གནམ་ཆོས་སྤོམ་རའི་གསོལ་མཆོད་གཡང་སྐྱབས་ཡིད་བཞིན་བསམ་འཕེལ་ནོར་བུ།
གནམ་ཆོས་སྤོམ་རའི་གསོལ་མཆོད་གཡང་སྐྱབས་ཡིད་བཞིན་བསམ་འཕེལ་ནོར་བུ་ཞེས་བྱ་བ་བཞུགས་སོ། །
གུ་རུ་རིན་པོ་ཆེ་ལ་ཕྱག་འཚལ་འདུད༔ སྤོམ་ར་ནོར་ལྷ་ལྟར་དུ་བསྒྲུབ་པ་ནི༔ གཡང་འཕེལ་ཞེས་བྱའི་གཏོར་མ་ཟླུམ་པོ་ནི༔ ཟུར་བརྒྱད་ཟུར་ལ་མར་གྱི་སྐུད་པ་འཐེན༔ རྩེ་མོར་ཉི་ཟླ་ནོར་བུས་བརྒྱན་པར་བྱ༔ མཐའ་ལ་མར་ཐུད་རིལ་བུས་བསྐོར་བ་བྲན༔ རང་ཉིད་པད་འབྱུང་ལ་སོགས་ཡི་དམ་བསྐྱེད༔ མདུན་དུ་རྨ་གཉན་སྤོམ་ར་ནི༔ སྐུ་མདོག་སེར་པོ་ཆས་དང་ལྡན༔ གཡས་པས་སྦ་ལྕག་གཡོན་ནེའུ་ལེ༔ ཆིབས་སུ་རྟ་སེར་འཕུར་ཤེས་ཆིབས༔ ཡུམ་དང་སྲས་འཁོར་ཁྲོམ་ལྟར་བསྐྱེད༔ ཧཱུྃ༔ ཤར་ཕྱོགས་རྨ་གཡང་ཆགས་པའི་ཡུལ༔ གངས་དཀར་རིན་ཆེན་གཞལ་ཡས་ནས༔ གཏེར་སྲུང་སྤོམ་ར་འཁོར་
དང་བཅས༔ མཆོད་ཕྱིར་བསྒྲུབ་ཕྱིར་སྤྱན་འདྲེན་ནོ༔ སྐད་ཅིག་ཉིད་ལ་འདིར་བྱོན་ནས༔ དགྱེས་ཤིང་བརྟན་པར་བཞུགས་སུ་གསོལ༔ སྔོན་ཚེ་སློབ་དཔོན་པདྨ་ཡིས༔ བཀའ་བསྒོས་དམ་ཚིག་དྲན་མཛོད་ལ༔ རྣལ་འབྱོར་བདག་གིས་གང་བཅོལ་བའི༔ ལས་རྣམས་མྱུར་མགྱོགས་འགྲུབ་པར་མཛོད༔ བཛྲ་ས་མ་ཡ་ཛ༔ ཛཿཧཱུྃ་བཾ་ཧོཿ ཏིཥྛ་ལྷན༔ ས་མ་ཡ་ཧོ༔ ཧཱུྃ༔ ཕྱི་ལྟར་ལྷ་བཙན་སྤོམ་ར་གཉན༔ ནང་ལྟར་རྒྱལ་ཆེན་ཡུལ་འཁོར་སྲུང་༔ གསང་བ་ཁྲོ་བོ་རྣམ་པར་རྒྱལ༔ ཡང་གསང་བཅོམ་ལྡན་རྡོ་རྗེ་སེམས༔ འཇིག་རྟེན་འདས་ཀྱང་འཁོར་
བའི་ཚུལ༔ གངས་ཅན་ཤར་ཕྱོགས་སྲུང་མ་མཛད༔ ཁྱེད་ལ་གུས་པས་ཕྱག་འཚལ་ལོ༔ རྨ་རྒྱལ་སྤོམ་ར་འཁོར་བཅས་ལ༔ ཉེར་སྤྱོད་བདུན་དང་འདོད་ཡོན་ལྔ༔ བཀྲ་ཤིས་རྫས་རྟགས་རིན་ཆེན་བདུན༔ འབྲུ་སྨན་དར་ཟབ་རིན་ཆེན་ཚོགས༔ དངོས་སུ་འབྱོར་དང་ཡིད་ཀྱིས་སྤྲུལ༔ དཔག་མེད་མཆོད་སྤྲིན་རྒྱ་མཚོས་མཆོད༔ བྷཾ་ལས་རིན་ཆེན་སྣོད་ཡངས་པར༔ ཁཾ་ལས་གཏོར་མ་བདུད་རྩིའི་མཚོ༔ ཧ་ཧོ་ཧྲི༔ཡིས་བྱིན་བརླབས་པས༔ ཞིམ་མངར་རོ་བཅུད་ཕུན་སུམ་ཚོགས༔ ཟག་མེད་བདེ་བ་སྐྱེད་པ་འདིས༔ གཉན་ཆེན་རྨ་རྒྱལ་སྤོམ་ར་དང་༔ རྨ་རི་རབ་འབྱམས་དྲག་མོ་རྒྱལ༔ རྨ་སྲས་དུང་མི་དཀར་པོ་དགུ༔ རྨ་རིགས་སུམ་བརྒྱ་དྲུག་ཅུ་དང་༔ སྲིང་ལྕམ་བཞི་བཅུ་རྩ་ལྔ་དང་༔ རྨ་སྨན་འབུམ་དང་བཅས་པ་ལ༔ གསོལ་ལོ་མཆོད་དོ་དགྱེས་པར་བཞེས༔ ཨོཾ་ཨཱབཛྲ་ཀུ་ལི་མི་མན་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི༔ གསུམ་མམ་བདུན། ཨརྒྷཾ་སོགས། ཤབྡ་པྲ་ཏཱིཙྪ་སྭཱ་ཧཱ༔ ཧཱུྃ༔ ཕྱི་ལྟར་སྤོམ་ར་མགུར་ལྷའི་གཙོ༔ མདོ་ཁམས་སྒང་དྲུག་ཀུན་གྱི་བདག༔ ནང་ལྟར་རྒྱལ་པོ་ཡུལ་འཁོར་སྲུང་༔ དྲི་ཟ་བྱེ་བ་འབུམ་གྱི་རྗེ༔ གསང་བ་རྒྱལ་ཆེན་
རྣམ་ཐོས་སྲས༔ ས་བརྒྱད་སེམས་དཔའ་ནོར་ལྷའི་མཆོག༔ ཁྱེད་ལ་བསྟོད་དེ་ཕྱག་ཀྱང་འཚལ༔ མངའ་ཐང་ལོངས་སྤྱོད་འཕེལ་བ་དང་༔ ཁས་དྲག་སྟོབས་ཤུགས་ལྡན་པ་ཡི༔ ཁྱེད་ལ་ཡོད་པའི་དངོས་གྲུབ་དེ༔ བདག་ལ་ད་ལྟ་ཉིད་དུ་སྩོལ༔ ཚེ་དཔལ་རླུང་རྟ་མངའ་ཐང་སྤེལ༔ གཞི་བྱེས་བྱ་བ་གང་ལ་ཡང་༔ དུས་ཀུན་ཁ་འཛིན་སྲུང་སྐྱོབ་མཛོད༔ ༈ གོད་ཁ་ཆོད་ལ་གོད་སྲིད་ཆིངས༔ རྐང་བཞི་རྟ་ནོར་དངོས་གྲུབ་སྩོལ༔ དཔལ་འབྱོར་ཚེ་བསོད་ཀླུང་རྟ་སྤེལ༔ ཨོཾ་ཨཱཋཀུལ་ལི་མིལ་མན་སྭཱ་ཧཱ༔ ཨོཾ་ཨཱཎཱབཛྲ་ཀུ་ལི་མིལ་མན་བཱ་སུ་ན་ན་ཁ་དྷེ་སིདྡྷི་ཕ་ལ་ཧཱུྃ༔ ༈ སྦྲུལ་ཤད་གཉིས་བར་འདི་ཧ་ཤྲཱི་བ་ན་ཐས་སོ།། ཕས་རྒོལ་གཡུལ་ལས་རྒྱལ་བ་དང་༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་པའམ། རྒྱས་པར་སྤྲོ་ན། ཧཱུྃ༔ སློབ་དཔོན་པདྨའི་བཀའ་ཉན་པ༔ གཏེར་སྲུང་རྨ་གཉན་སྤོམ་ར་ནི༔ འདོད་རྒུར་བསྒྱུར་བའི་རྫུ་འཕྲུལ་གྱིས༔ ཆ་ལུགས་གཅིག་ཏུ་མ་ངེས་ཀྱང་༔ རྒྱས་པའི་ཕྲིན་ལས་བསྒྲུབ་པའི་ཕྱིར༔ གསེར་མདོག་ཁྲོ་འཛུམ་བརྗིད་པའི་ཞལ༔ དབུ་ཡི་དུང་རྨོག་དཀར་པོ་ལ༔ བྱ་ཕོད་ལྡེམ་པར་ཉི་ལྟར་ཤར༔ སྐུ་ལ་
