ཛཾ་ལྷ་ཉེར་གཅིག་ལྷ་མོ་དཔལ་འབྲེལ་བའི་གཡང་སྐྱབས་ཟིན་བྲིས་ཡིད་ཀྱི་དོགས་གསལ་ཤེལ་དཀར་མེ་ལོང་།
ཛཾ་ལྷ་ཉེར་གཅིག་ལྷ་མོ་དཔལ་འབྲེལ་བའི་གཡང་སྐྱབས་ཟིན་བྲིས་ཡིད་ཀྱི་དོགས་གསལ་ཤེལ་དཀར་མེ་ལོང་བཞུགས་སོ། །
ན་མོ་དྷེ་ཝི་ཤྲཱི་ཛམྦྷ་ལ་ཡེ། གནམ་ཆོས་ལས་བྱུང་ཛ་ལྷ་ཉེར་གཅིག་དང་། །ལྷ་མོ་དཔལ་གྱི་གཡང་སྐྱབས་ཟིན་བྲིས་ཐོ། །མདོ་ཙམ་ཚུལ་མཐོང་ཤེལ་དཀར་མེ་ལོང་བཞིན། །རྨོངས་པ་འགའ་ལ་ཕན་སྙམ་འདིར་བཀོད་བྱ། །དེ་ཡང་དུས་ཀྱི་དབང་དང་སེམས་ཅན་རྣམས། །བསོད་ནམས་དམན་པས་ཕྲུ་གཡང་ལོངས་སྤྱོད་ཉམས། །ནམ་ཟླ་མི་སྙོམས་སད་སེར་མུ་གེ་རྒོད། །ཆར་ཆུ་མི་འབབ་ལོ་ཕྱུགས་རྟག་ཏུ་ཉེས། །གོད་ཁ་ནད་ཡམས་རྒྱལ་ཁམས་ཡུལ་ཉམས་ལྟས། །སྒོས་སུ་རང་དང་ཡོན་བདག་རྣམས། །ཕ་མ་ལ་སོགས་གཡང་རྒན་ཤི། །གཟའ་སྐར་ལ་སོགས་གཡང་སྐར་
དུས། །ཟས་ནོར་དངོས་པོ་ཕྱིར་བཏང་དང་། །སྔོན་འབྲས་སྦྱིན་རྣམས་ལས་ངན་གྱིས། །ཕྲུ་གཡང་བསོད་ནམས་ཉམས་པ་དང། །དབང་ཐང་རླུང་རྟ་རྒུད་པ་ཡིས། །བསམ་པའི་དོན་རྣམས་མི་འགྲུབ་ཅིང་། །གཏོར་བརླག་ཚོང་ཉེས་ལོ་ཉེས་དང་། །བློ་ཉེས་གོད་ཁ་དགྲ་ཡིས་འཚེ། །རྒྱུད་ལས་བཤད་ལྟར་ངན་རྟགས་འབྱུང་། །དེ་ལ་ཕན་ཕྱིར་གཡང་སྐྱབས་བྱེ། །བཀྲ་རྒན་ལ་སོགས་ཤི་བ་ལ། །ཕ་མཚུན་གཡང་སྐྱབས་བྱ་མོད་ཀྱང་། །འདི་ལྟར་བྱས་ན་མི་འགལ་སྙམ། ༈ །དེ་ཡང་གཡང་སྐྱབས་གསར་རྙིང་དང་། །བོན་ལུགས་ལ་སོགས་མང་དུ་དར། །
བོན་ལུགས་བརྗེས་བཅའ་མི་རུང་། །སྲིད་པ་རྒྱུད་ཀྱི་གཡང་འབུམ་དང་། །པདྨ་གཡང་འབུམ་གཏེར་གཡང་སོགས། །ཕལ་ཆེར་མགོ་སྟེང་མ་ཚང་ཞིང་། །ལ་ལར་བཀའ་ཆད་ལུང་སྡུམ་སྐྱོན། །རྣམ་སྲས་ནོར་ལྷ་བཅོ་བརྒྱད་སོགས། །དངོས་གྲུབ་བདག་པོ་མངག་ཡོད་ཀྱང་། །སྒབ་འདྲེ་བེ་དཀར་རྒྱལ་པོ་ངན། །མནན་པ་རྟགས་ཐོན་མ་གྲུབ་ན། །བར་ཆད་ཆེན་པོ་བརྩམ་པར་ངེས། །ལྷ་བཅོ་བརྒྱད་ཀྱིས་གཡང་སྐྱབས་མ་ཎི་གཡང་སྐྱབས་སོགས། མཆན། །ནོར་ལྷའི་རིགས་ནི་བསྒྲུབས་ན་ཡང་། །སྒྲུབ་པ་རྟགས་ཐོན་བྱེད་དགོས་སོ། །སྒབ་འདྲེ་རེ་ཡང་མཉམ་དུ་ཡོད། །རྟགས་ཐོན་བྱེད་ན་མནན་པ་བཀའ་ཚད་ཆེ། །དུས་ངན་ཚེ་ཐུང་དེ་འདྲ་ག་ལ་ལོང་། །དེ་བས་སྟབས་བདེ་བྱིན་རླབས་ཆེ། །གནམ་ཆོས་མཁའ་འགྲོའི་ཁ་རླངས་ཡིན། །རྒྱུད་སྡེ་དུ་མའི་ཡང་སྙིང་བཅུད། །དཔལ་གྱི་ལྷ་མོ་ལྷ་དགུ་ཡིན། །འདི་ཉིད་གཞུང་བཟུང་བྱིན་རླབས་ཆེ། །རྒྱུད་འཇམ་སྒབ་འདྲེ་རྒོད་པ་མིན། །དེ་ཕྱིར་འདི་ཡི་ལག་ལེན་ནི། །གཞི་དང་རྫས་དང་དུས་སྐར་མ། །གཞུང་ལ་གསལ་ཕྱིར་འདིར་མ་སྨོས། །རྫས་སྣ་གང་འཛོམ་བྱེད་པས་ཆོག༔ ༈ །གཡང་མདའ་གཡང་སྐྱེ་གཡང་ཕོར་དང་། །སྡེར་མ་ཤུག་པ་
བལ་ཚོན་དང་། །གཡང་ཟོ་བལ་གྱིས་བརྒྱན་པ་འོ་ཞོས་བཀང་། །མེད་ཐབས་མེད་པ་རྣམ་དྲུག་ཡིན། །ཟོ་བ་ཆུ་དཀར་གང་བ་དང་། །ཐུན་རྒྱུ་རྡོ་དཀར་ཡུངས་དཀར་སོགས། །ཡོ་བྱད་རྫས་ཀྱི་རིམ་པའོ།། ་་འདི་རྣམས་བྱེད་ཅིང་རབས་ཆད་ཡུགས་ས་དམེ་ཕོ་སོགས་ཀྱི་ལག་ལེན་མ་ཡིན་པར་མཆན། ༈ དེ་ནས་གཏོར་མའི་བཅའ་འགྲིགས་རིམ་པ་ནི། །གོང་གཏོར་ཞེས་། བྱ་ཡར་གཞི་བླ་མ་དང་། །ཡི་དམ་མཁའ་འགྲོ་ཆོས་སྐྱོང་བསྐང་གཏོར་དང་། །ཕྱི་རྒྱུད་ལ་སོགས་བཅས་ལ་ལོགས་གཅིག་བཤམས། །གཡང་གཞིའི་སྟེང་དུ་ཛཾ་ལྷ་ཉེར་གཅིག་གི༔ ། གཏོར་མ་ནོར་བུ་སུམ་ཚོམ་གདན་ཟླུམ་པོ། །པདྨ་འདབ་བརྒྱད་ཟླུམ་པོ་རང་བཏོད་པ། །ཛཾ་ལཾ་ཅོག་རྡོག་ཉི་ཤུས་བསྐོར་བའོ། །ལྷ་མོ་དཔལ་ལ་ཟླུམ་པོ་བང་རིམ་གསུམ། །དེ་སྟེང་ནོར་བུ་ཟུར་བརྒྱད་དེ་ཡི་སྟེང་། །དྲྭ་བ་རིས་སྟེང་གཡང་ཞག་འཁྱིལ་པ་ཞེས། །སྟོད་ནི་ཟུར་གཉིས་སྨད་ནི་ཟླུམ་པོ་ལ། །པད་འདབ་བཞིས་བརྒྱན་འཁོར་ནི་ཟུར་གཉིས་བརྒྱད། །དེ་དག་གཡང་སྡེར་ནང་དུ་བཞག་བྱ་ཡིན། །དཀར་གཏོར་གསུམ་པོ་གཞུང་ལས་གསལ་ལྟར་བཅའ། །རྣམ་སྲས་ཛཾ་ལྷ་གཙོར་བྱས་པའི་ལྷ་བཅོ་བརྒྱད་གཡང་སྐྱབས་ནི་སྒབ་འདྲེ་བེ་དཀར་
རྒྱལ་པོ་ཡིན་པས་ཕྲག་དོག་ཆེ་གསུངས་སོ།། ༈ །རྨ་གཡང་དང་འབྲེལ་ན་སྤོམ་རའི་དཀར་གཏོར་དང་། །ཟླུམ་པོ་ཟུར་བརྒྱད་ར་བ་སྒོ་བཞི་དང་། །རིལ་བུ་བཅུ་གསུམ་འབྲང་རྒྱས་མཉམ་དུ་བཤམས། །གཡང་ཕོར་མར་ཁུའི་ཁ་དེར་མར་གྱིས་ནི། །མཛོ་མོ་དཀར་མོ་རྭ་ཅོ་སྔོ་སར་བ། །སྟོང་སྐུད་དམར་པོ་སྐེ་བཏགས་གཡང་ཕོར་ལ། །བསྟོད་པའི་ཚུལ་བྱེད་མར་ཁུའི་ཁ་ལ་གཟུགས། །རང་རང་ཙཀི་ཡོད་ན་རྩེ་ལ་བཙུགས། །ཀུན་ལ་མར་གྱིས་ནོར་བུ་ཆར་འབེབས་བརྒྱན། །རྨ་ནི་དམར་ལ་དགྱེས་ཕྱིར་ཤ་དར་ཡང་བཙུགས། །མ་བཙུགས་ན་ཡང་མ་ཚང་འགལ་བ་མེད། ༈ །མཚུན་བཅོས་ལ་སོགས་བཅའ་ལུགས་གསལ་ལྟར་བཅའ། །གཞན་ཡང་དཀར་གཏོར་དམར་གཏོར་མཐེབ་ཀྱུ་དང་། །མར་སྡར་ཐུད་སྡར་མར་རིལ་ཐུད་རིལ་དང་། །ཟན་རིལ་ལ་སོགས་གསོ་བྲན་རྒྱུ་ཡང་བཅའ། །འབྲུ་སྣ་ཕྱེ་མར་བསང་གི་ཕྱེ་ཡང་བྱ། །ས་སྤྲིན་དག་ལ་བཀར་ཡས་གཏོར་མ་ནི། །གནམ་ཆོས་གཞུང་ནས་བྱུང་ལྟར་བཅའ་བ་དང་། །རྒྱུན་དུ་གཡང་སྐྱབས་ནང་གི་བཀར་ཡས་ནི། །འདོན་ཆ་ལྟར་ཏུ་བཅའ་འམ་གཙོ་བོ་རང་། །གཅིག་པུ་བཅའ་ལ་ཆངས་ཏིང་མར་མེ་དང་། །མི་ཁའི་རྫས་
