ཇོ་བོ་སྔགས་ཀྱི་བདག་པོའི་གཡང་སྐྱོབས་ཡིད་བཞིན་ནོར་གྱི་ཆུ་གཏེར།
ཇོ་བོ་སྔགས་ཀྱི་བདག་པོའི་གཡང་སྐྱོབས་ཡིད་བཞིན་ནོར་གྱི་ཆུ་གཏེར་ཞེས་བྱ་བ་བཞུགས་སོ། །
བཛྲ་པཱ་ཎི་ལ་ན་མོ། མཉམ་མེད་དྭགས་པོ་བཀའ་བརྒྱུད་ཆོས་སྐྱོང་དང་སྒྲུབ་བརྒྱུད་རིན་པོ་ཆེ་ཀཾ་ཚང་གི་བཀའ་སྲུང་སྔགས་ཀྱི་བདག་པོའི་སྒོ་ནས་ཀླུ་ཡི་གཡང་སྐྱབས་བྱ་བ་ནི། གཞི་དཀར་པོའི་སྟེང་དུ་ནས་ཀྱི་གཡུང་དྲུང་བྲིས་པའི་དབུས་སུ། གཡང་སྤེལ་ཟུར་བརྒྱད་པ་མར་གྱི་ནོར་བུའི་སྤྲས་པའི་མཐར། ཐུད་ཀྱི་པུ་ལུ་བཅུ་གསུམ་མར་ཁུས་བཀང་བ་དང་། ཕྱེ་མར་འབྲུ་སྣ་ཅི་འཇོམ་བཤམས། བུམ་པའི་ནང་དུ་ཆུ་མིག་བཅུ་གསུམ་གྱི་ཆུ་ལ་ཀླུ་སྨན་བཏབ། ཤེལ་ཚིགས་ལྤགས་བུ་དཀར་པོའམ། བལ་ལམ་དར་དཀར་པོའི་མདའ་དར་བཤམས། རྒྱས་པར་བྱེད་ན་ཁུག་རྒྱན་དང་རིན་པོ་ཆེ་སྣ་ཚོགས། ཤིང་ཐོག་མེ་ཏོག་དར་སྣ་འབྲང་རྒྱས་ཞལ་དཀར་ཐུད་གཡག་མར་ལུག་འོ་ཞོ་སོགས་བཤམས། ཀླུ་མཆོད་རྒྱས་པའམ་སྔགས་བདག་གི་ཆོ་ག་
གཞུང་བསྲང་ནས། རང་ཉིད་ལྷར་གསལ་བའི་མཐེ་བོང་ལ་སྣ་ཚོགས་རྡོ་རྗེའི་མཚན་པ་ལས་བྱུང་བའི་རྡོ་རྗེའི་གོ་ཁྲབ་ཞུ་ལུབས་སུ་གྱོན་པས་ཀླུའི་གདུག་པས་མི་ཚུགས་པར་གྱུར། ཨོཾ་བཛྲ་ཙཎྜ་མཎྜ་ལ་ཨ་མྲྀ་ཏ་མ་མ་རཀྵ་རཀྵ་ཧཱུྃ། ཞེས་རྡོ་རྗེ་ཁུ་ཚུར་གནས་ལྔར་གཏུགས། རང་གི་འཁོར་སློབ་ཡོན་བདག་རྣམས་ཀྱི་སྤྱི་བོར་ཨོཾ། །མགྲིན་པར་ཨཱཿ ཐུགས་ཀར་ཧཱུྃ། དཔྲལ་བར་ཛ། མིག་གཡས་གཡོན་ལ་ཧྲིདང་ཏྭཾ། རྣ་བ་གཡས་གཡོན་ལ་ཛ་དང་ཧརྣམས་ཀྱིས་མཚན་པས་བསྲུང་བར་གྱུར། ཧཱུྃ། རྒྱ་མཚོ་མུ་མེད་མཐའ་ཡས་ནས། །ཀླུ་ཡུལ་རབ་ཏུ་དགའ་བ་ནས། །ཀླུ་རྒྱལ་སངས་རྒྱས་བཅོམ་ལྡན་
