གནམ་ཆོས་ནོར་དབང་གི་སྒྲུབ་ཐབས་ཀྱི་ལྷན་ཐབས་སུ་བསྒྲིགས་པའི་འདོན་ཆ།
གནམ་ཆོས་ནོར་དབང་གི་སྒྲུབ་ཐབས་ཀྱི་ལྷན་ཐབས་སུ་བསྒྲིགས་པའི་འདོན་ཆ་ཞེས་བྱ་བ་བཞུགས་སོ༔ ཧཱུྃ༔ ཡི་གེ་རི་གསེར་ལས་བྱུང་བའི༔ ནོར་དབང་སྐུ་མདོག་ཤིན་ཏུ་དམར༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་ཞལ་དམར་སྐྱས་ལྷ་ཀུན་སྡུད༔ གཡོན་ཞལ་སྨུག་པོས་ཀླུ་ཀུན་སྡུད༔ དབུས་ཞལ་དམར་གསེར་མི་ཀུན་སྡུད༔ དང་པོ་གཉིས་ཀྱིས་ནོར་བུ་ཞུགས༔ བར་མ་གཉིས་ཀྱིས་ལྕགས་ཀྱུ་ནེའུ་ལེ༔ འོག་མ་གཉིས་ཀྱིས་མདའ་དར་དང་༔ ཏང་ཏང་ཏིང་ཏིང་ཕྱག་ན་བསྣམས༔ ཞབས་བཞི་ནེའུ་ལེ་སྟེང་ན་བསྒྲད༔ གཡོན་ན་ཡུམ་མཆོག་དམར་མོ་ནི༔ ཞལ་གཅིག་ཕྱག་གཉིས་ལྕགས་ཀྱུ་དང་༔ གཡོན་པའི་ཕྱག་ན་མེ་ལོང་འཛིན༔ འདིར་གཤེགས་དགྱེས་པའི་གདན་ལ་བཞུགས༔ དམ་རྫས་མཆོད་གཏོར་དགྱེས་པར་བཞེས༔ ཨོཾ་ཨ་བ་སུ་པ་ཤཾ་ཧཱུྃ་ཛ༔ ཨི་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། ཨརྒྷཾ་སོགས། ལྷ་ཡི་དབང་པོ་ཀུ་མེ་ཏ༔ ནོ་མེ་ཞེས་ནི་ལྷ་ཡུལ་གྲགས༔ ཀླུ་ཡུལ་ངར་མ་ནི་ཀ་ཞེས༔ མི་ཡུལ་ད་ཆུང་གྲོད་ཆེན་ཟེར༔ ལྕང་ལོ་བ་ཝ་ཡ་མེད་ཟེར༔ གཟའ་ཡུལ་ང་རྒྱལ་དབང་ཆེན་ཟེར༔ ཡ་མཚན་ཅན་ལ་ཕྱག་འཚལ་བསྟོད༔ ཁྱོད་ལ་
མཆོད་ཅིང་བསྟོད་པའི་མཐུས༔ ཕྱུགས་ནད་གོད་ཁ་ཞི་བ་དང་༔ ནོར་ལ་ལོངས་སྤྱོད་རྒྱས་པར་མཛོད༔ སྣང་སྲིད་དབང་དུ་འདུ་བ་དང་༔ དགྲ་ཇག་ཆོམ་ཀུན་འཆིང་བར་མཛོད༔ མདོར་ན་ཡིད་ལ་གང་འདོད་པ༔ ཡིད་བཞིན་ནོར་བུ་རིན་ཆེན་ལྟར༔ ཅི་བསམ་ཡིད་བཞིན་འགྲུབ་པར་མཛོད༔ ཨོཾ་ཨ་བཱ་སུ་པ་ཤཾ་ཧཱུྃ་ཛ༔ ཞེས་པ་འདི་ནི་ཐུན་མོང་མ་ཡིན་པའི་ཆོས་སྐལ་དུ་བྱུང་ཞིང་༔ སྔོན་ཆད་འཛམ་གླིང་དུ་མ་གྲགས་པའི་ནོར་ལྷ་ཁྱད་པར་ཅན་གནམ་ཆོས་སྙན་བརྒྱུད་ཟབ་མོ་སྤྲུལ་སྐུ་མི་འགྱུར་རྡོ་རྗེའི་གཏེར་མ་སྒྲུབ་གཞུང་ནས་བྱུང་སྟེ༔ སྤྲུལ་སྐུ་ཉིད་ཀྱིས་བཀའ་གནང་བ་ལ་བརྟེན་ནས༔ ཨ་རཱ་གས་བྲིས་པའོ།། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག༔ སརྦ་མངྒ་ལཾ། །