ནོར་རྒྱུན་མའི་སྒྲུབ་ཐབས།
ནོར་རྒྱུན་མའི་སྒྲུབ་ཐབས་བཞུགས་སོ། །
བླ་མ་དཀོན་མཆོག་གསུམ་ལ་སྐྱབས་སུ་མཆི། །འགྲོ་ཀུན་དབུལ་ཕོངས་སྡུག་བསྔལ་བསལ་བའི་ཕྱིར། །བདག་གིས་བཅོམ་ལྡན་ནོར་ལྷ་ཐམས་ཅད་བསྒྲུབ། །འགྲོ་ཀུན་བདེ་ལྡན་སྡུག་བསྔལ་ཀུན་བྲལ་ཞིང་། །བདེ་ལས་ཉམས་བདེ་བཏང་སྙོམས་ལ་གནས་ཤོག་།ཨ་ཆོས་ཀུན་རང་བཞིན་སྟོང་པའི་ངང་ཉིད་ལས། །གཞལ་ཡས་ཁང་གི་ར་བ་གུར་ཁང་ནང་། །པད་ཟླའི་སྟེང་དུ་རང་སེམས་པཾ་ཡིག་ལས། །འོད་འཕྲོས་རྒྱལ་བ་སྲས་བཅས་ཐམས་ཅད་མཆོད། །སེམས་ཅན་ཀུན་གྱི་དབུལ་ཕོངས་བཀྲེས་སྐོམ་བསལ། །འོད་ཟེར་ཚུར་འདུས་ཡོངས་སུ་གྱུར་པ་
ལས། །རང་ཉིད་བཅོམ་ལྡན་ལྷ་མོ་ནོར་རྒྱུན་མ། །གསེར་མདོག་ཞལ་གཅིག་ཕྱག་གཉིས་ཞི་ཞིང་འཛུམ། །ཕྱག་གཡས་མཆོག་སྦྱིན་མཛད་ཅིང་ཕྱག་གཡོན་ན། །གཏེར་གྱི་བུམ་པ་སྙེ་མས་བརྒྱན་པ་འཛིན། །སྣ་ཚོགས་དར་གྱི་སྟོད་གཡོགས་ཤམ་ཐབས་བཅིངས། སྣ་ཚོགས་རིན་ཆེན་དུ་མས་རྣམ་པར་བརྒྱན། །དེ་ཡི་དཔྲལ་བར་ཨོཾ་ཡིག་དཀར་པོ་དང་། །མགྲིན་པར་ཨཱདང་ཐུགས་ཀར་ཧཱུྃ་སྔོན་པོ། །ཐུགས་དབུས་ཟླ་སྟེང་པཾ་ཡིག་སྔགས་ཀྱིས་བསྐོར། །དེ་ལས་འོད་འཕྲོས་རི་རབ་ཆེན་པོའི་བྱང་། །ལྕང་ལོ་ཅན་གྱི་གནས་མཆོག་དམ་པ་ནས། །ནོར་
རྒྱུན་ལྷ་མོ་ནམ་མཁར་སྤྱན་དྲངས་གྱུར། །རང་གི་ཐུགས་ཀ་ནས་སྤྲུལ་མཆོད་པའི་ཚོགས། །ནམ་མཁའ་གང་བས་ལྷ་མོ་མཆོད་པར་གྱུར། །ཨོཾ་བཱ་སུ་དྷ་རི་ནི་སརྦ་པཱུ་ཛ་པྲ་ཏིཙྪ་སྭཱ་ཧཱ། ཛཿཧཱུྃ་བཾ་ཧོས་ལྷ་མོ་བདག་ལ་ཐིམ། །རྒྱལ་བ་རིགས་ལྔ་སྤྱན་དྲངས་དབང་བསྐུར་ནས། །དབུ་གཙུག་རིན་ཆེན་འབྱུང་ལྡན་དབུ་བརྒྱན་གྱུར། །རང་གི་སྙིང་དབུས་ཟླ་བའི་གདན་གྱི་སྟེང་། །ཁཾ་ཡིག་མཐའ་མར་མདུན་ནས་གཡོན་བསྐོར་དུ། །ཡིག་ངོ་ཕྱིར་བསྟན་སྔགས་ཀྱིས་བསྐོར་བ་ལས། །དེ་ཉིད་ཀློག་པའི་ཚུལ་དུ་སྔགས་བཟླས་པས། །སྔགས་ཕྲེང་སེར་པོ་གཡོན་དུ་ཀྱི་ལི་ལི། །འཁོར་བཞིན་པ་ལས་འོད་ཟེར་གསེར་གྱི་མདོག །ཕྱོགས་བཅུར་འཕྲོས་པས་སངས་རྒྱས་བྱང་སེམས་མཆོད། །ཐུགས་རྗེ་བྱིན་རླབས་ཚུར་བསྡུས་བདག་ལ་ཐིམ། །སེམས་ཅན་ཀུན་གྱི་བཀྲེས་སྐོམས་དབུལ་ཕོངས་བསལ། །ཚེ་དང་བསོད་ནམས་ཚུར་བསྡུས་བདག་ལ་ཐིམ། །ཁྱད་པར་གཏེར་བདག་ནོར་ལྷ་ཐམས་ཅད་ཀྱི། །དངོས་གྲུབ་ཡིད་བཞིན་ནོར་བུའི་མཐུ་རྩལ་གྱིས། །ཐམས་ཅད་ཚུར་བསྡུས་ཕྱག་གཡོན་བུམ་པར་ཐིམ། །བུམ་པའི་མཆུ་ནས་དགོས་འདོད་སྣ་ཚོགས་ཀྱི། །ཆུ་བོའི་
ཆར་རྒྱུན་བབས་པས་རང་བཞིན་གང་། །བུམ་པའི་ཁ་རྒྱན་འབྲས་ཀྱི་སྙེ་མ་ལས། །འབྲུ་ཡི་ཆར་བབ་བདག་གི་ཁྱིམ་ཁེངས་གྱུར། ཨོཾ་བཱ་སུ་དྷ་རི་ཎི་སྭཱ་ཧཱ། ཞེས་བརྒྱ་རེ། ཨོཾ་བཱ་སུ་དྷ་རི་རཏྣ་དྷ་རཀྵ་སྭཱ་ཧཱ། ཞེས་བརྒྱ་རེ། ཨོཾ་བཱ་སུ་དྷ་རེ་མ་ཧཱ་བཱ་སུ་བྷིལླི་ནི་ས་ཏཱ་ནི་བཱ་སུ་སྭཱ་ཧཱ། ཞེས་བརྒྱ་རེ། ཨོཾ་བཱ་སུ་དྷ་རི་ནི་མ་མ་ཝ་སུ་པུར་ཎེ་པུཊྚི་ཀུ་རུ་ཡེ་སྭཱ་ཧཱ། ཞེས་དེ་ཉིད་བརྒྱ་འདོན། དེ་ནས་མར་རམ་ཐུད་བྲན། འབྲུ་དང་མེ་ཏོག་སེར་པོ་ཞོ་འོ་མའི་མཆོད་པ་བཤམས་ལ། མདུན་གྱི་གནས་འདིར་མེ་ཏོག་པདྨ་ནི། །འདབ་མ་བཞི་ལྡན་ཡངས་ཤིང་རྒྱ་ཆེ་བའི། །དབུས་དང་ཕྱོགས་བཞིར་ཟླ་བའི་གདན་ལྔ་གསལ། །རང་གི་ཐུགས་ཀའི་ཛཾ་ཡིག་འོད་ཟེར་གྱིས། །ནོར་རྒྱུན་ལྷ་མོ་མཆེད་ལྔ་སྤྱན་དྲངས་ནས། །མདུན་གྱི་པད་ཟླའི་གདན་ལ་བཞུགས་པར་གྱུར། །ཧཱུྃ། རི་རྒྱལ་ལྷུན་པོའི་བྱང་ཕྱོགས་ལྕང་ལོ་ཅན། །རིན་ཆེན་གཏེར་མཛོད་མང་པོའི་ཕོ་བྲང་ནས། །ནོར་རྒྱུན་ལྷ་མོ་མཆེད་ལྔ་གཤེགས་སུ་གསོལ། །རིན་ཆེན་པདྨ་ཟླ་བའི་གདན་སྟེང་དུ། །བདག་ལ་སྤྱན་གྱིས་གཟིགས་ཤིང་བཞུགས་སུ་གསོལ། །སྔོན་གྱི་ཐུགས་བསྐྱེད་དམ་བཅའ་མ་གཡེལ་བར། །བདག་གི་
འདོད་པའི་དོན་རྣམས་འགྲུབ་པར་མཛོད། །ཨོཾ་བཱ་སུ་དྷ་རི་ཎི་ས་པཱ་རི་ཝ་ར་བཛྲ་ས་མཱ་ཛ༔ ཛཿཧཱུྃ་བཾ་ཧོཿ ས་མ་ཡ་ཧཱུྃ། ས་མ་ཡ་ཧོ། ཨ་ཏི་པཱུ་ཧོ། པྲ་ཏི་ཛ་ཧོ༔ ལྷ་མོ་ལྔ་ཡི་ཐུགས་ཀར་ཟླ་བའི་སྟེང་། །གསེར་མདོག་བཻ་ཡིག་རང་རང་སྔགས་ཀྱིས་བསྐོར། །དེ་ལས་འོད་འཕྲོས་སྣང་སྲིད་འཁོར་འདས་ཀྱི། །དངོས་གྲུབ་བསོད་ནམས་ཀུན་བསྡུས་བདག་ལ་ཐིམ། །ཨོཾ་བཱ་སུ་དྷ་རི་ཎི་སྭཱ་ཧཱ། ཨོཾ་བི་བ་སུ་སྭཱ་ཧཱ། མདུན་གྱི་དཔལ་མོ་ནོར་སྦྱིན་མའི་སྙིང་པོའོ། །ཨོཾ་བཱ་སུ་ཤྲཱི་ཡེ་སྭཱ་ཧཱ། གཡས་ཀྱི་ནོར་གཏེར་མའི་སྙིང་པོའོ། །ༀ་ཤྲཱི་བཱ་སུ་མུ་ཁི་སྭཱ་ཧཱ། རྒྱབ་ཀྱི་ནོར་གྱི་དཔལ་ཞལ་མའི་སྔགས་སོ། ཨོཾ་བཱ་སུ་མ་ཏི་ཤྲཱི་ཡེ་སྭཱ་ཧཱ། གཡོན་གྱི་ནོར་གྱི་བློ་གྲོས་མའི་སྔགས་སོ།། འཁོར་རེ་རེ་ལ་གཙོ་མོའི་ཕྱེད་རེ་ཙམ་འདོན་ནོ། །དེ་ནས་དངོས་གྲུབ་ཞུ་བ་ནི། འཕགས་མ་ནོར་རྒྱུན་མཆེད་ལྔ་དགོངས་སུ་གསོལ། །ཁྱེད་ཀྱི་བསྐལ་པ་གྲངས་མེད་གོང་རོལ་ནས། །བཀྲེས་སྐོམ་དབུལ་ཕོངས་ལྡན་པའི་སེམས་ཅན་ཀུན། །ལོངས་སྤྱོད་དངོས་གྲུབ་སྩོལ་བར་བྱ་བའི་ཕྱིར། །སེམས་བསྐྱེད་དམ་བཅའ་དགོངས་མཛད་རྗེས་དགོངས་ལ། །བདག་ལ་འཛད་མེད་ནོར་གྱི་དངོས་གྲུབ་སྩོལ། །ཐུགས་དམ་དུས་ལ་བབ་བོ་ས་མཱ་ཡ། །