འདས། །སྟོང་གསུམ་བདག་པོ་གཡོག་མཐའ་ཡས། །བདེ་གཤེགས་ཀླུ་དབང་རྒྱལ་པོ་ཡི། །ཕྲིན་ལས་སྤྲུལ་པ་སྔགས་ཀྱི་བདག །མི་མགོན་དཀར་པོ་ཝ་རུ་ཎ། །ཀླུ་རྒྱལ་མ་དྲོས་གཟི་ཆེན་དང་། །ཀླུ་ཆེན་བརྒྱད་དང་རིགས་བཞིའི་ཀླུ། །ཀུན་ཀྱང་བཙུན་མོ་སྲས་འཁོར་བཅས། །དངོས་གྲུབ་ཚོགས་དང་བཅས་ཏེ་བྱོན། །ཀླུ་ཡི་ཕྱུགས་གཡང་འཕེལ་གཡང་དང་། །ཀླུ་ཡི་དར་གཡང་སྐྱིད་གཡང་དང་། །ཀླུ་ཡི་འཕེལ་གཡང་བཙན་གཡང་དང་། །ཀླུ་ཡི་བཀྲ་ཤིས་དངོས་གྲུབ་དང་། །ཀླུ་ཡི་སྟོབས་དང་གཟི་བརྗིད་དང་། །དེ་རྣམས་ཕྱྭ་དང་གཡང་དུ་བྱོན། །ཀླུ་ཡི་རྫུ་འཕྲུལ་བསམ་མི་ཁྱབ། །ཀླུ་ཡི་ཕོ་བྲང་བསམ་མི་ཁྱབ། །ཀླུ་ཡི་ལོངས་སྤྱོད་བསམ་མི་ཁྱབ། །ཀླུ་ཡི་དངོས་གྲུབ་བསམ་མི་ཁྱབ། །ཀླུ་ཡི་རྨ་གཡང་བསམ་མི་ཁྱབ། །དེ་རྣམས་ཕྱྭ་དང་གཡང་ལ་བྱོན། །གཡང་སྤེལ་རིན་ཆེན་ཟུར་བརྒྱད་འདི། །ཕྱྭ་དང་གཡང་རྣམས་འབྱོན་པའི་རྟེན། །རྟེན་ལ་འབྱོན་ཞིག་གཡང་ལ་འདུས། །ཤར་ཕྱོགས་དུང་རི་དུང་གླིང་ན། །མི་མགོན་དཀར་པོ་དངོས་གྲུབ་ཅན། །ཀླུ་ཡི་རྒྱལ་པོ་མི་གྲངས་སྤེལ་མཛད་ཀྱི། །དཔལ་དང་དངོས་གྲུབ་གཡང་ལ་འདུས། །
ལྷོ་ཕྱོགས་རྒྱ་མཚོ་ནོར་གྱི་འཁོར་ལོ་ན། །ཀླུ་རྒྱལ་རིན་ཆེན་འབར་བ་བཞུགས། །ཀླུ་ཡི་རྒྱལ་པོ་ནོར་གྲངས་སྤེལ་མཛད་ཀྱིས། །ནོར་གྱི་དངོས་གྲུབ་གཡང་ལ་འདུས། །ནུབ་ཕྱོགས་རྫ་རི་རྫ་བྲག་མང་པོས་བསྐོར། །ཀླུ་ཡི་རྒྱལ་པོ་པདྨ་རིགས་འབྱུང་བྱ་བ་བཞུགས། །ཀླུ་ཡི་རྒྱལ་པོ་ཆོས་སྲིད་དབང་ཐང་སྤེལ་མཛད་པ། །ཆོས་སྲིད་དབང་ཐང་གཡང་ལ་འདུས། །བྱང་ཕྱོགས་བྲག་རི་དངོས་གྲུབ་ཆུ་ཡི་གླིང་། །དེ་ན་ཀླུ་ཡི་རྒྱལ་པོ་རིན་ཆེན་དངོས་གྲུབ་བཞུགས། །ཀླུ་ཡི་རྒྱལ་པོ་བཀྲ་ཤིས་དོན་གྲུབ་པའི། །མི་འཕེལ་རྟ་ཧྲག་གཡང་དུ་འདུས། །ཀླུ་རིགས་ལྔ་ཡི་ཆུ་མིག་ཐམས་ཅད་དང་། །རྫ་ཆུ་ཁྲོན་པ་ཐམས་ཅད་དང་། །ལུ་མ་ལྡིང་ཀ་ཐམས་ཅད་དང་། །རིན་ཆེན་རི་བོ་ཐམས་ཅད་དང་། །མཚོ་ཆེན་མཚོ་བྲན་ཐམས་ཅད་དང་། །ནེའུ་གསིང་སྤང་ལྗོངས་ཐམས་ཅད་ལ། །གནས་པའི་ཀླུ་གཉན་ཐམས་ཅད་ཀུན། །དངོས་གྲུབ་ཚོགས་དང་བཅས་ཏེ་བྱོན། །ཨོཾ་ནཱ་ག་རཱ་ཛ་ས་པ་རི་ཝཱ་ར་ཨ་གཙྪ་ཡ་ཨ་གཙྪ་ཡ་སྭཱ་ཧཱ། ཧཱུྃ། རིན་ཆེན་ཟུར་བརྒྱད་གཡང་གི་རྟེན། །གཡང་རྟེན་འདི་ལ་བཞུགས་སུ་གསོལ། །མར་ཁུའི་མཚོ་མོ་གཡང་གི་རྟེན། །
གཡང་རྟེན་འདི་ལ་བཞུགས་སུ་གསོལ། །ཟླ་ཕྲོམ་རིལ་བུ་གཡང་གི་རྟེན། །གཡང་རྟེན་འདི་ལ་བཞུགས་སུ་གསོལ། །བུམ་པ་ཆུ་སྣ་གཡང་གི་རྟེན། །གཡང་རྟེན་འདི་ལ་བཞུགས་སུ་གསོལ། །ཕྱེ་མར་ཟས་ཕུད་གཡང་གི་རྟེན། །གཡང་རྟེན་འདི་ལ་བཞུགས་སུ་གསོལ། །ཐུད་གཡག་མར་ལུག་གཡང་གི་རྟེན། །གཡང་རྟེན་འདི་ལ་བཞུགས་སུ་གསོལ། །ཨོཾ་ནཱ་ག་ར་ཛ་ཀུ་མ་རཱ་ཛ་ཏི་ཛ་ཏི་ཧཱུྃ་ཧཱུྃ། ཨོཾ་ནཱ་ག་རཱ་ཛ་གྷོ་རུ་གྷོ་རུ་མ་མ་ཧཱུྃ་ཧཱུྃ། ཀླུ་ཡི་རྒྱལ་པོ་ཁྱེད་རྣམས་ལ། །དཀར་གསུམ་མངར་གསུམ་ཕྱེ་མར་དང་། །གཡང་བཤོས་མཆོད་པ་སྣ་ཚོགས་དང་། །རིན་ཆེན་འབྲུ་སྨན་དར་ཟབ་དང་། །ཤེལ་ཚིགས་བལ་ཚོན་མེ་ཏོག་དང་། །འདོད་ཡོན་ལྔ་དང་རིན་ཆེན་བདུན། །བཀྲ་ཤིས་རྟགས་བརྒྱད་རྫས་བརྒྱད་སོགས། །དངོས་སུ་བཤམས་དང་ཡིད་ཀྱིས་སྤྲུལ། །མཆོད་པའི་སྤྲིན་ཕུང་རྒྱ་མཚོ་འབུལ། །ཀླུ་གཡང་དངོས་གྲུབ་རྒྱ་མཚོ་རྣམས། །ད་ལྟ་ཉིད་དུ་བསྩལ་དུ་གསོལ། །ཡིད་བཞིན་ནོར་བུའི་དངོས་གྲུབ་སྩོལ། །འདོད་པའི་ནོར་གྱི་དངོས་གྲུབ་སྩོལ། །སྲིད་ཀྱི་ཆུ་མིག་ཁ་ཕྱེས་ལ། །སྲིད་ཀྱི་རྩ་དཀར་བཀྲོལ་དུ་གསོལ། །ནོར་བུ་རིན་
ཆེན་བདག་ལ་བྱིན། །ཀླུ་ཡི་དངོས་གྲུབ་ཆེན་པོ་དང་། །མི་གྲངས་རྩ་དཀར་བཀྲོལ་བ་དང་། །ནོར་གྱི་ཕྱུགས་གཡང་ཅི་ཡོད་ཀུན། །བདག་དང་ཡོན་བདག་འདི་ལ་ད་སྩོལ་ཅིག །བཙན་པོའི་བཙན་གཡང་ཐམས་ཅད་དང་། །འཕེན་པོའི་འཕེན་གཡང་ཐམས་ཅད་དང་། །ཕྱུག་པོའི་ཕྱུག་གཡང་ཐམས་ཅད་དང་། །དངོས་གྲུབ་ཐམས་ཅད་ད་སྩོལ་ཅིག །ཧཱུྃ། ཀླུ་རྒྱལ་སངས་རྒྱས་བཅོམ་ལྡན་འདས། །ཕྱག་ན་རིན་ཆེན་ལྗོན་ཤིང་བསྣམས། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་སློངས། །བཙན་ཕྱུག་འཕེན་གསུམ་གཡང་དུ་བླན། །ཨོཾ་ནཱ་ག་རཱ་ཛ་སིདྡྷི་ཧཱུྃ། ཀླུ་ཡི་རྒྱལ་པོ་སོག་མ་མེད། །མ་དྲོས་ཀླུ་ཡི་དབང་པོ་སྟེ། །སྦྲུལ་མགོ་སྟོང་གི་གདེངས་ཀ་ཅན། །སྦྲུལ་མགོ་དག་ནི་རེ་རེ་ལ། །གླིང་བཞི་གང་བའི་ལོངས་སྤྱོད་ལྡན། །སངས་རྒྱས་སྟོང་གི་སྦྱིན་བདག་སྟེ། །བཙུན་མོ་སྲས་དང་བློན་པོ་དང་། །ཁྲི་ཕྲག་དྲུག་གི་འཁོར་དང་བཅས། །འོད་ཟེར་ནོར་གྱི་ཆར་པ་འབེབས། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་བླན། །
བཙན་ཕྱུག་འཕེན་གསུམ་གཡང་དུ་བསླང་། །ཨོྃ་ཕུ་ཏ་ཕུ་ཏ་མ་ཧ་ཀྲོ་ཏ་ཧཱུྃ། སིདྡྷི་སིདྡྷི་སྤོ་ཊ་ཡ་ཧཱུྃ་ཕཊ། ཆུ་བདག་ཝ་རུ་སྣ་ཚོགས་མདོག །ཕྱག་ན་ནོར་བུ་པད་དཀར་བསྣམས། །ཀླུ་མོ་དབང་ཕྱུག་རྒྱལ་མོ་དཀར། །ཕྱག་ན་ཚེ་བུམ་དམུ་དག་བཟུང་། །པང་ན་ཀླུ་སྲས་དུན་ཚུགས་ཚར། །འཁོར་ནི་ཀླུ་བྲན་འབུམ་གྱིས་བསྐོར། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་བསླང་། །བཙན་ཕྱུག་འཕེན་གསུམ་གཡང་དུ་བླུན། །ཨོཾ་སྤུང་སྤུང་སྭཱ་ཧཱ། ཀླུ་རྒྱལ་མཐའ་ཡས་སྐུ་མདོག་དཀར། །ཨུཏྤལ་ཚེ་ཡི་དམུ་དག་བསྣམས། །ཀླུ་མོ་རླུང་འབྱིན་སྔོན་པོ་ལ། །ཕྱག་ན་མེ་ལོང་གཡང་ཟོ་བསྣམས། །པང་ན་ཀླུ་སྲས་ནོར་བུ་འཛིན། །འཁོར་ནི་ཀླུ་བྲན་འབུམ་གྱིས་བསྐོར། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་བསླང་། །བཙན་ཕྱུག་འཕེན་གསུམ་གཡང་དུ་བླང་། །ༀ་གྲུབ་གྲུབ་སྭཱ་ཧཱ། ཀླུ་རྒྱལ་ནོར་རྒྱས་གསེར་གྱི་མདོག །འཁོར་ལོ་གཡང་གི་གཟུངས་ཐག་བསྣམས། །ཀླུ་མོ་འོད་ཟེར་མར་གད་མདོག །འོ་མའི་རྒྱ་
