ལྷ་མོ་དཔལ་གྱི་གཡང་གི་བྱུང་ཐེམ་དང་བྱུང་ཁུངས་གཡང་བྱུང་དང་གཡང་ལེན།
ལྷ་མོ་དཔལ་གྱི་གཡང་གི་བྱུང་ཐེམ་དང་བྱུང་ཁུངས་རྣམས་བཞུགས་སོ༔ གཡང་བྱུང་དང་གཡང་ལེན་བཞུགས་སོ། །
དང་པོ་གཡང་བྱུང་ནི༔ ཀྱེ༔ དང་པོ་གཡང་ལེན་གར་སྲིད་ན༔ སྔོན་གྱི་བསྐལ་པ་དང་པོ་ལ༔ ཁ་བ་ཅན་གྱི་རྒྱལ་ཁམས་སུ༔ སྤྱན་རས་གཟིགས་ཀྱི་སྤྲུལ་པ་ལས༔ སྤྲེའུ་བྱང་ཆུབ་སེམས་དཔའ་བྱུང་༔ ཇོ་མོ་སྒྲོལ་མའི་སྤྲུལ་པ་ལས༔ འབད་པ་ཅན་གྱི་སྲིན་མོ་བྱང་༔ དེ་གཉིས་ཐབས་ཤེས་འབྲེལ་བ་ལས༔ གདོང་དམར་ཕོ་མོ་ཐམས་ཅད་བྱུང་༔ མ་ཡི་འབད་པས་མནར་བ་ལས༔ སྤྲེའུ་རྒྱལ་པོ་ཡར་གཤེགས་པའི༔ པོ་ཊ་ལ་ཡི་རྩེ་མོ་ལ༔ སྤྱན་རས་གཟིགས་ཀྱི་དྲུང་དུ་ཕྱིན༔ སྤྲེའུ་རྒྱལ་པོས་འདི་སྐད་ཞུས༔ ཀྱེ་མ་ལས་ཀྱི་འབྲས་བུ་ལས༔ དབོན་
སྲིང་མང་པོ་འཕེལ་བ་ལས༔ དྲན་པ་གསལ་བ་ལྷ་དང་འདྲ༔ གདུག་རྩུབ་ཆེ་བ་ལྷ་མིན་འདྲ༔ གོས་མེད་གཅེར་བུ་དུད་འགྲོ་འདྲ༔ བཀྲེས་སྐོམ་སྡུག་བསྔལ་ཡི་དྭགས་འདྲ༔ ཤིན་ཏུ་སྡུག་བསྔལ་དམྱལ་བ་འདྲ༔ རིགས་དྲུག་སྡུག་བསྔལ་ང་ལ་ཚང་༔ འདི་ལས་ཐབས་ཤིག་ཞུས་པ་ལ༔ སྤྱན་རས་གཟིགས་ཀྱིས་འདི་སྐད་གསུངས༔ སྤྲེའུ་རྒྱལ་པོ་ལེགས་པར་ཉོན༔ ཁྱོད་ཀྱི་བུ་དང་ཚ་བོ་རྣམས༔ གདོང་དམར་སྲིན་པོ་ཡིན་པར་གསུངས༔ ཁ་བ་ཅན་གྱི་ཞིང་ཁམས་སུ༔ བྱིན་རླབས་སྤྲུལ་པའི་སྤྲེའུ་ཁྱོད༔ ཟས་ལ་འབྲས་ཟན་སྣ་ཚོགས་ཟོ༔ སྐོམ་ན་
