ཐབ་ལྷ་མཆོད་ཐབས།
ཐབ་ལྷ་བཞུགས་སོ། །ཧཱུྃ། ང་ནི་ཛཾ་བྷ་ལ་ཡི་སྐུ། །མ་ཐབ་ལྷའི་རྒྱལ་མོ་ཚུར་ཉོན་དང་། །ཁྱོད་སྐུ་མདོག་དཀར་ལ་འོད་ཟེར་འཕྲོ། །ཕྱག་ན་ཡིད་བཞིན་ནོར་བུ་བསྣམས། །དགོས་འདོད་ཡིད་བཞིན་ཆར་ལྟར་འབེབས། །མ་ཁྱེད་ཀྱང་འདིར་གཤེགས་གདན་ལ་བཞུགས། །ཁྱེད་ཀྱི་འཁོར་དང་བཀའ་འཁོར་ནི། །ཤར་ཕྱོགས་ཐབ་ལྷ་དཀར་མོ་ནི། །སྐུ་མདོག་དཀར་ལ་འོད་ཟེར་འཕྲོ། །ཕྱག་གཡས་འབྲས་གཡང་ཐམས་ཅད་སྡུས། །གཡོན་ན་དངུལ་དཀར་དྲིལ་བུ་བརྟེན། །མི་གཡང་སྡུད་པའི་བདག་པོ་སྟེ། །འབྲུ་སྣ་དཀར་གཏོར་ཕྱེ་མར་མཆོད། །འདིར་གཤེགས་བརྒྱན་པའི་མཆོད་པ་བཞེས། །ཐུགས་མཉེས་ནས་བྱང་ཆུབ་མཆོག་ཐོབ་ཤོག །ལྷོ་ཕྱོགས་ཐབ་ལྷ་སེར་པོ་ནི། །སྐུ་མདོག་སེར་ལ་འོད་ཟེར་འཕྲོ། །ཕྱག་ན་སྨན་གྱི་ལྷུང་བཟེད་བསྣམས། །སྡུག་བསྔལ་ནད་ལས་གྲོལ་བར་མཛད། །ཁྱེད་ཀྱང་གནས་འདིར་གཤེགས་སུ་གསོལ། །ནུབ་བྱ༔ ཕྱོགས་ཐབ་ལྷ་དམར་མོ་ནི། །སྐུ་མདོག་དམར་ལ་འོད་ཟེར་འཕྲོ། །ཕྱག་ན་རིན་ཆེན་གཏེར་ཁ་བསྣམས། །ཟས་གཡང་བསྡུས་པའི་བདག་མོ་སྟེ། །གནས་འདིར་བརྩེ་ཕྱིར་
གཤེགས་སུ་གསོལ། །བྱང་ཕྱོགས་ཐབ་ལྷ་ལྗང་གུ་ནི། །སྐུ་མདོག་ལྗང་མོ་འོད་ཟེར་འཕྲོ། །ཕྱག་ན་དངུལ་དཀར་མེ་ལོང་བསྣམས། །མི་གཡང་སྡུད་པའི་བདག་མོ་སྟེ། །གནས་འདིར་སྤྱན་འདྲེན་གཤེགས་སུ་གསོལ། །ཐབ་ཀྱི་ལྷ་ལ་འཁོར་བ་ཡི། །ལྷ་དང་སྲུང་མ་དམ་ཚིག་ཅན། །གནས་འདིར་སྤྱན་འདྲེན་གཤེགས་སུ་གསོལ། །ཕ་ནི་ཐབ་ལྷ་རོག་པོ་ཡིན། །མ་ནི་ཕྱུགས་ལྷ་ཉེ་བུ་ཡིན། །བུ་ནི་ཕྱུགས་ལྷ་གེ་ཐུང་ཡིན། །ཡབ་ཡུམ་སྲས་གསུམ་འཁོར་དང་བཅས། །འདིར་གཤེགས་དཀར་གྱི་རྒྱ་མཚོ་བཞེས། །