མཚོ་མར་རྐྱལ་བསྣམས། །ཀླུ་སྲས་ཟུར་ཕུད་ཅན་ལ་སོགས། །འཁོར་ནི་ཀླུ་བྲན་འབུམ་གྱིས་བསྐོར། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་བསླང་། །བཙན་ཕྱུག་འཕེན་གསུམ་གཡང་དུ་བླང་། །ཨོཾ་འབྲུག་འབྲུག་སྭཱ་ཧཱ། ཀླུ་རྒྱལ་འཇོག་པོ་སྐུ་མདོག་སྔོ། །དགྲ་སྟ་རྨ་བྱའི་རྒྱལ་མཚན་བསྣམས། །ཀླུ་མོ་མེ་ཏོག་མདངས་ལྡན་སེར། །དམུ་དག་དུང་གི་རྒྱལ་མཚན་འཛིན། །ཀླུ་སྲས་གཙུག་རྒྱན་ལ་སོགས་པའི། །འཁོར་ནི་ཀླུ་བྲན་འབུམ་གྱིས་བསྐོར། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་བསླང་། །བཙན་ཕྱུག་འཕེན་གསུམ་གཡང་དུ་བླང། །ཨོཾ་ནོར་འདུས་འདུས་སཱ་ཧཱ། ཀླུ་རྒྱལ་སྟོབས་རྒྱུ་མཐིང་ནག་འབར། །དར་མདུང་དམར་པོ་བཤོལ་མར་འཛིན། །ཀླུ་མོ་འོད་འབྱོན་མདངས་བཟང་མ། །དམར་སྐྱ་སྣང་གསལ་སྒྲོམ་བུ་འཛིན། །ཀླུ་སྲས་ཡིད་བཞིན་དཔལ་ལ་སོགས། །འཁོར་ནི་ཀླུ་བྲན་འབུམ་གྱིས་བསྐོར། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་
བཞེས་ལ། །མི་གཡང་ནོར་གཡང་ཟས་གཡང་བསླང་། །བཙན་ཕྱུག་འཕེན་གསུམ་གཡང་དུ་བླང་། །ༀ་འབུར་བ་འབུར་བ་སྭཱ་ཧཱ། ཀླུ་རྒྱལ་པདྨ་བྱི་རུའི་མདོག །པདྨ་དར་མདུང་དཀར་པོ་བསྣམས། །ཀླུ་མོ་འཁོར་ལོ་མཛེས་ལྡན་མ། །ལྗང་སྐྱ་སྣང་གསལ་ཚེ་སྒྲོམ་བསྣམས། །ཀླུ་སྲས་ཟུར་ཕུད་ལྔ་པ་སོགས། །འཁོར་ནི་ཀླུ་བྲན་འབུམ་གྱིས་བསྐོར། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་བསླང་། །བཙན་ཕྱུག་འཕེན་གསུམ་གཡང་དུ་བླནང་། །ཨོཾ་ཁྲོལ་ཁྲོལ་སྭཱ་ཧཱ། ཀླུ་རྒྱལ་པད་ཆེན་སྐུ་མདོག་དམར། །ཨུཏྤལ་ཚེ་ཡི་དམུ་དག་བསྣམས། །ཀླུ་མོ་གྲུབ་པ་དཀར་མོ་ནི། །རིན་ཆེན་བུམ་