གཡང་གཏད་བསྡུས་པ་དང་བཀྲ་ཤིས།
གཡང་གཏད་བསྡུས་པ་དང་བཀྲ་ཤིས་བཅས་བཞུགས་སོ།
དེ་ནས་མདའ་དར་བཟུང་ལ་འདི་སྐད་དོ།། ཧཱུྃ། རྣམ་ཐོས་བུ་ཡི་ཕྱག་མདའ་འདི། །བསྐོར་བ་ཙམ་གྱིས་གཡུལ་ལས་རྒྱལ། །རག་པ་ཙམ་གྱིས་ཕྱུ་གཡང་འབེབས། །གཡང་མདའ་གཡང་བསྐོར་སྒ་ར་ར། །གཡང་མདའ་གཡང་བསྐོར་ཀྱི་ལི་ལི། །ཕྱེ་མར་ཐོགས་ལ། ཧཱུྃ། སྔོན་ལྷ་ཡི་དབང་པོ་བརྒྱ་བྱིན་གྱིས། །ལྷ་ཡི་ཕྱེ་མར་བཀོལ་ནས་སུ། །མ་རྨོས་ལོ་ཏོག་རབ་ཏུ་འཕེལ། །ཁྲུས་ཀྱི་རྫིང་བུ་རབ་ཏུ་རྡོལ། །ལྷ་བྲན་མང་པོ་དར་ཞིང་རྒྱས། །དེ་བཞིན་ཡོན་བདག་ལྷ་ཁྱིམ་དཔལ་ཁང་འདིར། །ཕྱེ་མར་གཡང་བསྐོར་སྒ་ར་ར། །ཕྱེ་མར་གཡང་བསྐོར་ཀྱི་ལི་ལི། །
གཡང་བཤོས་ཐོགས་ལ། ཧཱུྃ། གཡང་བཤོས་རི་རབ་བྱས་འདྲ་འདི། །བང་རིམ་གསུམ་ནི་སྐྱབས་གནས་གསུམ། །དབུ་ལ་ཡིད་བཞིན་ནོར་བུ་འབར། །རྒྱུ་སྐར་ལྷ་མོ་གཅལ་དུ་བཀྲམ། །རག་པ་ཙམ་གྱིས་ཚེ་རིང་ཐོབ། །བསྐོར་བ་ཙམ་གྱིས་ཕྱྭ་གཡང་འབེབས། །གཡང་བཤོས་གཡང་བསྐོར་སྒ་ར་ར། །གཡང་བཤོས་གཡང་བསྐོར་ཀྱི་ལི་ལི། །གཡང་ཁུག་ཐོགས་ལ། ཧཱུྃ། གཡང་ཁུག་རིན་ཆེན་སྣོད་ལྡན་འདི། །སྐྱོན་སྐྱོན་ཕྱི་བའི་པགས་པ་དང་། །མྱུར་མགྱོགས་སྲེ་མོང་ཁ་སྤུད་དང་། །གཡང་མོ་ལུག་གི་སོག་བལ་དང་། །སྐར་མ་རྒྱལ་གྱི་ཉིན་པར་
བཟོས། །འདི་ཡི་ནང་སྙིང་འབྲུ་ཡིས་བཀང་། །མི་གྲངས་འཕེལ་བའི་བླ་གནས་ཡིན། །དུང་དང་མགྲོན་བུ་བཏགས་པ་འདི། །བཙན་ཕྱུག་འཕེལ་བའི་བླ་གནས་ཡིན། །སྦ་དང་སྨྱུག་མ་བཏགས་པ་ནི། །ཕྲུ་གཡང་འབེབས་པའི་བླ་གནས་ཡིན། །དམ་དམ་ཕར་ཕུར་བཏགས་པ་ནི། །ཕྱུགས་ནོར་འཕེལ་བའི་བླ་གནས་ཡིན། །འདི་རག་པ་ཙམ་གྱིས་ཕྱུ་གཡང་འབེབས། །བསྐོར་བ་ཙམ་གྱིས་ཚེ་རིང་ཐོབ། །གཡང་ཁུག་གཡང་བསྐོར་ཀྱི་ལི་ལི། །མར་མེ་ཐོགས་ལ། ཧཱུྃ། མར་མེ་གཡང་བསྐོར་སྒ་ར་ར། །མར་མེ་གཡང་བསྐོར་ཀྱི་ལི་ལི། །གཡང་གི་མུན་པ་གསལ་བར་ཤོག །ད་ནི་བཀྲ་ཤིས་བྱ་བ་ནི། ཀུན་ལ་དབང་བསྒྱུར་འཁོར་ལོའི་ཕྱུ། །དབང་དུ་སྡུད་པའི་བཀྲ་ཤིས་གསོལ། །མུན་སེལ་འོད་འབར་ནོར་བུའི་ཕྱུ། །དགོས་འདོད་འབྱུང་བའི་བཀྲ་ཤིས་གསོལ། །ཐམས་ཅད་ཀུན་བསྐྱེད་བཙུན་མོའི་ཕྱུ། །མཛེས་སྡུག་དཔལ་གྱི་བཀྲ་ཤིས་གསོལ། །ཕྱི་ནང་དངོས་གྲུབ་བློན་པོའི་ཕྱུ། །ཕྱི་ནང་བརྗིད་པའི་བཀྲ་ཤིས་གསོལ། །ཐེག་ཆེན་སྟོབས་ལྡན་གླང་པོའི་ཕྱུ། །སྟོབས་ཆེན་ཟིལ་གནོན་བཀྲ་ཤིས་གསོལ། །ཅང་ཤེས་ཤུགས་ལྡན་རྟ་མཆོག་
ཕྱུ། །བདེ་ཆེན་ཞིང་བསྒྲོད་བཀྲ་ཤིས་གསོལ། །ལོག་རྟོག་དཔུང་འཇོམས་དམག་དཔོན་ཁྱུ། །བདུད་ལས་རྒྱལ་བའི་བཀྲ་ཤིས་གསོལ། །མི་དབང་འཁོར་ལོས་སྒྱུར་རྒྱལ་གྱིས། །རིན་ཆེན་སྣ་བདུན་བཀྲ་ཤིས་གང་། །དེང་འདིར་བདག་ཅག་འཁོར་བཅས་ལ། །ཐམས་ཅད་ལྷུན་གྲུབ་བཀྲ་ཤིས་ཤོག །ན་མོ། དབུ་ལ་བཀྲ་ཤིས་གདུགས་ལྟར་མཛེས། །སྐུ་ལ་བཀྲ་ཤིས་མི་ནུབ་རྒྱལ་མཚན་མཆོག །གསུང་ལ་བཀྲ་ཤིས་ཆོས་དུང་གཡས་སུ་འཁྱིལ། །ཐུགས་ལ་བཀྲ་ཤིས་དཔལ་གྱི་བེའུ་གསལ། །སྤྱན་ལ་བཀྲ་ཤིས་རིན་ཆེན་གསེར་གྱི་ཉ། །ལྗགས་ལ་བཀྲ་ཤིས་པདྨ་ལོ་འདབ་རྒྱས། །མགུལ་ལ་བཀྲ་ཤིས་རིན་ཆེན་བུམ་པ་བཟང་། །ཕྱག་ན་བཀྲ་ཤིས་ཡོན་ཏན་ནོར་བུ་མཆོག །ཞབས་ལ་བཀྲ་ཤིས་ཕྲིན་ལས་འཁོར་ལོས་མཚན། །རྫས་མཆོག་བརྒྱད་ཀྱི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སརྦ་མངྒ་ལཾ།། ༈ ལྷ་མོ་དཔལ་གྱི་ཆ་ལག་གཡང་སྐྱབས་ལོངས་སྤྱོད་ཀུན་འདུས་བཞུགས་སོ། །གཡང་བཤོས་སོགས་གཡང་རྫས་ཡོན་བདག་ཕོ་མོ་རྣམས་ཀྱིས་བཀྱག་ལ་གཡང་འགུགས་པ་ནི། །ཀྱཻ། དེ་རིང་གནམ་ལ་སྐར་མ་བཟང་། །དེ་
རིང་ས་ལ་ཉི་མ་དྲོ། །དེ་རིང་དགའ་བའི་ལྷ་གསོལ་ལོ། །དེ་རིང་སྐྱིད་པའི་ཁྱིམ་ཕུབ་བོ། །ཆེ་བཙུན་དེ་ནི་ཆུང་བཙུན་ཡང་། །གཡང་འགུགས་པའི་རྟེན་ནི་འཛུགས་པར་འཚལ། །ཆེ་བསྐོར་དེ་ནི་ཆུང་བསྐོར་ཡང་། །གཡང་ལྷ་དེ་ནི་མ་བསྐོར་ན། །ཟས་ནོར་དེ་ནི་ཉམས་མི་དོགས། །གཡང་འགུགས་དེ་ནི་ལྷ་གསོལ་འཚལ། །དང་པོ་གཡང་འགུགས་གང་དུ་སྲིད། །རྗེ་གཅིག་གཉའ་ཁྲི་བཙན་པོ་དང་། །གནམ་གཟའ་དེ་ནི་སྨིན་དྲུག་གཉིས། །ལྷ་ཁྱིམ་དེ་ནི་གུར་དུ་ཕུབ། །གཡུ་སྒོང་དེ་ནི་རྣམ་དག་མཆོང་། །དེ་དུས་བཀྲ་ཤིས་གཡང་ཁུག་གི །ཁ་ལ་ཉི་མ་ཟླ་བས་བརྒྱན། །ཞབས་ལ་འཁོར་ལོ་རྩིབས་བརྒྱད་ལྡན། །ནང་ནི་རྒྱ་མཚོ་འཁྱིལ་པ་འདྲ། །ཆེ་རྙེད་ཆུང་རྙེད་གཡང་རྫས་རྣམས། །གཡང་ཁུག་དེ་ཡི་ནང་དུ་བསོག །འཇིག་རྟེན་འདས་དང་མ་འདས་དང་། །ནོར་ལྷ་རྣམས་ཀྱི་རྟེན་དུ་བཙུགས། །གཡང་ལྷ་གང་རྒྱལ་འཁོར་བཅས་ཀྱི། །མི་ནོར་ཟས་གསུམ་འཛོམས་པར་བྱས། །སྔོན་ཡང་བཀྲ་ཤིས་གཡང་སྐྱོབ་ནི། །རྗེ་གཅིག་གཉའ་ཁྲི་བཙན་པོ་ཡི། །གཡང་སྐྱོབ་བཀྲ་ཤིས་དེ་ལྟར་ཤོག །ཀྱཻ། དེ་རིང་རྒྱུ་སྦྱོར་ཡོན་བདག་
གིས། །གཡང་སྐྱོབ་བཀྲ་ཤིས་ལྷ་གསོལ་ལོ། །གཡང་སྐྱོབ་བཀྲ་ཤིས་ཕོ་བྲང་དུ། །གཡང་བཤོས་གཏོར་མ་རི་ལྟར་སྤུངས། །གཡང་གི་བདུད་རྩི་མཚོ་ལྟར་བསྐྱིལ། །འདོད་ཡོན་ལོངས་སྤྱོད་སྤྲིན་ལྟར་འཁྲིགས། །ཕྱེ་མར་གངས་ཀྱི་རི་ལྟར་སྤུངས། །སྣ་ཚོགས་ཟས་ཕུད་རྫ་ལྟར་བསྙིལ། །མི་འགྱུར་གཡང་གི་རྟེན་རྣམས་བཤམས། །གཡང་གི་དུད་པ་སྤྲིན་ལྟར་འཁྲིགས། །བླ་མ་ཡི་དམ་མཁའ་འགྲོ་དང་། །སངས་རྒྱས་བྱང་ཆུབ་སེམས་དཔའ་རྣམས། །ཆོས་སྐྱོང་སྲུང་མ་ཐམས་ཅད་དང་། །འགོ་བའི་ལྷ་ལྔ་འཁོར་བཅས་ཀྱི། །ནོར་ལྷ་གཡང་ལྷའི་ཚོགས་བཅས་མཆོད། །བསོད་ནམས་ནོར་གྱི་དངོས་གྲུབ་སྩོལ། །འཛམ་གླིང་གཏེར་གྱི་དངོས་གྲུབ་སྩོལ། །མི་ནོར་ཟས་གསུམ་འཕེལ་བར་མཛོད། །དེ་རིང་ཚེ་ཁུག་གཡང་ཁུག་ཅིག །ཀྱཻ། །ཚེ་བདག་ཆེན་པོའི་ཚེ་ཁུག་ཅིག །གཡང་བདག་ཆེན་པོས་གཡང་ཁུག་ཅིག །ནོར་བདག་ཆེན་པོས་ནོར་ཁུག་ཅིག །བཅུད་བདག་ཆེན་པོས་བཅུད་ཁུག་ཅིག །ཟས་བདག་ཆེན་པོས་ཟས་ཁུག་ཅིག །དཀོན་མཆོག་གསུམ་གྱི་བྱིན་རླབས་ཀྱིས། །མི་ནོར་ཟས་གསུམ་གཡང་ཁུག་ཅིག །བླ་མ་ཡི་
དམ་ཐུགས་རྗེ་ཡིས། །ཁམས་གསུམ་གནས་ནས་གཡང་ཁུག་ཅིག །ཕྱུ་བདག་ཆེན་པོའི་ཕྲུ་ཁུག་ཅིག །མཁའ་འགྲོ་ཆོས་སྐྱོང་ནུས་མཐུ་ཡིས། །སྲིད་གསུམ་གནས་ནས་གཡང་ཁུག་ཅིག །ནོར་ལྷའི་ཚོགས་རྣམས་འཁོར་བཅས་ཀྱིས། །སྟོང་གསུམ་གཡང་རྣམས་འདིར་ཁུག་ཅིག །འགོ་བའི་ལྷ་ལྔ་འཁོར་བཅས་ཀྱིས། །འཛམ་གླིང་གཡང་རྣམས་འདིར་ཁུག་ཅིག །ཀྱཻ། །གཡང་གི་ཡུལ་གསུམ་བྱ་བ་ནི། །སྲིད་པ་ཕྱ་ཡི་ཡུལ་དང་གཅིག །ཡོད་པ་གཡང་གི་ཡུལ་དང་གཉིས། །ཕྱུ་བྲལ་ཏིང་འཛིན་དེ་དང་གསུམ། །གཡང་ཡུལ་གསུམ་ནས་གཡང་ཁུག་ཅིག །གཡང་ཡུལ་གསུམ་ནས་གཡང་ལེན་ནོ། །ཀྱཻ། །གཡང་གི་རི་གསུམ་བྱ་བ་ནི། །འབྲུ་ཡི་ཕུང་པོ་གཡང་གི་རི། །ཕྱུ་བཤོས་གཡང་བཤོས་གཡང་གི་རི། །གཙུག་རི་ཕྱུག་མོ་གཡང་གི་རི། །གཡང་རི་གསུམ་ནས་གཡང་ཁུག་ཅིག །གཡང་རི་གསུམ་ནས་གཡང་ལེན་ནོ། །ཀྱཻ། །གཡང་གི་མཚོ་གསུམ་བྱ་བ་ནི། །བདུད་རྩི་འོ་མའི་མཚོ་དང་གཅིག །སྨུག་པོ་ཞག་གི་མཚོ་དང་གཉིས། །བདུད་རྩི་རིན་ཆེན་མཚོ་དང་གསུམ། །གཡང་མཚོ་གསུམ་ནས་གཡང་ཁུག་ཅིག །གཡང་མཚོ་གསུམ་
ནས་གཡང་ལེན་ནོ། །ཀྱཻ། །གཡང་གི་བྱ་གསུམ་བྱ་བ་ནི། །གཅིག་ནི་ཁྱིམ་བྱ་སྤུ་སྡུག་ལགས། །གཅིག་ནི་གཡང་བྱ་དཀར་མོ་ཡིན། །གཅིག་ནི་བྱ་ཁྱུང་མེ་རུ་གང་། །བྱ་གསུམ་གནས་ནས་གཡང་ཁུག་ཅིག །བྱ་གསུམ་གནས་ནས་གཡང་ལེན་ནོ། །ཀྱཻ། །གཡང་གི་མཁར་གསུམ་བྱ་བ་ནི། །ཕྲུ་ཁུག་གཡང་ཁུག་གཡང་གི་མཁར། །གའུ་ཁ་སྦྱར་གཡང་གི་མཁར། །གཉན་ཆེན་དགུ་བརྩེགས་གཡང་གི་མཁར། །གཡང་མཁར་གསུམ་ནས་གཡང་ཁུག་ཅིག །གཡང་མཁར་གསུམ་ནས་གཡང་ལེན་ནོ། །འདི་ཡན་རྒྱུན་དུ་བཏོན་ཀྱང་རུང་། །ཅེས་གཡང་རྫས་རྣམས་གཡང་ཁུག་ནང་དུ་བླུགས་ནས་འདི་སྐད་དོ།། །ཀྱཻ། གཡང་གི་སྔགས་གསུམ་བྱ་བ་ནི། །ཁུ་ཡེ་ཁུ་སྟོན་ཕྱུ་ཡ་ཕུ་སྟོན་དང་། །གཡང་སྔགས་གསུམ་ནས་གཡང་ཁུག་ཅིག །གཡང་སྔགས་གསུམ་ནས་གཡང་བསྐོར་རོ། །ཁུ་ཡེ་ཁུ་ཡེ་ཕུ་ཁུ་ཡེ། །ཁུ་ཡེ་ཁུ་ཡེ་གཡང་ཁུ་ཡེ། །དེ་ནས་གཡང་གི་གྲོགས་པོ་བྱས་ལ་འདི་སྐད་དོ།། །ཀྱཻ། གཡང་གི་རྒྱ་གསུམ་བྱ་བ་ནི། །མི་གྲོལ་མདུད་ཀྱི་རྒྱ་དང་གཅིག །མི་འཆད་ཕྱག་གི་རྒྱ་དང་གཉིས། །མི་ཤིགས་ཕྱག་གི་རྒྱ་དང་གསུམ། །རྒྱས་བཏབ་འདི་
ནི་མ་འཇིགས་ཤིག །རྒྱས་བཏབ་འདི་ནི་བརྟན་གྱུར་ཅིག ༈ ཕྱེ་མར་གཡང་སྐྱབས་བཞུགས། དེ་ནས་ཕྱེ་མར་གཡང་སྐྱབས་ལ་བསྐུས་ནས་འདི་སྐད་དོ།། །ཀྱཻ། མགོ་ནག་མི་ཡི་ཕྱུ་ལོངས་ལ། །དུད་འགྲོ་ཀུན་གྱི་ཕྲུ་ཁུག་ཅིག །གཡང་ལ་གཡང་འཕེལ་གནག་གིས་གང་། །གཡང་ལ་གཡང་འཕེལ་ལུག་གིས་གང་། །གཡང་ལ་གཡང་འཕེལ་རྟ་ཡིས་གང་། །གཡང་ལ་གཡང་འཕེལ་བོང་བུས་གོང་། །ནོར་ལ་གཡང་འཕེལ་ཕྱུགས་ཀྱིས་གང་། །ཁྱིམ་ལ་གཡང་འཕེལ་མི་ཡིས་གང་། །དེ་ལྟར་བདག་ལ་བསྩལ་དུ་གསོལ། །དེ་རིང་ཧུ་ཡེ་ཧུ་ལྡན་ནོ། །དེ་རིང་ཕྱུ་ཡེ་ཕྱུ་ལྡན་ནོ། །དེ་ནས་དཀྱིལ་ཀ་ལ་བསྐུས་ཏེ་འདི་སྐད་དོ།། །ཀྱཻ། ད་ནི་ཁྱིམ་ལྷ་གཡང་དུ་ལེན། །ཕ་ནི་སྤྱི་ལྷ་གང་པོ་ཡིན། །མ་ནི་སྤྱན་གཟིགས་རྒྱལ་མོ་ཡིན། །བུ་ནི་ཁྱིམ་ལྷ་གེལ་ཐུང་ཡིན། །གསེར་གྱི་ཀ་བ་མ་འབུད་ཅིག །གཡུ་ཡི་གདུང་མ་མ་ཆག་ཅིག །མཐིང་བུ་ལྷོག་ལྷོག་མ་བྱེད་ཅིག །ཕུ་རུ་གཡུ་སྦྲང་མ་ཞན་ཅིག །དབྱར་གསུམ་སྦྲ་ལ་ཐོག་མ་ལྷུང་། །དགུན་གསུམ་གུར་ལ་མེ་མ་ཤོར། །དུང་གི་བྱ་ལག་མ་འཐོར་ཅིག །དངུལ་གྱི་ཆོན་ཐག་མ་ཆད་ཅིག །དེ་རིང་ཧུ་ཡེ་ཧུ་ལྡན་ནོ། །དེ་རིང་ཕྱུ་ཡེ་ཕྲུ་
ལྡན་ནོ། །དེ་ནས་སྒོ་ཐེམ་ལ་བསྐུས་ལ་འདི་སྐད་དོ།། །ཀྱཻ། ཕྱི་སྒོ་ཕྱི་མའི་ནང་ཤེད་ན། །རིན་ཆེན་གསེར་གྱི་མི་བོ་ཆེ། །གསེར་གྱི་སྦ་འཁར་ཕྱག་ན་བསྣམས། །ནང་སྒོ་ཕྱུག་མོ་བྱ་བ་ནི། །ལྕགས་ཀྱི་རྟེན་མཁར་ཕྱག་ན་བསྣམས། །ཕྱི་མི་སྐྱ་བོ་ནང་དུ་མ་བཏང་ཞིག །ནང་མི་སྨུག་པོ་ཕྱི་ལ་མ་འབུད་ཅིག །ལྷ་ལུག་ཐང་ལ་མ་ལྷུང་ཞིག །སྲིད་ཀྱི་གླང་ཆེན་ནང་ལ་མ་གཏོང་ཞིག །དེ་རིང་ཧུ་ཡེ་ཧུ་ལྡན་ནོ། །དེ་རིང་ཕྱུ་ཡེ་ཕུ་ལྡན་ནོ། །དེ་ནས་ཐབ་ནང་དུ་བཏབ་ལ་འདི་སྐད་དོ།། །ཀྱཻ། ཕ་ནི་བཙན་ལྷ་ཕུར་བུ་དང་། །མ་ནི་བྱམས་ལྡན་བཙུན་མོ་ཡིན། །བུ་ནི་ཐབ་ལྷ་རོག་པོ་ཡིན། །སྐྱེད་པུ་གསུམ་པོ་སྐུ་གསུང་ཐུགས། །མེ་ནི་འབྱུང་བའི་དྭངས་མེ་དྲོད། །སྣོད་དགུ་བཙུགས་པ་གཞལ་ཡས་ཁང་། །འདོད་དགུ་གཡང་གི་ཟས་དང་ལྡན། །དེ་རིང་ཧུ་ཡེ་ཧུ་ལྡན་ནོ། །དེ་རིང་ཕྱུ་ཡེ་ཕྱུ་ལྡན་ནོ། །དེ་ནས་སྒམ་ནང་དུ་བླུགས་ལ་འདི་སྐད་དོ།། །ཀྱཻ། དེ་རིང་ཟས་བརྒྱ་ཕར་བཏང་ཡོད། །སང་ཉིན་ཟས་སྟོང་ཚུར་ལ་ཤོག །བརྩིགས་པའི་རི་བོ་མ་ཉིལ་ཞིག །འཁྱིལ་བའི་མཚོ་མོ་མ་སྐམ་ཅིག །ཟད་མེད་གཏེར་ལ་སྤྱོད་པར་ཤོག །དེ་རིང་ཧུ་ཡེ་ཧུ་ལྡན་ནོ། །དེ་