དར་བེར་སུམ་བརྩེགས་སྟེང་༔ གསེར་ཁྲབ་སྟག་གི་ཡང་ཤམ་ཅན༔ ཕྱག་གཡས་སྦ་ལྕག་ཀླད་ལ་བསྐོར༔ ཁམས་གསུམ་སྲིད་གསུམ་དབང་དུ་སྡུས༔ གཡོན་པས་ནེའུ་ལེའི་རྐྱལ་པ་འཛིན༔ རིན་ཆེན་ནོར་གྱི་ཆར་པ་འབེབས༔ ཆིབས་སུ་རྟ་སེར་འཕུར་ཤེས་ལ༔ སྟག་སྒྲ་གསེར་སྲབ་གཡུ་མཐུར་རྒྱན༔ རྨ་སྲས་དུང་མི་དཀར་པོ་དགུ༔ སྤུ་རིས་ལྡན་པའི་རྟ་དགུ་ཆིབས༔ རྨ་རིགས་སུམ་བརྒྱ་དྲུག་ཅུ་དང་༔ ཆུ་དྲུག་སྒང་ལྔའི་ཡུལ་ལྷའི་ཚོགས༔ ཀུན་ཀྱང་མི་དཀར་རྟ་དཀར་ལ༔ གོ་ཆ་སྲ་ལ་མཚོན་ཆ་རྣོ༔ སྟག་རལ་གཡས་ལ་གཟིག་ཤུབས་གཡོན༔ བ་དན་དཀར་པོ་གནམ་ལ་གཡུགས༔ ཀུ་བསྲོ་ཆ་སྒྲ་ཏི་རི་རི༔ རྡོ་རྗེ་དྲག་མོ་རྒྱལ་ལ་སོགས༔ འཁོར་གྱི་རྨ་སྨན་འབུམ་ཕྲག་ནི༔ འཛུམ་མཛེས་དར་དང་རིན་ཆེན་བརྒྱན༔ གླུ་ལེན་བྲོ་བརྡུང་གར་སྟབས་འཁྱུགས༔ སྤོམ་ར་འཁོར་དང་བཅས་ལ་བསྟོད༔ ་མཆོད་སྦྱིན་གཏོར་མ་འདི་བཞེས་ལ༔ བདག་དང་བསྲུང་བྱར་གྱུར་རྣམས་ཀྱི༔ ནད་གདོན་བར་ཆད་ཞི་བར་མཛོད༔ བཀྲ་ཤིས་བདེ་ལེགས་དངོས་གྲུབ་སྩོལ༔ རིགས་བརྒྱུད་བཙན་དར་ཆེ་བ་དང་༔ མི་འཕེན་རྟ་ཧྲག་དངོས་གྲུབ་སྩོལ༔ སྣང་
སྲིད་ལྷ་འདྲེ་མི་གསུམ་དང་༔ འདོད་རྒུའི་དངོས་གྲུབ་དབང་དུ་སྡུས༔ རྐང་བཞི་ཕྱུགས་དང་བང་མཛོད་འབྲུ༔ རྨ་གཡང་ཟས་ཀྱི་དངོས་གྲུབ་སྩོལ༔ མི་གཡང་རྟ་གཡང་ནོར་གྱི་གཡང་༔ རྨ་གཡང་ནམ་མཁའི་ཆར་བཞིན་ཕོབ༔ ཨོཾ་ཁུ་ཡེ་ཁུ་ཡེ་གཡང་ཕོབ་ཅིག༔ མུ་ཡེ་མུ་ཡེ་གཡང་ཕོབ་ཅིག༔ ཏིང་ལམ་ཏིང་ལམ་གཡང་ཕོབ་ཅིག༔ ཟུ་ཡུ་ཟུ་ཡུ་གཡང་ཕོབ་ཅིག༔ ཧུ་ཡ་ཧུ་ཡ་གཡང་ཕོབ་ཅིག༔ རྨ་ཡེ་རྨ་ཡེ་གཡང་ཕོབ་ཅིག༔ ཕྲུ་ཁུག་ནང་དུ་ཀྱི་ལི་ལི༔ གཡང་ཁུག་ནང་དུ་སྒ་ར་ར༔ ཕྲུ་ཉི་མ་ཙམ་ཞིག་ཀྱི་ལི་ལི༔ གཡང་ཟླ་བ་ཙམ་ཞིག་སྒ་ར་ར༔ རྩྭ་འདི་རི་ལ་མ་བྲོས་ལ༔ གཡང་འདི་སྒོ་ལ་མ་ཉམས་ཤིག༔ འདི་འོག་གི་ན་ན་ཁ་རྙེ་ཞེས་པའི་སྔགས་བཟླ༔ རྒྱ་གླི་བ་ནཱ་ཐས་སོ། མཆན། སྤོམ་རི་ཐུགས་ཀར་ཟླ་བའི་སྟེང་༔ ཤ་ཡིག་དཀར་སེར་ཐ་མ་རུ༔ སྔགས་དེས་གཡས་སུ་བསྐོར་བ་ལས༔ འོད་ཟེར་གསེར་མདོག་ཕྱོགས་བཅུར་འཕྲོས༔ རྨ་གཡང་དངོས་གྲུབ་ཐམས་ཅད་དང་༔ རིན་ཆེན་སྣ་ཚོགས་ཆར་འབེབས་བསམ༔ ཨོཾ་ཨཱཿབཛྲ་ཀུ་ལི་མིལ་མན་བཱ་སུ་ན་ན་ཁ་དྷེ༔ སིདྡྷི་ཕ་ལ་ཧཱུྃ༔ རྨ་རྒྱལ་སྤོམ་ར་འཁོར་བཅས་ཀྱིས༔ ཡུལ་ཁམས་མ་ལུས་
དབང་བསྡུས་བསམ༔ ཨོཾ་ཨཱཿབཛྲ་ཀུ་ལི་མིལ་མན༔ ཡུལ་ཁམས་ཐམས་ཅད་ཝ་ཤཾ་ཀུ་རུ་ཡེ་སྭཱ་ཧཱ༔ དེ་ནས་ཕྲུ་དར་མདའ་དར་སོགས༔ ཡོད་ན་གཙོ་བོ་དེ་ལ་བསྟིམ༔ འཁོར་རྣམས་རང་གནས་གཤེགས་པར་བསམ༔ སརྦ་བྷ་ཏ་གཙ༔ འདི་ནི་སྲུང་མར་བརྟེན་པ་ན༔ ས་བརྒྱད་སེམས་དཔའ་ཡིན་པའི་ཕྱིར༔ ས་ལམ་བར་ཆད་སེལ་བར་ནུས༔ རིགས་བརྒྱུད་བཙན་དར་ཆེ་བ་དང་༔ ཕྱུག་བར་དབུལ་གྱིས་མི་ཆོད་ཅིང་༔ མི་འཕེན་རྟ་ཧྲག་འབྱུང་བ་དང་༔ སྡེ་དཔོན་ཡིན་ན་ཆུས་སྲིད་རྒྱས༔ གཞན་གྱིས་མི་ཐུབ་དཔུང་ཆེ་བ༔ འདི་ཡི་དངོས་གྲུབ་ཡིན་པར་བཤད༔ རྣལ་འབྱོར་པ་ནི་ཡིན་ན་ཡང་༔ གཞི་བདག་ཡིན་ཕྱིར་རྣོ་མྱུར་ཆེ༔ གང་འདོད་བསམ་པ་འགྲུབ་པ་ཡིན༔ ཁྱད་པར་འབྲི་ཆུ་ཕན་ཆད་ཀྱི༔ ཡུལ་ལྷའི་གཙོ་བོ་འདི་ཡིན་ཞིང་༔ ཁྱད་པར་གླིང་གི་མི་རིགས་ཀྱི༔ ཕོ་ལྷ་དགྲ་ལྷ་འདི་ཡིན་པས༔ ཕྱོགས་དེའི་མི་ལ་ཐུགས་བརྩེའི་ཕྱིར༔ འདི་ཉིད་བརྟེན་ན་བཀྲ་ཤིས་དགེ༔ དེ་ཕྱིར་གླིང་གི་ས་སྐྱོང་བར༔ རིག་འཛིན་མགོན་པོ་ལྷུན་གྲུབ་དང་༔ བླ་མ་བྷ་དྲའི་མཚན་ཅན་གྱིས༔ ནོར་ལྷ་དཀོར་གྱི་བདག་པོ་རུ། །རྒྱུན་དུ་བརྟེན་པར་བྱ་བའི་ཕྱིར། །སྔགས་འཆང་ཀརྨ་ཨ་རཱ་གས། །གནམ་ཆོས་སྒྲུབ་ཐབས་ཁ་སྐོང་དུ། །ངག་ནས་ཇི་ལྟར་སྨྲས་པ་བཞིན། །གླིང་གི་མི་རིགས་དགེ་བཤེས་ནི། །པདྨ་དད་པས་ཡི་གེར་བྲིས། །ཉེས་འགལ་སྲུང་མ་ཉིད་ལ་བཤགས། །དགེ་བས་འདི་ཉིད་སུས་བཏོན་པ། །བསོད་ནམས་མངའ་ཐང་འཕེལ་ཞིང་
རྒྱས། །འཁོར་ལོས་སྒྱུར་རྒྱལ་ལྟ་བུར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།