མཚུན་བཅོས་ཀུན་གྱི་དོན་བསྡུས་འདོན་འགྲིགས།
མཚུན་བཅོས་ཀུན་གྱི་དོན་བསྡུས་འདོན་འགྲིགས་གསལ་ཞིང་སྟབས་བདེ་བ་ཞིག་བཞུགས་པའི་དབུ་ཕྱོགས་ལགས་སོ། །
ན་མོ་ལོ་ཀི་ཤྭ་ར་ཡེ། འཇིག་རྟེན་དབང་ཕྱུག་ཞབས་ལ་ཕྱག་འཚལ་ནས། །མཚུན་བཅོས་ཉུང་བསྡུས་ཁྱེར་བདེ་འདིར་བཀོད་བྱ་། །གཞི་དཀར་སྟེང་དུ་འདབ་བརྒྱད་བྲིས་པའི་དབུས། །སྣོད་གཙང་ནང་དུ་རི་རབ་བརྩེགས་པའི་སྟེང་། །བཤོས་བུ་གྲུ་བཞི་རྩེ་ལ་བྱ་ཁྱུང་བཙུགས། །གཡག་ལུག་ར་གསུམ་རྟ་དྲེལ་གཟུགས་འགྲོས་དང་། །ཤིང་རིས་མདའ་དར་ཤིང་རྩི་ལུག་མགོ་དང་། །ཕྱེ་མར་འོ་ཞོ་མར་མེ་ཟས་ཕུད་བཤམས། །བསྡུས་པ་འདི་ཙམ་ཞིག་གིས་ཆོག་པ་ཡིན། །རྒྱས་པར་བཤམས་པ་རྟེན་རྫ་ས་གཞུང་ལྟར་བྱ། །དེ་ནས་རང་ཉིད་འདི་ལྟར་གྱེར་བསྒོམ་བྱ། །རང་ཉིད་ཐུགས་རྗེ་ཆེན་པོར་གསལ་བའི་མདུན། །བླ་རྟེན་མི་དམིགས་སྟོང་པའི་ངང་ཉིད་
ལས། །བྷྲཱུཾ་ལས་རིན་ཆེན་ལས་གྲུབ་གཞལ་ཡས་ཁང་། །ཤིན་ཏུ་མཚན་ཉིད་ཐམས་ཅད་ཡོངས་སུ་རྫོགས། །དེ་དབུས་པདྨ་འདབ་མ་སྟོང་ལྡན་དབུས། །སྲོང་བཙན་སྒམ་པོ་རྒྱལ་རབས་བཙུན་མོར་བཅས། །གཡས་གཡོན་སྲིད་པའི་ཕ་མཚུན་ཐམས་ཅད་དང་། །མདུན་དུ་རིག་འཛིན་བདག་ཅག་གདུང་རབས་ཀྱི། །སྲིད་པ་ཆགས་ནས་ད་ལྟ་ཡན་ཆད་ཀྱི། །ཕ་མཚུན་དགྲ་ལྷ་མཆེད་སྡེ་མ་མཚུན་སོགས། །རྒྱན་དང་ཆ་ལུགས་མདངས་དང་གཟི་བརྗིད་ལྡན། །སྟེང་དུ་ཀུན་བཟང་ཆོས་སྐུ་ཡུམ་ཆེན་དང་། །པད་འབྱུང་མར་པ་རྩ་བརྒྱུད་བླ་མ་དང་། །ཕྱི་རོལ་
གདུང་རིགས་དགྲ་བླ་ཝེར་མ་དང་། །མགོན་སྐྱབས་ཕན་འདོགས་ནུས་པའི་སྲུང་མས་བསྐོར། །ཀུན་གྱི་གནས་གསུམ་འབྲུ་གསུམ་འོད་ཟེར་གྱིས། །རང་བཞིན་གནས་ནས་འཁོར་བཅས་སྤྱན་དྲངས་གྱུར། །ཧཱུྃ། པདྨ་འབྱུང་གནས་ལ་སོགས་པའི། །རྒྱ་གར་གྲུབ་ཆེན་མཚུན་རྣམས་དང་། །བོད་ཡུལ་མར་པ་ལོ་ཙཱ་དང་། །སྲོང་བཙན་སྒམ་པོ་ལ་སོགས་པའི། །བོད་ཡུལ་རིག་འཛིན་མཚུན་རྣམས་དང་། །རྒྱལ་བུ་མཐིང་གེ་ལ་སོགས་པའི། །མིའུ་གདུང་དྲུག་མཚུན་རྣམས་ཀུན། །སྤྱན་འདྲེན་གནས་འདིར་གཤེགས་སུ་གསོལ། །གཞན་ཡང