ལྷ་མོ་ཆེན་མོ་དཔལ་གྱི་གཡང་སྐྱབས་ཀྱི་མདུན་བསྐྱེད་ལྷན་ཐབས།
ལྷ་མོ་ཆེན་མོ་དཔལ་གྱི་གཡང་སྐྱབས་ཀྱི་མདུན་བསྐྱེད་ལྷན་ཐབས་བཞུགས་སོ།
ན་མོའི་དྷེ་ཝི་ཡེ། ལྷ་མོ་དཔལ་གྱི་གཡང་སྐྱབས་མདུན་བསྐྱེད་ལྷན་ཐབས་ནི། གཞན་ཡང་གནས་ཁང་གཡང་རྫས་བྱིན་གྱིས་རླབས་པ་ནི། བཛྲ་སྤ་ར་ཎ་ཁཾ༔ ཞེས་བརྗོད་ནས་འདི་སྐད་དོ།། དེ་ལྟར་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པའི་ནང་དུ་གཡང་རྫས་མཆོད་པའི་སྤྲིན་ཕུང་གི་དབུས་སུ་པཾ་ལས་པདྨ་ཨ་ལས་ཟླ་བའི་སྟེང་དུ་ཡི་གེ་བྷིཡོངས་སུ་གྱུར་པ་ལས་གཡང་གི་ལྷ་མོ་དཔལ་ཆེན་མོ་བཅུ་གཉིས་མཚན་ལྡན་མ། སྐུ་མདོག་ལྗང་གུ་རྩྭ་མཆོག་དཱུརྦ་ཚེ་འཕེལ་གྱི་མདངས་ལྡན་འོད་ཟེར་འཕྲོ་བ་ཞལ་གཅིག་ཕྱག་གཉིས་གཡས་པས་དགོས་འདོད་ཀུན་འབྱུང་པདྨ་རིན་པོ་ཆེའི་
མཚན་པ་ལ་ལོངས་སྤྱོད་ཆར་བཞིན་དུ་འབེབས་པ། གཡོན་པས་སྐྱབས་སྦྱིན་གྱི་ཕྱག་རྒྱས་འགྲོ་བའི་དབུལ་བ་སེལ་བ། སྐུ་ལ་དར་སྣ་ཚོགས་ཀྱི་ན་བཟའ་དང་རིན་པོ་ཆེ་དུ་མས་བརྒྱན་པ། ཞབས་གཉིས་བཙུན་མོ་རོལ་པའི་སྟབས་ཀྱིས་རིན་པོ་ཆེའི་གཏེར་གྱི་བུམ་པའི་སྟེང་ན་བཞུགས་པའོ། །དེའི་ཕྱི་རོལ་པདྨ་འདབ་མ་ལ། བཀྲ་ཤིས་གཡང་གི་ལྷ་མོ་བརྒྱད་ཤར་དུ་ནོར་རྒྱུན་མ། ལྷོ་རུ་ཟླ་ཤེལ་མ། ནུབ་ཏུ་སྦྱིན་བྱེད་མ། བྱང་དུ་རབ་སྦྱིན་མ། ཤར་ལྷོར་འཕགས་མ། ལྷོ་ནུབ་ཏུ་སྦས་མ། ནུབ་བྱང་དུ་རབ་བཟང་མ། བྱང་ཤར་དུ་དབྱངས་ཅན་མ། དེ་
རྣམས་ཀྱང་སྐུ་མདོག་སེར་པོ་གསེར་བཙོ་མའི་མདོག་ཅན་ཞལ་གཅིག་ཕྱག་གཉིས་གཡས་པས་འབྲས་ཀྱི་སྙེ་མ་འཛིན་པ་དགོས་འདོད་འབྲུ་དང་རིན་པོ་ཆེའི་ལོངས་སྤྱོད་ཆར་བཞིན་འབེབས་པ། གཡོན་པས་ཡིད་བཞིན་གཏེར་གྱི་བུམ་པ་བསྣམས་པ་འཛད་མེད་བདུད་རྩིའི་ཆར་རྒྱུན་འབེབས་པས་དབུལ་བའི་སྡུག་བསྔལ་སེལ་བ། སྐུ་ལ་དར་དང་རིན་པོ་ཆེས་བརྒྱན་པ། ཞབས་གཉིས་པདྨ་དང་གཏེར་གྱི་བུམ་པའི་སྟེང་ན་སྒེག་བཞད་གར་ཐབས་ཀྱིས་བཞུགས་པའོ། །དེའི་ཕྱི་རོལ་གཡས་ཀྱི་འདབ་མ་ལ། ནོར་ལྷ་ལྷ་ཆེན་ཚོགས་ཀྱི་བདག་པོ་གླང་པོ་ཆེའི་དབུ་ཅན་སྐུ་མདོག་དཀར་པོ་ཕྱག་བཞི་ལ་ཕུག་དང་དགྲ་སྟ་ཟངས་གཞོང་ཟས་སྣས་བཀང་བ་དང་། རིན་པོ་ཆེ་ཕྲེང་བ་འཛིན་པ་དར་སྣ་ཚོགས་ཀྱིས་བརྒྱན་ཅིང་གཡང་གི་བྱི་བ་སྔོན་མོ་ལ་ཆིབས་པ། སྟེང་ཕྱོགས་ལྷའི་ཕྱྭ་གཡང་གིས་བསྐོར་བའོ། །གཡོན་གྱི་པད་འདབ་ལ་ཀླུ་རྒྱལ་མི་མགོན་སྐུ་མདོག་དཀར་པོ་ཞལ་གཅིག་ཕྱག་གཉིས་རིན་པོ་ཆེའི་གཏེར་གྱི་བུམ་པ་ཐུགས་ཀར་འཛིན་པ་སྐུ་སྨད་གསེར་སྦྲུལ་སེར་པོ་གཡང་གི་རྒྱ་མཚོ་འཁྱིལ་བ། སྐུ་སྟོད་ལ་དར་སྣ་ཚོགས་གསོལ་བ། འོག་ཕྱོགས་ཀླུ་ཡི་ཕྱྭ་དང་གཡང་གི་
བསྐོར་བའོ། །མདུན་གྱི་པད་འདབ་ལ་ཡུལ་ལྷ་རྨ་རྒྱལ་སྤོམ་ར་སྐུ་མདོག་དཀར་པོ་མདངས་དང་ལྡན་པ་ཞལ་གཅིག་ཕྱག་གཉིས་པ་ཕྱག་གཡས་པས་མདུང་དར་དཀར་པོ་དང་། གཡོན་པས་དགོས་འདོད་ཀུན་འབྱུང་ནོར་བུ་རིན་པོ་ཆེ་བསྣམས་པ། སྐུ་ལ་བེར་དཀར་དང་བསེ་ཁྲབ་གསོལ་བ། དབུ་ལ་དུང་རྨོག་དར་འཕྲུས་བརྒྱན་པ། སྟག་རལ་གཟིག་ཤུབས་རལ་གྲི་འཁོར་གསུམ་དཔའ་ཆས་དང་ལྡན་པ། ཐུགས་ཀར་ཡིད་བཞིན་ནོར་བུས་མཚན་པ་ལས་བདག་དང་ཡོན་བདག་ལ་དངོས་གྲུབ་ཆར་ལྟར་འབེབས་པ། རྟ་དཀར་འཕུར་ཤེས་རླུང་གི་ཤུགས་ལྡན་ལ་ཆིབས་པ། བར་ཕྱོགས་རྨ་གཡང་གིས་བསྐོར་བའོ། །དེའི་ཕྱི་རོལ་དུ་ཡེ་ཤེས་དང་འཇིག་རྟེན་ལས་ལ་གྲུབ་པའི་གཡང་གི་ལྷ་ཚོགས་ཐམས་ཅད་སྤྲིན་འཁྲིགས་པ་ལྟར་དུ་གཏིབས་ནས་བསྐོར་བའོ། །དེ་ལྟར་གསལ་བའི་གཙོ་མོའི་ཐུགས་ཀར་ཤྲིདང་རང་རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་རི་རབ་ཆེན་པོའི་བྱང་ཕྱོགས་ལྕང་ལོ་ཅན་གྱི་གནས་མཆོག་གཉའ་ཤིང་འཛིན་གྱི་རྩེ་མོ་ཙན་དན་ཚལ་གྱི་མེ་ཏོག་ཁང་བཟང་གསེར་གྱི་རྒྱལ་མཚན་ནས་གཡང་གི་ལྷ་མོ་དཔལ་ཆེན་མོ་ལ་གྲོགས་མོ་ལྷ་
མོ་བརྒྱད་དང་བཅས་པ། གཞན་ཡང་ལྷ་ཀླུ་གཉན་ལ་སོགས་པའི་ཕྱུ་དང་གཡང་གི་བདག་པོ་ཐམས་ཅད་སྐད་ཅིག་གིས་སྤྱན་དྲངས། མདུན་བསྐྱེད་དང་གཉིས་སུ་མེད་པར་གྱུར། །ཨོཾ་དེ་ཝ་ཤྲཱི་ཛྙཱ་ན་ལོ་ཀ་བ་སུ་དེ་བ་སརྦ་ས་པ་རི་ཝཱ་ར་བཛྲ་ས་མ་ཡ་ཛཿཛཿ དེ་ནས་སྤོས་བསྲེག་རོལ་མོ་སྒྲོགས། མདའ་དར་དཀར་པོ་གཡབ་ལ། དབྱངས་སྙན་པོས་གཞུང་གི །ཀྱེ། དེ་རིང་གཟའ་སྐར་ཚེས་གྲངས་སོགས་གཞུང་ལ་འཇུག་གོ། ཞེས་པ་ལྷ་མོ་དཔལ་གྱི་གཡང་སྐྱབས་ཀྱི་མདུན་བསྐྱེད་ལྷན་ཐབས་སྦྱོར་བར་རུང་བ་རཱ་ག་ཨ་སྱས་བྲིས་པའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།