དཔལ་ཆེན་མོ་ཀུན་འདུས་ཀྱི་རྒྱུན་གཏོར་དང་གསོལ་མཆོད་གཅིག་ཏུ་དྲིལ་བ།
དཔལ་ཆེན་མོ་ཀུན་འདུས་ཀྱི་རྒྱུན་གཏོར་དང་གསོལ་མཆོད་གཅིག་ཏུ་དྲིལ་བ་བཞུགས་སོ།
བཅོམ་ལྡན་ཐུགས་རྗེ་ཅན་ལ་ཕྱག་འཚལ་ནས། །ལྷ་མོ་དཔལ་གྱི་གསོལ་མཆོད་འདི། །འགྲོ་བ་རྣམས་ལ་ཕན་ཕྱིར་བྲི། །ཁྱད་པར་གསང་སྔགས་རྣལ་འབྱོར་པའི། །དཔལ་ལྡན་ལྷ་མོ་ཆེན་མོ་ལ། །མཆོད་བསྟོད་ཕྲིན་ལས་གཞོལ་འདོད་ན། །གཡང་སྒྲུབ་ལས་གསུངས་རང་གཞུང་བཞིན། །དཀྱིལ་འཁོར་བཅའ་གཞི་ལས་ལ་སྦྱོར། །ཀུན་གྱི་ཁ་སྐོང་ལས་གཞུང་བསྲང་། །ཁྱད་པར་ཉ་སྟོང་དུས་ཆེན་དང་། །ཡར་ངོའི་མར་ངོའི་ཚེས་བཅུ་སོགས། །ལྷ་མོ་མཆོད་ཅིང་བརྟེན་འདོད་ན། །ལྷ་མོའི་བཤོས་དུ་ལྷ་གྲངས་བཤམས། །འབྲུ་སྣ་དཀར་གསུམ་དག་གིས་བརྒྱན། །སྨྱུག་རྒོད་མདའ་དར་སྐུ་གཟུགས་རྣམས། །ཙཀ་ལི་བཏགས་ཤིང་དར་གུར་ཕུབ། །གཏོར་མར་བཙུགས་ཤིང་སྨན་རཀ་
བཤམ། །གཏོར་རྫས་འབྲུ་སྣ་ཡིན་པར་བཤད། །སྣོད་གཙང་ནང་དུ་གཏོར་མཆོད་ཚོགས། །ཅི་འབྱོར་བཤམས་ལ་བདག་ཉིད་ཡི་དམ་གྱི། །ཏིང་ངེ་འཛིན་གསལ་བའི་ངང་ལས། །རཾ་ཡཾ་ཁཾ། ལན་གསུམ། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས་ཤིང་། །གྱེར་སྒོམ་གསལ་འདེབས་འདི་ལྟར་རོ།། རང་ཉིད་ཡི་དམ་ལྷའི་ཐུགས་ཀའི་ས་བོན་ལས་འོད་ཟེར་འཕྲོས་པས་བྱང་ཕྱོགས་ལྕང་ལོ་ཅན་ནས་ལྷ་མོ་ཆེན་མོ་དཔལ་ཆེན་མོའི་ཐུགས་ཀར་ཕོག་པས་སྔོན་གྱི་དམ་ཚིག་དྲན་ནས་ལྷ་མོ་འཁོར་དང་བཅས་པ་རྣམས་སྤྱན་དྲངས་ཏེ་བདག་གིས་ཅི་བཅོལ་བའི་ལས་ཐམས་ཅད་བྱེད་པར་བསམས་ལ། སྤོས་དང་ཤུག་པ་ཕྱེ་མར་བསྲེགས་ལ་