སོགས་ཡས་རྣམས་ཀུན་ལ་དགོས། །དང་པོ་བཅའ་གཞི་འདོན་ཆའི་རིམ་པ་ནི། །དང་པོ་གསང་སྔགས་རྙིང་མའི་སྐྱབས་སེམས་དང་། །དཀར་བགེགས་ཡན་འདོན་༈ ཐུགས་སྒྲུབ་སྤྱི་འདུས་སོགས། །རང་གི་ཡི་དམ་གང་ཡིན་བཞུང་སྲོང་ལ། །མ་ནིང་ལ་སོགས་ཆོས་སྐྱོང་ཐམས་ཅད་འདོན། །ཕྱི་རྒྱུད་གོང་དེར་དུང་ཆུས་འོ་ཆབ་དང་། །དྲི་བཟང་བཏབ་པའི་བསང་ཆུས་ལེགས་པར་བྲན། །སྤོས་རུམ་ཤུག་རུམ་འདོན་ཚེ་བསང་དུད་བྱ། །དང་པོ་བསེ་རག་ཡས་ལ་ཆུ་གཙང་བྲན། །གནམ་ཆོས་གཞུང་ལྟར་རང་ཉིད་ཡི་དམ་ནས། །མཆོད་བསྟོད་ཡན་འདོན་བསྙེན་པ་རིང་ཐུང་གཉིས། །བརྒྱ་སྟོང་གང་འགྲུབ་ལོང་སྐབས་དག་དང་བསྟུན། །རྡོ་དཀར་ཐུན་དང་ཆུ་དཀར་སྔགས་ཀྱིས་བཏབ། །དེ་ནས་དཀྱུས་ལྟར་་བཀར་ཡས་ཡོངས་རྫོགས་འདོན། །བདེ་གཤེགས་རིན་ཆེན་མང་ཞེས་ཚིགས་བཅད་སྔགས། །ལན་བདུན་བརྗོད་ཧཱུྃ་ལྷ་གེ་ཁོད་ཅེས་པའི། །སྔགས་ཀྱིས་ཐུན་རྡོའི་ཅུང་ཟད་བྲབ། །རྫོངས་འདེབས་སྐབས་སུ་ཚ་ཡས་སྣ་དགུ་བཏབ། །ལམ་བསྟན་བྱས་ནས་གཏོར་གཡོག་པས་བཟུང་བཅོལ། །ཧཱུྃ་ང་ནི་ཞེས་རྡོ་ཐུན་ཚིག་དེར་འདོན། །ཧཱུྃ་བཞིའི་སྔགས་དང་རོལ་མོ་དྲག་
ཏུ་བརྡུང་། །གླད་ཡས་སྦྲ་ཁྱིམ་མི་མཐོང་ས་རུ་སྐྱལ། །དེ་ནས་དཔལ་གཡང་ནང་ལྟར་ཐུན་བཟུང་ལ། །ཧཱུྃ་ང་ནི་ཁྲོ་བོ་བདུད་རྩི་འཁྱིལ་ཞེས་སོགས། །ཡི་དམ་དྲག་སྔགས་རྣམས་ལྟའདོན་སྦྲ་ཁྱིམ་གྱི། །ཕྱི་ནང་ཐམས་ཅད་རྡོ་ཐུན་ཁྱབ་པར་གཏོར། །དེ་ནས་ཆུ་དཀར་འཐོར་ཡབ་ཤུག་ལོས་གཏོར། །ཧཱུྃ་བདུད་རྩི་འཁྱིལ་པའི་བྱིན་རླབས་སོགས། །རྣམ་འཇོམས་གཟུངས་འདོན་སྦྲ་ཁྱིམ་མི་ནོར་གཏོར། །ཐུན་རྫས་ཆུ་དཀར་འཐོར་ལྷག་གཞི་ཟུར་བཞག །དེ་ནས་བདག་གིས་བྱས་པའི་ནོར་ལྷ་སྤྱི་གཏོར་འདོན། །མཆོད་བསྟོད་རྒྱས་བསྡུས་སྐབས་དང་བསྟུན་པར་བྱ། །དེ་ནས་ཛ་ལྷ་ཉེར་གཅིག་མཆོད་པ་བྱིན་བརླབས་ནས། །བཀའ་རྒྱ་ཛཾ་ནག་དང་བཅས་ཡོངས་རྫོགས་འདོན། །གནམ་ཆོས་ལས་བྱུང་ནོར་དབང་དེ་ལ་སྦྱར། །དེ་ནས་ལྷ་མོ་དཔལ་གཡང་བྱིན་བརླབས་ནས། །ཨོཾ་བཛྲ་ཨ་མྲྀ་ཏ་ནས་ཨ་ཀཱ་རོ་དང་སྤ་ར་ཎ་ཁཾ། །ལན་གསུམ་བརྗོད་ནས་གཞུང་ལྟར་འདོན་པར་བྱ། །སངས་རྒྱས་ཆོས་གཉིས་ཕྱག་མཆོད་ལན་གསུམ་བྱ། །བཅུ་གཉིས་མཚན་ལ་བདུན་འདེབས་བྱ་རྒྱུ་སྟེ། །སྔགས་དེ་ལན་བདུན་འདོན་པ་བསྡུས་པའི་ལུགས། །ནོར་རྒྱུན་མཆེད་བརྒྱད་སྔགས་དེ་སུམ་སྡེབ་བྱ། །
དཀར་གཏོར་བྲན་ལ་ཚོགས་བདག་སྔགས་བཅས་འདོན། །ཀླུ་ལ་ཀླུ་སྨན་བྲན་འདོན་སྤོམ་ར་འདོན། །འབུལ་སྔགས་ལན་གསུམ་སྒྲུབ་སྔགས་བདུན་རེ་བྱ། །ལྷ་མོ་དཔལ་དེ་དུ་ཐོན་བྱ་བ་ལེགས། །གྲོལ་ཁ་ཕྱིན་ལ་ཛཾ་ལྷ་ཉེར་གཅིག་དེ། །ཚར་ལྔ་ཡན་འདོན་བརྒྱ་ཚར་གོ་ཡང་ཆོད། །ལྷ་རེ་ལ་ཡང་ལས་བྱང་མཆོད་བསྟོད་བསྐང་། །ཚང་མ་རེ་ཡོད་དོན་ལ་ངོ་བོ་ཡང་ཅིག ༈ །རྨ་གཡང་འབྲེལ་ན་རྨ་རྒྱལ་ལས་བྱང་འདོན། །བསྙེན་པ་བྱས་ལ་རྨ་གཡང་བཅུ་གསུམ་ནི། །ཀྱཻ། །དེ་རིང་སྲིད་པའི་གནམ་གང་ནས། །ཁུ་ཡེ་ཕྱུ་ཞེས་བྱིན་འབེབས་བྱ། །ཀྱཻ། །ཤར་ཕྱོགས་དགའ་བའི་འཇིག་རྟེན་སོགས། །གཡང་གི་གཏེར་མཛོད་ཚེ་གཡང་འགུགས། །གཡང་སྲས་བླ་འགུགས་བཅས་པར་བྱ། །གཡང་འབོད་བྱས་ལ་མཛོ་མོ་བྲན། །དཀར་གསུམ་ཇ་ཆང་འབྲུ་ཡིས་མཆོད། །ཀྱཻ། །ཟོ་ཟོ་གཡང་གི་མཛོ་མོ་ནས། །ལེའུ་གསུམ་འདོན་ཐ་མ་སྐྱུར། ༈ །གཞན་ཡང་མཚུན་བཅོས་གཡང་སྐྱབས་སོགས། །དམིགས་བསལ་དགོས་ན་འདི་བར་བྱ། ༈ །དེ་ནས་ཚེ་ཡི་གཡང་འགུགས་བྱ། །མེད་ཐབས་མེད་པའི་གནད་གཅིག་ཡིན། །ཚེ་ནོར་ཆོས་གསུམ་ཟེར་བའི་དོན། །
