ཕ་མཚུན་དགྲ་བླ་གཉན་པོའི་བསང་མཆོད་མགོན་སྐྱབས་ཆེན་མོ།
ཕ་མཚུན་དགྲ་བླ་གཉན་པོའི་བསང་མཆོད་མགོན་སྐྱབས་ཆེན་མོ་ཞེས་བྱ་བ་བཞུགས་སོ། །
སློབ་དཔོན་པདྨ་ལ་ཕྱག་འཚལ་ལོ། །ཕ་མཚུན་དགྲ་བླའི་བསང་མཆོད་ནི། །བསང་མཆོད་རྫས་རྣམས་གཞུང་ལྟར་བྱ། །དབྱངས་སྙན་རོལ་མོས་འདི་སྐད་དོ།། ཀྱཻ། སྔོན་གྱི་བསྐལ་པ་དང་པོ་ལ། །ཡེ་མེད་སྟོང་པའི་ངང་ཉིད་ལས། །འབྱུང་བ་རྣམ་ལྔ་རིམ་བཞིན་ཆགས། །དབང་ཆེན་གསེར་གྱི་ས་གཞི་ལས། །གླིང་ཆེན་བཞི་དང་གླིང་ཕྲན་བརྒྱད། །ཐ་མ་ལྕགས་རི་མུ་ཁྱུད་བསྐོར། །རང་སྣང་དེ་ལ་འགྲོ་དྲུག་སྲིད། །གླིང་བཞི་མཆོག་གི་འཛམ་གླིང་འདིར། །ལུབ་ལེགས་གཡུ་ཡི་དགུང་སྔོན་འོག །བཏིང་ལེགས་གསེར་གྱི་ས་གཞིའི་སྟེང་། །འཇིག་རྟེན་མྱེས་པོ་ཚངས་པ་དང་། །
བདེ་བྱེད་འཕྲུལ་གཉིས་སྤྲུལ་པ་ལས། །སྲས་བུ་རྒྱལ་རབས་མཆེད་བཞི་དང་། །སྲིད་པའི་མིའུ་གདུང་དྲུག་བྱུང་། །གདུང་དྲུག་འཕེན་ཞིང་རགས་པ་དང་། །བོད་འབངས་རྒྱ་ཆེ་གྲངས་མང་ཡང་། །བདག་དང་རྒྱུ་སྦྱོར་ཡོན་བདག་གི །བཀྲ་ཤིས་ལྷ་གཞི་དཀར་པོའི་སྟེང་། །འབྲུ་ཡི་མེ་ཏོག་གཅལ་དུ་བཀྲམ། །ཞལ་ཟས་མཆོད་པ་རི་ལྟར་སྤུངས། །བདུད་རྩིའི་ཇ་ཆང་མཚོ་ལྟར་བསྐྱིལ། །འདོད་ཡོན་རྣམ་ལྔ་ཆར་ལྟར་འབེབས། །ཀྱཻ། གདོད་ནས་སྐུ་གསུམ་ཞིང་ཁམས་ནས། །ཀུན་བཟང་འཇམ་དཔལ་པདྨ་འབྱུང་། །མེས་དབོན་རྣམ་གསུམ་
ལ་སོགས་ཀྱི། །ཕ་མཚུན་ཐུགས་རྗེ་མངའ་བ་རྣམས། །གཤེགས་བཞུགས་མཚན་མ་མི་མངའ་ཡང་། །ཐུགས་དམ་དབང་གིས་གནས་འདིར་གཤེགས། །ཡེ་སྨོན་ཡབ་ལྷ་བདལ་དྲུག་དང་། །ཕྱ་བསང་གང་ཆུང་ཕྱ་གཡང་དཀར། །རྒྱལ་བུ་མཐིང་གེ་སྟག་ཆས་སོགས། །སྲིད་པའི་ཕ་མཚུན་དགྲ་བླ་རྣམས། །འཛམ་གླིང་མཐའ་དབུས་གར་བཞུགས་ཀྱང་། །སྐད་ཅིག་ཡུད་ཙམ་འདིར་བྱོན་ཅིག །ཁྱད་པར་བདག་ཅག་ཡོན་མཆོད་ཀྱི། །ཕ་མཚུན་མ་མཚུན་དགྲ་བླ་རྣམས། །རང་རང་གར་བཞུགས་གནས་མཆོག་ནས། །མཆོད་པའི་གནས་འདིར་གཤེགས་སུ་གསོལ། །བདག་དང་ཡོན་བདག་བསྲུང་ཕྱིར་དུ། །ལྷ་གཞི་གོང་དུ་བཞུགས་སུ་གསོལ། །བདུད་རྩི་ཆུ་ཡིས་སྐུ་ཁྲུས་གསོལ། །མི་གཙང་ཉམས་གྲིབ་དག་གྱུར་ཅིག །ཀྱཻ། སངས་རྒྱས་ཀུན་གྱི་སྤྱི་སྐྱེས་ལྷ། །ཆོས་སྐུ་ཀུན་བཟང་ཡབ་ཡུམ་ལ། །གཡུ་ཤུག་ཕྱེ་མར་དུད་པས་བསང་། །རབ་འབྱམས་ཞིང་གི་སྤྱི་མྱེས་ལྷ། །སྤྱན་རས་གཟིགས་དབང་གངས་ཆེན་མཚོ། །གཡུ་ཤུག་ཕྱེ་མར་དུད་པས་བསང་། །འཕགས་པ་བཞི་པོ་སྐྱེད་པའི་ཡུམ། །ཆོས་སྐུ་ཡུམ་ཆེན་ཤེར་ཕྱིན་ལ། །གཡུ་
ཤུག་ཕྱེ་མར་དུད་པས་བསང་། །རྒྱལ་བའི་ཡབ་གཅིག་འཇམ་དཔལ་དབྱངས། །རྡོ་རྗེ་ཕག་མོ་བདེ་གཤེགས་ཡུམ། །གཡུ་ཤུག་ཕྱེ་མར་དུད་པས་བསང་། བཀའ་བརྒྱུད་ཕ་རྒན་མར་པ་རྗེ། །བཀའ་གདམས་ཕ་རྒན་འབྲོམ་སྟོན་ལ། །གཡུ་ཤུག་ཕྱེ་མར་དུད་པས་བསང་། །བོད་ཀྱི་ཕ་གཅིག་པདྨ་འབྱུང་། །རིག་འཛིན་གདུང་བརྒྱུད་ཕ་མཚུན་ལ། །གཡུ་ཤུག་ཕྱེ་མར་དུད་པས་བསང་། །མཁའ་སྤྱོད་ནམ་མཁའ་རྒྱལ་མཚན་སོགས། །གྲུབ་ཐོབ་ཕ་མཚུན་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །ཆོས་རྒྱལ་མེས་དབོན་རྣམ་གསུམ་སོགས། །རྒྱལ་བློན་སེམས་དཔའ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །འཇིག་རྟེན་ཀུན་གྱི་སྐྱེས་པོ་སྟེ། །ལྷ་ཆེན་དབང་ཕྱུག་ཆེན་པོ་ལ། །གཡུ་ཤུག་ཕྱེ་མར་དུད་པས་བསང་། །སྟོང་གསུམ་འཇིག་རྟེན་མྱེས་པོ་སྟེ། །ལྷ་ཆེན་ཚངས་པ་གདོང་བཞི་ལ། །གཡུ་ཤུག་ཕྱེ་མར་དུད་པས་བསང་། །འཁོར་ལོས་སྒྱུར་རྒྱལ་སྡེ་ལྔ་སོགས། །རྒྱ་གར་ཡུལ་གྱི་མཚུན་རྣམས་ལ། །གཡུ་ཤུག་ཕྱེ་མར་དུད་པས་བསང་། །ཀོང་ཙེ་འཕྲུལ་རྒྱལ་རྩིའུ་སོགས། །རྒྱ་ནག་ཡུལ་གྱི་མཚུན་
རྣམས་ལ། །གཡུ་ཤུག་ཕྱེ་མར་དུད་པས་བསང་། །སྤྲེའུ་བྲག་སྲིན་མོ་ལ་སོགས། །བོད་ཀྱི་ཕ་མཚུན་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །དུང་གི་ལྷ་དཀར་ལ་སོགས་པའི། །ལྷ་རིགས་ཕ་མཚུན་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །སྲིད་པའི་སྨོན་མི་ལུམ་ལུམ་དང་། །ཕྱྭ་དམུ་བཙུགས་གསུམ་མཚུན་རྣམས་ལ། །གཡུ་ཤུག་ཕྱེ་མར་དུད་པས་བསང་། །དམུ་སྲས་འཕྲུལ་བུ་དབང་ལྡན་དང་། །རྒྱལ་བལ་ལི་དང་ཁྲོམ་གྱི་མཚུན། །གཡུ་ཤུག་ཕྱེ་མར་དུད་པས་བསང་། །ཕྱུའུ་སྤྱི་གཙུག་རྒྱལ་པོ་དང་། །ཕྱུ་རབ་སྟག་ཆས་བལ་བུ་ལ། །གཡུ་ཤུག་ཕྱེ་མར་དུད་པས་བསང་། །ཡབ་ལྷ་བདལ་དྲུག་ཁྲི་རྗེ་འབར། །འོད་དེ་གུང་རྒྱལ་མཆེད་བཞི་ལ། །གཡུ་ཤུག་ཕྱེ་མར་དུད་པས་བསང་། །ལྷ་ཚ་ཐུགས་ཀར་བུ་དགུ་དང་། །སྲིན་ཚ་ཐུགས་དམར་བུ་དགུ་ལ། །གཡུ་ཤུག་ཕྱེ་མར་དུད་པས་བསང་། །ཕྱ་རྗེ་ཡབ་ལྷ་བདལ་དྲུག་གི །སྲས་བུ་སུམ་ཅུ་སོ་ལྔ་ལ། །གཡུ་ཤུག་ཕྱེ་མར་དུད་པས་བསང་། །མི་སྡུག་ཤ་མཚན་བཅོ་བརྒྱད་ཅན། ཁྲི་ཆེན་དཔལ་ལྷ་ཞེས་བྱ་ལ། །གཡུ་ཤུག་ཕྱེ་མར་དུད་པས་བསང་། །སྲིད་པའི་སྣེལ་
ཕྲོམ་ལེགས་བཀྲ་དང་། །སྲིད་པ་ཕྱ་ལྕམ་རྒྱལ་མོ་ལ། །གཡུ་ཤུག་ཕྱེ་མར་དུད་པས་བསང་། །རྒྱལ་བུ་མཐིང་གེ་འཛོམ་ལ་རྒན། །ཁྲི་ལ་ཞིང་དང་བཙན་ལ་འཕེན། །ཕ་མྱེ་ཧྲི་ཐོ་ཆེན་པོ་དང་། །མིའུ་གདུང་དྲུག་ཕ་མཚུན་ལ། །གཡུ་ཤུག་ཕྱེ་མར་དུད་པས་བསང་། །ཕ་སྤུན་ནག་པོ་རྒྱ་ཡི་མཚུན། །ཁྱིམ་མཚེས་ཝེར་མ་མོན་གྱི་མཚུན། །གཉེན་ཡ་ཆུ་ཁྲི་འཇང་གི་མཚུན། །འཐབ་ཡ་ཨ་བ་ཧོར་གྱི་མཚུན། །རྒྱ་གར་ཆོས་ཀྱི་རྒྱལ་པོའི་མཚུན། །སྟག་གཟིག་ནོར་གྱི་རྒྱལ་པོའི་མཚུན། །རྒྱ་ནག་ཁྲིམས་ཀྱི་རྒྱལ་པོའི་མཚུན། །གེ་སར་དམག་གི་རྒྱལ་པོའི་མཚུན། །སྤུ་རྒྱལ་བོད་ཀྱི་རྒྱལ་པོའི་མཚུན། །འཛམ་གླིང་མི་ཡི་མཚན་མགོན་རྣམས། །གཡུ་ཤུག་ཕྱེ་མར་དུད་པས་བསང་། །ཀྱཻ། དཀར་པོ་གདོང་དང་ནག་པོ་གདོང་། །སྨུག་པོ་གདོང་དང་ཁྲ་བོ་གདོང་། །རྡོ་རྗེ་རྒྱལ་མཚན་ལྷ་རྒོད་དང་། །གླིང་རྗེ་གེ་སར་སྦ་ཚ་དགའ། །མ་སང་ཨ་སྟག་ཀླུ་མོ་ཀྱིསོགས། །གདོང་རིགས་སྲིད་པའི་ཕ་མཚུན་ལ། །གཡུ་ཤུག་ཕྱེ་མར་དུད་པས་བསང་། །དབྲ་དཀར་དབྲ་ནག་སྦྲ་དབྲ་དང་། །ཆེ་དྲུག་ཕྱུག་དྲུག་བཙུན་དྲུག་དང་། །མར་པ་
ལྷ་རྒད་རྩོམ་སྤྱིར་དང་། །ཞང་དཀར་ཉི་མ་རྒྱལ་མཚན་དང་། །དབྲ་རིགས་ཕ་མཚུན་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །ལྷ་དབང་ཐོད་དཀར་ཕྱུ་བཟའ་ཡུམ། །གནམ་ཐིག་དཀར་དང་ས་ཐིག་ཁྲ། །འབྲུ་རྗེ་རྭ་ཅན་བཅོ་བརྒྱད་དང་། །བྷི་ཇིར་རྒྱལ་པོ་ཀུ་མ་དང་། །བྷ་མོང་བྷེ་ཙ་བྷི་རྒྱལ་དང་། །གནམ་བྷེ་དཀར་པོ་ས་བྷེ་གྲོ། །འབྲོམ་དྭགས་འཇམ་དབྱངས་བདུན་རྒྱུད་སོགས། །འབྲུ་རིགས་སྲིད་པའི་མཚུན་རྒན་ལ། །གཡུ་ཤུག་ཕྱེ་མར་དུད་པས་བསང་། །དམུ་ཚ་སྒ་ཡི་བུ་དགུ་སོགས། །སྒྲ་རིགས་ཕ་མཚུན་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །དབལ་ཟླ་གཉིས་ཀྱི་ཕ་མཚུན་དང་། །ཁྱད་པར་བདག་ཅག་ཡོན་མཆོད་ཀྱི། །ཕྱིས་ཡང་མྱེས་ལ་ཕྱི་ཡི་མཚུན། །ཕ་ཁུ་མྱེས་པོ་ཡང་མྱེའི་མཚུན། །བུ་མོ་མག་པ་ཞང་པོའི་མཚུན། །ཐམས་ཅད་མ་ལུས་འཁོར་དང་བཅས། །གཡུ་ཤུག་ཕྱེ་མར་དུད་པས་བསང་། །ཀྱཻ། མགོན་པོ་ལེགས་ལྡན་ནག་པོ་སོགས། །ཆོས་ཀྱི་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །རྣམ་ཐོས་སྲས་དང་རེ་མན། །བོད་ཀྱི་དགྲ་བླ་ཐམས་ཅད་ལ། །
གཡུ་ཤུག་ཕྱེ་མར་དུད་པས་བསང་། །རྡོ་རྗེ་ལེགས་པ་ལ་སོགས་པའི། །སྐྱེ་བོའི་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །རྒྱལ་ཆེན་བེ་ཧར་ལ་སོགས། །སེར་ཆགས་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །གནམ་ཐེའུ་དཀར་པོ་ལ་སོགས་པའི། །འབྲུ་དང་ཧོར་སོགས་དགྲ་བླ་ལ། །གཡུ་ཤུག་ཕྱེ་མར་དུད་པས་བསང་། །གཡུ་འབྲུག་ཟངས་ཀྱི་ཟེ་བ་ཅན། །གདོང་རིགས་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །བྱ་ཁྲ་གནམ་ལྕགས་མཆུ་སྡེ་ཅན། །དབྲ་ཡི་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །དུང་གཡག་དབལ་གྱི་རྭ་ཅོ་ཅན། །འབྲུ་ཡི་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །གསེར་སྟག་མཚལ་གྱི་རི་མོ་ཅན། །ས་རིགས་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །ཤེལ་གྱི་ར་སྐྱེས་ཁམ་པ་དང་། །དུང་གི་ཁྱི་མོ་དཀར་མོ་སོགས། །དབལ་ཟླ་གཉིས་ཀྱི་དགྲ་བླ་ལ། །གཡུ་ཤུག་ཕྱེ་མར་དུད་པས་བསང་། །འདོད་ཁམས་དགྲ་བླ་བེར་ཆེན་དང་། །འདོད་ལྷའི་དུང་ཁྲབ་གནམ་