གསོལ་བ་བཏབ་པའི་ལྷ་མོ་མཆེད་ལྔ་ཡི། །ཕྱག་གཡོན་རིན་ཆེན་གཏེར་གྱི་བུམ་པ་ནས། །ནོར་དང་ལོངས་སྤྱོད་འདོད་དགུའི་ཆར་རྒྱུན་བབ། །བུམ་པའི་ཁ་རྒྱན་འབྲས་ཀྱི་སྙེ་མ་ལས། །འབྲུ་ཡི་ཆར་བབ་གནས་དང་ས་ཕྱོགས་གང་། །བདག་དང་འགྲོ་ཀུན་དབུལ་ཕོངས་བྲལ་བར་གྱུར། །ཨོཾ་བཱ་སུ་དྷ་རི་ཎི་མ་མ་ན་ན་ཀ་དྷེ་བཱ་སུ་སིདྡྷི་སྭཱ་ཧཱ༔ ཞེས་བརྒྱ་རེ། ཨོཾ་ཤྲཱི་བཱ་སུ་ན་ན་ཁ་དྷེ་བཱ་སུ་སིདྡྷི་སྭཱ་ཧཱ། ཨོཾ་བཱ་སུ་ཤྲཱི་ཡེ་ན་ན་ཁ་དྷེ་བཱ་སུ་སིདྡྷི་སྭཱ་ཧཱ། ༀ་ཤྲཱི་བཱ་སུ་མུ་ཁི་ན་ན་ཁ་དྷེ་བཱ་སུ་སིདྡྷི་སྭཱ་ཧཱ། ཨོཾ་བཱ་སུ་མ་ཏི་ཤྲཱི་ཡེ་ན་ན་ཁ་དྷེ་བཱ་སུ་སིདྡྷི་སྭཱ་ཧཱ། ཞེས་འཁོར་རེ་ལ་གཙོ་མོ་ཅི་ཙམ་བཏོན་པའི་ཕྱེད་རེ་ཙམ་འདོན་ནོ། །དེ་ནས་མཆོད་བསྟོད་བྱ་སྟེ། དེ་ནས། ཧཱུྃ་ལས་རིན་ཆེན་སྣོད་དུ་གཏོར་མ་དང་། །མཆོད་རྫས་ལོངས་སྤྱོད་ཟད་མི་ཤེས་པ་རྣམས། །ཨོཾ་ཨཱཿཧཱུྃ་གིས་ཟད་མེད་བདུད་རྩིར་བསྒྱུར། །ལྷ་མོ་རྣམས་ཀྱིས་གཏོར་མ་བདུད་རྩི་གསོལ། །མཆོད་ཅིང་བསྟོད་པས་ཤིན་ཏུ་མཉེས་པར་གྱུར། །མཆོད་ཡོན་མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་འདོད་པའི་ཡོན་ཏན་ལྔ། །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །འབྲུ་སྣ་དར་ཟབ་རིན་ཆེན་སྣ་ལྔ་
དང་། །དངོས་འབྱོར་ཡིད་སྤྲུལ་མཆོད་པའི་སྤྲིན་ཕུང་འདི། །ནོར་རྒྱུན་ལྷ་མོ་མཆེད་ལྔ་རྣམས་ལ་འབུལ། །དགྱེས་པར་བཞེས་ལ་དངོས་གྲུབ་བསྩལ་དུ་གསོལ། །ཨོཾ་བཱ་སུ་དྷ་རི་ཎི་ས་པཱ་རི་ཝཱ་ར་བྷུ ཛཿཧཱུྃ་བཾ་ཧོཿ པུཝེ དྷུ་པེ་དི་པཾ། གནེ་ནེ་ཝི་དྱ་ཨི་དཾ་བྷ་ལི་ཏ་ཁ་ཁ་ཁཱ་ཧི་ཁཱ་ཧི། བྷཀྵ་ནི་བྷཀྵ་ནི་སྭཱ་ཧཱ། ཞེས་གསུམ་མམ་བདུན་བརྗོད། །ཧཱུྃ། ཕྱོགས་བཅུ་དུས་གསུམ་སངས་རྒྱས་ཐམས་ཅད་ཀྱི། །སྦྱིན་པའི་ཕ་རོལ་ཕྱིན་པའི་ངོ་བོ་ཉིད། །རྒྱལ་བའི་བསྐྱེད་ཡུམ་ལྷ་མོ་ནོར་རྒྱུན་མ། །ས་བཅུའི་སེམས་མ་ཁྱོད་ལ་ཕྱག་འཚལ་བསྟོད། །ཡེ་ཤེས་ལུས་ཅན་མཚན་དང་དཔེ་བྱད་རྫོགས། །དར་སྣའི་སྟོད་གཡོགས་ཤམ་ཐབས་སྨད་དཀྲིས་ཅན། །རིན་ཆེན་དབུ་རྒྱན་ཕྱག་ཞབས་གདུབ་བུས་མཚན། །ནོར་རྒྱུན་མ་ཡི་སྐུ་ལ་ཕྱག་འཚལ་བསྟོད། ་།སེམས་ཅན་དབུལ་ཕོངས་ནད་མང་སྡུག་བསྔལ་ལས། །ཕན་ཕྱིར་སངས་རྒྱས་ཀུན་གྱིས་གསུངས་པའི་སྔགས། །དངོས་གྲུབ་མྱུར་དུ་ཐོབ་པའི་སྙེ་མ་འཛིན། །ནོར་རྒྱུན་མ་ཡི་གསུང་ལ་ཕྱག་འཚལ་བསྟོད། །དུས་གསུམ་སངས་རྒྱས་ཀུན་དང་དགོངས་པ་མཉམ། །འགྲོ་བ་སེམས་ཅན་ཀུན་ལ་བུ་ལྟར་
བརྩེ། །མངོན་ཤེས་དྲུག་ལྡན་ཐུགས་རྗེ་གློག་ལྟར་མྱུར། །ནོར་རྒྱུན་མ་ཡི་ཐུགས་ལ་ཕྱག་འཚལ་བསྟོད། །གང་ཞིག་ཁྱོད་ལ་གུས་པས་གསོལ་བཏབ་ན། །གནོད་སྦྱིན་སྲིན་པོ་ཤ་ཟ་གདོན་གྱི་རིགས། །རླུང་མཁྲིས་བད་ཀན་ལ་སོགས་ནད་ཀྱི་རིགས། །ཐམས་ཅད་ཞི་མཛད་ལྷ་མོ་ཁྱོད་ལ་བསྟོད། །ཚེ་དང་བསོད་ནམས་བཟའ་བཏུང་ལོངས་སྤྱོད་དང་། །འབྲུ་ནོར་བསོད་ནམས་དབང་ཐང་ཐམས་ཅད་རྒྱས། །འཕེལ་ཞིང་རྒྱས་ལ་ཟད་པ་མེད་པར་མཛོད། །གཏེར་བདག་ཆེན་པོ་ཁྱོད་ལ་བདག་བསྟོད་དོ། །གང་གིས་ཁྱོད་ལ་མཆོད་ཅིང་བསྟོད་བྱས་ན། །སྐྱེ་བ་ཀུན་ཏུ་གཟུགས་མཛེས་སྐྱེ་བ་དྲན། །ཕྱུག་ཅིང་ནོར་མང་ཚུལ་ཁྲིམས་ལྡན་པར་སྐྱེ། །ཚེ་རབས་ཀུན་ཏུ་ཕན་བྱེད་མ་ལ་བསྟོད། །གཞན་ཡང་ཁྱོད་ལ་མཆོད་ཅིང་བསྟོད་བྱས་ན། །མི་དགེ་མཚམས་མེད་སྡིག་སྒྲིབ་ཐམས་ཅད་བྱང་། །བདེ་བ་ཅན་དུ་སྐྱེ་ཞིང་ས་བཅུ་ནོན། །གཏན་གྱི་སྐྱབས་གནས་འཕགས་མ་ཁྱོད་ལ་བསྟོད། །དཔལ་གྱི་ནོར་སྦྱིན་མ་དང་ནོར་གཏེར་མ། །ནོར་ཞལ་མ་དང་ནོར་གྱི་བློ་གྲོས་མ། །སྐུ་མདོག་ཆ་ལུགས་ལྷ་མོ་ཉིད་དང་མཚུངས། །འཁོར་གྱི་ལྷ་མོ་བཞི་ལ་
ཕྱག་འཚལ་བསྟོད། །འཕགས་མ་ནོར་རྒྱུན་མ་ཁྱོད་བདག་ལ་དགོངས། །བདག་གིས་ཁྱོད་ལ་རྩེ་གཅིག་གསོལ་འདེབས་ན། །ཐུགས་རྗེ་མ་ཆུང་སྔོན་གྱི་ཐུགས་དམ་དགོངས། །ནད་གདོན་གནོད་པ་ཞི་བའི་ཕྲིན་ལས་མཛོད། །ཚེ་དང་བསོད་ནམས་རྒྱས་པའི་ཕྲིན་ལས་མཛོད། །ཟས་གོས་ལོངས་སྤྱོད་དངོས་གྲུབ་ཆར་ལྟར་ཕོབ། །བང་མཛོད་འབྲུ་ཡི་དངོས་གྲུབ་བསྩལ་དུ་གསོལ། །རྨ་གཡང་ཟས་ཀྱི་དངོས་གྲུབ་བསྩལ་དུ་གསོལ། །ལྷབ་ལྷུབ་གོས་ཀྱི་དངོས་གྲུབ་བསྩལ་དུ་གསོལ། །རྐང་བཞི་ཕྱུགས་ཀྱི་དངོས་གྲུབ་བསྩལ་དུ་གསོལ། །འཆི་མེད་ཚེ་ཡི་དངོས་གྲུབ་བསྩལ་དུ་གསོལ། །ནམ་ཞིག་འདི་ནས་ཚེ་འཕོས་གྱུར་མ་ཐག །བདེ་བ་ཅན་གྱི་ཞིང་དེར་དྲང་དུ་གསོལ། །མ་གཡེལ་ལས་མཛོད་འཕགས་མ་ནོར་རྒྱུན་མ། །མ་གཡེལ་མ་གཡེལ་དཔལ་གྱི་ནོར་སྦྱིན་མ། །མ་གཡེལ་མ་གཡེལ་ལྷ་མོ་ནོར་སྟེར་མ། །མ་གཡེལ་མ་གཡེལ་དཔལ་གྱི་ནོར་ཞལ་མ། །མ་གཡེལ་མ་གཡེལ་ནོར་གྱི་བློ་གྲོས་མ། །དེ་ལ་རྟག་ཏུ་དངོས་གྲུབ་བསྩལ་དུ་གསོལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་ཐུན་གཅིག་ལ་བཏོན་ནས། ཐུན་བསྡུ་བ་ནི། ལྷ་མོ་ལྔ་ལ་ཕྱག་
