གཡང་ཉམས་ཤོར་བ་དེ་རྣམས་འགུགས་པར་བྱ་བ།
དེ་ནས་གཡང་ཉམས་ཤོར་བ་དེ་རྣམས་འགུགས་པར་བྱ་བ་ནི་འདི་སྐད་དོ།། །ཀྱཻ། ད་ནི་གཡང་ཤོར་འགུགས་པ་ལ། །རྒྱལ་པོ་ཆེན་པོ་རྣམ་ཐོས་སྲས། །ཛཾ་བྷ་ལ་དང་གང་བ་བཟང་། །ནོར་བུ་བཟང་དང་ཀུ་བེ་ར། །ཡང་དག་ཤེས་དང་འབྲོག་གནས་དང་། །རྔས་རྩེན་པི་ཅི་ཀུན་དྷ་ལི། །ཕྱུགས་ལྷ་ལྷ་མོ་ནོར་རྒྱུན་མ། །ལྷ་མོ་ཆེན་མོ་དབྱངས་ཅན་མ། །འཕགས་མ་སྦས་མ་རབ་བཟང་མ། །སྦྱིན་བྱེད་མ་དང་རབ་སྦྱིན་མ། །ཟས་སྦྱིན་མ་དང་འོད་སྦྱིན་མ། །གཡང་གི་ལྷ་ཚོགས་མ་ལུས་པས། །ཕྱྭ་གཡང་འགུགས་པའི་ཕྲིན་ལས་མཛོད། །ཧཱུྃ། སངས་རྒྱས་ཆོས་ཀྱི་གཡང་ཤོར་བ། །བཅོམ་ལྡན་འདས་ཀྱི་ཐུགས་ཀྱིས་ཁུག །ཉི་ཟླ་ཟུང་གཅིག་འོད་ལས་ཁུག །སྐར་མ་ས་རིའི་ཉིན་པར་ཁུག །སྐུ་གསུང་ཐུགས་ཀྱི་རྟེན་ལ་སྟིམས། །རྗེ་རྒྱལ་བཙན་པོའི་གཡང་ཤོར་དེ། །རྣམ་མང་ཐོས་སྲས་སྟོབས་ཀྱིས་ཁུག །དགུང་སྔོན་མཐོན་པོའི་སྟེང་ནས་ཁུག །སྐར་མ་རྒྱལ་གྱི་ཉིན་པར་ཁུག །གཉེན་གཡུ་འོད་འབར་དེ་ལ་བསྟིམ། །ཇོ་བཟང་བཙུན་མོའི་གཡང་ཤོར་དེ། །ལྷ་མོ་བརྟན་མའི་ནུས་མཐུ་ཡིས། །དོག་མོ་ས་ཡི་སྟེང་ནས་ཁུག །སྐར་མ་སྨིན་
དྲུག་ཉིན་པར་ཁུག །གཟི་མོ་མིག་དྲུག་འདི་ལ་བསྟིམ། །སྐྱེས་པ་ཕོ་ཡི་གཡང་ཤོར་དེ། །ཕོ་ལྷ་དགྲ་བླའི་ནུས་སྟོབས་ཀྱིས། །སྲ་བརྟན་རྡོ་རྗེའི་བྲག་ནས་ཁུག །སྐར་མ་མགོ་ཡི་ཉིན་པར་ཁུག །མདའ་མོ་ལྟོང་བཟང་འདི་ལ་བསྟིམ། །ཟ་མ་མོ་ཡི་གཡང་ཤོར་དེ། །མོ་ལྷ་སྨན་བཙུན་དཀར་མོའི་མཐུས། །གཡུ་མཚོ་རྟེན་འཁྱིལ་ནང་ནས་ཁུག །སྐར་མ་ནམ་གྲུའི་ཉིན་པར་ཁུག །གསེར་གྱི་མོ་འཕང་འདི་ལ་བསྟིམ། །བྱིས་སྦ་ཆུང་གི་གཡང་ཤོར་དེ། །མ་ལྷ་བུ་རྫིའི་མཐུ་བྱིན་གྱིས། །ཕྱོགས་མཚམས་ཀུན་ནས་ཚེ་ཁུག་ཅིག །སྐར་མ་ནག་པའི་ཉིན་པར་ཁུག །རིགས་མཆོག་ཡུམ་གྱི་པང་དུ་བསྟིམ། །གྱི་ལིང་རྟ་ཡི་གཡང་ཤོར་དེ། །རྟ་ལྷ་རེ་མནྟ་ཡིས་མཐུས། །འདོ་བ་ཆུ་ཡི་ནང་ནས་ཁུག །སྐར་མ་མོན་གྲུའི་ཉིན་པར་ཁུག །ས་ལྕགས་སྒྲོག་གསུམ་འདི་ལ་བསྟིམ། །ཟེར་ཆུང་འབྲི་ཡི་གཡང་ཤོར་དེ། །དཔལ་ལྡན་ལྷ་མོ་ནོར་རྒྱུན་མས། །ཟ་ལེ་འབྲི་ཡི་ཁྱུ་ནས་ཁུག །སྐར་མ་ཆུ་སྨད་ཉིན་པར་ཁུག །རྒྱུ་དག་གསེར་ཟོ་འདི་ལ་བསྟིམ། །འདོད་འཇོ་བ་ཡི་གཡང་ཤོར་དེ། །འདོད་རྒྱལ་ཁྲོ་བོའི་མཐུ་བྱིན་གྱིས། །གཡུང་དྲུང་བ་ཡི་ཁྱུ་ནས་ཁུག །སྐར་མ་