མི་གཡོ་དགྱེས་ཤིང་བརྟན་པར་བཞུགས། །ཁྱེད་ལ་མཆོད་པ་འབུལ་བ་ནི། །དཀར་གསུམ་མངར་གསུམ་སྤྱན་གཟིགས་དང་། །ཤིང་སྣ་བལ་ཚོན་མདའ་དར་དང་། །གཡང་རྫས་སྣ་དགུ་འདི་བཞེས་ལ། །ཐབ་ཆེན་འདི་ལ་གཡང་རྟེན་བཞུགས། །གཡང་འཁྱིལ་མི་འགྱུར་བརྟན་པར་ཤོག །ཁྱེད་ཀྱི་སྐུ་གསུང་ཐུགས་མཉེས་ནས། །མི་གཡང་ཟས་གཡང་ནོར་གཡང་དང་། །འབྲུ་གཡང་གཏེར་གཡང་ཟས་ཀྱི་བཅུད། །བདུད་རྩི་བཞིན་དུ་འདིར་ཕོབ་ལ། །རྒྱ་མཚོ་བཞིན་ཏུ་འདིར་འཁྱིལ་ལ། །ཆུ་བོ་བཞིན་ཏུ་འདིར་བོབ་ལ། །དངོས་
གྲུབ་མ་ལུས་བསྩལ་དུ་གསོལ། །དེ་རིང་རྒས་པ་རྣམས་ཀྱི་ཚེ་སྲིངས་ལ། །གཞོན་པ་རྣམས་ཀྱི་དཔལ་བསྐྱེད་ཅིག །དེ་རིང་ཁུ་ཡེ་གཡང་དུ་ཁུག །དེ་རིང་ཕྲུ་ཡེ་ཕ་ལྡན་ནོ། །གསེར་གྱི་ཀ་བ་མ་ཡོ་ཅིག །གཡུ་ཡི་གདུང་མ་མ་ཆག་ཅིག །མཐིང་བུ་ལྷོག་ལྷོག་མ་བྱེད་ཅིག །ཕུ་རུ་གཡུ་སྦྲང་མ་ཞད་ཅིག །མདའ་རུ་ཆུ་མ་ཇག་པ་མ་འདེབས་ཤིག །ཁྱེད་རྣམས་འཁོར་དང་བཅས་པ་ལ། །ཡུགས་གྲིབ་བཙོག་གྲིབ་གྲི་བོ་གྲི་མོ་དང་། །མནོལ་གྲིབ་མི་གཙང་ངན་པ་ཐམས་ཅད་ཀྱང་། །ཤེལ་སྒོང་བཞིན་དུ་གསལ་གྱུར་ཅིག །རིན་ཆེན་བསང་གི་སྣུམ་པར་གྱིས། །བསང་ངོ་མཆོད་དོ་ཐབ་ལྷ་བསང་། །ཐབ་སྨན་དེ་ནི་དཀར་མོ་བསང་། །ཁྱིམ་ལྷ་ཕུག་ལྷ་ལྷ་མོ་བསང་། །ཞིང་ལྷནོར་ལྷ་སྦྲ་ལྷ་བསང་། །བྱེས་ལྷ་ལུག་ལྷ་བ་ལྷ་བསང་། །འབུལ་ལོ་བཞེས་སོ་མཉེས་མཆོད་འབུལ། །ཕྱི་མི་སྐྱ་བོ་ནང་མི་སྨུག་པོ་སོགས། །མ་ནོར་མ་འཆུག་ཡིད་བཞིན་བསམ་འཕེལ་ཤོག །སྐུ་ལ་ཡིད་བཞིན་བསམ་འཕེལ་འདོད་དགུ་འབྱུང་། །སྐུ་གསུང་ཐུགས་རྟེན་ཕྲིན་ལས་རྒྱས་གྱུར་ཤོག་།སྔགས་འཆང་རཱ་ག་ཨ་སྱས་བསྒྲིགས། །མངྒ་ལཾ།།