འཚལ་མཆོད་ཅིང་བསྟོད། །ཆད་ལྷག་འགལ་འཁྲུལ་གང་བྱུང་བཟོད་པར་གསོལ། །སེར་སྣ་འཕྲོག་བཅོམ་ལས་སྒྲིབ་གང་མཆིས་བཤགས། །ཡེ་ཤེས་པ་རྣམས་རང་གནས་གཤེགས་པའམ། །སྐུ་གཟུགས་རྟེན་ལ་བརྟན་པར་བཞུགས་སུ་གསོལ། །བདག་བསྐྱེད་དམ་ཚིག་འོད་ཞུ་སྟོང་པར་གྱུར། །རང་གི་སེམས་ཀྱིས་སེམས་ལ་ཧྲིག་གེ་ལྟོས། །གཟུགས་དང་ཁ་དོག་མེད་པས་སྟོང་པ་ཉིད། །མི་འཕྲོ་ཀྱི་ལེ་གནས་པས་གནས་པ་ཟེར། །སྣ་ཚོགས་གར་ཡང་རྒྱུགས་པས་འགྱུ་བ་ཟེར། །གནས་འགྱུ་ཅི་མཛད་རིག་པས་རིག་པ་ཟེར། །མ་ཡེངས་རྒྱང་སྲུང་བྱེད་པ་ཉམས་ལེན་ཡིན། །དེ་ལ་རྟག་ཏུ་འཇུག་པས་བསྒོམ་ཞེས་ཟེར། །མཐོང་རྒྱུ་མེད་ཡང་མཐོང་བ་ཀུན་གྱི་མཆོག །སེམས་ཉིད་སྟོང་པའི་རང་ངོ་མཐོང་བ་ཡིན། །འདི་ལྟར་འཕགས་མ་བསྙེན་སྒྲུབ་བྱས་པ་སོགས། །དུས་གསུམ་བསགས་པའི་དགེ་བ་ཅི་བསགས་མཐུས། །ཚེ་འདིར་ཚེ་རིང་ནད་མེད་དཔལ་འབྱོར་རྒྱས། །ནམ་ཞིག་འཕོས་ཚེ་བདེ་ཆེན་ཞིང་ཁམས་སུ། །བརྫུས་ཏེ་སྐྱེས་ནས་ས་བཅུ་ཐོབ་པར་ཤོག །འདི་དང་པོ་གཙོ་མོའི་སྙིང་པོ་བྱེ་བ་བཟླ། དེ་ནས་ས་སྟེགས་གྲུ་བཞི་ཁྲུ་དོ་ལ་འབྲུ་ཡི་ཚོམ་བུ་
ལྔ་བཀོད་སྐུ་ཡོད་ན་བཤམས་མེད་ཀྱང་རུང་སྟེ་པདྨ་ཟླ་བའི་གདན་དུ་བསྒོམ་ལ་ལྷ་མོ་ལྔ་གོང་དུ་བཤད་པ་ལྟར་སྤྱན་དྲངས་ལ། སེ་བའི་མེ་ཏོག་སེར་ཆེན་སོགས་མེ་ཏོག་དྲི་ཞིམ་པོ་རྙེད་ཚད་ཀྱི་མཆོད་ནས་བསྙེན་པ་སྟོང་ཕྲག་བཞི་བཟླས་ན་ཟླ་བ་དྲུག་ཚུན་ལ་ཡིད་ལ་ཅི་བསམ་པ་ཐམས་ཅད་འགྲུབ་པར་གསུངས། དེ་མ་ལྕོགས་ན་བདག་མདུན་ལྷ་བསྒོམ་ཞིང་སྙིང་པོ་ཁྲི་ཕྲག་་་་་་་་་་་་་་་བདག་བསྐྱེད་རྐྱང་པ་སྒོམ་བཟླས་བྱས་པས་ཀྱང་ཡིད་ལ་ཅི་བསམ་པ་ཐམས་ཅད་རྫོགས་པར་འགྱུར། ཅེས་པ་འདི་ནོར་རྒྱུན་མའི་མདོ་དང་། ནོར་རྒྱུན་མའི་རྟོགས་པ་གཉིས། ནོར་རྒྱུན་་་་་་་་་བརྒྱ་རྩ་མའི་བསྟོད་པ་དང་། དཔའ་བོ་གཅིག་གྲུབ་རྒྱུད