དབྱངས་ཀྱིས་འདི་སྐད་དོ།། ཧཱུྃ། ཕྱོགས་ནི་ཉི་མ་བྱང་གི་ཕྱོགས། །རི་རབ་ཆེན་པོའི་བྱང་གི་ངོས། །གཉའ་ཤིང་འཛིན་གྱི་རྩེ་མོ་ན། །ལྕང་ལོ་ཅན་གྱི་ཕོ་བྲང་ན། །སྐྱིད་མོའི་ཚལ་བཟང་མེ་ཏོག་འོད། །ཁང་བཟང་གསེར་གྱི་རྒྱལ་མཚན་ན། །བཞུགས་པའི་ལྷ་མོ་ཆེན་མོ་དཔལ། །གྲོགས་མོ་ལྷ་མོ་བརྒྱད་དང་བཅས། །མཚན་ནི་པད་ཕྲེང་དཔལ་ལྡན་མ། །བཀྲ་ཤིས་དཀར་མོ་ནོར་གྱི་བདག །གྲོགས་ཆེན་པད་སྤྱན་བྱེད་པ་མོ། །འོད་ཆེན་རབ་སྦྱིན་རིན་ཆེན་མ། །ཟས་སྦྱིན་དཔལ་ཆེན་གྲོགས་མོ་བརྒྱད། །ནོར་རྒྱུན་ཟླ་ཤེལ་སྦྱིན་བྱེད་མ། །རབ་སྦྱིན་འཕགས་སྦས་རབ་བཟང་མ། །ལྷ་མོ་ཆེན་མོ་དབྱངས་ཅན་མ། །མ་ཐོགས་མྱུར་དུ་ད་ཚུར་བྱོན། །ཞལ་བཞེས་དགོངས་ལ་གནས་འདིར་བྱོན། །དམ་བཅས་དགོངས་ལ་ཕྲིན་ལས་སྒྲུབས། །བུ་ཡིས་སྒྲུབ་པའི་གནས་མཆོག་འདིར། །མ་ལ་གདུང་བས་འབོད་པའི་ཆེ། །དམ་ལ་འདུས་ཤིག་དམ་ལྡན་མ། །ཆ་ལ་བྱོན་ཅིག་ལྷ་མོའི་ཚོགས། །གནས་འདིར་སྤྱན་འདྲེན་གཤེགས་སུ་གསོལ། །འཁོར་བཅས་གནས་འདིར་གཤེགས་སུ་གསོལ། །ལྷ་མོ་འབུམ་སྡེ་གཤེགས་སུ་གསོལ། །བཀའ་ཉན་བྲན་
གཡོག་གཤེགས་སུ་གསོལ། །དྲག་ཏུ་སྤྱོན་ལ་ལས་མཛོད་ཅིག །དགྲ་རྣམས་བསྒྲལ་ཕྱིར་གཤེགས་སུ་གསོལ། །བགེགས་རྣམས་འདུལ་ཕྱིར་གཤེགས་སུ་གསོལ། །ནད་རྣམས་བཟློག་ཕྱིར་གཤེགས་སུ་གསོལ། །བར་ཆད་སེལ་ཕྱིར་གཤེགས་སུ་གསོལ། །རྐྱེན་རྣམས་བསྒྱུར་ཕྱིར་གཤེགས་སུ་གསོལ། །དངོས་གྲུབ་སྩོལ་ཕྱིར་གཤེགས་སུ་གསོལ། །ཨོཾ་དེ་ཝཱི་ཤྲཱི་བཱ་སུ་དྷ་རི་ཎི་ས་པཱ་རི་ཝཱ་ར་བཛྲ་ས་མ་ཡ་ཛ་ཛཿ ཛཿཧཱུྃ་བཾ་ཧོཿ ཏིཥྛ་ལྷན། ཨ་ལ་ལ་ཧོ། མཆོད་པ་འབུལ་བ་ནི། ཧཱུྃ། དཔལ་ལྡན་ལྷ་མོ་འཁོར་བཅས་ལ། །མཆོད་རྫས་སྣ་ཚོགས་འབུལ་བ་ནི། །དཀར་གསུམ་འོ་ཞོ་རྒྱ་མཚོ་འབུལ། །བ་ལི་བརྒྱན་ལྡན་མཆོད་འབུལ་བཞེས། །ཨརྒྷཾ་༴ ཤཔྟ་ཨཱཿཧཱུྃ། དེ་ནས་ལྷ་མོ་རྣམས་ལྗགས་འོད་ཟེར་གྱི་སྦུ་གུས་མཆོད་རྫས་རྣམས་དང་གཏོར་མའི་བཅུད་དྲངས་ཏེ་གསོལ་བས་དགྱེས་ནས་བདག་ལ་མཆོག་ཐུན་མོང་གི་དངོས་གྲུབ་སྩོལ་བར་བསམས་ལ། ཨོཾ་དེ་ཝཱི་ཤྲཱི་བཱ་སུ་དྷ་རི་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་བརྗོད། བསྟོད་པ་ནི། ཧཱུྃ། དཔལ་ཆེན་བཀྲ་ཤིས་པདྨའི་ཕྲེང་། །ནོར་བདག་དཀར་མོ་གྲགས་
ཆེན་མོ། །པདྨའི་སྤྱན་བྱེད་འོད་ཆེན་མོ། །ཟས་སྦྱིན་རིན་ཆེན་རབ་སྦྱིན་མ། །ཟླ་ཤེས་འཕགས་སྦས་རབ་བཟང་མ། །དབྱངས་ཅན་འཁོར་དང་བཅས་ལ་བསྟོད། །མཆོག་ཐུན་དངོས་གྲུབ་མ་ལུས་སྩོལ། །ཅེས་བཟླས་པ་ལ་འབུང་། ཨོཾ་དྷེ་ཝི་ཤི་བ་སུ་དྷ་རི་ཎི་སྭཱ་ཧཱ། རཏ་ན་ཕ་ལ་སི་ཏི་ན་ན་ཁ་ཏི་པུཎྜི་སིདྡྷི་ཧཱུྃ། ཞེས་ཡང་ཡང་བཟླ། འདི་ལྷ་མོའི་རྒྱུད་ནས་བྱུང་བའོ། །འབྲུ་སྣ་གཏོར། གསུར་དུད་རོལ་མོ་འདིར་ཞིང་གཉེར་གཏད་པ་ནི། ཧོ༔ དགོངས་སུ་གསོལ་ལོ་དཔལ་ཆེན་མོ། །གསན་དུ་གསོལ་ལོ་དཔལ་ལྡན་མ། །སྔོན་གྱི་བསྐལ་པ་དང་པོ་ལ། །རི་རབ་ཆེན་པོའི་བྱང་ཕྱོགས་ནས། །ཡང་དག་དཔལ་ཆེན་ཧེ་རུ་ཀས། །དམ་ལ་བཏགས་པའི་གཡར་དམ་དགོངས། །གཡར་དམ་དགོངས་པ་གཉེར་བྱང་ལོངས། །དེ་འོག་བར་གྱི་བསྐལ་པ་ལ། །རི་རབ་ཆེན་པོའི་བྱང་ཤར་མཚམས། །ཡོངས་འདུས་ཤིང་གི་རྩ་བ་ན། །གུ་རུ་རྡོ་རྗེ་ཐོད་ཕྲེང་གིས། །དམ་ལ་བཏགས་པའི་ཐ་ཚིག་དགོངས། །ཐ་ཚིག་དགོངས་ལ་གཉེར་བྱང་ལོངས། །དེ་འོག་བསྐལ་པའི་ཐ་མ་ལ། །ཡང་ལེ་ཤོད་ཀྱི་བྲག་ཕུག་ཏུ། །སློབ་དཔོན་དྷ་ན་སང་ཀྲི་ཏས། །དམ་ལ་བཏགས་པའི་ཁས་ལེན་དགོངས། །