་རྣལ་འབྱོར་བདག་གི་མཚུན། །ཕ་མཚུན་མེས་མཚུན་མཆེད་ཟླའི་མཚུན། །མ་སྲིང་བུ་མོའི་མཚུན་རིགས་རྣམས། །སྤྱན་འདྲེན་གནས་འདིར་གཤེགས་སུ་གསོལ་།ཁྱད་པར་མཆེད་ཟླ་རིག་འཛིན་མཚུན། །བསྲུང་བའི་ཚུལ་དུ་གནས་པ་དང་། །མགོན་སྐྱབས་ཕན་འདོགས་ནུས་པ་དང་། །གདུང་བའི་ཡིད་ཀྱིས་འཁོར་བ་རྣམས། །མཆོད་ཕྱིར་བསྟོད་ཕྱིར་སྤྱན་འདྲེན་ནོ། །འདིར་བཤམས་རིན་ཆེན་འབར་བ་དང་། །ཟ་འོག་བརྩེགས་པའི་ཁྲི་སྟེང་དུ། །དགྱེས་པའི་ཚུལ་གྱིས་བཞུགས་སུ་གསོལ། །པདྨ་ཀ་མ་
ལ་ཡེ་ཧཱུྃ། དེ་ནས་སྒབ་འདྲེ་བསྐུད་ཐབས་ནི། ཧཱུྃ། མཚུན་རིགས་དགྲ་བླའི་རྗེས་སུ་འབྲང་བ་ཡི། །ཡེ་ངམ་ནག་པོ་དྲིལ་ནག་སྤུང་སྐུ་ཅན། །དམ་སྲི་བསེ་རག་ལྟོགས་འགོང་དབུལ་སྲི་དང་། །མཚུན་མིན་མཚུན་དུ་བརྫུ་བའི་བསེ་རག་རྣམས། །རབ་འཇིགས་ཁྲོ་རྒྱལ་འབར་བའི་བཀའ་བྱུང་གིས། །གནས་འདིར་མ་ཉེ་མ་འཁོར་གཞན་དུ་དེངས། །གལ་ཏེ་མི་འགྲོ་བཀའ་ལས་འདའ་བྱེད་ན། །ཡེ་ཤེས་ཅན་གྱི་རྡོ་རྗེའི་མཚོན་ཆ་ཡིས། །མགོ་བོ་ཚལ་པ་བརྒྱ་རུ་འགས་འགྱུར་ཞིང་། །དེ་བས་གླུད་འདི་ཁྱེར་ལ་མྱུར་བར་དེངས། །སརྦ་བྷུ་ཏ་གཙྪ། དེ་ནས་ཁྲུས་གསོལ་བ་ནི། ཧཱུྃ། སྔོན་ཚེ་རྒྱལ་བུ་དོན་གྲུབ་ལ། །བདུད་རྩི་ཆུ་ཡིས་ཁྲུས་གསོལ་ལྟར། །མི་གཙང་དྲི་མ་དག་གྱུར་ཅིག །བཀྲག་མདངས་གཟི་བརྗིད་རྒྱས་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། དེ་ནས་མཆོད་པ་འབུལ་བ་ནི། རཾ་ཡཾ་ཁཾ། ཨ་ལས་པད་སྣོད་ཡིད་འོང་སྣོད་ནང་དུ། །དཀར་གསུམ་མངར་གསུམ་ཇ་ཆང་གསེར་སྐྱེམས་ཕུད། །འབྲུ་སྣ་སྨན་སྣ་ཟས་སྣ་འདོད་ཡོན་དང་། །ནོར་བུ་ཆ་བདུན་དར་ཟབ་གོ་མཚོན་སོགས། །མཁོ་དགུ་ལོངས་
སྤྱོད་ཟད་མེད་རིན་ཆེན་གཏེར། །ཕ་མཚུན་འཁོར་བཅས་དགྱེས་པའི་མཆོད་སྤྲིན་གྱུར། །ཨོཾ་ཨཱཿཧཱུྃ། ལན་གསུམ་སྔགས་དང་ཕྱག་རྒྱ་དྲུག་གིས་བྱིན་བརླབས་ལ། ཧཱུྃ། རིག་འཛིན་རྣལ་འབྱོར་བདག་ཅག་གིས། །སྲིད་པ་ཆགས་ནས་ད་ལྟའི་བར། །ཕ་མེས་མ་མཚུན་མཆེད་སྡེའི་མཚུན། །ཁྱེད་རྣམས་མཆོད་པའི་ཡོ་བྱད་ནི། །བཀྲ་ཤིས་རྟགས་བརྒྱད་རིན་ཆེན་བདུན། །ཉེར་སྤྱོད་བདུན་དང་འདོད་ཡོན་ལྔ། །རིན་ཆེན་གསེར་དངུལ་ཤེལ་གཡུ་དང་། །གོ་མཚོན་དར་ཟབ་འབྲུ་སྣ་དང་། །ཕྱེ་མར་ཇ་ཆང་འོ་ཞོའི་ཕུད། །དཀར་གསུམ་མངར་གསུམ་ཟས་སྣ་དང་། །སྤྱན་གཟིགས་ལོངས་སྤྱོད་སྣ་ཚོགས་འདིས། །ཡེ་ཤེས་ལྷ་ཡི་མཚུན་རྣམས་མཆོད། །དགྲ་བླ་ཝེར་མ་ཐམས་ཅད་དང་། །ཕ་མེས་མཚུན་རིགས་ཐམས་ཅད་མཆོད། །མཆེད་ཟླའི་མཚུན་རིགས་ཐམས་ཅད་མཆོད། །འཇིག་རྟེན་མཚུན་རིགས་ཐམས་ཅད་མཆོད། །མགོན་སྐྱབས་བྱེད་པ་ཐམས་ཅད་མཆོད། །འཁོར་བཅས་མཉེས་ཤིང་ཚིམས་གྱུར་ཅིག །རིན་ཆེན་མང་དང་གཟུགས་མཛེས་དང་། །འབྱམས་ཀླས་འཇིགས་ཀུན་བྲལ་བ་ཡི། །དེ་བཞིན་གཤེགས་ལ་ཕྱག་འཚལ་ལོ། །དཀོན་མཆོག་
གསུམ་གྱི་བདེན་པ་དང་། །ཆོས་ཉིད་རྣམ་པར་དག་པ་དང་། །རྟེན་འབྲེལ་བསླུ་བ་མེད་པའི་མཐུས། །བསྔོས་པ་བཞིན་དུ་ཐོབ་པར་ཤོག །ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་ཨཱཕ་མེས་མཆེད་ཟླའི་མཚུན་ཐམས་ཅད་ཧཱུྃ་སྭཱ་ཧཱ། པཉྩ་ཨ་མྲྀ་ཏ་ཨི་དཾ་བ་ལིཾ་ཏ་ཁཱ་ཧི། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། ལན་གསུམ་མམ་བདུན་བརྗོད། ཧཱུྃ། མཚུན་བཤོས་རི་རབ་གྲུ་བཞི་སུམ་བརྩེགས་སྟེང་། །དཔལ་གཏོར་གྲུ་བཞི་རྩི་བཅུད་མར་གྱིས་བརྒྱན། །རྩེ་མོ་ནོར་བུ་མདུན་དུ་ཉི་ཟླས་བརྒྱན། །སེང་གེ་བྱ་ཁྱུང་གཡུ་འབྲུག་རྒྱན་དང་ལྡན། །འབྲང་རྒྱས་ཞལ་དཀར་སྨན་ཏིང་བརྩེགས་མ་དང་། །དཔལ་བཤོས་ཟུར་གསུམ་གཡག་ལུག་ར་གསུམ་དང་། །མཚུན་ཤིང་སུར་དཀར་མཚུན་ལུག་རྟེན་རྫ་ས་དང་། །དངོས་སུ་འབྱོར་དང་ཡིད་ལས་སྤྲུལ་པ་ཡིས། །ལོངས་སྤྱོད་མི་ཟད་རིན་ཆེན་གཏེར་མཛོད་འདིས། །ཡེ་ཤེས་ལྷ་ཡི་མཚུན་རིགས་ཐམས་ཅད་མཆོད། །ཕོ་ལྷ་དགྲ་ལྷ་ཕ་མེས་མཚུན་རྣམས་མཆོད། །བཙན་ཕྱུག་འཕེན་དར་བྱེད་པའི་ལྷ་རྣམས་མཆོད། །འཇིག་རྟེན་ལྷ་རྣམས་མཆེད་ཟླའི་མཚུན་
