་ལ༔ མ་ལུས་འགྲོ་བའི་རེ་སྐོང་འདིར་གཤེགས་བཞུགས༔ ཕུན་སུམ་ཚོགས་པའི་གཟུགས་སྒྲ་དྲི་རོ་རེག་མང་ཞིང་རྒྱ་ཆེ་བདུད་རྩིའི་མཆོད་གཏོར་བཞེས༔ གཡས་ཞལ་དཀར་བས་ལྷ་རྣམས་དབང་དུ་སྡུས༔ གཡོན་ཞལ་སྔོ་བས་ཀླུ་རྣམས་དབང་དུ་སྡུས༔ རྩ་ཞལ་དམར་བས་མི་རྣམས་དབང་དུ་སྡུས༔ སྲིད་གསུམ་དབང་དུ་སྡུད་པའི་ཕྲིན་ལས་མཛོད༔ ཞལ་གསུམ་ཕྱག་དྲུག་ཞབས་བཞིའི་ནོར་སྐྱུགས་མནན༔ འགྲོ་བའི་རེ་སྐོང་ཡིད་བཞིན་རིན་པོ་ཆེ༔ ཁམས་གསུམ་འགུགས་པར་བྱེད་པའི་ལྕགས་ཀྱུ་གཉིས༔ གཡས་གཉིས་དང་པོ་བར་པས་བསྣམས་པར་བྱེད༔ འཕགས་པ་སྨུག་འཛིན་ཡབ་ཡུམ་ཐུགས་དམ་བསྐང་༔ རིན་ཆེན་ཐོད་པ་ཞགས་པ་གཡས་གཡོན་བསྣམས༔ མཐའ་གཉིས་ནེའུ་ལེ་བཙིར་ཞིང་རིན་ཆེན་འབེབས༔ རྣམ་མང་རིན་ཆེན་ནོར་གྱི་ཆར་པ་ཕོབ༔ མ་ལུས་འགྲོ་བའི་རེ་སྐོང་ཡབ་དང་ཡུམ༔
ནོར་སྐྱགས་ཕོ་མོར་བཅས་ལ་གསོལ་ཞིང་མཆོད༔ སྐུ་ལ་རིན་ཆེན་དུ་མས་རྣམ་པར་བརྒྱན༔ ཀླུ་ཆེན་བརྒྱད་དང་ལྷ་ཡི་ན་བཟས་བཀླུབས༔ སྒེག་པའི་ཉམས་ཅན་འགྲོ་བ་ཀུན་ཡིད་སྡུད༔ མགོན་པོ་ཛཾ་བྷ་ལ་ལ་ཕྱག་འཚལ་བསྟོད༔ བདག་ལ་ལོངས་སྤྱོད་ནོར་གྱི་དངོས་གྲུབ་སྩོལ༔ ཨོཾ་ཛ་བྷ་ལ་ཛ་ལེནྡྲ་ཡེ་དྷ་ན་མེ་དྷི་ཧཱུྃསྭཱ་ཧཱ༔ བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ལན་གསུམ་བརྗོད༔ བཛྲ་མུ༔ ཞེས་རང་གི་སྙིང་ཁར་བསྡུའོ། །དེ་ལྟར་ཤོ་ལོ་ཀ་ཕྱེད་དྲུག་གི་ལས་བྱང་བསྐང་བ་གསོལ་ཁ་ཚང་བ༔ བརྩམས་པ་དང་མི་འདྲ་བྱིན་རླབས་ཆེ་སྟེ༔ བསྟོད་པ་འདི་ཕྲེང་སྔགས་ཀྱང་ཡིན་པས་སོ༔ ཞེས་སློབ་བུ་པདྨ་ཡེ་ཤེས་ཀྱིས་བསྐུལ་པ་ལ་བརྟེན་ནས་ཤིང་སྤྲུལ་བདུད་རྩི་འཁྱིལ་པའི་ལོར་ཨ་རཱ་གས་བྲིས།།