པ་ཕྱག་ན་བསྣམས། །ཀླུ་སྲས་ཡིད་བཞིན་པ་ལ་སོགས། །འཁོར་ནི་ཀླུ་བྲན་འབུམ་གྱིས་བསྐོར། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་བསླང། །བཙན་ཕྱུག་འཕེན་གསུམ་གཡང་དུ་བླང་། །ཨོཾ་སྤུ་ཏ་སྤུ་ཏི་ཕཊ། ཀླུ་རྒྱལ་དུང་སྐྱོང་ཨིནྡྲའི་མདོག །དུང་དཀར་གཡང་གི་ཞགས་པ་བསྣམས། །ཀླུ་མོ་དོན་གྲུབ་
དཀར་མོ་ནི། །སྒྲོམ་བུ་གཡང་གི་མུ་དག་བསྣམས། །ཀླུ་སྲས་ནོར་བུ་འཛིན་ལ་སོགས། །འཁོར་ནི་ཀླུ་བྲན་འབུམ་གྱིས་བསྐོར། །ཀུན་ཀྱང་རྨ་གཡང་འོད་ཟེར་འཕྲོ། །མཆོད་པ་དམ་པ་འདི་བཞེས་ལ། །མི་གཡང་ནོར་གཡང་ཟས་གཡང་བསླང་། །བཙན་ཕྱུག་འཕེན་གསུམ་གཡང་དུ་བླང་། །ཨོཾ་ནཱ་ག་མྱེར་སྲུང་མྱེར་སྲུང་སྭཱ་ཧཱ། །ཀླུ་རྒྱལ་རིགས་ལྡན་ལ་སོགས་པའི། །ཀླུ་ཡི་རྒྱལ་པོ་དེ་དག་ནི། །སྐུ་མདོག་སྣ་ཚོགས་འོད་ཟེར་འབར། །སྦྲུལ་མགོ་བདུན་གྱི་གདེངས་ཀ་ཅན། །ཐུགས་རྗེའི་སྤྲིན་གྱི་དབུ་བརྒྱན་ཅན། །ནོར་བུ་རིན་ཆེན་རྒྱན་ཆ་ཅན། །འོད་ཟེར་འཕེན་གཡང་ཕྱུག་གཡང་འཕྲོ། །ཀླུ་མོ་དཔའ་མོ་ནག་མོ་སོགས། །ཀླུ་ཡི་རྒྱལ་མོ་དེ་དག་ནི། །སྐུ་མདོག་སྣ་ཚོགས་འོད་ཟེར་འཕྲོ། །སྦྲུལ་མགོ་གསུམ་གྱི་གདེངས་ཀ་ཅན། །ཐུགས་རྗེའི་སྤྲིན་གྱི་དབུ་རྒྱན་ཅན། །རིན་ཆེན་མེ་ཏོག་ལུས་ལ་བརྒྱན། །འོད་ཟེར་དངོས་གྲུབ་ཕྱོགས་བཅུར་འཕྲོ། །འཁོར་ལོ་དཔལ་སོགས་ཀླུ་སྲས་དགུ། །བློན་པོ་འབངས་འཁོར་ཐམས་ཅད་ལ། །ཕྱག་འཚལ་བསྙེན་བཀུར་མཆོད་པ་འབུལ། །བདག་དང་ཡོན་མཆོད་འཁོར་བཅས་ལ། །མི་
ཡི་འཕེལ་གཡང་བསྩལ་དུ་གསོལ། །ནོར་གྱི་ཕྱུགས་གཡང་བསྩལ་དུ་གསོལ། །དགོས་འདོད་ཡིད་བཞིན་འགྲུབ་པར་མཛོད། །ཨོཾ་ནཱ་ག་རཱ་ཛ་སྲི་དུ་སྟེ། ཨོཾ་ནཱ་ག་རཱ་ཛ་ཧེ་སྟ་ཕོབ་ཕོབ། ཨོཾ་ནཱ་ག་རཱ་ཛ་ཧེ་སྟ་ཀ་ལ་ཕོབ་ཕོབ། ཅེས་དང་ཀླུ་གཡང་འབེབས་པའི