ལྷ་མོ་དཔལ་གྱི་བསང་མཆོད་དགོས་འདོད་ཀུན་འབྱུང་།
ལྷ་མོ་དཔལ་གྱི་བསང་མཆོད་དགོས་འདོད་ཀུན་འབྱུང་ཞེས་བྱ་བ་བཞུགས་སོ།
ཨོཾ་བཛྲ་ཨ་མྲྀ་ཏ་སོགས། ཨོཾ་ཨཱཿཧཱུྃ་ཧ་ཧོ་ཧི༔ ཨོཾ་སརྦ་བིད་པཱུ་ར་པཱུ་ར་སུ་ར་སུ་ར་ཨ་ཝརྟ་ཡ་ཨ་ཝརྟ་ཡ་ཧོ༔ བཛྲ་སྤ་ར་ཎ་ཁཾ་སྭཱ་ཧཱ། ཧཱུྃ། གཡང་གི་ལྷ་མོ་དཔལ་ཆེན་མོ། །བཅུ་གཉིས་མཚན་ལྡན་ཟས་ནོར་བདག །སྐུ་མདོག་ལྗང་མཛེས་འོད་ཟེར་འཕྲོ། །ཕྱག་གཉིས་རིན་ཆེན་པདྨ་དང་། །སྐྱབས་སྦྱིན་རོལ་སྟབས་བུམ་སྟེང་བཞུགས། །དཔལ་ལྡན་མ་དང་བཀྲ་ཤིས་མ། །པདྨའི་ཕྲེང་བ་ནོར་གྱི་བདག །དཀར་མོ་གྲགས་པ་ཆེན་མོ་དང་། །པདྨའི་སྤྱན་དང་བྱེད་པ་མོ། །འོད་ཆེན་མ་དང་ཟས་སྦྱིན་མ། །རིན་པོ་ཆེ་ནི་རབ་སྦྱིན་མ། །གསེར་མདོག་
བུ་མོ་ལྔ་བརྒྱར་བཅས། །བདག་ལ་དངོས་གྲུབ་སྟེར་མཛད་པའི། །བསང་མཆོད་འདི་ཡིས་ཐུགས་དམ་བསྐང་། །རྣལ་འབྱོར་བདག་ལ་དངོས་གྲུབ་སྩོལ། །ནོར་རྒྱུན་མ་དང་ཟླ་ཤེལ་མ། །སྦྱིན་བྱེད་རབ་སྦྱིན་འཕགས་མ་དང་། །སྦས་མ་རབ་བཟང་དབྱངས་ཅན་མ། །གསེར་མདོག་འབྲས་ཀྱི་སྙེ་མ་འཛིན། །ཟས་ནོར་ལོངས་སྤྱོད་གཡང་གི་བདག །བདག་ལ་དངོས་གྲུབ་སྟེར་མཛད་པའི། །བསང་མཆོད་འདི་ཡིས་ཐུགས་དམ་བསྐང་། །རྣལ་འབྱོར་བདག་ལ་དངོས་གྲུབ་སྩོལ། །ཤུག་སྔོན་གཡུ་ཡི་ཐོག་བུ་ཅན། །བལ་བུ་བྱུ་རུའི་ལན་ཚར་
ཅན། །མཁན་དཀར་གསེར་གྱི་ཐོག་བུ་ཅན། །སྦ་སྨྱུག་ལ་སོགས་ལྷ་ཤིང་དང་། །ཕྱེ་མར་ཞལ་ཟས་འོ་སྐོལ་དང་། །ཇ་ཆང་ཟས་ཕུད་གསེར་སྐྱེམས་རྣམས། །འབྱུང་བ་མེ་ལ་བསྲེགས་པ་ཡིས། །དྲི་ཞིམ་ཡིད་འོང་རྣམས་ཀྱི་བསང་། །དེ་ལྟར་བསང་བའི་བྱིན་རླབས་ཀྱིས། །རྣལ་འབྱོར་བདག་ཅག་འཁོར་བཅས་ལ། །འབྲུ་སྣ་བདུན་གྱི་དངོས་གྲུབ་སྩོལ། །རིན་ཆེན་བདུན་གྱི་དངོས་གྲུབ་སྩོལ། །རྐང་བཞི་ཕྱུགས་ཀྱི་དངོས་གྲུབ་སྩོལ། །ལྷབ་ལྷུབ་གོས་ཀྱི་དངོས་གྲུབ་སྩོལ། །སྙན་གྲགས་མཐུ་ཡི་དངོས་གྲུབ་སྩོལ། །ཚེ་རྒྱུདང་དཔལ་འབྱོར་དངོས་གྲུབ་སྩོལ། །མཆོག་དང་ཐུན་མོང་དངོས་གྲུབ་སྩོལ། །དགྲ་དང་བགེགས་ཀྱི་གནོད་པ་རྣམས། །སྐད་ཅིག་ཉིད་ལ་ཞི་བར་མཛོད། །རྟག་ཏུ་སྲུང་ཞིང་སྐྱོབ་པར་མཛོད། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་ཚོགས་བདག་བསང་ནི། །ཀྱཻ། སུམ་ཅུ་རྩ་གསུམ་གནས་མཆོག་ན། །ལྷ་ཆེན་ཚོགས་ཀྱི་བདག་པོ་ནི། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་གསུར་གྱི་བསང་། །བདུད་རྩི་ཇ་ཆང་ཕུད་ཀྱིས་མཆོད། །སྐུ་ཡི་ཚོགས་བདག་དཀར་པོ་བསང་། །དགྲ་
བགེགས་གནོད་པ་ཞི་བར་མཛོད། །གསུང་གི་ཚོགས་བདག་དམར་པོ་བསང་། །ཁམས་གསུམ་དབང་དུ་འདུ་བར་མཛོད། །ཐུགས་ཀྱི་ཚོགས་བདག་སྔོན་པོ་བསང། །ཕ་རོལ་དམག་དཔུང་གཡུལ་ངོ་ཟློག །ཡོན་ཏན་ཚོགས་བདག་སེར་པོ་བསང་། །ལོངས་སྤྱོད་མངའ་ཐང་རྒྱས་པར་མཛོད། །ཕྲིན་ལས་ཚོགས་བདག་མཐིང་ག་བསང། །གནོད་བྱེད་དགྲ་བགེགས་རྡུལ་དུ་རློགས། །ཡེ་ཤེས་ལས་ལ་གྲུབ་པ་ཡི། །ཚོགས་བདག་གླང་སྣ་སྤྲེལ་ཐོད་ལ། །བསང་དང་མཆོད་པ་རྒྱ་ཆེན་འབུལ། །རིགས་ཀྱི་བུ་ལ་རྒྱུད་པའི་ལྷ། །འཁོར་བ་སྲིད་པའི་ལུགས་ཡིན་པས། །ཕྱག་ན་རྡོ་རྗེའི་བཀའ་བཞིན་དུ། །མི་དང་ལྷ་རུ་མ་འབྲལ་ཞིག །རྟག་ཏུ་སྲུང་སྐྱོབ་སྡོང་གྲོགས་མཛོད། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་ཀླུ་མི་མགོན་དཀར་པོའི་བསང་ནི། །ཀྱཻ། རྒྱ་མཚོ་ཆེན་པོ་དྭངས་བའི་དབུས། །རིན་ཆེན་གཞལ་ཡས་ཁང་པ་ནས། །པདྨ་ཟླ་བའི་གདན་སྟེང་དུ། །ཀླུ་རྒྱལ་མི་མགོན་དཀར་པོ་དང་། །ཀླུ་མོ་ཀུན་ཤེས་འོད་ལྡན་དང་། །བློན་པོ་དུང་སྐྱོང་འབར་བ་དང་། །ཀླུ་རྒྱལ་གཙུག་ན་རིན་ཆེན་དང་། །ཀླུ་མོ་མལ་དྲོ་གཟི་