རིང་ཕྱུ་ཡེ་ཕུ་ལྡན་ནོ། །དེ་ནས་བག་མ་ཚུར་ལེན་པའི་ཁ་ལ་བླུག་པར་བྱའོ། །ཕར་འགྲོ་མི་ལ་མི་སྦྱིན། དེ་ནས་ནང་མི་རྣམས་ལ་བྱིན་ནས་འདི་སྐད་དོ། །ཀྱཻ། སྐྱིད་པའི་ཟས་མཆོག་ཕྱེ་མར་འདི། །རིགས་བཟང་ལྡན་པའི་བུའམ་བུ་མོར་སྦྱིན། །དཀོན་མཆོག་གསུམ་གྱི་ཐུགས་རྗེ་ཡིས། །ལོ་བརྒྱ་ཐུབ་པའི་སྨོན་ལམ་དང་། །སྟོན་བརྒྱ་མཐོང་བའི་སྨོན་ལམ་ཞུ། །བདེ་སྐྱིད་དཔལ་ལ་སྤྱོད་པར་ཤོག །བསོད་ནམས་རི་བོ་བཞིན་དུ་བརྟན་པ་དང་། །བརྒྱུད་འཛིན་ཉི་ཟླ་བཞིན་དུ་གསལ་བ་དང་། །སྙན་གྲགས་ནམ་མཁའ་ལྟ་བུར་ཁྱབ་གྱུར་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱང་ཕྱོགས་སྐྱོང་བའི་རྒྱལ་ཆེན་རྣམ་ཐོས་སྲས། །ནོར་གྱི་བདག་པོ་ཨར་ཛཾ་བྷ་ལ། །དབུལ་བ་སེལ་བའི་ལྷ་མོ་ནོར་རྒྱུན་མ། །ནོར་ལྷ་གཏེར་བདག་རྣམས་ཀྱི་བཀྲ་ཤིས་ཤོག །བྱང་ཕྱོགས་སྐྱོང་ཡུམ་ལྷ་མོ་དཔལ་ཆེན་མོ། །ཟས་ནོར་འབྲུ་སྤེལ་བཀྲ་ཤིས་ལྷ་མོ་བཅུ། །སེམས་མ་བརྒྱད་དང་ལྷ་ཆེན་ཚོགས་བདག་ཀླུ། །རྨ་རྒྱལ་ལ་སོགས་ནོར་ལྷའི་བཀྲ་ཤིས་ཤོག །རབ་འབྱམས་རྒྱལ་བ་མ་ལུས་སྐྱེད་པའི་ཡུམ། །ཐུགས་རྗེ་ཚད་མེད་ནོར་གྱི་ཆར་པ་འབེབས། །མརྒད་མདོག་ཅན་
རིན་ཆེན་རྒྱན་གྱིས་སྤྲས། །ལྷ་མོ་དཔལ་ཆེན་མོ་ཡི་བཀྲ་ཤིས་ཤོག །གྲངས་མེད་གོང་ནས་མངོན་པར་བྱང་ཆུབ་མ། །ཐུགས་རྗེ་མཐུ་ཡི་ནོར་སྦྱིན་སེམས་མའི་སྐུ། །གསེར་མདོག་རིན་ཆེན་རྒྱན་ལྡན་མཛེས་སྡུག་མ། །ལྷ་མོ་ཆེན་མོ་བརྒྱད་ཀྱི་བཀྲ་ཤིས་ཤོག །འབད་དང་རྩོལ་བས་མ་གོས་སོགས་དང་། ཉིན་མོ་བདེ་ལེགས་སོགས་བརྗོད། རྟེན་འབྲེལ་སྙིང་པོ་དང་སུ་པྲ་ཏིཥྛ་སོགས་བརྗོད། མདའ་དར་དཀྱིལ་ཀ་ལ་བཙུགས་པར་བྱའོ། །ཞེས་སྔགས་འཆང་རཱ་ག་ཨ་སྱས་སྦྱར་བའོ། །གཡང་ལྷ་ཡེ་ཤེས་པ་རྣམས་སྦྲ་ཁྱིམ་མི་ནོར་འཁོར་དང་བཅས་པ་ལ་བཞུགས། འཇིག་རྟེན་པ་རྣམས་རང་གནས་སུ་གཤེགས་ལོ་ཀ་སརྦ་གཙྪ།