་སྔགས་བརྒྱ་ཙམ་བཟླས་ཤིང་བུམ་པའི་ཆུ་སྣ་རང་དང་ཡོན་བདག་ལ་གཏོར་རོ། །དེ་ནས་མདའ་དར་གཡབ་ཅིང་། ཧཱུྃ། ཀླུ་ཡི་རྒྱལ་པོ་འཁོར་བཅས་རྣམས། །འདོད་ཡོན་མཆོད་པ་འདི་བཞེས་ལ། །བདག་ཅག་ཡོན་མཆོད་འཁོར་བཅས་ལ། །མི་ལ་ཀླུ་གཡང་འབེབ་ཏུ་གསོལ། །གཡང་གི་སྒོ་མོ་ཤར་ནས་ཕྱེས། །མི་མགོན་དཀར་པོའི་འཕེན་གཡང་ཕོབ། །གཡང་གི་སྒོ་མོ་ལྷོ་ནས་ཕྱེས། །གཙུག་ན་རིན་ཆེན་ནོར་གཡང་ཕོབ། །གཡང་གི་སྒོ་མོ་ནུབ་ནས་ཕྱེས། །ཀླུ་རྒྱལ་དགའ་བོའི་བཙན་གཡང་ཕོབ། །གཡང་གི་སྒོ་མོ་བྱང་ནས་ཕྱེས། །ཀླུ་རྒྱལ་འཇོག་པོའི་ཕྱུགས་གཡང་ཕོབ། །མི་རྣམས་འཕེལ་བའི་འཕེན་གཡང་ཕོབ། །ནོར་རྣམས་ཕྱུག་པའི་ཕྱུགས་གཡང་ཕོབ། །རྟག་ཏུ་སྐྱིད་པའི་སྐྱིད་གཡང་ཕོབ། །རྒྱུན་ཏུ་བཙན་པའི་བཙན་གཡང་ཕོབ། །ལོངས་སྤྱོད་ཟས་ཀྱི་རྨ་གཡང་ཕོབ། །རྐང་བཞི་ཕྱུགས་ཀྱི་འཕེལ་གཡང་
ཕོབ། །བང་མཛོད་འབྲུ་ཡི་འཕེལ་གཡང་ཕོབ། །ལྷབ་ལྷུབ་གོས་ཀྱི་བཀྲག་གཡང་ཕོབ། །འཛད་མེད་གཏེར་གྱི་གཡང་ཕོབ་ཅིག །དེ་ནས་མཚོའམ་ཆུ་མིག་འགྲམ་ཡིན་ན་ལག་པ་བཀྲུས་ནས་རྡེའུ་དང་སྦྲུལ་གྱི་གཟུགས་དང་ཆུ་བླང་ཞིང་། ཧཱུྃ། རྒྱ་མཚོ་ཆེན་པོའི་གཏིང་རུམ་ན། །ཀླུ་ཡུལ་གནས་མཆོག་དམ་པ་ན། །ཀླུ་ཡི་ཕོ་བྲང་བསམ་མི་ཁྱབ། །དེ་ན་བཀྲ་ཤིས་འོ་མ་ཡིས། །བདུད་རྩིའི་མཚོ་མོ་དེ་ན་འཁྱིལ། །བདུད་རྩིའི་ཟིལ་ཆར་དེ་ན་འབབས། །ཀླུ་རྒྱལ་འཁོར་བཅས་དེ་ན་བཞུགས། །བཀྲ་ཤིས་སྲས་བརྒྱད་དེ་ན་བཞུགས། །དངོས་གྲུབ་མཆོག་བརྒྱད་དེ་ན་མངའ། །ཀླུ་དགོས་འདོད་ཕུན་སུམ་ཚོགས་པ་དེ་ན་འཚོགས། །ཁུ་ཡེ་ཕྱྭ་དང་གཡང་དུ་ལེན། །སྐུ་གསུང་ཐུགས་ཀྱི་དངོས་གྲུབ་སྩོལ། །བཀྲ་ཤིས་བདུད་རྩི་ཆུ་ཡི་གཡང་། །མི་མཐའ་ཆུ་བས་རིང་བའི་གཡང་། །མི་འཕེལ་ནས་བས་འཕེལ་བའི་གཡང་། །མི་སྲོག་བྲག་བས་སྲ་བའི་གཡང་། །ཁུ་ཡེ་ཕྱྭ་དང་གཡང་དུ་ལེན། །སྐུ་གསུང་ཐུགས་ཀྱི་དངོས་གྲུབ་སྩོལ། །བསོད་ནམས་ཕུན་སུམ་ཚོགས་པ་ཀླུ་ཡི་གཡང་། །དངོས་གྲུབ་ཕུན་སུམ་ཚོགས་པ་ཆུ་ཡི་གཡང་། །མི་གཡང་ནོར་གཡང་ཟས་