ཁས་ལེན་དགོངས་ལ་གཉེར་བྱང་ལོངས། །ཧཱུྃ། མ་གཅིག་ཁྱོད་ལ་གཉེར་གཏད་པ། །སངས་རྒྱས་བསྟན་པའི་བཞུགས་གཉེར་འདི། །བསྟན་པ་འཛིན་པའི་སྐྱེས་བུ་རྣམས། །ཁྱོད་ལ་གཉེར་གཏད་སྲུངས་ཤིག་སྐྱོབས། །སྐུ་དགྲ་སྒྲོལ་ལ་སུན་མ་ཟློག །བླ་མེད་ཆོས་ཀྱི་ཐེག་པ་རྣམས། །ཁྱོད་ལ་གཉེར་གཏད་སྲུངས་ཤིག་རྒྱུ། །སྒྲུབ་པའི་རྟགས་སྟོན་བཀའ་སྐྱོངས་ཤིག །འཕགས་པའི་དགེ་འདུན་ཆོས་གྲྭ་རྣམས། །ཁྱེད་ལ་གཉེར་གཏད་སྲུངས་ཤིག་སྐྱོབས། །བཤད་སྒྲུབ་ཕྱོགས་བཅུར་རྒྱས་པར་མཛོད། །འཛམ་བུ་གླིང་གི་སྐྱེ་འགྲོ་རྣམས། །ཁྱོད་ལ་གཉེར་གཏད་ལེགས་ཉེས་གཟིགས། །སྡིག་ལྡན་སྒྲོལ་ལ་ཆོས་ལྡན་སྐྱོངས། །རྣལ་འབྱོར་བདག་གི་དགོན་གཞི་མཁར། །ཁྱོད་ལ་གཉེར་གཏད་བདག་ཏུ་ཟུངས། །ཀ་ཆ་དཀོར་སྲུང་དཀོར་རྐུན་སྒྲོལ། །རྣལ་འབྱོར་བདག་གི་རྟ་ཕྱུགས་ནོར། །ཁྱོད་ལ་གཉེར་གཏད་དགྱེས་བསྐང་བཞེས། །ཇག་ཆོམ་སྒྲིབ་ལ་གཅན་སྤྱང་སྲུངས། །རྣལ་འབྱོར་བདག་གི་འཁོར་སློབ་བྲན། །ཁྱོད་ལ་གཉེར་གཏད་སྲུང་སྐྱོབ་མཛོད། །དམ་ལྡན་སྐྱོང་ལ་དམ་མེད་སྒྲོལ། །ཧཱུྃ། དཔལ་ལྡན་ལྷ་མོ་དཔལ་
ཆེན་མོ། །བདག་ཅག་རྣལ་འབྱོར་སྒྲུབ་པ་པོ། །རྗེ་ལྟར་བརྟེན་ནོ་དབང་མ་ཆུང་། །མ་ལྟར་བརྟེན་ནོ་སྙིང་མ་རིང་། །སྲིང་ལྟར་བརྟེན་ནོ་ཚུལ་མ་ཞན། །ཆུང་མར་བྱས་སོ་མཚུངས་མ་ཞན། །མཛའ་མོ་བྱས་སོ་གཞུང་མ་ངན། །གཡོག་མོར་བྱས་སོ་རྒན་མ་ལྗི། །བྲན་ལྟར་བརྟེན་ནོ་རྩལ་མ་ཆུང་། །ཕོ་ཉར་བཏང་ངོ་བང་མ་བུལ། །ཤན་པར་བསྐོས་སོ་དགྲ་མ་ཤོར། །སྲུང་མར་བྱས་སོ་བགེགས་མ་གཏོང་། །བོས་པའི་ཚེ་ན་སྙན་མ་ས། །གཡབ་པའི་ཚེ་ན་སྤྱན་མ་རྟུལ། །བསྐུལ་བའི་ཚེ་ན་རྒྱང་མ་རིང་། །རྦད་པའི་ཚེ་ན་ལས་མ་འགྱངས། །མངག་པའི་ཚེ་ན་བང་མ་བུལ། །དཀར་གསུམ་མངར་གསུམ་བདུད་རྩིའི་མཚོ། །མཆོད་རྫས་སྣ་ཚོགས་འདི་བཞེས་ལ། །བསྔོས་པ་ཙམ་གྱིས་ལྷ་མོ་རྣམས། །ཐམས་ཅད་དགའ་འགུ་ཚིམ་པར་དམིགས། །གཏོར་མ་ཕར་ལ་ཕུལ་བ་ཡིས། །དངོས་གྲུབ་བདག་ལ་ཚུལ་སྩོལ་ཅིག །དགྲ་བགེགས་བཟློག་ལ་བར་ཆད་སྒྱུར། །དེང་ནས་བྱང་ཆུབ་མ་ཐོབ་བར། །བདག་གིས་མགོན་སྐྱབས་སྟོང་གྲོགས་མཛོད། །མཆོད་པ་ཡིན་ནོ་ངོ་མ་ཆུང་། །བརྟེན་པ་ཡིན་ནོ་རྒྱང་མ་རིང་། །སྒྲུབ་པ་ཡིན་ནོ་འཕྲག་མ་
དོག །ལུས་དང་གྲིབ་མའི་ཚུལ་དུ་འགྲོགས། །བསྡུ་བ་རྣམ་བཞི་དབང་དུ་སྡུས། །དཔལ་འབྱོར་ཚེ་བསོད་ཉམས་རྟོགས་སྤེལ། །བཅོལ་བའི་ཕྲིན་འགྲུབ་པར་མཛོད་།ཅེས་གཏོར་མ་གཙང་སར་གཤེགས། །འདོད་པའི་དངོས་གྲུབ་ལེགས་སྩོལ་ནས། །ལྷ་མོ་དཔལ་ཆེན་འཁོར་བཅས་ཀྱི། །སྙིང་ཁྲག་དྭངས་མ་འདི་ཡིན་ཏེ། །དམ་ལྡན་རྣམས་ཀྱིས་བརྩོན་པར་བྱ། །དམ་མེད་རྣམས་ལ་འདི་གསང་ཞིག །དམ་མེད་སྲོག་གི་དབང་པོའི་སྦུབས། །འདི་ལྟར་མཆོད་བསྟོད་ལེགས་བརྟེན་པའི། །ལུས་དང་གྲིབ་མ་ལྟར་འགྲོགས་ཤིང་། །མགོན་སྐྱོབ་སྡོང་གྲོགས་བྱེད་པ་དང་། །དམ་ལ་འགལ་ན་འཁུ་ཞིང་ལྡོག །རང་གཤེད་རང་ལ་འབབ་པར་འགྱུར། །ཡན་ལག་ངེས་ཤེས་དམ་ཚིག་སྲུངས། །མཆོད་བསྟོད་འབུལ་བ་གལ་ཆེ་འོ། །ལྷ་མོ་དབྱིངས་སུ་གཤེགས་པར་བསམ། །འདི་ནི་ཕྲིན་ལས་ཀུན་གྱི་བདག །ཁྱད་པར་ཐུན་མོང་ལས་རྣམས་ཀུན། །མཆོད་ཅིང་བསྟོད་པས་འགྲུབ་པར་བྱེད། །སྒྲུབ་པ་ལས་སྦྱོར་མི་དགོས་སོ། །གསོལ་མཆོད་འབུལ་བས་དོན་ཀུན་འགྲུབ། །སྙིང་ཉེ་དམ་གཙང་འཁུ་ལྡོག་ཆུང་། །རྒྱུན་དུ་ཆག་མེད་མཆོད་བསྟོད་ན། །དཀོར་བདག་མེ་ཚེ་ངེས་པར་བྱེད། །མོ་ཆགས་ཡིན་པས་སེར་སྣ་ཆེ། །ལྷ་མོ་ཡིན་པའི་སྤོས་ངད་ནི། །མེ་ཏོག་ལ་སོགས་ཕྱི་མཆོད་དགྱེས། །ཀླུ་མོ་ཡིན་པས་དཀར་གསུམ་དང་། །མངར་གསུམ་མཆོད་པས་ཐུགས་རྒྱུད་དགྱེས། །ནོར་བདག་ཡིན་པས་འབྲུ་སྣ་དང་། །དར་