བེའུ་རྫིའི་ཉིན་པར་ཁུག །ཤེལ་གྱི་ཟོ་བ་འདི་ལ་བསྟིམ། །གཡང་མོ་ལུག་གི་གཡང་ཤོར་དེ། །ལུག་ལྷ་གང་བ་བཟང་པོ་ཡི། །གཡང་མོ་ལུག་གི་ཁྱུ་ནས་ཁུག །སྐར་མ་སྦོ་ཡི་ཉིན་པར་ཁུག །དུང་གི་དར་ཐག་འདི་ལ་བསྟིམ། །ཚེ་རེ་ར་ཡི་གཡང་ཤོར་དེ། །ར་ལྷ་ཚེར་མོ་ཨག་ཚོམ་ཅན། །ཚེ་རེ་ར་ཡི་ཁྱུ་ནས་ཁུག །སྐར་མ་སྣོན་གྱི་ཉིན་པར་ཁུག །གདང་ཐག་ཕུར་པ་འདི་ལ་བསྟིམ། །བཤོལ་ཞིང་འོལ་མོའི་གཡང་ཤོར་དེ། །ཞིང་ལྷ་ཚངས་པའི་གཟི་བྱིན་གྱིས། །དོག་མོ་ས་གཡང་དཀྱིལ་ནས་ཁུག །སྐར་མ་ས་གའི་ཉིན་པར་ཁུག །ཞིང་ས་བཟང་པོ་འདི་ལ་བསྟིམ། །རྨ་གཡང་ཟས་ཀྱི་གཡང་ཤོར་ན། །འབྲུ་ལྷ་འཇིག་རྟེན་དབང་ཕྱུག་གི །འབྲུ་སྣ་དྲུག་གི་ཕྱྭ་གཡང་ཁུག །སྐར་མ་བྲེ་ཕུལ་ཉིན་འདི་རུ། །བསྡུས་མཛོད་བང་བ་འདི་ལ་བསྟིམ། །རྨ་གཡང་ཟས་ཀྱི་གཡང་ཤོར་ན། །ཟས་ལྷ་བདུད་རྩི་འཁྱིལ་པ་ཡིས། །ཟས་རྣམས་ཀུན་གྱི་བཅུད་བསྡུས་ལ། །སྐར་མ་ཆུ་སྟོད་ཉིན་འདི་རུ། །ཟད་མེད་གཏེར་ཁ་མཛད་དུ་གསོལ། །གཡུང་དྲུང་བོན་གྱི་གཡང་ཤོར་ན། །གཤིན་ལྷ་འོད་དཀར་ཐུགས་རྗེ་ཅན། །
གནས་མཆོག་བོན་རི་བླ་གབ་ནས། །སྐར་མ་བོན་གྱི་ཉིན་མོ་འདི། །བསྡུས་མཛོད་གྲྭ་སློབ་དར་རྒྱས་མཛོད། །འདིར་ནི་བདག་ཅག་ཡོན་མཆོད་ལ། །གཡང་འཐོར་བ་ཐམས་ཅད་བསྡུས་མཛོད་ལ། །བྱེར་བ་ཐམས་ཅད་ཤུགས་ལ་འཁོར། །ཤོར་བ་ལག་ཏུ་ཚུད་པར་མཛོད། །སརྦ་སིདྡྷི་ཕ་ལ་ཧོ། ཨ་ལ་ལ་ཧོ། ཞེས་བརྗོད་ནས་གཡང་ཤོར་བ་ནས་གཡང་བླང་བྱའོ། ལྷ་མོ་དཔལ་གྱི་གཡང་འགུགས་ཚེ་འགུགས་རྨ་སྤོམ་རའི་གཡང་སྐྱབས། པདྨ་གཡང་སྐྱབས། གསེར་འོད་གཡང་སྐྱབས་སོགས་ཚེ་གཡང་འགུགས་པ་གཞུང་ལས། འདིར་ནི་ཚེ་གཡང་འགུགས་བསྐུལ་མེད་ཐབས་མེད་པ་དཔེར་ན་གཟེ་མ་ལ་གཟུས་མེད་པ་ལྟ་བུ་ཡིན་པའི་ལྷན་ཐབས། །ཨ་རཱ་གས་སྦྱར་བའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།