འབྱུང་བ་ཆུ་ལ་འཐུང་༔ གོས་ལ་ལྷ་ཡི་ན་བཟའ་གྱོན༔ བསྐལ་པའི་ཕྱྭ་གཡང་དངོས་གྲུབ་ལོངས༔ སྤྱན་རས་གཟིགས་ཀྱིས་དེ་སྐད་གསུངས༔ དེ་ནས་སྤྲེའུ་རྒྱལ་པོ་དེས་སྔགས་འཆང་རྒྱལ་པོ་སྤྱན་དྲངས་ནས༔ ལྷ་གཞི་དཀར་པོའི་སྟེང་དུ་ནི༔ དཀོན་མཆོག་མཆོད་པ་རྒྱ་ཆེན་བཤམས༔ མདའ་དར་དངུལ་དཀར་མེ་ལོང་གཡབ༔ ཁུ་ཡེ་ཟེར་ཞིང་འོ་དོད་བོས༔ ཐུགས་རྗེ་ཆེན་པོའི་བྱིན་རླབས་ལས༔ སྔགས་འཆང་བདག་གིས་སྨྲས་སྔགས་བོས༔ དབུ་ནག་བོད་ཀྱི་བསོད་ནམས་ལས༔ འོད་ཟེར་དེ་ལས་འོད་འཕྲོས་པས༔ ཚངས་པ་དུང་འོད་དཀར་པོ་ལས༔ ལྷ་ཡི་ལོངས་སྤྱོད་འཕེལ་བ་ལས༔ འོད་དཔུང་དཀར་པོ་གཅིག་ཏུ་སྤྲུལ༔ ལྷ་ཡི་ལོངས་སྤྱོད་བོད་དུ་འོང་༔ བོད་ལྷ་ཁམས་འདྲ་བ་དེ་ནས་སྲིད༔ འོད་ཟེར་འོག་ཏུ་འཕྲོས་པ་ལས༔ ཀླུ་རྒྱལ་གཙུག་ན་རིན་ཆེན་ལ༔ ཀླུ་ཡི་ལོངས་སྤྱོད་འཕེལ་བ་ལས༔ ཀླུ་ཡི་ལོངས་སྤྱོད་བོད་དུ་འོང་༔ བོད་ཀླུ་དང་འདྲ་བ་དེ་ནས་སྲིད༔ འོད་ཟེར་བར་སྣང་ཁམས་སུ་འཕྲོས༔ བར་གཉན་གྱི་ལོངས་སྤྱོད་འཕེལ་བ་ལས༔ གཉན་གྱི་ལོངས་སྤྱོད་བོད་ལ་འོང་༔ བོད་གཉན་དང་འདྲ་བ་དེ་ནས་སྲིད༔
འོད་ཟེར་ཤར་ཕྱོགས་གླིང་དུ་འཕྲོས༔ ཡུལ་འཁོར་སྲུང་གི་རྒྱལ་པོ་ལ༔ ལོངས་སྤྱོད་ལྡན་ཞིང་སྐྱེ་བ་བཟང་༔ ཤར་ཕྱོགས་གཡང་རྣམས་བོད་ལ་འོང་༔ བོད་སྐྱེ་བ་བཟང་བ་དེ་ནས་སྲི༔ འོད་ཟེར་ལྷོ་ཕྱོགས་གླིང་དུ་འཕྲོས༔ འཕགས་སྐྱེས་པོ་ཡི་རྒྱལ་པོ་ལ༔ ལོངས་སྤྱོད་ལྡན་ཞིང་དཀོར་ནོར་ཕྱུགས༔ ལྷོ་ཕྱོགས་གཡང་རྣམས་བོད་ལ་འོང་༔ བོད་ལོངས་སྤྱོད་ཆེ་བ་དེ་ནས་སྲིད༔ འོད་ཟེར་ནུབ་ཕྱོགས་གླིང་དུ་འཕྲོས༔ སྤྱན་མི་བཟང་གི་རྒྱལ་པོ་ནི༔ ལོངས་སྤྱོད་ལྡན་ཞིང་དཀོར་ནོར་ཕྱུག༔ ནུབ་ཕྱོགས་གཡང་རྣམས་བོད་དུ་འོང་༔ བོད་མི་འཕེལ་མང་བ་དེ་ནས་སྲིད༔ འོད་ཟེར་བྱང་ཕྱོགས་གླིང་དུ་འཕྲོས༔ རྣམ་ཐོས་སྲས་ཀྱི་རྒྱལ་པོ་ནི༔ ལོངས་སྤྱོད་ལྡན་ཞིང་སྐུ་ཚེ་རིང་༔ བྱང་ཕྱོགས་གཡང་རྣམས་བོད་དུ་འོང་༔ བོད་སྐུ་ཚེ་རིང་བ་དེ་ནས་སྲིད༔ འོད་ཟེར་ཕྱོགས་མཚམས་གླིང་དུ་འཕྲོས༔ ཕྱོགས་མཚམས་ནོར་ལྷ་རྣམས་ལ་འཕྲོས༔ དེ་རྣམས་ལོངས་སྤྱོད་བོད་དུ་འོང་༔ བོད་ནོར་ཕྱུགས་འཕེལ་བ་དེ་ནས་སྲིད༔ འོད་ཟེར་རྒྱ་གར་ཡུལ་དུ་འཕྲོས༔ རྒྱ་གར་ཆོས་རྣམས་བོད་དུ་འོང༔ བོད་ཆོས་ལ་དཀར་བ་དེ་ནས་སྲིད༔ འོད་
ཟེར་སྟག་གཟིག་ཡུལ་དུ་འཕྲོས༔ སྟག་གཟིག་དཀོར་ནོར་བོད་ལ་འོང་༔ བོད་དཀོར་ནོར་ཆེ་བ་དེ་ནས་སྲིད༔ འོད་ཟེར་རྒྱ་ནག་ཡུལ་དུ་འཕྲོས༔ རྒྱ་ཡི་གོས་དར་བོད་དུ་འོང་༔ བོད་གོས་དར་ཆེ་བ་དེ་ནས་སྲིད༔ འོད་ཟེར་བོད་ཡུལ་ཀུན་ཏུ་འཕྲོས༔ མི་དང་གཡང་གཉིས་ཆི་ལི་ལི༔ ཕྱྭ་དང་གཡང་གཉིས་སྒ་ར་ར༔ ལོངས་སྤྱོད་སྣ་ཚོགས་དེ་ནས་འཚོགས༔ སྔོན་གྱི་སྨོན་ལམ་དབང་གིས་ནི༔ དར་དཀར་གཡབ་ཅིང་སྤྱན་འདྲེན་ན༔ དེ་རིང་གཡང་འབོད་གཡང་ཞིག་འབོད༔ སྟེང་ཕྱོགས་ལྷ་ཁམས་ཡོངས་ཀྱི་གཡང་། དེ་རིང་གཡང་འབོད་གཡང་ཞིག་འབོད༔ བར་སྣང་གཉན་གྱི་རྒྱལ་པོའི་གཡང་༔ དེ་རིང་གཡང་འབོད་གཡང་ཞིག་འབོད༔ ས་གཞི་ཀླུ་ཁམས་རྒྱལ་པོའི་གཡང་༔ དེ་རིང་གཡང་འབོད་གཡང་ཞིག་འབོད༔ ཤར་ཕྱོགས་ཡུལ་འཁོར་སྲུང་གི་གཡང་༔ དེ་རིང་གཡང་འབོད་གཡང་ཞིག་འབོད༔ ལྷོ་ཕྱོགས་འཕགས་སྐྱེས་པོ་ཡི་གཡང་༔ དེ་རིང་གཡང་འབོད་གཡང་ཞིག་འབོད༔ ནུབ་ཕྱོགས་སྤྱན་མི་བཟང་གི་གཡང་༔ དེ་རིང་གཡང་འབོད་གཡང་ཞིག་འབོད༔ བྱང་ཕྱོགས་རྣམ་ཐོས་སྲས་ཀྱི་གཡང་༔ དེ་རིང་གཡང་འབོད་
