གནོད་སྦྱིན་ཛོ་ཁྲའི་ཟིན་བྲིས།
གནོད་སྦྱིན་ཛོ་ཁྲའི་ཟིན་བྲིས། ན་མོ་ཨརྨ་ཛམྦྷ་ལ་ཡེ། ཛི་ལྷ་ཀུན་འདུས་རླུང་སྒྲུབ་ལག་ལེན་ནི། །ད་ལ་སྤོས་བྱུགས་སྣ་ཚོགས་པདྨའི་སྟེང་། །ཟངས་ལྕགས་གའུ་སྔགས་བྱང་གཡང་ཊི་དང་། །འབྲུ་སྣ་རིན་ཆེན་སྣ་ལྔ་བཅུག་ལ་བཞག །གཏོར་མ་འབྲི་མོག་བྱུགས་པ་ཟུར་གསུམ་ལ། །གཙང་མའི་ཤས་བརྒྱན་མཆོད་པ་སྤྱི་ལྟར་བཤམས། །ཟངས་ཁབ་དར་ཚོན་ལྔ་བཏགས་གོང་རྩར་འཆང་། །སྤོས་དང་སྤུ་ཤེལ་རྩི་སྦྱར་དུད་པ་བཏང་། །རང་ཉིད་ཡི་དམ་ལྷར་གསལ་མདུན་གྱི་གཞིར། །སྣ་ཚོགས་པད་ཉིད་ཇི་ལས་ཁྲོ་བོ་ནི། །ཞལ་གཅིག་གསེར་མདོག་སྤྱན་གསུམ་ཁྲོ་ཞིང་བཞད། །སྐུ་དཀར་མགུལ་དང་ཕྱག་ནི་སྔོན་པོ་སྟེ། །སྨེ་བ་དམར་པོའི་ག་ཤལ་གསུས་ཁྱིམ་ཆེ། །ཕྱག་གཡས་ནམ་མཁའ་མཛོད་ཀྱི་ཕྱག་རྒྱ་མཛད། །གཡོན་པས་ནེའུ་ལེ་འཛིན་ཅིང་འདོར་སྟབས་བཞུགས། །སྒེག་འགྱིང་ནོར་གྱི་དབང་ཕྱུག་ཆེན་པོ་ནི། །གནས་གསུམ་འབྲུ་གསུམ་ཐུགས་ཀའི་འོད་ཟེར་གྱིས། །ཛ་ལྷའི་རིགས་རྣམས་ཐམས་ཅད་སྤྱན་དྲངས་གྱུར། ཧཱུྃ། རབ་འབྱམས་ཞིང་ཁམས་རྒྱ་མཚོ་ཐམས་ཅད་དང་། ལྕང་ལོ་ཅན་གནས་བྱེ་བ་ཕྲག་བརྒྱ་ནས། །ཛ་ལྷའི་རིགས་གྱུར་ཐམས་ཅད་སྤྱན་འདྲེན་ན། །ཐུགས་རྗེ་ཐུགས་དམ་
དབང་གིས་མྱུར་དུ་བྱོན། །ཨོཾ་སརྦ་ཛམྦྷ་ལ་བཛྲ་ས་མ་ཛ་ཛཿ ཛཿཧཱུྃ་བཾ་ཧོཿ དམ་ཡེ་དབྱེར་མེད་དབང་ལྷས་དབང་བསྐུར་ནས། །དབང་རྟགས་རྒྱལ་བ་རིགས་ལྔས་དབུ་བརྒྱན་གྱུར། །ཉེར་སྤྱོད་བདུན་དང་འདོད་ཡོན་རྣམ་པ་ལྔ། །བཀྲ་ཤིས་རྫས་བརྒྱད་རྟགས་བརྒྱད་རྒྱལ་སྲིད་བདུན། །འབྲུ་སྣ་དར་སྣ་རིན་ཆེན་སྣ་ལྔ་དང་། །བདུད་རྩི་གཏོར་མ་དངོས་འབྱོར་ཡིད་སྤྲུལ་མཆོད། །ཨོཾ་སརྦ་ཛམྦྷ་ལ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཧཱུྃ། རྒྱལ་དང་རྒྱལ་བའི་སྲས་པོ་ཐམས་ཅད་ཀྱི། །སྦྱིན་པའི་ཕར་ཕྱིན་རྫོགས་པའི་རང་གཟུགས་ལས། །གཏེར་བདག་ཛ་ལྷ་རྒྱལ་བ་བསྐྱེད་པའི་ཡབ། །རྒྱལ་བ་ཀུན་དངོས་ཁྱོད་ལ་ཕྱག་འཚལ་བསྟོད། །སྐུ་གསུང་ཐུགས་ཡོན་ཕྲིན་ལས་ཛཾ་བྷ་ལ། །གཅིག་ཏུ་བསྡུས་པ་ཁྲོ་བོ་ཛཾ་བྷ་ལ། །སྐུ་མདོག་ཁྲ་བོ་རིགས་རྣམས་ཐམས་ཅད་མཚོན། །གཏེར་བདག་ནམ་མཁའ་མཛོད་ལ་བདག་བསྟོད་དོ། །ཞག་གཅིག་སྒྲུབ་ཀྱང་ཡིད་བཞིན་བསམ་པ་འགྲུབ། །ཞག་བདུན་བསྒྲུབས་ན་དབུལ་ཕོངས་རྒྱུན་གཅོད་པའི། །ཐུགས་རྗེ་མྱུར་མགྱོགས་ཅན་ལ་ཕྱག་འཚལ་བསྟོད། །བདག་ལ་ལོངས་སྤྱོད་རྒྱ་ཆེན་མྱུར་དུ་སྩོལ། །ཛཾ་ལྷའི་
ཐུགས་ཀར་ཉི་སྟེང་ཛི་ཡིག་མཐར། །སྔགས་ཕྲེང་གཡས་སུ་འཁོར་བའི་འོད་ཟེར་གྱིས། །རིན་ཆེན་ཟས་ནོར་ལོངས་སྤྱོད་མཁོ་དགུ་རྣམས། །ཆར་པ་ན་བུན་ཚུལ་དུ་འབེབས་པར་གྱུར། །ཞག་གཅིག་གམ་ནི་ཞག་བདུན་རྩེ་གཅིག་བསྒྲུབ། །ཨོཾ་ཛམྦྷ་ལ་བྷུར་ཀུར་མ་ཧཱ་ས་རད་ན་དེ་བོར་བྱི་བོར་ཀེ་བྱེ་ལོ་ནི་སོ་རྣོ་ཤོག་མུ་གུ་ལུད་སྭཱ་ཧཱ། སྒྲུབ་པ་ཚར་ནས་ཟངས་ཁབ་འཆང་། །གའུ་མཛོད་དུ་སྦས་ལ་འཆང་། །སྒྲུབ་དུས་སམ་ནི་ཞུ་དུས་ལ། །ཚོགས་འཁོར་རཏྣའི་མཎྜལ་ཕུལ། །གསང་སྒྲུབ་འདི་བྱས་དབུལ་གྱུར་ན། །པདྨ་ང་ཡིས་འགྲོ་བ་བསླུས། །མ་འོངས་ཆོས་མཛད་སྐལ་ལྡན་ལ་རྣམས། །དབུལ་ཕོངས་སྡུག་སྲན་མ་བྱེད་པ། །སྒྲུབ་པ་འདི་ལ་ནན་ཏན་གྱིས། །དེ་སྐད་ཨོ་རྒྱན་རྗེ་ཡིས་གསུངས། །གཏེར་གཞུང་རྒྱུད་ཚིག་མི་གསལ་བ། །འདིར་ནི་ཟིན་བྲིས་བལྟས་ཆོག་བཀོད། །ཉེས་འགལ་སྲུང་མ་རྣམས་ལ་བཤགས། །དགེ་བས་སྦྱིན་ཕར་རྫོགས་པར་ཤོག །དེ་སྐད་རཱ་ག་ཨ་སྱས་སོ། །མངྒ་ལཾ།། །།