ཁེབས་དང་། །ས་གཞི་གསེར་སྦལ་གཡུ་ཐིག་ཅན། །ཆུ་དཀྱིལ་ཀླུ་ཡི་རྒྱལ་པོ་དང་། །རླུང་དཀྱིལ་ལྷ་ལུག་དཀར་པོ་དང་། །ལྷ་ཀླུ་གཙུག་གསུམ་སྲུང་མ་དང་། །དགྲ་བླ་གྲ་མ་མཆེད་བརྒྱད་དང་། །སྐྱེས་ཟིན་དགྲ་བླ་སྤྱན་གསུམ་དང་། །དགྲ་ཐུབ་དགྲ་བླ་སྤུན་གསུམ་སོགས། །སྲིད་པའི་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསང་། །གདོང་གི་ཐོག་འབྲུག་གློག་རྡེབས་དང་། །དབྲ་ཡི་མཚར་བུ་སྨྲ་ཤེས་དང་། །འབྲུ་ཡི་དུང་གཡག་དཀར་པོ་དང་། །སྒྲ་ཡི་མཚལ་སྟག་གཡུ་རིས་དང་། །སྒོ་ཡི་དུང་མི་དུང་རྟ་དང་། །སྐྱེས་པའི་ཟངས་ཀྱི་འཕར་བ་དང་། །བུ་ཚའི་གཡུ་ཡི་ཁུ་བྱུག་དང་། །བུ་སྲིང་གཡུ་ཡི་ནེ་ཚོ་དང་། །བུད་མེད་རྨ་བྱ་འཇོལ་མཁན་དང་། །ཡུལ་མཁར་དུང་སྦལ་དཀར་པོ་སོགས། །མཚུན་རིགས་དགྲ་བླ་ཐམས་ཅད་ལ། །གཡུ་ཤུག་ཕྱེ་མར་དུད་པས་བསངས། །གོ་ཆའི་ཁྲ་མོ་ར་མགོ་དང་། །མགྱོགས་པའི་བྱ་རྟ་དགུ་བརྩེགས་དང་། །མི་འཐོར་དུང་མི་དུང་རྟ་དང་། ཟིན་གྱི་དགྲ་བླ་སྤུན་བདུན་དང་། །རླུང་ལྷ་དཀར་པོ་རྗེ་རླུང་འཕྱོ། །འོད་ཟེར་མི་རྟ་བཅོ་བརྒྱད་སོགས། །ཡེ་སྲིད་དགྲ་བླ་ཐམས་ཅད་ལ། །གཡུ་
ཤུག་ཕྱེ་མར་དུད་པས་བསང་། །བསང་ངོ་ལྷ་མཚུན་དགྲ་བླ་བསང་། །ཕྱི་མོ་རྒྱུད་ཀྱི་དགྲ་བླ་བསང་། །མ་ཕྱི་རྒྱུད་ཀྱི་བཀྲག་མཚུན་བསང་། །ཕ་མྱེས་རྒྱུད་ཀྱི་མཚུན་མགོན་བསང་། །མ་ཕྱིའི་མཚུན་ལྕམ་དཀར་མོ་བསང་། །དར་མཚུན་ལྡང་ཟླའི་དགྲ་བླ་བསང་། །དང་པོ་སྲིད་པའི་དགྲ་བླ་བསང་། །སྤྲུལ་པའི་དགྲ་བླ་མཆེད་དགུ་བསང་། །ཡེ་སྲིད་དགྲ་བླ་མཆེད་དགུ་བསང་། །ཕྱི་རབས་རྒྱུད་ཀྱི་དགྲ་བླ་བསང་། །མ་སང་སྤྲུལ་པའི་དགྲ་བླ་བསང་། །འཕེན་པར་བྱེད་པའི་དགྲ་བླ་བསང་། །ཕྱུག་པར་བྱེད་པའི་དགྲ་བླ་བསང་། །བཙུན་པར་བྱེད་པའི་དགྲ་བླ་བསང་། །བཙན་པར་བྱེད་པའི་དགྲ་བླ་བསང་། །དཔའ་བཏགས་ལོན་པའི་དགྲ་བླ་བསང་། །བུ་གསོ་ཚེ་སྐྱིད་དགྲ་བླ་བསང་། །དཀར་གསུམ་ཕུད་ཀྱིས་དགྲ་བླ་བསང་། །མངར་གསུམ་ཕུད་ཀྱིས་ཕ་མཚུན་བསང་། །ཕྱེ་མར་འོ་བསྐོལ་གསུར་གྱིས་བསང་། །རྩི་ཤིང་དྲི་ཞིམ་དུད་པས་བསང་། །བཟང་དྲུག་སྨན་གྱི་དུད་པས་བསང་། །བདུད་རྩི་ཇ་ཆང་འོ་མས་བསང་། །དར་ཆེན་སྟག་གཟིག་འཕེན་གྱིས་བསང་། །མདའ་དར་མདུང་དར་རྟེན་གྱིས་བསང་། །གཡག་ལུག་