གཡང་ཞིག་འབོད༔ ཕྱོགས་སྐྱོང་ནོར་ལྷ་རྣམས་ཀྱི་གཡང་༔ དེ་རིང་གཡང་འབོད་གཡང་ཞིག་འབོད༔ ཡི་དམ་ལྷ་ཡི་དངོས་གྲུབ་གཡང་༔ དེ་རིང་གཡང་འབོད་གཡང་ཞིག་འབོད༔ མ་དང་མཁའ་འགྲོའི་རྟེན་འབྲེལ་གཡང་༔ དེ་རིང་གཡང་འབོད་གཡང་ཞིག་འབོད༔ ཆོས་སྐྱོང་སྲུང་མའི་མཐུ་རྩལ་གཡང་༔ དེ་རིང་གཡང་འབོད་གཡང་ཤིག་འབོད༔ ལྷ་སྲིན་སྡེ་བརྒྱད་དྲག་རྩལ་གཡང་༔ དེ་རིང་གཡང་འབོད་གཡང་ཞིག་འབོད༔ རྒྱ་གར་ཆོས་གཡང་རྒྱ་ནག་དར་གཡང་དེ༔ དེ་རིང་གཡང་འབོད་གཡང་ཞིག་འབོད༔ སྟག་གཟིག་ནོར་གཡང་གེ་སར་དམག་གཡོང་དེ༔ དེ་རིང་གཡང་འབོད་གཡང་ཞིག་འབོད༔ དགུང་སྔོན་ཆུ་གཡང་ས་ཡི་རྨ་གཡང་དེ༔ དེ་རིང་གཡང་འབོད་གཡང་ཞིག་འབོད༔ ཉི་ཟླ་སྐར་གསུམ་བཀྲག་གཡང་དེ༔ དེ་རིང་གཡང་འབོད་གཡང་ཞིག་འབོད༔ རི་རབ་བརྟན་གཡང་མཚོ་བདུན་འཁྱིལ་བའི་གཡང་༔ དེ་རིང་གཡང་འབོད་གཡང་ཞིག་འབོད༔ གླིང་ཆེན་བཞི་དང་གླིང་ཕྲན་བརྒྱད་ཀྱི་གཡང་༔ དེ་རིང་གཡང་འབོད་གཡང་ཞིག་འབོད༔ དཔག་བསམ་ཤིང་དང་རྩི་ཐོག་འབྲས་བུ་གཡང་༔ དེ་
རིང་གཡང་འབོད་གཡང་ཞིག་འབོད༔ འཆི་མེད་རྡོ་རྗེ་ཚེ་ཡི་གཡང་༔ དེ་རིང་གཡང་འབོད་གཡང་ཞིག་འབོད༔ ཕྱུག་པོ་རྣམས་ཀྱི་ཕྱུག་གཡང་དེ༔ དེ་རིང་གཡང་འབོད་གཡང་ཞིག་འབོད༔ བཙན་པོ་རྣམས་ཀྱི་བཙན་གཡང་དེ༔ དེ་རིང་གཡང་འབོད་གཡང་ཞིག་འབོད༔ སྙན་གྲགས་བསོད་ནམས་ཚེ་ཡི་གཡང་༔ དེ་རིང་གཡང་འབོད་གཡང་ཞིག་འབོད༔ ཕྱྭ་དང་གཡང་གི་གདོང་རིགས་ཤོག༔ གཡང་རྫས་འདི་ལ་བརྟན་པར་ཤོག༔ ཕྱྭ་གཡང་ཇི་སྲིད་ཐམས་ཅད་འདིར་ཤོག་ཤོག༔ ཛ༔ཧཱུྃ་བཾ་ཧོཿ ལྷ་མོ་དཔལ་གྱི་གཡང་འགུགས་གཡང་འབོད་བྱ་བ་འདི་ནི༔ རཱ་ག་ཨ་སྱས་སྦྱར་བའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།