ལྷ་མོ་དཔལ་གྱི་གཡང་སྐྱབས་ཀྱི་སྒྲུབ་ཐབས་དམིགས་རིམ་ཞལ་གདམས་དཔེའུ་རིས་མན་ངག་ཐུགས་ཀྱི་ཡང་ཏིག་གསལ་བར་བཀོད་པ།
ལྷ་མོ་དཔལ་གྱི་གཡང་སྐྱབས་ཀྱི་སྒྲུབ་ཐབས་དམིགས་རིམ་ཞལ་གདམས་དཔེའུ་རིས་མན་ངག་ཐུགས་ཀྱི་ཡང་ཏིག་གསལ་བར་བཀོད་པ་བཞུགས་སོ། །
ན་མོ་གུ་རུ་དེ་ཝ་ཛཾ་བྷ་ལ་ཡེ། སེམས་ཅན་དབུལ་ཕོངས་ཞི་མཛད་ལྷ་མོ་དཔལ། །བཀྲེས་པའི་སྡུག་བསྔལ་སེལ་བྱེད་ཆེན་མོ་ལ། །བསོད་ནམས་ལོངས་སྤྱོད་མངའ་ཐང་རྒྱས་མཛད་ཕྱིར། །གུས་པས་ཕྱག་འཚལ་འགྲོ་ལ་ཕན་དོན་དུ། །ལྷ་མོ་དཔལ་གྱི་སྒྲུབ་ཐབས་ཟབ་ཁྱད་བྲི། །ཤིན་ཏུ་དབེན་ཞིང་ཉམས་དགའི་གཞི་མ་ལ། །གཞུང་དུ་བཤད་པའི་གཡང་རྫས་སྣ་ཚོགས་བསགས། །བཤོས་ཆེན་བཤོས་ཕྲན་རྣམས་ཀྱང་གཞུང་བཞིན་བཤམས། །གཡས་སུ་ཕོ་ཡི་རྟེན་ལ་མདའ་དར་དང་། །གསེར་དངུལ་ལ་སོགས་རིན་པོ་ཆེ་ཡི་རིགས། །དར་ཚོན་སྣ་ལྔས་བརྒྱན་པ་གཡས་སུ་བཙུགས། །གཡོན་དུ་འབྲི་བརྒྱའི་མར་ལ་མར་ཁུའི་མཚོ། །ལོངས་སྤྱོད་ཐབ་ཁ་རྒྱས་ཕྱིར་གཡོན་དུ་བཤམས། །མདུན་དུ་གཡང་སྒྱེ་གེ་ལུ་བལ་ཚོན་བརྒྱན། །
དེ་ཡི་ནང་དུ་འབྲུ་སྣ་གང་འཛོམ་དང་། །ཕྱུག་པོ་ཡུལ་གྲགས་ཅན་གྱི་སྤུ་སྣ་བཅུག །ལོ་ཐོག་དབང་སྡུད་བཟང་ཞིང་ས་སྣ་བསྡུས། །ཚེ་སྲོག་བརྟན་པའི་བླ་ཤུག་རྒྱབ་ཏུ་འཛུགས། །དངོས་གྲུབ་གང་འདོད་འབྱུང་བའི་ཕྱེ་མར་བཤམས། །ཚེ་རིང་དཔལ་འབྱོར་རྒྱས་པའི་གཡང་རྫས་བསགས། །གཡས་གཡོན་ལྷ་ཀླུ་མདུན་དུ་རྨ་རྒྱལ་གྱི། །བཤོས་བུ་རང་མཐུན་རྫས་ཀྱིས་བསྐོར་བར་བསྐོར། །རྗེ་ལ་འབངས་འཁོར་རྒྱས་པའི་བརྡ་ཡིན་ཕྱིར། །སྤྲུལ་སྐུ་མི་འགྱུར་རྡོ་རྗེའི་བཅའ་ཚུལ་གསུངས། །བདག་གིས་གནམ་ཆོས་ནས་བྱུང་གཏེར་ཆོས་དང་། །ཁྱེད་ཀྱི་ཐུགས་ལས་བྱུང་བའི་ཆོས་གཏེར་འདི། །ཚིག་གི་བསྒྱུར་སོ་མ་གཏོགས་འདྲ་བར་གསུངས། །དེ་སྐད་མི་འགྱུར་རྡོ་རྗེས་གསུངས་པའོ། །བདག་གིས་མི་འགྱུར་རྡོ་རྗེར་འདི་སྐད་ཞུས། །མ་
འོངས་ཕྱི་རབས་དབུལ་པོའི་དོན་ཕྱིར་དུ། །ལྷ་མོ་དཔལ་གྱི་སྒྲུབ་ཐབས་ཆ་ཚང་ཞིག །བྲིས་ནི་འགལ་འཁྲུལ་ཉེས་པ་ཨེ་འབྱུང་ཞུས། །གཞན་ལ་ཕན་ཡང་རང་ཉིད་དབུལ་ཉེས་ཡོད། །དེ་ཕྱིར་མང་དུ་སྤེལ་བར་མི་རུང་གསུངས། །སློབ་དཔོན་ཐུགས་ཀྱིས་གཏེར་ལ་ཉེས་འགལ་མེད། །དེ་སྐད་གསུངས་པས་དམིགས་རིམ་སྒྲུབ་ཐབས་བཀོད། །འདི་ཡི་སྒྲུབ་ཐབས་དམིགས་རིམ་བཀོད་པ་འདི། །དམ་ལྡན་སྙིང་གི་བུ་ནི་མ་གཏོགས་པར། །བཀའ་རྒྱ་ཤིན་ཏུ་ཆེ་བས་སྤེལ་མི་རུང། །ཞེས་སོ། །སྒྲུབ་སྔགས་དམིགས་རིམ་འདི་ཉིད་ནི། །སྒྲུབ་པ་བྱེད་དམ་གཡང་སྐྱབས་དུས། །རྣོ་མྱུར་ལྡན་པའི་དམིགས་རིམ་དང་། །བྱིན་རླབས་ལྡན་པའི་སྒྲུབ་པ་རྣམས། །ཚེས་གྲངས་གཟའ་སྐར་བཟང་པོར་བྱ། །ཞེས་གསུངས། །ཁྲོ་བོ་བདུད་རྩི་འཁྱིལ་པ་ཡི། །ཐུགས་ཀའི་ཧཱུྃ་ཡིག་དེ་ཉིད་ལས། །བདུད་རྩི་རྒྱུན་དུ་བབ་པ་ཡི། །མི་གཙང་ནད་གདོན་སྡིག་སྒྲིབ་ཚོགས། །སྲིན་བུའི་ཚུལ་དུ་བུད་པར་བསམ། །ཁྲུས་ཆུ་གཏོར་བའི་དམིགས་རིམ་ནི། ཧཱུྃ། ང་ནི་ཁྲོ་བོ་བདུད་རྩི་འཁྱིལ། །བདུད་རྩི་འཁྱིལ་པའི་བྱིན་རླབས་ཀྱིས། །སོགས་བརྗོད། སྦྲ་ཁྱིམ་རྣམས་ཐ་མལ་དུ་མ་ཡིན་པ་སྐད་ཅིག་རྒྱུ་རིན་པོ་ཆེ་ལས་གྲུབ་པའི་གཞལ་ཡས་ཀྱི་ཁང་པ་གྲུ་བཞི་སྒོ་བཞི་པ། སྟོང་ཞིང་གསལ་ལ་གསལ་ཞིང་སྟོང་པ་གསེར་གྱི་ར་བ་དང་རིན་པོ་ཆེ་དང་མ་རྨོས་པའི་ལོ་ཏོག་ཕུན་
སུམ་ཚོགས་པ་དུས་འཁོར་བ་མ་སྟོང་བར་དུ་རྒྱུན་མི་འཆད་པའི་ལོངས་སྤྱོད་བསམ་གྱིས་མི་ཁྱབ་པར་བསྒོམས་ལ། གནས་ཁང་བྱིན་གྱིས་རླབས་པ་ནི། ཧཱུྃ། དངོས་གྲུབ་ཀུན་གྱི་བདག་པོ་སྟེ། །ལྷ་མོའི་བྱིན་རླབས་མཛད་པ་ཡི། །ཚེ་དབང་ལོངས་སྤྱོད་ཀུན་གྱི་བདག །གནས་ཁང་བྱིན་གྱིས་བརླབ་ཏུ་གསོལ། །ཅེས་བྱིན་གྱིས་བརླབས་ནས། སྟོང་པའི་ངང་ལས་སྦྲ་ཁྱིམ་འདི། །ཅེས་སོགས་ནས། ས་གཞི་གསེར་ལས་གྲུབ་པའི་པདྨ་འདབ་བརྒྱད་དང་ལྡན་པའི་སྟེང་གི་གཡང་རྫས་བསམ་གྱིས་མི་ཁྱབ་པ་ལས་འོད་འཕྲོས་པས། །གཡང་གི་ལྷ་མོ་དེ་ཉིད་ཀྱིས་དགོངས་ནས། ངས་ཡོན་བདག་འདི་ལ་མི་ཟད་པའི་གཏེར་འཕེལ་ཆེ་བ་འབྲུ་ཡི་དངོས་གྲུབ་ས་ཡི་ལྷ་མོ་དང་ལོངས་སྤྱོད་མཉམ་པའི་མོས་གུས་གདུང་ཤུགས་ཀྱིས་གསོལ་བ་ཡང་ཡང་བཏབ་པ། །ཀྱཻ། དེ་རིང་གཟའ་སྐར་ཚེས་གྲངས་བཟང་། །སོགས་ཅེས་པས། གཡང་གི་ལྷ་མོ་སྐུ་མདོག་ལྗང་སྔོན། ཞལ་གཅིག་ཕྱག་གཉིས་ཞི་འཛུམ་མཛེས་པའི་ཉམས་ཅན་དེ་ཡི་ཐུགས་ཀ་ནས་བཾ་ཡིག་སྔོན་པོ་ལས་འོད་ཟེར་འཕྲོས་པས་ཕྱི་སྣོད་ཀྱི་འཇིག་རྟེན་གྱི་ཁམས་ཐམས་ཅད་ལ་ཕོག་པས་ཕྱི་སྣོད་འཇིག་རྟེན་གྱི་ཚེ་དང་
བསོད་ནམས་བཀྲག་མདངས་གཟི་མདངས་ཐམས་ཅད་འོད་ཟེར་སྔོན་པོའི་ཚུལ་དུ་བསྡུས་ནས་སྦྲ་ཁྱིམ་དང་གཡང་རྫས་རྣམས་ལ་ཐིམ་པས་འབྱོར་པ་ལོངས་སྤྱོད་ལ་སོགས་སྟོང་འཁོར་ལོས་སྒྱུར་བའི་རྒྱལ་པོ་དང་མཉམ་པར་བསམས་ལ། ཧཱུྃ། གཡང་གི་ལྷ་མོ་དཔལ་ཆེན་མོ། སྐུ་མདོག་ལྗང་ཁུ་སོགས་ནས་མོས་གུས་དྲག་པོའི་དབྱངས་སྙན་པོས། བུ་ཡིས་མ་ལ་འབོད་པའི་ཚུལ་ལྟར་ཡིད་བྱམས་པའི་སེམས་ཀྱིས་སྐྱབས་སུ་མཆིའོ་བསམ་ཞིང་མཆོད་དོ།། ཧཱུྃ། གཡང་གི་ལྷ་མོའི་ཐུགས་ཀར་ཉི་གདན་ལ། །སྔགས་ཕྲེང་གཡས་སུ་འཁོར་ཚེ་དཔལ་འབྱོར་རྒྱས། །གཡོན་དུ་འཁོར་ཚེ་བདེ་སྐྱིད་ལོངས་སྤྱོད་ལྡན། །བར་དུ་འཁོར་ཚེ་སྙན་གྲགས་མངའ་ཐང་ཆེ། །སྟེང་དུ་འཁོར་བས་དབུལ་ཕོངས་དགུང་དང་མཉམ། །འོག་ཏུ་འཁོར་བས་གོད་འདྲེ་རྡུལ་དུ་བརླག །སྔགས་ཀྱི་འོད་ཀྱིས་གཡང་གི་ལྷ་ཚོགས་བསྐུལ། །དེ་ཡི་འོད་ཟེར་ནོར་རྒྱུན་མ་ལ་ཕོག །འོག་མིན་གནས་དང་ཕྱོགས་བཅུའི་ཞིང་ཁམས་དང་། །ཁམས་གསུམ་སྲིད་གསུམ་ཚེ་རིང་དཔལ་འབྱོར་སོགས། །བདག་དང་ཡོན་བདག་ལ་ཐིམ་ལོངས་སྤྱོད་ལྡན། །སྔགས་སྒྲ་སྒྲོག་པ་འབྲུག་ལྟར་གྲག་པར་གྱུར། །བསམ། སྙད་ཐེ་དན་ཛི་ནི་གི་ནི་སོགས་
