ལྷ་མོ་དཔལ་གྱི་རྗེས་ཆོག
རྗེས་ཆོག་མཆོད་བསྟོད་ཞལ་རྒྱུན་ལྟར་ལ། བཱ་སུ་དྷ་རི་ནི་ས་པ་རི་ཝཱ་ར་བཛྲ་ཨརྒྷཾ་པཱ་དཾ་སོགས་ཤབྟ་པྲ་ཏིཙྪ་སྭཱ་ཧཱ། གྲངས་མེད་གོང་ནས་མངོན་པར་བྱང་ཆུབ་ཀྱང་། །ཐུགས་རྗེའི་མཐུ་ཡིས་ནོར་སྦྱིན་སེམས་མའི་ཚུལ། །གསེར་མདོག་རིན་ཆེན་རྒྱན་ལྡན་མཛེས་སྡུག་མ། །ལྷ་མོ་ཆེན་མོ་བརྒྱད་ལ་ཕྱག་འཚལ་བསྟོད། །བསྟོད་པར་འོས་པ་ཐམས་ཅད་ལ། ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་བསྟོད། །མ་འབྱོར་པ་དང་ཉམས་པ་དང་། །གང་ཡང་ནུས་པ་མ་མཆིས་པ། །བགྱིས་པ་དང་ནི་བགྱིད་བསྩལ་བ། །དེ་ཀུན་མགོན་པོས་བཟོད་པར་གསོལ། །དཀོན་མཆོག་གསུམ་དང་ཨརྱ་ཛཾ་བྷ་ལ། །ལྷ་མོ་དཔལ་དང་འཁོར་གྱི་གྲོགས་མོ་བརྒྱད། །རྣམ་ཐོས་སྲས་སོགས་ཡེ་ཤེས་ནོར་ལྷའི་ཚོགས། །སྦྱིན་བདག་འདོད་པའི་རེ་བ་སྐོང་སླད་དུ། །གཡང་རྟེན་རྣམས་ལ་བརྟན་པར་བཞུགས་ནས་ཀྱང་། །སྦྱིན་བདག་ཆེ་གཡང་ཚོགས་གཉིས་སྤེལ་དུ་གསོལ། །ཨོཾ་ཛྙཱ་ན་བཱ་སུ་དེ་ཝཱི་སུ་པྲ་ཏིཥྛ་བཛྲ་ཡེ་སྭཱ་ཧཱ། ཚོགས་བདག་ཀླུ་རྒྱལ་རྨ་གཉན་འཁོར་དང་བཅས། །སྦྱིན་བདག་འདོད་དོན་མ་ལུས་
བསྒྲུབས་ནས་སླར། །རང་རང་གནས་སུ་གཤེགས་སོ་བཛྲ་མུཿ །སརྦ་ལོ་ཀ་གཙྪ། ཞེས་འཇིག་རྟེན་པ་རྣམས་རང་གནས་སུ་གཤེགས། །གཡང་ལྷ་ཡེ་ཤེས་པ་རྣམས་མདའ་དར་རམ། ཤུག་པ་སྦྲ་ཁྱིམ་སོགས་ལ་ཐིམ་པར་བསམས་ལ། གཡང་ཁུག་ལ་ཉིན་པར་ཚགས་བྱ། གཏོར་མ་ཚོགས་གཡང་རྫས་ལྷག་མ་ནང་མིས་དངོས་གྲུབ་རོལ་ལ་ཞག་བདུན་འབྲིང་ལྔ་ཐ་མའང་གསུམ་ལ་ཟས་དཀར་མཚན་ཅན་ཕྱིར་སྟོང་བར་མི་བྱ། ཤ་ཁྲག་སོགས་མི་གཙང་བའི་ཟས་དང་ཕྱིས་མི་ཡོང་ནང་དུ་མི་འོང་པའི་མཚམས་སྲུང་བསོད་ནམས་ལོངས་སྤྱོད་འཕེལ་བར་བྱ་བ། ལྷ་མོ་དཔལ་གྱི་གཡང་སྐྱབས་བྱ་བའི་ཚེ། ལྷན་ཐབས་སྒོ་ལྕགས་ལྟ་བུ་འདི། པདྨ་རབ་གསལ་བསྐུལ་ཕྱིར་སྙོམས་ལས་པ། ཀརྨ་རཱ་ག་ཨ་སྱའི་སྔོན་རབས་ཀྱི། དོན་བསྡུས་ཚིག་རབ་གསར་དུ་སྤེལ། སྔགས་ཆུང་མང་པོའི་དགའ་སྟོན་རོལ་མོ་སྤེལ།། །།