ལྷ་མོ་དཔལ་གྱི་གཡང་གཏད།
ཀྱཻ། དགུང་སྔོན་རིམ་པ་བཅུ་གསུམ་ཡང་སྟེང་ནས། །གནམ་གྱི་གུང་རྒྱལ་གཡང་གི་བུམ་པ་འཛིན། །འཆི་མེད་ཚེ་ཡི་དངོས་གྲུབ་གཡང་དུ་ལེན། །འོག་ཕྱོགས་གཙུག་ན་རིན་ཆེན་གཡང་གི་བདག །ཕྱག་ན་རིན་ཆེན་གཡང་གི་བུམ་པ་འཛིན། །འཛད་མེད་ནོར་གྱི་དངོས་གྲུབ་གཡང་དུ་ལེན། །བར་སྣང་གཉན་རྗེ་གོང་སྔོན་གཡང་གི་བདག །ཕྱག་ན་གཡང་བུམ་དར་དཀར་གཡུ་གིས་བརྒྱན། །ཕྱོགས་བཅུ་ཀུན་གྱི་ཟས་ནོར་གཡང་དུ་ལེན། །རྒྱ་གར་ཆོས་ཀྱི་རྒྱལ་པོའི་ཆོས་གཡང་དང་། །རྒྱ་ནག་ཁྲིམས་ཀྱི་རྒྱལ་པོའི་ཁྲིམས་གཡང་དང་། །སྟག་གཟིག་ནོར་གྱི་རྒྱལ་པོའི་ནོར་གཡང་དང་། །གེ་སར་དམག་གི་རྒྱལ་པོའི་དམག་གཡང་དང་། །ཇི་གིང་ཧོར་གྱི་རྒྱལ་པོའི་བཙན་གཡང་དང། །སྐུ་རྒྱལ་བོད་ཀྱི་རྒྱལ་པོའི་ཚེ་གཡང་རྣམས། །དེ་རིང་ཁུ་ཡེ་ཕྱྭ་དང་གཡང་དུ་ལེན། །ཧྭ་ཡེ་ཧུ་ཡེ་གཡང་བརྟན་ནོ། །སྤུང་སྤུང་བྱོན་ལ་བརྟེན་ཕུར་ཚུགས། །འཆི་མེད་ཚེ་ཡི་དངོས་གྲུབ་དང་། །འཛད་མེད་ནོར་གྱི་དངོས་གྲུབ་དང་། །འཛམ་གླིང་གཏེར་གྱི་དངོས་གྲུབ་དང་། །ཕྱྭ་དང་གཡང་གི་དངོས་གྲུབ་དང་། །རྒྱུ་སྦྱོར་ཡོན་གྱི་བདག་པོ་
འདིའི། །ཕ་མཚུན་དགྲ་བླ་གཡང་དང་བུ་རྒྱུད་འདི། །ཁྱུང་དང་གཤོག་པ་བཞིན་དུ་མ་འབྲལ་ཅིག །སེང་གེ་གཡུ་རལ་བཞིན་དུ་མ་འབྲལ་ཅིག །སྟག་དང་འཛུམ་དྲུག་བཞིན་དུ་མ་འབྲལ་ཅིག །ཉ་མོ་གསེར་མིག་བཞིན་དུ་འབྲལ་མེད་མཛོད། །ཕ་བཙུན་དགྲ་བླའི་གཡང་དང་དངོས་གྲུབ་རྣམས། །ཕ་སྤུན་ཤག་རོག་བུ་སྲིང་གི །ཡུལ་དུ་མ་འཁྱམས་མ་བྲོས་བར། །ཡུལ་མཁར་ཁང་ཁྱིམ་སྦྲ་གུར་དང་། །གོ་མཚོན་རྟེན་རྫས་འདི་རྣམས་ལ། །དུས་རྣམས་རྟག་ཏུ་བརྟན་པར་བཞུགས། ༈ །མཁའ་འགྲོ་ཆོས་སྐྱོང་ཚོགས་ལ་ཕྱག་འཚལ་ལོ། །ཁྱིམ་ལྷ་གེ་ཐུང་ཁྱོད་ལ་གཡང་གཏད་དོ། །གསེར་གྱི་ཀ་བ་ཤགས་སེ་མ་གས་ཤིག །གཡུ་ཡི་གདུང་མ་གྲུམས་སེ་མ་ཆག་ཅིག །ཕྱུ་གཡང་ཐམས་ཅད་ཁྱིམ་ལྷ་གེ་ཐུང་ཁྱོད་ལ་གཏད་དོ། །བཅོལ་ལོ་ཕྱི་སྒོ་འདི་ཕྱི་ནས་སྡོམས་ཤིག །ཕྱི་གསེར་གྱི་མི་བོ་ཆེ་འདི་ཡི་ཕྱག་ན་གསེར་གྱི་འདན་དཀར་བསྣམས། ཕྱི་མི་སྐྱ་བོ་ནང་ལ་མ་བཏང་ཞིག །ནང་སྒོ་འདི་ནང་ནས་སྡོམས་ཤིག །ནང་ལྕགས་ཀྱི་མི་བོ་ཆེ་འདི་ཡི་ཕྱག་ན་ལྕགས་ཀྱི་འདན་སྔོན་བསྣམས། ནང་མི་སྨུག་པོ་ཕྱི་རུ་མ་བཏང་ཞིག །ཁྱིམ་ལྷ་གེ་ཐུང་ཁྱོད་ཀྱིས་སྲིན་
གྱི་གླང་སྣ་སུ་ལ་མ་བཏང་ཞིག །ལྷ་ཡི་ལུ་གུ་ཐང་ལ་མ་འབུད་ཅིག །ཁྱིམ་ལྷ་གེ་ཐུང་ཁྱོད་ལ་གཡང་གཏད་དོ། །ཐབ་ལྷ་ཡུ་མོ་ཁྱོད་ལ་གཡང་གཏད་དོ། །ཞིང་ལྷ་ཚངས་པ་ཁྱོད་ལ་གཡང་གཏད་དོ། །ཕྱུགས་ལྷ་ལྗང་གུ་ཁྱོད་ལ་གཡང་གཏད་དོ། །རྟ་ལྷ་ཨརླ་ཁྱོད་ལ་གཡང་གཏད་དོ། །ལུག་ལྷ་སྨན་བུ་ཁྱོད་ལ་གཡང་གཏད་དོ། །གཡག་ལྷ་རལ་དཀར་ཁྱོད་ལ་གཡང་གཏད་དོ། །འབྲི་ལྷ་ཤམ་པོ་ཁྱོད་ལ་གཡང་གཏད་དོ། །ར་ལྷ་ཚེ་རེ་ཁྱོད་ལ་གཡང་གཏད་དོ། །ཕྱུ་མ་འབྲོས་གཡང་མ་ཉམས་ཤིག །བཀྲ་ཤིས་ཕྱུ་གཡང་བརྟན་པར་མཛོད། བདེ་ལེགས་ཕུན་སུམ་ཚོགས་པའི་གཡང་བརྟན་ནོ། །ཧཱུྃ། གཡང་གི་ལྷ་མོ་དཔལ་ཆེན་མོ། །ལྷ་མོ་ཆེན་མོ་བརྒྱད་དང་བཅས། །ཕྱུ་དང་གཡང་གི་དངོས་གྲུབ་རྣམས། །ཡོན་བདག་སྦྲ་ཁྱིམ་ཞིང་ཁང་ལ། །དུས་རྣམས་ཀུན་ཏུ་བརྟན་པར་བཞུགས། །བུ་ཚ་དབོན་སྲས་འདི་རྣམས་ལ། །ཁ་འཛིན་སྡོང་གྲོགས་མེལ་ཚེ་མཛོད། །ཕྱྭ་དང་གཡང་གི་བརྟན་ཕུར་ཚུགས། །དེ་སྔ་དབུལ་ཕོངས་རྒུད་ནི་མ་མྱོང་སྟེ། །དེ་སྔ་བས་ཀྱང་ཕྱུག་ཅིང་དར་བར་མཛོད། །དེ་སྔ་མི་མེད་རྨོངས་ནི་མ་མྱོང་སྟེ། །དེ་
སྔ་བས་ཀྱང་འཕེན་དར་ཆེ་བར་མཛོད། །དེ་སྔ་ཕ་སྤུན་ནང་ནི་མི་ཞན་ཏེ། །དེ་སྔ་བས་ཀྱང་ནང་བཟང་ཚང་སྐྱིད་མཛོད། །དེ་སྔ་སྡུག་ཅིང་བསྔལ་ནི་མ་མྱོང་སྟེ། །དེ་སྔ་བོས་ཀྱང་སྐྱིད་ཅིང་དགའ་བར་མཛོད། །མགོ་དཀར་མགོ་ནག་རྩིས་བགྲང་མེད་པར་མཛོད། །རྒས་པའི་ཚེ་སྲིངས་གཞོན་པའི་དཔལ་སྐྱེད་ཅིག །ཀྱཻ། །གསོན་དང་ལྷ་མོ་མཆེད་དགུ་ཡང། །ཡུལ་འདིར་ས་ལ་མ་གྲུབ་ཡུལ་གསུམ་ཡོད། །མི་ཡུལ་ལྷ་ཡུལ་གཡང་ཡུལ་འདི་ནི་ཡོད། །ས་མེད་མི་རི་ལྷ་རི་གཡང་རི་གསུམ། །ཆུ་མེད་མི་མཚོ་ལྷ་མཚོ་གཡང་མཚོ་གསུམ། །རྡོ་མེད་མི་མཁར་ལྷ་མཁར་གཡང་མཁར་གསུམ། །ཤིང་མེད་མི་ཤིང་ལྷ་ཤིང་གཡང་ཤིང་གསུམ། །དེ་འདྲའི་ཡ་མཚན་ལྡན་པའི་ཡུལ་འདི་ན། །གཡང་གི་ལྷ་མོ་མཆེད་དགུ་བཞུགས་སུ་གསོལ། །སྔོན་པོ་ནས་ཀྱི་སྙིང་ཁུ་བདུད་རྩི་ཆང་། །ཕྱེ་མར་ཟས་ཕུད་མར་ཁུ་ཇ་ཆང་ཕུད། །གཡང་གི་ལྷ་མོ་མཆེད་དགུར་མཆོད་པར་འབུལ། །མི་རྒྱུད་ཆུ་བས་རིང་ཕྱིར་ཆང་གིས་མཆོད། །མི་འབྲུ་ནས་བས་མང་ཕྱིར་ནས་ཀྱིས་མཆོད། །མི་སྲོག་ལྕགས་ལས་སྲ་ཕྱིར་ལྕགས་ཀྱིས་མཆོད། །མི་བཀྲ་གཡུ་བས་བཀྲ་ཕྱིར་གཡུ་ཡིས་
མཆོད། །དཔའ་རྒྱུད་དར་ཕྱིར་དར་ཚོན་སྣ་ལྔ་འབུལ། །བུ་དང་ཚ་ལ་བྱམས་ཕྱིར་བལ་ཚོན་འབུལ། །མགྱོགས་དར་ཐོབ་ཕྱིར་གསེར་སྲབ་གཡུ་མཐུར་འབུལ། །ཆོས་སྲིད་ཐོབ་ཕྱིར་སྦ་ཡི་ལྕག་ཚན་འབུལ། །སྐྱེ་རྒབ་འཕེལ་ཕྱིར་དཔྱིད་གསུམ་རོལ་ཁས་འབུལ། །གོད་ཁ་ཞི་ཕྱིར་དབྱར་གསུམ་ཤེ་ཕུད་འབུལ། །ཐབ་ཀ་རྒྱས་ཕྱིར་ཇ་ཆང་ཕུད་ཀྱིས་མཆོད། །འདོད་ཡོན་ཕྱེ་མར་ཟས་སྣ་དང་། །གྲོ་དང་གྲོ་མ་མར་ཐུད་དང་། །ཤིང་རྩི་ཇ་ཆང་ཕུད་རྣམས་ཀྱིས། །གཡང་གི་ལྷ་མོ་མཆེད་དགུ་མཆོད། །ཡོན་བདག་མི་ནོར་འཁོར་བཅས་ཀྱི། །སྦྲ་ཁྱིམ་འདི་ལ་བཞུགས་སུ་གསོལ། །བཀྲ་ཤིས་ཅི་རིགས་བརྗོད་པ་བྱའོ། །མཐར་བསྔོ་བ་སྨོན་ལམ་རྣམ་པར་དག་པས་རྒྱས་བཏབ་བྱའོ། །ཨེ་མ་ཧོ། ལྷ་མོ་དཔལ་གྱི་ཆ་ལག་གཡང་༔ གཏད་འདི། །དད་མོས་ཅན་རྣམས་འགའ་རེས་བསྐུལ་བའི་ངོར། །ས་ག་ཟླ་བའི་ཡར་ཚེས་རྒྱལ་ཕུར་ལ། །སྔགས་འཆང་རཱ་ག་ཨ་སྱ་བདག་གིས་སྨྲས། །ཕྱི་རབས་བྱོན་པའི་སྔགས་ཆུང་རྣམས་དང་ཡང་། །འགྲོ་བ་མང་པོའི་དབུལ་ཕོངས་སེལ་བ་དང་། །གཞན་ཕན་མཐའ་ཡས་འབྱུང་བའི་རྒྱུར་གྱུར་ཅིག། །། ༧ བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།