ཟབ་གཏོར་མས་ཤིན་ཏུ་དགྱེས། །འདི་ཉིད་རྒྱུན་དུ་བརྟེན་བྱེད་ན། །སྐུ་གཟུགས་བཟོས་ནས་མཛོད་དུ་སྤ། །སྤྱན་གཟིགས་ཀ་ཆ་ཅི་འབྱོར་བཤམས། །དུས་སུ་མཆོད་ཅིང་གཏོར་མ་འབུལ། །དམ་ཚིག་ཡུགས་ས་མཛེ་ཕོ་དང་། །ནལ་དང་རྨུགས་ཀྱི་གྲིབ་ལ་འཛེམ།། ༈ འདི་ལྟར་བྱས་པའི་ལྷ་མོ་དཔལ་ཆེན་མོ། །རབ་ཀྱིས་སྦྲ་ཁྱིམ་དེ་རུ་གནས་འགྱུར་ཏེ། །འབྲིང་གིས་ཞལ་མཇལ་ཐ་མ་རྨི་ལམ་བཟང་། །ལྷ་མོ་འགྲུབ་པའི་རྟགས་ལ་འབྲུ་སྡུད་དང་། །རང་ལ་གཞན་གྱིས་ཕྱག་འཚལ་ཡོན་འབུལ་དང་། །ནས་དང་རོལ་མོའི་སྐད་སྙན་འབུལ། །གཞན་ལ་དབང་བསྐུར་ཆོས་བཤད་ལ་སོགས་རྨི། །མཆོད་བསྟོད་ཡང་ཡང་འབུལ་བ་གལ་ཆེའོ། །ཕྱུག་ཅིང་བདེ་སྐྱིད་ཕུན་སུམ་ཚོགས་པར་འགྱུར། །ཡང་ཐ་ལྷ་མོའི་ཐུགས་ཀྱིས་དགོངས་འགྱུར་ཏེ། །ལོངས་སྤྱོད་དངོས་གྲུབ་འབྱུང་བར་གསུངས་སོ། །འདི་ནི་མདོ་སྡེ་གསེར་འོད་དམ་པ་དང་། ལྷ་མོ་དཔལ་གྱི་མདོ་གར་མཁན་མཆོག་གི་རྒྱུད། གསེར་འོད་གཡང་སྐྱབས་དང་། པདྨ་གཡང་སྐྱོབས་དང་། རྨ་སྤོམ་རའི་གཡང་སྐྱོབས་རྣམས་ཀྱི་དོན་བསྡུས་ཏེ། བདག་གིས་མང་དུ་བསྒྲུབ་སྟེ་དངོས་གྲུབ་མ་བྱུང་། ནུབ་གཅིག་རྨི་ལམ་དུ་བུད་མེད་མཛེས་མ་གཅིག་བྱུང་། བདག་ལ་འོ་མ་ཟངས་སྐྱོགས་གང་གནང་། དངོས་གྲུབ་ཡིན་གསུངས། ལྷ་མོའི་གསོལ་མཆོད་དགོས་པ་ཡིན་གསུངས། དེ་ཕྱིར་རཱ་ག་ཨ་སྱས་སྦྱར་བའོ། །ཉེས་འགལ་མཆིས་ན་ཡེ་ཤེས་སྤྱན་ལྡན་རྣམས་ལ་བཤགས་ཤིང་། དགེ་བས་འབྲེལ་ཐོགས་བར་ཆད་རྐྱེན་ཞི་ནས། བདེ་བ་ཅན་
གྱི་ཞིང་དུ་སྐྱེ་བར་ཤོག །དགེའོ། །སརྦ་མངྒ་ལཾ། །བཀྲ་ཤིས་པར་གྱུར་ཅིག ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།