སྟོང་ཕྲག་བདུན་ལས་མི་ཉུང་བར་བཟླས་སོ། ལྷ་མོ་ནོར་རྒྱུན་མའི་ཐུགས་ཀ་བཻ་ཡིག་སེར་པོ་ལས་འོད་ཟེར་འཕྲོས་པས་སྲིད་པ་གསུམ་ལ་ཕོག །སྲིད་པ་གསུམ་གྱི་མངའ་ཐང་དཔལ་འབྱོར་ཐམས་ཅད་ཚུལ་བསྡུས་ནས་གཡང་རྫས་དང་མི་ནོར་ལ་ཐིམ་པར་བསྒོམས་ལ། །ཧཱུྃ། གཡང་གི་ལྷ་མོ་ནོར་རྒྱུན་མ། །ཞེས་སོགས་ནས། ནོར་རྒྱུན་མ་ཡི་ཐུགས་ཀར་བཻ་ཡིག་སེར། །དེ་ལས་འོད་འཕྲོས་ལྷ་མོ་མཆེད་བརྒྱད་བསྐུལ། །མཆེད་བརྒྱད་ཐུགས་ཀའི་འོད་ཟེར་ཕྱོགས་བཅུར་འཕྲོས། །སྲིད་པ་གསུམ་གྱི་ཐུགས་རྗེའི་མཐུ་སྟོབས་དང་། །བདེ་སྐྱིད་ལོངས་སྤྱོད་འདོད་དོན་ཕུན་སུམ་ཚོགས། །ཚེ་དཔལ་བསོད་ནམས་མངའ་ཐང་རབ་རྒྱས་ནས། །རྟག་ཏུ་མི་འབྲལ་ཐུགས་རྗེས་བཟུང་དུ་གསོལ། །མི་འབྲལ་འགྲོགས་ལ་གཡང་ལྷ་བརྟན་པར་བཞུགས། །སྔགས་སྒྲ་སྒྲོགས་པས་འགོང་པོ་དམ་སྲི་འདུལ། །གྲག་སྟོང་སྒྲ་དེས་བདེ་སྐྱིད་དངོས་གྲུབ་ཐོབ། །ཅེས་བསྒོམས་ལ། ཏདྱ་ཐཱ། ཛི་ནི་གྷི་ནི་སརྦ་ཨརྦ་ས་དྷ་ན་སོགས་གཞུང་བཞིན། ཨོཾ་ཙནྡ་ཀནེ་ཡེ་སྭཱ་ཧཱ། སོགས་མཆེད་བརྒྱད་སྔགས་ལ། སརྦ་བྷ་སུ་སིདྡྷི་སིདྡྷི་ཧཱུྃ་སྭཱ་ཧཱ། བཏགས། སྒྲུབ་ཐབས་འདི་ལ་རབ་འབུམ་ཕྲག་བརྒྱད། འབྲིང་འབུམ་ཕྲག་
ལྔ། ཐ་མའང་འབུམ་ཕྲག་གསུམ་ལས་མི་ཉུང་བར་བཟླའོ། །དེ་ལྟར་བཟླས་པས་འགྲུབ་པའི་རྟགས་རྣམས་ནི། །མེ་ཏོག་སྣ་ཚོགས་སྐྱེས་སར་ཕྱིན་པ་དང་། །གསེར་དངུལ་རིན་ཆེན་བང་མཛོད་རྙེད་པ་དང་། །རིན་ཆེན་འབྲས་བུ་ལོ་ཐོག་བརྗེ་བ་དང་། །དེ་དག་རྨིས་ན་འགྲུབ་པའི་རྟགས་ཡིན་ནོ། །དུས་ངན་སྙིགས་མར་སྔགས་པ་དམ་མེད་ཀྱི། །ཚད་དང་མི་ལྡན་བསྙེན་སྒྲུབ་མི་བརྩོན་པ། །ཡི་དམ་ལྷ་ལ་སྨད་ཅིང་སྐུར་པ་འདེབས། །ལྷ་ཡང་ཡི་མུག་རི་རབ་ཕར་ལ་གཟིགས། །ལྷ་སྲིན་སྡེ་བརྒྱད་མང་པོ་རླུང་ལྟར་འཚུབ། །འགོང་པོ་དམ་སྲི་སྤུན་དགུསའིས་ཁམས་གང་། །མི་ལ་ཚེ་མེད་ནོར་ལ་དབུལ་ཕོངས་མང་། །ས་བཅུད་ཉམས་ཤིང་ལོ་ཏོག་འབྲས་བུ་མེད། །ཕུན་སུམ་ཚོགས་པའི་རྟགས་རྣམས་ཐམས་ཅད་ནུབ། །མུ་གེ་ནད་ཡམས་མང་པོའི་བསྐལ་པ་དར། །དེ་ཡི་སྡུག་བསྔལ་དཔག་མེད་འབྱུང་བའི་དུས། །ནོར་སྒྲུབ་འདི་ལ་བརྩོན་དང་བུ་སློབ་ཀུན། །མན་ངག་མང་པོའི་བཅུད་བསྡུས་ཡང་སྙིང་ཡིན། །མང་གྲགས་ཆེ་ན་ཀུན་གྱིས་ཉམས་ལེན་དཀའ། །ཉམས་ལེན་བདེ་ཕྱིར་ཀུན་གྱི་དོན་བསྡུས་ཡིན། །འདི་ཉིད་བསྒྲིགས་ན་རུང་དང་མི་རུང་སྙམ། །ཡི་དམ་ལྷ་ལ་གསོལ་བ་ཡང་ཡང་བཏབ། །དེ་ནས་ནོར་རྒྱུན་མ་སོགས་ལྷ་མོ་ལ། །ཚོགས་འཁོར་བསྐོར་ནས་མཎྜལ་བརྒྱ་རྩ་ཕུལ། །དེ་ནས་ཡེངས་མེད་འཁྲུལ་མེད་ངང་ཉིད་ལས། །རྫོགས་རིམ་ཕྱག་རྒྱ་ཆེན་པོ་ནན་ཆེར་སྒོམ། །དེ་དུས་ཡེངས་བའི་སྣང་བ་ཡུད་ཙམ་ལ། །མདུན་གྱི་ནམ་མཁར་པདྨ་ཟླ་བའི་གདན། །དེ་སྟེང་རིན་ཆེན་སྣ་ཚོགས་ཁྲི་
བཟང་སྟེང་། །བུད་མེད་གཞོན་ནུ་མཛེས་མ་ལྟ་ན་སྡུག །ལྟ་བས་མི་བཟོད་གཟི་བརྗིད་མདངས་ལྡན་པའི། །ཞལ་ནས་མཁའ་འགྲོའི་གསུང་དབྱངས་སྙན་པ་ཡིས། །ཚེ་གཅིག་སངས་རྒྱས་སྒྲུབ་པའི་རྣལ་འབྱོར་ལ། ང་ཡི་སྒྲུབ་ཐབས་ཟབ་མོ་བཀོད་པ་ལས། །ཉེས་འགལ་མི་འབྱུང་སེམས་ཅན་དོན་ཕྱིར་དུ། །ཐུགས་ཀྱི་ཡང་སྙིང་བུ་སློབ་གཅིག་ལ་གཏོད། །དངོས་གྲུབ་ལུང་བསྟན་ཐུགས་ཀྱི་ཡང་སྙིང་འདི། །རུ་པ་བརྩོན་འགྲུས་རྒྱ་མཚོ་ཞེས་བྱ་དང་། །། བདག་ལས་ལྷག་པའི་པདྨ་རིག་འཛིན་གྱིས། །ཐུགས་དམ་མཛོད་ལ་ཉམས་ལེན་བརྩོན་འགྲུས་སྐྱོང་། །བཀའ་ཡི་སྲུང་མ་རྨ་རྒྱལ་སྤོམ་ར་ཡིས། །ཐུབ་པར་སྲུངས་ཤིག་མི་མགོན་དཀར་པོའི་ཚོགས། །ཕྱི་རབས་སེམས་ཅན་ལོངས་སྤྱོད་ལྡན་གྱུར་ཅིག །དེ་སྐད་བཀའ་སྩལ་རཱ་ག་ཨ་སྱ་ཡིས། །ལེགས་གཏམ་ཚིག་འཁྱལ་སྨྲས་པ་མ་ཡིན་ཏེ། །ཤིང་རྟ་གྲོ་ཞུན་ཟླ་བའི་ཡར་ཚེས་ཉིན། །ཐུན་བཞི་བར་མར་རྫོགས་པར་བྲིས་པ་འདི། །ཡི་གེ་པདྨ་ཐབས་མཁས་ཞེས་བྱས་བཀོད། །ཉེས་འགལ་བཤགས་ཤིང་དགེ་བས་འགྲོ་ཕན་ཤོག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།