རྣམས་མཆོད། །མོ་ལྷ་མོ་སྨན་མོ་བཙུན་ཐམས་ཅད་མཆོད། །ལྕམ་མོའི་མཚུན་དང་ཡུལ་ལྷའི་མཚུན་རྣམས་མཆོད། །གསོལ་ལོ་མཆོད་དོ་བསྟོད་དོ་མངའ་གསོལ་ལོ། །ཕ་མཚུན་དགྲ་བླ་མཆོད་དོ་མཐུ་མ་ཆུང་། །མཆེད་ཟླ་ལྷ་མཚུན་བསྟོད་དོ་སྟོང་གྲོགས་མཛོད། །མ་མཚུན་མོ་སྨན་བསྟོད་དོ་གཟི་མདངས་བསྐྱེད། །ཡུལ་ལྷའི་མཚུན་རིགས་བསྟོད་དོ་དངོས་གྲུབ་སྩོལ། །ཕ་མཚུན་དགྲ་བླ་མཚུན་རིགས་ཐམས་ཅད་ལ། །ཅི་འདོད་ཡིད་བཞིན་འདོད་རྒུའི་ཆར་འབེབས་ཤོག །མཆོད་ཅིང་བསྟོད་ན་ངོ་འཕང་མ་དམའ་ཅིག །དབོན་སྲས་བུ་ཚའི་ཁ་འཛིན་མ་གཡེལ་ཞིག །མགྱོགས་པ་སྔོན་དང་བཙན་པོ་གཉར་མ་གཏོང་། །དགྲ་འོང་བྱ་ཐོང་དུག་འོང་རྩི་སྨན་ཐོང་། །དཔལ་གྱི་ཉི་མ་ཚེ་ཡི་དམུ་ཐག་ཟུངས། །ཕྱག་གཡང་རྟེན་ཕུར་མ་འབུད་དམ་དུ་ཆིངས། །བཙན་ཕྱུག་འཕེན་གསུམ་ཟས་ནོར་ལོངས་སྤྱོད་དང་། །མངའ་ཐང་ཆོས་སྲིད་དགུང་ལྟར་མཐོ་བར་མཛོད། །དེ་སྔ་དབུལ་ཕོངས་རྒུད་ནི་མ་མྱོང་སྟེ། །དེ་སྔ་བས་ཀྱང་ཕྱུག་ཅིང་དར་བར་མཛོད། །དེ་སྔ་ཕ་སྤུན་ནང་ནས་མ་ཞན་ཏེ། །དེ་སྔ་བས་ཀྱང་ནང་བཟང་ཚང་སྐྱིད་མཛོད། །དེ་སྔ་སྡུག་
ཅིང་བསྔལ་ནི་མ་མྱོང་སྟེ། །དེ་སྔ་བས་ཀྱང་སྐྱིད་ཅིང་དགའ་བར་མཛོད། །མགོ་དཀར་མགོ་ནག་རྩིས་གྲངས་མ་བྱེད་པར། །རྒས་པའི་ཚེ་བསྲིང་གཞོན་པའི་ཟི་དཔལ་བསྐྱེད་ཅིག །ཀྱཻ། དགུང་སྔོན་ས་གཞི་བར་སྣང་གཞལ་ཡས་ནས། །ལྷ་ཀླུ་གཉན་རྣམས་དངོས་གྲུབ་གཡང་གི་བདག །ཕྱག་ན་བུམ་པ་དར་དཀར་ཡུག་གིས་བརྒྱན། །ཕྱོགས་བཅུ་ཀུན་གྱི་ཟས་ནོར་གཡང་དུ་ལེན། །རྒྱ་གར་རྒྱ་ནག་སྟག་གཟིག་གེ་སར་དང་། །ཇིང་གེར་ཧོར་དང་སྐུ་རྒྱལ་བོད་རྣམས་ཀྱིས། །རང་རང་མངའ་བའི་རྩལ་གཡང་ནོར་གཡང་རྣམས། །དེ་རིང་ཁུ་ཡེ་ཕྱྭ་དང་གཡང་དུ་ལེན། །སྤུང་སྤུང་སྤུངས་ལ་བྱོན་པས་བརྟན་ཕུར་ཚུགས། །ཕ་མེས་མཚུན་རིགས་རྣམས་ཀྱི་སྤྱན་སྔ་རུ། །འབག་བཙོག་འགལ་འཁྲུལ་གང་མཆིས་མཐོལ་ལོ་བཤགས། །ཕ་མེས་མཚུན་རྣམས་སྦྲ་ཁྱིམ་རྟེན་ལ་ཐིམ། །བདག་དང་ཡོན་བདག་མི་ནོར་འཁོར་བཅས་ལ། །བདེ་སྐྱིད་ཕུན་སུམ་ཚོགས་པའི་བཀྲ་ཤིས་ཤོག །ཅེས་མཚུན་བཅོས་ཀུན་གྱི་དོན་བསྡུས་ནས། རང་གི་ལག་ཏུ་ལེན་བདེ་ཕྱིར་རཱ་ག་ཨ་སྱས་བྲིས་པ་དགེ་ལེགས་སུ་གྱུར་ཅིག །སརྦ་མངྒ་ལཾ།། །།