ཅན་དང་། །ཀླུ་ཆེན་བརྒྱད་པོ་འཁོར་བཅས་རྣམས། །སྦྲུལ་མགོ་བདུན་གྱི་གདེངས་ཀ་ཅན། །རིན་ཆེན་དར་གྱི་རྒྱན་དང་ལྡན། །གཞོང་པ་ནོར་བུའི་གང་བ་འཛིན། །ཀླུ་རྒྱལ་འཁོར་དང་བཅས་པ་ལ། །རིན་པོ་ཆེ་དང་ཀླུ་སྨན་དང་། །ཤུག་སྔོན་གཡུ་ཡི་ཐོག་བུ་ཅན། །བལ་བུ་བྱུ་རུའི་ལན་ཚར་ཅན། །མཁན་དཀར་གསེར་གྱི་ཐོག་བུ་ཅན། །སྦ་སྨྱུག་ལ་སོགས་ལྷ་ཤིང་དང་། །ཕྱེ་མར་ཞལ་ཟས་འོ་སྐོལ་དང་། །ཇ་ཆང་ཟས་ཕུད་གསེར་སྐྱེམས་རྣམས། །འབྱུང་བ་མེ་ལ་བསྲེགས་པ་ཡི། །དྲི་ཞིམ་ཡིད་འོང་རྣམས་ཀྱིས་བསང། །དེ་ལྟར་བསང་བའི་བྱིན་རླབས་ཀྱིས། །རྣལ་འབྱོར་བདག་ཅག་འཁོར་བཅས་ལ། །འབྲུ་སྣ་བདུན་གྱི་དངོས་གྲུབ་སྩོལ། །རིན་ཆེན་བདུན་གྱི་དངོས་གྲུབ་སྩོལ། །རྐང་བཞི་ཕྱུགས་ཀྱི་དངོས་གྲུབ་སྩོལ། །ལྷབ་ལྷུབ་གོས་ཀྱི་དངོས་གྲུབ་སྩོལ། །སྙན་གྲགས་མཐུ་ཡི་དངོས་གྲུབ་སྩོལ། །ཚེ་དང་དཔལ་འབྱོར་དངོས་གྲུབ་སྩོལ། །མཆོག་དང་ཐུན་མོང་དངོས་གྲུབ་སྩོལ། །དགྲ་དང་བགེགས་ཀྱི་གནོད་པ་རྣམས། །སྐད་ཅིག་ཉིད་ལ་ཞི་བར་མཛོད། །དེ་ནས་རྨ་རྒྱ་སྤོམ་རའི་བསང་ནི། །ཀྱཻ། ཤར་ཕྱོགས་གངས་རི་རྩེ་རྒྱལ་
ན། །འོད་ཀྱི་གུར་འཁྱིལ་འཇའ་ཚོན་ནང་། །རིན་ཆེན་སྣ་ལྔའི་ཁྲི་སྟེང་ན། །སྐུ་རྒྱལ་ཕུ་བོ་ཆེ་བ་སྟེ། །རྨ་རྒྱལ་སྤོམ་ར་ཡུལ་ལྷའི་གཙོ། །སྐུ་མདོག་དཀར་ལ་འོད་ཟེར་འཕྲོ། །ཐུགས་ཀར་ཡིད་བཞིན་ནོར་བུ་འབར། །ཡ་མཚན་དུང་མི་དུང་རྟ་ཆིབས། །དུང་རྨོག་དུང་ཁྲབ་ལྡེམ་འཕྲུ་ཅན། །ཕྱག་ན་མདུང་དར་ནོར་བུ་འཛིན། །རྨ་རིགས་སུམ་བརྒྱ་དྲུག་ཅུ་དང་། །སྲིང་ལྕམ་བཞི་བཅུ་ཞེ་ལྔ་དང་། །རྨ་སྨན་འབུམ་དང་བཅས་པ་རྣམས། །འདིར་གཤེགས་བསང་དང་མཆོད་པ་བཞེས། །གཡུ་ཤུག་ཕྱེ་མར་དུད་པས་བསང་། །ཇ་ཆང་ཟས་ཕུད་སྐོམ་གྱིས་མཆོད། །བདག་ཅག་དཔོན་སློབ་འཁོར་བཅས་ལ། །རྨ་གཡང་ནམ་མཁའི་ཆར་བཞིན་ཕོབ། །བཙན་ཕྱུག་འཕེན་དར་ཆེ་བ་དང་། །ཅི་འདོད་དངོས་གྲུབ་བསྩལ་དུ་གསོལ། །ཞེས་ལྷ་མོ་དཔལ་དང་ཚོགས་བདག་ཀླུ་རྒྱལ་མི་མགོན་དཀར་པོ་རྨ་སྤོམ་ར་སོགས་ཀྱི་གཡང་བསང་བསྡུས་པ་ཨ་རཱ་གས་བྲིས་པའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།