ར་གསུམ་གཟུགས་ཀྱིས་བསང་། །གོས་དར་གོ་མཚོན་ཆས་ཀྱིས་བསང་། །བསང་ངོ་གསོལ་ལོ་མཆོད་པ་འབུལ། །བདག་དང་རྒྱུ་སྦྱོར་ཡོན་བདག་གི །བསང་མཆོད་ཡག་པའི་ཡོན་ཏན་གྱི། །ཕ་མཚུན་དགྲ་བླ་ཁྱེད་རྣམས་ཀྱི། །རྨུགས་པ་སངས་ནས་ཁམས་བདེའོ། །འཐིབ་པ་སངསནས་ཉམས་དགའ་འོ། །བཀྲག་མདངས་གཟི་བརྗིད་མཐུ་ལྡན་ནས། །རྣལ་འབྱོར་བདག་ཅག་འཁོར་བཅས་ལ། །བཟང་ཁ་ཟུངས་ལ་ཡག་དང་སྤྱོད། །བུ་དང་ཚ་བོ་འཚོ་སྐྱོང་མཛོད། །ཕྱུགས་གཡང་ཕོན་ལ་ཁ་འཛིན་མཛོད། །མི་འཕེན་རྟ་ཧྲག་བཙུན་པར་མཛོད། །ཚེ་བསྲིང་དཔལ་བསྐྱེད་རིགས་རྒྱུད་སྤེལ། །ལོངས་སྤྱོད་མངའ་ཐང་རྒྱས་པར་མཛོད། །ཉིན་གསུམ་རྒྱངསནས་བྱ་ར་མཛོད། །མཚན་གསུམ་དྲུང་ནས་མེལ་ཚེ་མཛོད། །འཇིགས་པའི་ལམ་དུ་སྐྱེལ་མ་མཛོད། །འཐབ་པའི་ཚེ་ན་དཔུང་རོགས་མཛོད། །བརྒྱ་ཡི་ནང་གི་གྲྭ་པ་མཛོད། །སྟོང་གི་ནང་གི་ཞུར་པོ་མཛོད། །རྒྱབ་ཀྱི་རྟེན་ས་མཛད་དུ་གསོལ། །མདུན་གྱི་འཁར་བ་མཛད་དུ་གསོལ། །རྒས་པ་རྣམས་ཀྱི་ཚེ་སྲིངས་ལ། །གཞོན་པ་རྣམས་ཀྱི་དཔལ་སྐྱེད་ཅིང་། །བདེ་སྐྱིད་ཕུན་སུམ་ཚོགས་པར་
མཛོད། །ཅི་བསམ་དོན་རྣམས་འགྲུབ་པར་མཛོད། །ཅེས་སློབ་དཔོན་པདྨས་མཛད་པའི་མཚུན་བཅོས་ཆེན་མོ་དང་། རྒྱུད་གཞུང་བསྟན་ཆོས་མང་པོ་ནས་ཁོལ་བུར་ཕྱུངས་ཤིང་ལེགས་པར་བསྒྲིགས་པ་འདི་ནི་མི་རྒྱུད་ཕྲ་བ་ལ་བྱས་ན་སྲིད་འཕེལ། སྔ་དར་ཆེ་བ་ལ་ཕྱིས་རྒུད་སོང་བ་ལ་བྱས་ན་མཆོག་ཡིན། གཡང་དང་དཀོར་བདག་གཞན་དུ་སོང་བ་ལ་བྱས་ན་ཕན། རྨི་ལམ་ཚེ་འདས་རྨིས་ནས་གནོད་པ་ལ་ཕན། ཕ་ཁུ་བཙན་སོགས་ལྷ་འདྲེ་ལ་སྐྱེས་ན་མཆོད་ཐབས་འདི་ཡིན། ཕ་མེས་བཟང་པོའི་རྗེས་ཤུལ་རྒུད་པ་ལ་མཆོག་ཏུ་ཕན། དེ་ཕྱིར་མཁོ་དགོས་མང་བར་སྣང་བས་རང་གཞན་ཀུན་ནས་ཕན་ཕྱིར་དུ། རཱ་ག་ཨ་སྱས་བསྒྲིགས་པ་ལ་ཉེས་ལྟུང་བྱུང་ན་ཡི་དམ་ལྷ་ལ་བཤགས༔ དགེ་བས་འགྲོ་ཀུན་བདེ་སྐྱིད་ཕུན་སུམ་ཚོགས་པར་ཤོག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།