ཚེ་གཡང་ཤིན་ཏུ་དོ་གལ་ཆེ། །འཇིག་རྟེན་འདི་ན་དཀོན་པའི་ནོར། །ཚེ་སྲོག་ལས་ལྷག་ནོར་གཞན་མེད། །འདི་མེད་ནོར་གྱི་དགོས་པ་སྒྱུར། །དེ་ཕྱིར་རིགས་ལྔའི་ཚེ་འགུགས་ནི། །ཧཱུྃ། དབུས་ཀྱི་ཚོགས་ན་བཞུགས་པ་ཡི། །ཞེས་པ་མདའ་དར་གཡབ་ཅིང་འདོན། ༈ །དེ་ནས་ཚོགས་མཆོད་བྱ་ན་ཚོགས་བྲན་ལ། །ཛཾ་ལྷ་དམར་པོའི་ཚོགས་མཆོད་བྱ་བར་རིགས། །སངས་རྒྱན་ཀུན་གྱི་སྦྱིན་འབྲས་ལས་གྲུབ་པའི། །འཕགས་པ་གནོད་གནས་མགོན་པོ་ཛཾ་བྷ་ལྷ། །སྐུ་གཅིག་མཚན་གྱི་རྣམ་གྲངས་དུ་མ་རུ། །སྐུ་ལྔ་བྱེ་བ་བརྒྱ་སོགས་སྤྲུལ་སྒྱུར་མཛད། །ཡབ་གཅིག་ངལ་གསོ་ཡུམ་གཅིག་པདྨའི་མཚན། །ལྷ་མོ་དཔལ་གཡང་ཕྱི་མོ་ཡིན་པ་དང་། །བཙུན་མོ་ལྷ་མོ་ནོར་རྒྱུན་མ་ལ་སོགས། །ནོར་ལྷ་ཐམས་ཅད་ཛ་ལྷའི་འཁོར་ལ་ཚང་། །དེ་ཕྱིར་འབྲེལ་ཆགས་བྱིན་རླབས་ཕན་ཡོན་ཆེ། །རཾ་ཡཾ་ཁཾ་ནས་བྱིན་རླབས་ཚོགས་སྤྱན་འདྲེན། །ཧྲཱི༔ བདེ་སྐྱིད་ལྡན་པའི་ཞིང་ཁམས་སོགས། །དེ་ནས་ཚོགས་ཕུད་རིམ་གསུམ་བཅད། །ཚོགས་ཕུད་འབུལ་ལ་རིགས་ཀྱི་བདག་པོ་སོགས། །ཕྱི་རྒྱུད་ལ་སོགས་སྔར་གྱི་འཕྲོ་དེར་འདོན། །བར་པས་བསྐང་བ་གསོས་ལ་ཡི་དམ་ཆོས་སྐྱོང་གི །
གསོལ་ཁ་བསྐང་བ་འདོན་ལ་འདིའི་བསྐང་བཤགས། །ཧྲཱི༔ འདོད་ཡོན་ངོ་མཚར་སོགས་དང་ཡིག་བརྒྱ་བརྗོད། །གསུམ་པ་བྲན་ལ་བཀུག་བསྒྲལ་བསྟབ་པ་བྱ། །དེ་ནས་ཛ་བྷ་ལ་ཡི་ལྷ་ཚོགས་ལ། །ཞེས་སོགས་གཏོར་མ་དཀྱིལ་འཁོར་དྲུང་དུ་འབུལ། །ཞེས་པས་ཚོགས་རོལ་ཚོགས་ལྷག་བཤམས་ལ་བྲན། །ཨོཾ་ཨཱཿཧཱུྃ་ཧོ་ལྷག་གཏོར་བདུད་རྩི་སོགས། །ལྷག་མ་ཕྱི་རོལ་འབུལ་ལ་ཐུན་གཏོར་བཤམས། །བྱིན་བརླབས་བྱས་ནས་རྩ་སྔགས་ཁཱ་ཧིའི་བསྔོ། །ཧཱུྃ། དཔལ་ལྡན་མགོན་པོ་ཛཾ་བྷ་ལ། །ཞེས་སོགས་གཏོར་མ་དཀྱིལ་འཁོར་དྲུང་དུ་འབུལ། །ཡི་དམ་ཚོགས་ལྷག་ཆད་མདོ་བརྟན་མ་དང་། །རྟ་བྲོ་བཟོད་གསོལ་བསྡུ་རིམ་གཞུང་ལྟར་བྱ། །ཞག་མང་བཅས་ན་ཕྱིར་ནངའང་སྔར་ལྟར་ལ། །བཀར་ཡས་རྒྱས་པ་མི་དགོས་གཞུང་དེས་ཆོག །དེ་མིན་སྔ་ཉིན་ལྟར་དུ་ཡོངས་རྫོགས་ཡིན། །ཞག་གྲངས་ལྔ་བདུན་དགུ་སོགས་གང་འགྲུབ་བཅའ། །ལྷ་མོ་དཔལ་དེ་ཅི་ཐོན་བྱ་བ་ལེགས། །བརྒྱ་ཚར་ཐོན་ན་ངེས་པར་ལྷ་མོ་ཡི། །ཐུགས་རྗེས་སྐྱོབས་ལ་སྦྲ་ཁྱིམ་དེར་འཁོར་ཞེས། །རྒྱུད་ནས་གསུངས་པ་ཕུག་ཆེ་ཡིད་ཆེས་གནད། །གཤེགས་གསོལ་མི་བྱ་འདོན་
ཆའི་རིམ་པའོ། ༈ །དེ་ནས་གྲོལ་ཁ་དེ་དགོང་ངམ་ནི་ཕྱིར་ཉིན་ནངས། །ཕྱིར་ཉིན་བྱས་ན་བསྡུས་པ་ཙམ་ཞིག་འདོན། །བསང་ནི་རྒྱས་བསྡུས་སྐབས་བསྟུན་ཁུ་ཡེའི་མཚམས། མདའ་དར་ཐོགས་ལ་ཐོག་མར་གཡང་སྒོ་ཕྱེ། །གཡང་འབོད་དང་ནི་མདའ་དར་ཤིས་བརྗོད་བྱ། །མདའ་དར་ཡོན་བདག་གཏད་ལ་གཡང་གཏད་ནི། །ཀྱཻ། །ཚངས་པ་བརྒྱ་བྱིན་ལག་ཏུ་སོགས་འདོན་ལ། །གཡང་རྫས་ཐོག་མ་གཡང་ཁུག་ཤིས་བརྗོད་བྱས་ལ་གཏད། །དེ་བཞིན་གཡང་གཏད་དངོས་གྲུབ་ཀུན་འབྱུང་བཞིན། །གཡང་གཏོར་ལ་སོགས་མཛོ་མོ་མ་གཏོགས་གཏད། །དེ་ནས་མདའ་དར་ལ་སོགས་གཡས་སུ་གཡབ། །ཀྱཻ། །མི་བུ་བརྒྱ་ནི་སོགས་དང་གཡང་ལེན་འདོན། །ཁུ་ཡེ་ལེན་ཞིང་མཛོ་མོ་ལག་ལེན་ལྟར། །ཕྱག་ལེན་ལ་ལེའུ་དང་པོ་སྟོང་སྐུད་སྣེ་ནས་སློབ་དཔོན་གྱིས་བཟུང་ལ་མཆོད། གཉིས་པ་གདན་སར་ཙམ་མཆོད། གསུམ་པ་སྟོང་སྐུད་ཡོན་བདག་ལ་གཏད་ལ་མཆོད། བཞི་པ་མཛོ་མོ་ལག་ཏུ་གཏད་ལ་མཆོད། དེ་ནས། ཀྱི་དགུང་སྔོན་རིམ་པ་བཅུ་གསུམ་གཡང་གཏད་བྱ། །བལ་ཚོན་ཀར་བ་བཅིང་ལ་རྟེན་བཙུགས་བྱ། དེ་ནས་སྲུང་བཙུགས་སྲུང་བཀོད་གཡང་སྒོ་
བསྡམས། །ཧཱུྃ། གཡང་གི་ལྷ་མོ་སོགས་ཀྱི་བརྟན་བཞུགས་བྱ། །འཇིག་རྟེན་པ་རྣམས་ཕྱི་དར་ཡོད་ན་བསྟིམ། །མེད་ན་རང་རང་གནས་སུ་གཤེགས་པར་བྱ། །གཡང་རྫས་ཕུད་རྣམས་ཅུང་ཟད་གཡང་ཁུག་བླུག །ཀྱཻ། །གཡང་ཁུག་ཕྱྭ་གཡང་འབེབས་ཞེས་འདོན་ཆ་ལྟར། །གཡང་ཁུག་གྲོགས་པོ་བྱ་བ་གཡང་ཕུར་འདོགས། །ཀྱཻ། །གཡང་ལ་རྒྱས་གསུམ་བཏབ་པ་སོགས། །དེ་ནས་འདོན་ཡོན་ལྟར་དུ་དངོས་གྲུབ་རོལ། །ཚེ་མར་ཤིས་བརྗོད་འདོན་ཆ་ལྟར་དུ་བྱ། །ཧཱུྃ། སྐུ་ཡི་དངོས་གྲུབ་ཀུན་གྱི་བདག །ཅེས་སོགས་བཀྲ་%ཤིས་གང་ཤེས་ཡེ་དྷར་དང་། །ཨ་ལི་ཀཱ་ལི་བསྔོ་བ་སྨོན་ལམ་བྱ། །དེ་ནས་རྗེས་ཀྱི་བྱ་བའི་རིམ་པ་ནི། །ས་བདག་དང་ནི་གཡང་སྐྱབས་འགྲེལ་བ་ནི། །ཚོགས་ཀྱི་གོང་དེར་ས་བདག་འདོན་པ་ཡིན། །ས་བདག་རྒྱས་བསྡུས་སྒྲུབ་པའི་ཟོལ་དང་བསྟུན། །གཞན་ཡང་ལུགས་མང་འབྲེལ་པ་མང་བྱེད་ཀྱང་། །ས་བདག་འབྲེལ་པ་འདི་ནི་འབྲེལ་ཆགས་སྙམ། །བྱིན་རླབས་ཆེ་ཞེས་མི་ཡི་ཁ་སྤྲོས་སྣང་། །དེ་ལྟར་ད་ལྟ་གྲགས་ཆེ་གཡང་སྐྱབས་ཞེས། །གྲོང་དུ་རྒྱུ་བ་སྔགས་བཙུན་གང་རིགས་ཀྱི། །དབྱར་ཐོག་བྱུང་ན་དར་སྲོལ་ཆེ་མོད་ཀྱང་། །ལ་ལར་
རྒྱས་འདོད་བན་བོན་མང་པོ་བསྲེ། །རས་ལ་སློག་པའི་ལྷན་དེ་དགོད་རེ་བྲོ། །ལ་ལས་བསྡུས་འདོད་རང་གཞུང་ཡང་མི་ཚང་། །གཞུ་ལ་མདའ་མེད་འབེན་དེ་ངོ་རེ་ཚ། །ལ་ལས་དབང་མེད་ལུང་མེད་དོན་མ་གོ །ལུང་སྟོང་འབོད་པ་གྲེ་བ་འགགས་པའི་རྒྱུ། །དེ་ཕྱིར་ཡོན་ཏན་ལྡན་རྣམས་མི་སྤྲོ་ཀྱང་། །རང་འདྲའི་རྨོངས་པ་འགའ་ལ་ཕན་པར་བསམ། །དབང་ལུང་ཐོབ་ན་སློབ་དཔོན་དཔེ་ཡིས་ཆོག །ཚད་དང་ལྡན་ན་མཁས་པའི་ཡང་རབ་ཡིན། །དེ་སྐད་ཨ་རཱ་ཨ་སྱས་སྨྲས་པ་བཞིན། །པདྨ་ཐབས་མཁས་བསྐུལ་བ་པོ་དེས་བྲིས། །ཉེས་འགལ་མཆིས་ན་ནོར་ལྷའི་ཚོགས་ལ་བཤགས། །དགེ་བས་འགྲོ་བའི་དབུལ་ཕོངས་སྡུག་བསྔལ་ཞི། །མགོན་པོ་ཛཾ་བྷ་ལ་ཉིད་འགྲུབ་གྱུར་ནས། །སྦྱིན་པའི་ཕར་ཕྱིན་བསྟན་པའི་སྦྱིན་བདག་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།