རྣམ་སྲས་དང་མགོན་དཀར་ཡིད་བཞིན་ནོར་བུ་གནོད་སྦྱིན་ཤན་དམར་བཅས།
རྣམ་སྲས་ནི། བཻ། བྱང་ཕྱོགས་ལྕང་ལོ་ཅན་གྱི་ཁང་བཟང་ནས། །སངས་རྒྱས་སྟོང་གི་སྦྱིན་བདག་དབང་བསྐུར་བས། །ས་བརྒྱད་སེམས་དཔའ་མགོན་པོ་རྣམ་ཐོས་སྲས། །དབང་གི་ལས་མཛད་རྒྱལ་ཆེན་མདུང་དམར་ཅན། །དྲག་པོའི་སྐུར་སྟོན་རྒྱལ་ཆེན་རྟ་སྔོན་ཅན། །ནང་བློན་སྲས་གསུམ་ཕོ་ཉ་བྲན་གྱི་འཁོར། །ལས་མཛད་སྤྲུལ་པ་རྟ་བདག་བརྒྱད་ཀྱི་ཚོགས། །ཀླུ་བརྒྱད་ཡུལ་སྐྱོང་འབྲོག་གནས་ཡུལ་འཁོར་སྐྱོང་། །གནོད་སྦྱིན་ཞིང་གི་རྡུལ་མཉམ་མ་ལུས་ཀུན། །འདིར་བྱོན་སྨན་གཏོར་རཀྟ་བདུད་རྩིའི་མཚོ། །དཀོར་ནོར་རིན་ཆེན་ལོངས་སྤྱོད་དགྱེས་དགུར་འབུལ། །རྣལ་འབྱོར་གཞི་བྱེས་གར་སོང་ལོངས་སྤྱོད་སྤེལ། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །སྟོང་ཁམས་དབང་སྡུད་གཞན་སྣང་ཟིལ་གྱིས་གནོན། །ཕྱི་ནང་སྣོད་བཅུད་དཔལ་འབྱོར་ཕྱུ་གཡང་བསྡུས། །སྟོབས་རྩལ་མངའ་ཐང་རྒྱས་པའི་ཕྲིན་ལས་མཛོད། ༄༅། མགོན་དཀར་ཡིད་བཞིན་ནོར་བུ་ནི། ཧཱུྃ། སྤྱན་རས་གཟིགས་དབང་སྙིང་རྗེའི་རང་གཟུགས་ནི། །བསྟན་པ་བསྲུང་ཕྱིར་མ་ཧཱ་ཀཱ་ལའི་སྐུ། །ཙན་དན་ལྗོན་ཤིང་འཁྲིགས་པའི་དུར་ཁྲོད་ནས། །
སྟོན་ཀའི་སྤྲིན་དཀར་ཕུང་པོ་ཆེར་ལྡང་བཞིན། །མགོན་དཀར་ཡིད་བཞིན་ནོར་བུའི་ཚོགས་དང་བཅས། །འདིར་བྱོན་ཟག་མེད་གཏོར་མ་སྨན་རཀ་ཕུད། །དཀོར་ནོར་ལོངས་སྤྱོད་རིན་ཆེན་དགྱེས་དགུར་འབུལ། །རྣལ་འབྱོར་གཞི་བྱེས་གར་སོང་ལོངས་སྤྱོད་སྤེལ། །མཐུན་རྐྱེན་འབད་མེད་ལྷུན་གྱིས་གྲུབ་པར་མཛོད། །སྲིད་ཞིའི་ལེགས་ཚོགས་མ་ལུས་འབྱུང་བའི་གནས། །ཁམས་གསུམ་ཆོས་ཀྱི་རྒྱལ་པོ་བཀའ་བརྒྱུད་པའི། །བསྟན་རྩ་འཕགས་ཚོགས་དགེ་འདུན་སྡེ་རྒྱས་ཤིང་། །འཁོར་ལོ་རྣམ་བཞིའི་བཤད་སྒྲུབ་བསྟན་པ་རྒྱས། །མཐུན་རྐྱེན་དཔལ་འབྱོར་འཛད་མེད་རྒྱས་པར་མཛོད། །ཨ་རཱ་གས་སོ། དགེའོ།། ༈ གནོད་སྦྱིན་ཤན་དམར་ནི། ཧཱུྃ། བྱང་ཕྱོགས་གནོད་སྦྱིན་གཏེར་གྱི་བདག །འཛད་མེད་ནོར་ལ་དབང་མཛད་ཆེ། །གནོད་སྦྱིན་ཤན་པ་དམར་ནག་ནི། །ཞལ་གཅིག་ཕྱག་གཉིས་མཛེས་པའི་སྐུ། །ཆིབས་སུ་ཟངས་ཀྱི་ཁྱུང་དམར་ཆིབས། །སྐུ་མདོག་དམར་འཚེར་འོད་དུ་འབར། །རིན་ཆེན་སྣ་ལྔའི་རྒྱན་གྱིས་སྤྲས། །ཕྱག་གཡས་ལྕགས་ཀྱུས་ཟས་ནོར་འགུགས། །ཕྱག་གཡོན་ནེའུ་ལེས་དགོས་འདོད་སྟེར། །འཁོར་དུ་གནོད་སྦྱིན་སྟོང་གིས་
བསྐོར། །སྔོན་གྱི་ཐུགས་དམ་ཆེན་པོ་ནི། །མི་ཟད་ནམ་མཁའི་མཛོད་སྟེར་བ། །ཇི་ལྟར་ཁས་བླངས་དམ་བཅས་ལྟར། །མི་ནོར་ཟས་གསུམ་དབང་དུ་བསྡུས། །གཏེར་བདག་འཁོར་དང་བཅས་པ་ལ། །མཆོད་ཚོགས་བ་ལི་གཏོར་མ་འབུལ། །ཟས་ནོར་ལོངས་སྤྱོད་ཆར་ལྟར་ཕོབ། །འགྲོ་བ་མི་ཡི་རྣམ་ཤེས་བསྒྱུར། །སྦྱིན་བདག་རྣམས་ཀྱི་ལག་པ་བསྐུལ། །ཅི་བསམ་འགྲུབ་པའི་དངོས་གྲུབ་སྩོལ། །རྡོ་རྗེ་གཏུམ་པོའི་བཀའ་མ་བཅག །རྣལ་འབྱོར་བདག་གི་རེ་བ་སྒྲུབས། །བཅོལ་བའི་ཕྲིན་ལས་འགྲུབ་པར་མཛོད། ་དམར་པོ་ལྷ་གསུམ་གྱི་མཚན་སྔགས་མཐར། མཆན། ཨེ་ཧེ་དམར་རུ་ཙེ་གུ་ཎ་ཧྲཱིཿཏྲི་ཧཱུྃ་ཛ༔ ས་པཱ་རི་ཝཱ་ར་སོགས། །