་དང་རྡོ་རྗེ་གུར་གྱི་རྒྱུད་རྒྱ་གཞུང་གསུམ་དང་སྒྲུབ་ཐབས་ཡིག་རྙིང་རྣམས་ཀྱི་དོན་བསྡུས་ཐ་མལ་པས་ཉམས་སུ་ལེན་བདེ་བར་བྱས་སོ། །དེ་སྔོན་བསྐལ་པ་གྲངས་མེད་པའི་སྔོན་རོལ་དུ། སངས་རྒྱས་རྡོ་རྗེ་འཆང་རྒྱ་མཚོའི་དབྱངས་ཞེས་བྱ་བས་ནོར་རྒྱུན་མའི་སྔགས་འདི་གསུངས་སྐད་དོ། །དེ་ནས་བསྟན་པ་འདི་ལ་སྟོན་པ་ཤཱཀྱ་ཐུབ་པ་ཡུལ་ཀོའུ་ཤམ་བའི་ཚེར་མ་ཅན་གྱི་ནགས་ན་སྔོན་བཞུགས་པའི་ཚེ། ཡུལ་དེའི་ཁྱིམ་བདག་ཟླ་བ་བཟང་པོ་ཞེས་བྱ་བ། དབུལ་ཞིང་ཕོངས་པ་བཟའ་མི་མང་པོ་ཡོད་པ་གཅིག་གིས། བཅོམ་ལྡན་འདས་ལ་ཕྱག་འཚལ་ཞིང་བསྐོར་བ་འབུམ་ཐེར་བྱས་ནས། དབུལ་ཕོངས་དང་ནད་མང་བའི་སྡུག་བསྔལ་སེལ་བའི་ཐབས་ཞུས་པས། བཅོམ་ལྡན་འདས་ཀྱིས་ནོར་རྒྱུན་མ་འདི་གསུངས་པས། སྐད་ཅིག་དེ་མ་ཐག་ཏུ་ཁྱིམ་བདག །ནོར་དང་འབྲུ་སྣ་
ཚོགས་ཀྱིས་གང་བར་གྱུར་ཏོ། །འདི་ཉིད་ཐོས་པ་ཙམ་གྱིས་ཀྱང་བདེ་བ་དང་ལོ་ལེགས་གསུངས་སོ། །རྡོ་རྗེ་གུར་གྱི་རྒྱུད་ལས་ནོར་རྒྱུན་མའི་སྒྲུབ་ཐབས་གསུངས་ནས། ནོར་རྒྱུན་རྒྱལ་མོ་བསྒོམ་པར་བྱ། །ནོར་སྦྱིན་ཕྱུག་ཅིང་རྒྱས་པར་གྱུར། །ཅེས་པ་དང་། དཔའ་བོ་གཅིག་གྲུབ་རྒྱུད་ལས་འདི་ཡི་སྒྲུབ་ཐབས་གསུངས་ནས། ཡིད་ལ་བསམ་པ་ཐམས་ཅད་རྫོགས་པར་འགྱུར་རོ། །ཞེས་གསུངས་སོ། །ཞེས་པ་འདི་ཀུན་ལ་ཕན་པའི་དོན་དུ། ཨ་རཱ་གས་བྲིས་པ་ལ་ཉེས་པ་གང་མཆིས་བཤགས་ཤིང་སེམས་ཅན་ཐམས་ཅད་ཀྱི་བསོད་ནམས་འཕེལ་ཞིང་རྒྱས་ནས། ཚེ་འདིར་ཕུན་སུམ་ཚོགས་ཞིང་ཕྱི་མ་བདེ་བ་ཅན་དུ་སྐྱེས་ནས་ས་བཅུའི་གོ་འཕང་ཐོབ་པར་གྱུར་ཅིག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།