ཀྱི་གཡང་། །དགོས་འདོད་ཕུན་སུམ་ཚོགས་པའི་གཡང་། །ཁུ་ཡེ་ཕྱྭ་དང་གཡང་དུ་ལེན། །སྐུ་གསུང་ཐུགས་ཀྱི་དངོས་གྲུབ་སྩོལ། །ཀླུ་ཡི་རྒྱལ་པོ་འཁོར་དང་བཅས། གངས་རིའི་རྩེ་ན་བཞུགས་པའི་ཚེ། །སྟོན་ཟླ་འབྲིང་པོའི་ཉ་གསུམ་ལ། །ཀླུ་ཡི་དངོས་གྲུབ་དམ་པ་སྩོལ། །གཡང་གི་ཁ་འཛིན་མ་གཡེལ་ཞིག །ནོར་གྱི་རྫི་བོ་མ་གཡེལ་ཞིག །མི་ཡི་མགོན་སྐྱབས་མ་གཡེལ་ཞིག །ཀླུ་ཡི་རྒྱལ་པོ་བཅོམ་ལྡན་འདས། །ཀླུ་ཡི་སེམས་དཔའ་གཡོག་མཐའ་ཡས། །ཀླུ་དབང་རྒྱལ་པོ་སྔགས་ཀྱི་བདག །མི་མགོན་དཀར་པོ་ཝ་རུ་ཎ། །མ་དྲོས་ཀླུ་ཆེན་བརྒྱད་རྣམས་ཀྱི། །མཐུ་སྟོབས་ཕུན་སུམ་ཚོགས་པ་ཡི། །བྱིན་རླབས་སྟོབས་ཀྱི་གཡང་རྟེན་ནོ། །སྔགས་དང་ཕྱག་རྒྱས་གཡང་རྟེན་ནོ། །ཏིང་འཛིན་སྟོབས་ཀྱིས་གཡང་རྟེན་ནོ། །གཡང་གི་དངོས་གྲུབ་བརྟན་གྱུར་ཅིག །བཀྲ་ཤིས་ཕུན་སུམ་ཚོགས་གྱུར་ཅིག །ཨོཾ་པཎ་ཤ་ཝ་རི་པུ་རུ་སིདྡྷི་ཕ་ལ་ས་མ་ཡ་སྟེ། ས་མ་ཡ་ཧོ༔ ཏིཥྛ་ལྷན་སྭ་ཧཱ། ཤེལ་ཚིགས་ཆུ་གནས་གཟུགས་རྣམས་ཆུར་མཆོད། ཕྱེ་མར་དངོས་གྲུབ་ཏུ་རོལ། གཡང་སྤེལ་མར་གྱི་སྤྲུལ་རྡེའུ་རྣམས་ཁྱིམ་དུ་གཡང་སྒམ་དུ་བཞག །གཡང་ལེན་ཅུང་ཟད་མཐོང་བ་བརྒྱུད་པ་ལྟར་
བྱའོ། །འདི་ཀླུ་མཆོད་རྒྱས་པ་མཚོའམ་ཆུ་མིག་ལ་བྱེད་པའམ། ཡང་ན་སྔགས་བདག་ཆོ་ག་གཞུང་ལས་ཀྱང་རུང་། ཡང་ཁྱིམ་དུ་སྔགས་བདག་ཆོ་ག་ལ་བཏགས་ན་རུང་སྟེ་ཀླུ་ཐེབས་བརྩི་བ་གལ་ཆེ་ཞིང་དམིགས་པ་ཅུང་ཟད་གབ་བོ། །ཞེས་ཨ་རཱ་གས་མགྱོགས་པར་བྲིས་པའོ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།